Atayaridá xkri̱da ndrígu̱ún gaʼyee: Nahúm
1. Ndiéjunʼ eʼsngúlúʼ libro ndrígóo Nahúm rá.
1 Rí xóó niguanúu náa xuajen Nínive dí nirígá nákha wajyúúʼ nasngájma rí, xó má niʼtáriyaʼ Nahúm, rí Jeobá na̱ʼkha̱ kayóo dí ra̱májánʼ náa xa̱bu̱ bi sia̱nʼ gajmíi̱n. Asndu nimbáa xa̱bu̱ bi̱ itháan mixkawiʼ xáʼngo̱o̱ gárikhoo rí maʼni (Nah. 1:2, 6). Rí mbuyáá májánʼ rí niʼtáriyaʼ Nahúm maʼsngulúʼ tikhuu rí ma̱ndoo majmuluʼ náa na̱jkua̱ gúʼtaraʼa.
2. Ndíjkha rí nindxu̱u̱ májánʼ wéñuʼ ajngáa rí na̱jkua̱ kuʼyúlú rá.
2 Guʼthá rí maʼni̱i̱ a̱jkiu̱ún xa̱bu̱ ga̱jma̱a̱ dí marigá nda̱wa̱a̱. Índo̱ nduyáá, libro dí niʼnirámáʼ Nahúm niʼtáriyaʼ rí magíʼnuu xuajin Nínive, capital ndrígóo Asiria rí mixkawiʼ wéñuʼ (Nah. 1:1; 3:7). Mú ajngáa rúʼko̱ nindoo gáʼthúu̱n ajngáa rí májánʼ náa xuajñu Jeobá. Nahúm, nandoo gáʼthi ‹bi̱ naʼni̱i̱ a̱jkiu̱ún›, niʼthún eʼwíínʼ judíos rí xa̱bu̱ bi̱ sia̱nʼ nacha̱ má maguma gámbíin. Ma̱ngaa niʼthún dí Jeobá nindxu̱u̱ náa nakhánun tsiakii índo̱ rígá ga̱jmá (Nah. 1:7). Índo̱ nuʼtáraʼa, ikháanʼ mangáanʼ na̱jkua̱ kuʼyáá ajngáa rí májánʼ ga̱jma̱a̱ nuʼthúún xa̱bu̱ rí mumbayúmi̱jna̱ náa Jeobá (Nah. 1:15).
3. Xó má niʼni Nahúm, xú káʼnii gándoo gajmulú xkri̱da ga̱jma̱a̱ xtiʼkhu índo̱ nuʼtáraʼa rá.
3 Gajmulú xkri̱da ga̱jma̱a̱ xti’khu. Jeobá niʼni rí Nahúm majmuu xkri̱da ndrígóo Tebas (o No-amón), xuajen egipcio rí nini gámbáa xa̱bu̱ asirios, mu majmuu xóo xkri̱da rí magíʼnuu Nínive (Nah. 3:8-10). Índo̱ gúʼthún xa̱bu̱ rí xú káʼnii gámbáa numbaaʼ xkawiʼ rígi̱, gajmulú rí niʼtáriyaʼ náa Biblia mu musngajmá rí Jeobá naʼnimbánuu xúgíʼ rí naʼthí. Mbá xkri̱da, xúgínʼ soldados ndrígóo Babilonia ga̱jma̱a̱ soldados ndrígóo medos nitu̱ʼu̱u̱n guxmijná náa xuajen Nínive nákha tsiguʼ 632 nákha xóó tséʼkha̱ Jesús. Rí nixnúu wéñuʼ ruʼwa nini rí magajnúu mañu Tigris, ga̱jma̱a̱ xtátsí ndrígóo xuajen niguámbári̱ga̱a̱. Xúʼko̱ niguma gámbáa Nínive, xó má niʼtáriyaʼ Jeobá (Nah. 1:8; 2:6).
4. Xú káʼnii gándoo gúʼthá kaʼwu mu makru̱ʼu̱u̱n xa̱bu̱ índo̱ nuʼtáraʼa rá.
4 Guʼthá kaʼwu ga̱jma̱a̱ dí xáʼni mingíjyúuʼ makru̱ʼu̱u̱n. Nahúm niʼnirámáʼ káxi̱ rí niʼtáriyaʼ, niʼthí májánʼ wéñuʼ ga̱jma̱a̱ niʼthí kaʼwu (Nah. 1:14; 3:1). Xúʼko̱ má mangáanʼ, ajngáa rí muʼthá ragíʼmaa maʼni mingíjyúuʼ makru̱ʼu̱u̱n xa̱bu̱ (1 Cor. 14:9). Índo̱ na̱jkua̱ guʼyáá timbá aʼphu̱ mbáa xa̱bu̱, guʼthán kaʼwu náa numuu ni̱jkua̱ guʼyáá. Ga̱jma̱a̱ gumbáñuun bi̱ kuwáanʼlu ruʼsngúún numuu Biblia rí maguaʼdáá fe náa Jeobá ga̱jma̱a̱ náa Ajngá rawunʼ ma̱ngaa makru̱ʼu̱u̱n xú káʼnii embáñun rí kuwa rajmañún (Rom. 10:14).
5. Índo̱ nduʼyáá rí nimbánuu rí niʼtáriyaʼ Nahúm, ndiéjunʼ eʼsngúlúʼ rá.
5 Nahúm ni̱jkha̱nú ndiʼyoo rí xúgíʼ rí naʼthí Jeobá nambánuu tsiakii, rígi̱ nakujmaa kaʼwu náa libro ndrígóo Biblia rí kayá mbiʼyuu. Nákha xóó tséʼkha̱nú fin náa numbaaʼ ndrígóo Gixa̱a̱, ikháanʼ naʼni̱i̱ a̱jkiu̱lú ajngáa rí niʼthí Jeobá: “Gamiéjunʼ xáʼga̱nú marigá a̱jma̱ nuthu” (Nah. 1:9).