Rí gajkhun ga̱jma̱a̱ numuu dí marigá nda̱wa̱á

Jesús niʼthí xú káʼnii gándoo mbuʼyáá “dí Reino ndrígóo Dios gíʼ mijngii” (Lucas 21:31). Ma̱ngaa niʼthí dí marigá guerra, maʼxma gakhii, marigá ewiʼ ga̱jma̱a̱ nandii dí na̱jkha̱roʼoo, ikhaa kayuuʼ xó ma xtáa rarígá dí mbiʼi xúgi̱ (Lucas 21:10-17).

Náa Biblia ma̱ngaa niʼtáriyaʼ dí xú kaʼnii gákujmaa índo̱ gáʼni “iwáá mbiʼi” ndrígu̱ún Xa̱bu̱ Ñajunʼ bi̱ kúwá náa numbaaʼ, muni xó ma eni eʼwíínʼ xa̱bu̱, xóo muʼthá, muni dí raʼkhí. Atraxnuu dí kiʼtáriyaʼ rígi̱ náa 2 Timoteo 3:1-5.a Lá ragájkhun dí xúʼko̱ ni̱ndxu̱ún xa̱bu̱ ga̱jma̱a̱ xúʼko̱ e̱ni̱ bi̱ kúwi̱i̱n náa mijngii xtáa ráʼ.

Ndiéjunʼ eyoo gáʼthúu̱n rígi̱ rá. Rí nánguá má mba̱yu̱u̱ʼ guanúu dí Reino ndrígóo Dios mariʼkhuu xóo makuwáanʼ ga̱jma̱a̱ maʼni rí makuwáanʼ itháan májánʼ náa tsu̱du̱u̱ Ku̱ba̱ʼ (Lucas 21:36). Náa Biblia, naʼthí rí Dios maʼni rí májánʼ náa tsu̱du̱u̱ Ku̱ba̱ʼ ga̱jma̱a̱ numún bi̱ gakúwi̱i̱n ikhí. Guʼyáá tikhuu xkri̱da.

MBÁA XA̱BU̱ ÑAJUNʼ MÁJÁANʼ

Jesús “nigruigú rí maʼtáñajunʼ, gamajkhu ga̱jma̱a̱ mbá reino, mu xa̱bu̱ xuajin ma̱jkha̱ʼ, xuajin mba̱ʼu̱ ga̱jma̱a̱ mbaʼa ajngáa gúní ñajunʼ ikhaa. Rí maʼtáñajunʼ mani̱ndxu̱u̱ kámuu mbiʼi rí nditháan xámbáa, ga̱jma̱a̱ reino ndrígóo xáguma gámbáa” (DANIEL 7:14).

Ndiéjunʼ eyoo gáʼthúu̱n. Rí ma̱ndoo makuwáanʼ gagi náa xúgiʼ numbaaʼ rí gáʼtañajunʼ bi̱ Dios nigíiʼ ga̱jma̱a̱ A̱ʼdióo xóo Rey.

XÁʼNIULU NANDII

“Nímba̱a̱ xa̱bu̱ xáʼthi: ‹Nandoo kháñuʼ› ” (ISAÍAS 33:24).

Ndiéjunʼ eyoo gáʼthúu̱n. Rí ikhú makruigulú, muʼdxuun, muʼgua o mandoo muʼni i̱ʼwáʼ rí tsíyoo muʼni xúgi̱ ma̱ngaa nánguá maʼniulú nandii. Makuwáanʼlu kámuu mbiʼi.

TSÍMÁÁ KÁMUU MBIʼI

“Ikhaa naʼni gámbáa guerra dí rígá náa xúgíʼ tsu̱du̱u̱ ku̱ba̱ʼ” (SALMO 46:9).

Ndiéjunʼ eyoo gáʼthúu̱n. Marigá rí tsímáá kámuu mbiʼi ga̱jma̱a̱ xúminiiʼ ga̱jma̱a̱ guerra.

NÁA TSU̱DU̱U̱ KU̱BA̱ʼ MAJTÍINʼ XA̱BU̱ MÍJÍI̱N

“Xa̱bu̱ xkawiinʼ ní xákúwá; [...] xa̱bu̱ bi̱ májánʼ a̱jkiu̱ún makuwá náa tsu̱du̱u̱ ku̱ba̱ʼ” (SALMO 37:10, 11).

Ndiéjunʼ eyoo gáʼthúu̱n. Rí nánguá makuwíin xa̱bu̱ ra̱míjínʼ i̱ndó makuwá xa̱bu̱ bi̱ maʼndún munimbu̱ún kuyáá Dios.

XÚGÍʼ KU̱BA̱ʼ MAʼNI̱I̱ MITSAANʼ

“Munila guʼwá, ga̱jma̱a̱ makuwáanʼla ikhí; mudula ixi̱ uva ga̱jma̱a̱ muphula xndúu”. (ISAÍAS 65:21, 22.)

Ndiéjunʼ eyoo gáʼthúu̱n. Rí xúgíʼ numbaaʼ maʼni̱i̱ ixi̱ ri̱ʼi̱ mitsaanʼ. Dios maʼnimbánuu rí ninda̱ʼa̱a̱luʼ: Gambanúu xóo rí nandaaʼ ikháán “náa tsu̱du̱u̱ ku̱ba̱ʼ” (Mateo 6:10).