Rí gáʼni Reino ndrígóo Dios

RÍ NIʼNI MÁ REINO NDRÍGÓO DIOS

Náa artículo rí ninújngoo ndiʼyáá mbá tsinaʼ rí Jesús niʼthí. Nindxu̱u̱ mbá rí nasngájma dí Reino ndrígóo Dios nigi̱ʼi̱ mekhuíí ga̱jma̱a̱ Rey ndrígóo nindxu̱u̱ Jesucristo.

Náa Biblia naʼthí rí timbá rí niʼni Jesús índo̱ nigíʼdu̱u̱ maʼtáñajunʼ rí maxkríguíi Satanás gajmíi̱n xa̱bu̱ wéñiʼ. Ikhiin i̱ndó nuni dí ra̱májánʼ náa tsu̱du̱u̱ Ku̱ba̱ʼ, ikha jngó na̱jkha̱ raʼni itháan xkawiʼ asndu nákha tsiguʼ 1914 (Apocalipsis 12:7, 9).

Maski ajndu náa numbaaʼ narígá itháan dí ra̱májánʼ, Jesús, xóo Rey náa Reino ndrígóo Dios, naʼni mbaʼa rí májánʼ ga̱jma̱a̱ numún xa̱bu̱ numbaaʼ. Ikhaa niʼtáriyaʼ rí miʼtáraʼa náa xúgíʼ numbaaʼ, rígi̱ naʼni dí mbaʼin xa̱bu̱ majmañún numuu Biblia ga̱jma̱a̱ nugíʼ nunimbánii (Isaías 2:2-4). Nijmañún muñajunʼ májánʼ, makuwá májánʼ náa guʼwún ga̱jma̱a̱ awáán gúyáá mbújkha̱a̱. Biblia nambáñun makuwá itháan májánʼ ga̱jma̱a̱ naʼniratiin mu mani̱ndxu̱ún xa̱bu̱ bi̱ nandoo Dios makuwá náa Reino ndrígóo.

RÍ INUU MAʼNI REINO NDRÍGÓO DIOS

Maski ajndu Jesús xtáa má raʼtáñajunʼ mekhuíí, xa̱bu̱ xóó nutañajunʼ náa tsu̱du̱u̱ Ku̱ba̱ʼ. Dios niʼthúu̱n Jesús: “Ayuʼ raratáñajunʼ náa taphu̱ún bi̱ nakiʼníin kuyaaʼ” (Salmo 110:2). Inu má rí Jesús maʼni gámbíin bi̱ nakiʼníin kuyáá ga̱jma̱a̱ maʼni gámbáa xkujndu rí naʼni maxmiéjúnʼ bi̱ nandún munimbu̱u̱n kuyáá Dios.

Ikhú, Reino ndrígóo Dios maʼni rígi̱:

• Maʼnimbáti̱ga̱a̱ religión rí nduwaʼ. Náa Biblia naʼnimbríguii religión rí nduwaʼ ga̱jma̱a̱ a̱ʼgu̱ bi̱ nagujuamínáʼ bi̱ inu maguma gámbáa. Ikha jngó ní xárígá religión dí naʼsngáa rí nduwaʼ ga̱jma̱a̱ numuu Dios ma̱ngaa bi̱ naʼni gíníi xa̱bu̱. Mbaʼin maʼniún tsiánguá índo̱ gáguma gámbáa (Apocalipsis 17:15, 16).

• Maʼni gámbíin Xa̱bu̱ Ñajunʼ. Reino ndrígóo Dios maʼni gámbíin xúgíinʼ Xa̱bu̱ Ñajunʼ (Apocalipsis 19:15, 17, 18).

