Xú káʼnii gumbáñuun bi̱ tsíraxnuu májánʼ rá.
1. Ndíjkha rí mingíjyúuʼ muʼsngúún ga̱jma̱a̱ numuu Dios xa̱bu̱ bi̱ tsíraxnuu májánʼ rá.
1 Tikhun xa̱bu̱ bi̱ nuʼtáruʼun nandún majmañún ga̱jma̱a̱ numuu Dios, mu naʼniún mingíjyúuʼ muraxnuu, namiñun kuyáá Biblia ga̱jma̱a̱ i̱ʼwáʼ libro. Ikha jngó, rí muxná libro Enseña xánindxu̱u̱ májánʼ, índo̱ nugíʼdi̱i̱ nuʼsngáá mbáa xa̱bu̱. Xú káʼnii gándoo gumbáñuun xa̱bu̱ mu muʼsngúún ga̱jma̱a̱ numuu Dios rá. Nixtaxu̱u̱n publicadores bi̱ najmañún nutaraʼa bi̱ kuwa náa itháan rí mbá skiñúʼ xuajin mba̱ʼu̱, bi̱ nithi rí ma̱ndoo muʼni rí mbuʼyáá xúgi̱.
2. Xú káʼnii nindxu̱u̱ folleto rí kuaʼdáá mu mumbáñuun xa̱bu̱ bi̱ tsíraxnuu májánʼ rá.
2 Á mu bi̱ narasngáa na̱nguá guxnuu májánʼ, o na̱nguá ejmañuu gaguxnuu, ma̱ndoo matagíʼdi̱i̱ marasngáá ga̱jma̱a̱ folleto Atadxawíín Diúu̱ o Atadxawíín Diúu̱ ga̱jma̱a̱ araxtaa kámuu mbiʼi. Mbáa precursor bi̱ xtáa náa Estados Unidos nasngájmuu mbáa xa̱bu̱ a̱jma̱ folleto ga̱jma̱a̱ naraxu̱u̱ náa rí nandoo maguanúu ga̱jma̱a̱. Náa sucursal ndrígóo Kenia naʼthí rí folleto rígi̱ najmaa wéñuʼ, numuu rí xa̱bu̱ bi̱ kuwa náa África najmañún índo̱ nutún ga̱jma̱a̱ numuu mbá historia raʼkháa rí muniu̱u̱ graxe̱ mu ikhiin muriʼña̱a̱. Mú, mbáa xa̱bu̱ bi̱ niʼnigajmaa̱ mbaʼa escuela xáʼniuu mingíjyúuʼ maguxnuu ga̱jma̱a̱ mariʼña̱a̱ graxe̱ rí gátani, mú mbáa bi̱ táʼga mba̱a̱ escuela, maʼniuu mingíjyúuʼ. Á mu xa̱bu̱ bi̱ narasngáá najmañuu naguxnuu mbá lájuíin, mbaʼin publicadores najmún folleto Ajngáa rí májánʼ na̱ʼkha̱ náa Dios o Mandoo mambaxulúʼ májánʼ gajmiulúʼ Dió, o najmún Libro ndrígóʼ náa na̱ʼkha̱ raʼthí ga̱jma̱a̱ numuu Biblia.
3. Ndiéjunʼ gíʼmaa mbuʼyáá ginii mu muʼsngúún májánʼ xa̱bu̱ bi̱ tsíjmañún muraxnuu rá.
3 Araxná tsiakii. Xa̱bu̱ bi̱ tsíjmañún muraxnuu natiñu̱u̱nʼ ga̱jma̱a̱ kuwa gíná wéñuʼ. Rí mumbáñuun mu xátiñu̱u̱nʼ índo̱ nuʼsngúún nindxu̱u̱ timbá rí ma̱ndoo muʼni mu muʼsngúún rí gajkhun. Mbaʼin xa̱bu̱ bi̱ tsíjmañún guraxnuu wabaʼ edxu̱ún ga̱jma̱a̱ tséjyuuʼ ejmañún. Ikha jngó, atayamajkún xó má gíʼmaa matani náa ikhiin (1 Ped. 3:15). Maʼndún munigajmaa má xúʼko̱ á mu nduyáá rí gíʼdoo numuu tsiakii rí nuni ga̱jma̱a̱ rí majmañún itháan ga̱jma̱a̱ numuu Dios. Ikha jngó arathún má xúʼko̱ dí ra̱ʼkhá tháán májánʼ rí kuwa runi.
Xa̱bu̱ bi̱ tsíjmañún muraxnuu natiñu̱u̱nʼ ga̱jma̱a̱ kuwa gíná wéñuʼ. Rí mumbañúún mu xátiñu̱u̱nʼ índo̱ nuʼsngúún nindxu̱u̱ timbá rí ma̱ndoo muʼni mu muʼsngúún rí gajkhun.