• Ma’ni gámbíin xa̱bu̱ ra̱míjíinʼ. Ndiéjunʼ gúgiʼnii xa̱bu̱ bi̱ tséniñaʼ runi dí ra̱májánʼ ga̱jma̱a̱ tsíñún gágun kidxuuʼ Reino ndrígóo Dios rá. “Xa̱bu̱ bi̱ nuni dí ra̱májánʼ wéñuʼ mambíin náa tsu̱du̱u̱ ku̱ba̱ʼ” (Proverbios 2:22).

• Muruguaraʼaa Satanás gajmíi̱n xa̱bu̱ wéñiʼ. Satanás gajmíi̱n xa̱bu̱ wéñiʼ ní xúni̱ “nduwiinʼ xa̱bu̱” (Apocalipsis 20:3, 10).

Ndiéjunʼ gúgiʼnii xa̱bu̱ bi̱ maʼndún makuwá náa maʼtáñajunʼ Reino ndrígóo Dios rá.

RÍ MAʼNI REINO NDRÍGÓO DIOS GA̱JMA̱A̱ NUMÚN XA̱BU̱

Jesucristo bi̱ xtáa mekhuíí maʼni itháan ki xóo mbáa Xa̱bu̱ Ñajunʼ. Ma̱ngaa mumbayíí mbá 144,000 reyes bi̱ kaxtaʼwíin náa tsu̱du̱u̱ Ku̱ba̱ʼ (Apocalipsis 5:9, 10; 14:1, 3). Maʼnimbánuu rí nandoo Dios náa tsu̱du̱u̱ Ku̱ba̱ʼ. Ndiéjunʼ gáʼni Reino ndrígóo Dios ga̱jma̱a̱ numún xa̱bu̱ numbaaʼ rá.

• Maʼni gámbáa nandii ga̱jma̱a̱ rí nakháñulú. “Nímba̱a̱ xa̱bu̱ xáʼthi: ‹Nandoo kháñuuʼ›” ga̱jma̱a̱ ‹ní xákháñulú itháan› (Isaías 33:24; Apocalipsis 21:4).

• Ma̱ʼkha̱ kayóo rí tsímáá. “Ejñaʼ makuwíin tsímáá wéñuʼ” ga̱jma̱a̱ “mámbáa xa̱bu̱ magi̱ʼi̱ náa agoo ixu̱u̱ uva ga̱jma̱a̱ náa agoo ixi̱ higo, ga̱jma̱a̱ ní xáxtáa nimbáa bi̱ maʼnimiñun” (Isaías 54:13; Miqueas 4:4).

• Maxnúlú ñajunʼ májánʼ. “Bi̱ ikhúúnʼ niraʼwi̱i̱n makuwá gagi wéñuʼ ga̱jma̱a̱ numuu ñajunʼ ndrígu̱ún. Ni xáʼni néʼngu̱u̱n” (Isaías 65:22, 23).

• Maʼni kaʼwi̱i̱ ku̱ba̱ʼ. “Náa ku̱ba̱ʼ mixooʼ ga̱jma̱a̱ náa mbaaʼ rí nijndooʼ marigá rí gagi, ga̱jma̱a̱ náa xkua̱ rí nijndooʼ marigá rí tsímáá ga̱jma̱a̱ majmi̱di̱ wéñuʼ ri̱ʼi̱ azafrán” (Isaías 35:1).

• Maʼsngúún xa̱bu̱ rí gíʼmaa muni mu makuwá kámuu. “Rígi̱ eyoo gáʼthúu̱n rí makuwá kámuu mbiʼi: Rí muninuwíínʼ ikháán, mbáwíín ikháán bi̱ nindxa̱a̱ʼ Dios gajkhun, ga̱jma̱a̱ muninuwiinʼ Jesucristo bi̱ ikháán nitaxúngua̱a̱nʼ” (Juan 17:3).

Dios nandoo rí maguma tsajkurámáánʼ ga̱jma̱a̱ xúgíʼ rígi̱ (Isaías 48:18). Náa imbo̱o̱ artículo gáʼtháanʼ ndiéjunʼ gándoo gátani mu makhánáʼ.