4. Xú káʼnii gándoo gumbañúún xa̱bu̱ bi̱ tsíjmañún guraxnuu májánʼ mu ikhiin munigajmaa nákha xóó tsédxúʼ garasngúún rá.
4 Maski ajndu bi̱ narasngáá naʼniu mingíjyúuʼ maguxnuu, aratháán maʼnigajmaa rí gáta̱ya̱a̱ ga̱jma̱ʼ nda̱wa̱á. Tikhun publicador bi̱ kuwa Sudáfrica nutún xa̱bu̱ bi̱ nusngúún rí mundu̱ʼu̱u̱n mumbañún bi̱ kuñún o bi̱ nambáxu̱u̱n májánʼ gajmiún bi̱ najmañún nuraxnuu májánʼ. Mu muʼni rí xa̱bu̱ bi̱ nuʼsngáá maʼnigajmaa mbáwíi, mbáa publicador bi̱ xtáa náa Gran Bretaña naxná tíʼña libro ndrígóo náa tikhuu párrafo mu mbuyáá dí itháan ra̱mingíjyúuʼ muxkamaa rí maxtiʼña̱a̱ índo̱ naguma subrayar libro. Mbáa ndxájulú bi̱ xtáa náa India nandu̱ʼu̱u̱n rí mbuyáá xtiʼkhu rí tima náa kíxnuu rí mbuyáá imbo̱o̱ xmáná ga̱jma̱a̱ rí magún rundxaʼwa̱a̱ edxu̱ún ga̱jma̱a̱ numuu xtiʼkhu nákha xóó ikhiin tsénigajmaa.
5. Xú káʼnii gándoo gúʼni mu xákiʼnáanʼ índo̱ nuʼsngáá xa̱bu̱ rá.
5 Gaʼngo̱o̱ a̱jkia̱nʼ. Atayáá ndiéjunʼ gíʼdoo itháan numuu náa i̱yi̱i̱ʼ rí xtaa rarasngáa ga̱jma̱a̱ atambáyii bi̱ narasngáá makro̱ʼo̱o̱ májánʼ. Índo̱ gátagíʼdi̱i̱, mbáa májánʼ gáʼni rí xútamíjná itháan rí gu̱wa̱ʼ o gu̱wa̱ʼ nitsu minutos. Xátani rí ma̱ta̱ya̱a̱ mbaʼa wéñuʼ párrafo, i̱ndó atayáá tikhuu párrafo ndrígóo i̱yi̱i̱ʼ. Xákiʼnán á mu bi̱ narasngáa naguxnuu mañúú wéñuʼ. Mbáa ikhaa manigu̱ʼ maguxnuu itháan májánʼ índo̱ gáʼga rajoo rí maʼndoo kaʼyoo itháan Jeobá. Mu rígi̱ maʼga̱ rajoo, itháan májánʼ gáʼni rí muʼthán xa̱bu̱ bi̱ nuʼsngáá rí maʼga̱ náa reunión asndu nákha nugíʼdi̱i̱ nuʼsngáá.
6. Xú káʼnii gándoo garasngáá mbáa xa̱bu̱ mu maguxnuu rá.
6 Xa̱bu̱ bi̱ xtáa raʼnigajmaa majmañuu itháan nacha̱ ga̱jma̱a̱ numuu Dios á mu najmañuu naguxnuu májánʼ (Sal. 1:1-3). Mbaʼin publicadores najmún tikhuu minutos mámbá índo̱ naguambu̱u̱n runigajmaa mu mumbayíí ga̱jma̱a̱ folleto Atani̱sie̱ki̱mínáʼ ma̱traxnuu ga̱jma̱a̱ ma̱ta̱ni̱ra̱ʼmáʼ. Á mu xa̱bu̱ bi̱ naʼnigajmaa xtáa gíná, mbáa ma̱ndoo matambáyii maxtáa májánʼ á mu naratháán tikhuu rí ikhaa má nijmañuu maʼni. Aratháán rí Jeobá maʼni tsajkurámaʼ tsiakii rí naʼni ga̱jma̱a̱ aratháán rí maʼtájkháan náa Jeobá mu mambáyúu (Prov. 16:3; 1 Juan 5:14, 15). Tikhun publicadores bi̱ kúwi̱i̱n náa Gran Bretaña nutún xa̱bu̱ bi̱ nusngúún rí mugíiʼ muni mbá rí maʼngu̱u̱n muni ga̱jma̱a̱ muni má xúʼko̱, mbá xkri̱da, majmañún muniʼnu̱ʼ alfabeto, mbuyáaʼ ga̱jma̱a̱ muraxnuu versículos ndrígóo Biblia ga̱jma̱a̱ nda̱wa̱á kayuʼ muraxnuu i̱yi̱i̱ʼ dí ra̱mingíjyúuʼ dí nagájnuu náa Biblia. Rí marasngáá mbáa xa̱bu̱ maguxnuu ndayóoʼ maraxna̱a̱ tsiakii mu maʼndoo maʼni.
7. Náa numuu rí gíʼmaa muʼsngúún má xúʼko̱ rí gajkhun xa̱bu̱ bi̱ tsíjmañún guraxnuu májánʼ rá.
7 Jeobá ndaʼyoo rí gíʼdoo wéñuʼ numuu mbáa xa̱bu̱ maski ajndu táʼga mba̱a̱ escuela (Job 34:19). Ikhaa ndaʼyoo rí gíwanʼ náa a̱jkiu̱ún (1 Crón. 28:9). Ikha jngó guʼsngún má xúʼko̱ xa̱bu̱ dí gajkhun bi̱ tsíjmañún guraxnuu májánʼ. Rígá mbaʼa i̱yi̱i̱ʼ dí ra̱ʼkhá tháán májánʼ rí ma̱ndoo mugíʼdi̱i̱ muʼsngáá ga̱jma̱a̱. Índo̱ gáʼga ranújngoo mbiʼi, ma̱ndoo majmulú libro Enseña mu xúʼko̱ xa̱bu̱ bi̱ nuʼsngáá maʼga̱ rakro̱ʼo̱o̱ itháan rí e̱ʼkha̱ raʼthí Biblia.