Gajmulú jw.org náa na̱jkua̱ gúʼtaraʼa

Ináa ndrígúlú dí rígá náa Internet nindxu̱u̱ mbá rí nayambáá wéñuʼ mu miʼtáraʼa ajngáa rí májánʼ “asjndo naʼ ndambarigo raun numba” (Hech. 1:8). Mú, mbaʼin xa̱bu̱ na̱nguá eniʼnu̱ʼ; nduyáá dí rígá índo̱ mbáa publicador naʼthúún o nasngájmún ináa rígi̱.

Mbáa superintendente viajante nirígú náa celular ndrígóo video rí mbiʼyuu Náa numuu rí gíʼmaa muʼnigajmaa Biblia rá. Ga̱jma̱a̱ nasngájmuu xa̱bu̱ índo̱ nandoo. Mbá xkri̱da, índo̱ naʼtáraʼa náa mámbá guʼwá, naʼthí: “Ngroʼoʼ rañu̱u̱n mbégu̱ʼ xa̱bu̱ mu mambáñun muxkamaa rí xú káʼnii maxtiʼña̱a̱ ajtsú graxe̱ rí gíʼdoo wéñuʼ numuu: Ndíjkha dí rígá mbanda̱ʼkho dí ra̱májánʼ rá. Xú káʼnii gáʼni̱i̱ májánʼ Dios rá. Ga̱jma̱a̱ ndiéjunʼ gándoo gúʼni ikháanʼlu rá. Naxtiʼña̱a̱ náa video rígi̱”. Nasngájmuu video ga̱jma̱a̱ nagiʼthu̱u̱n mbaʼyoo xú káʼnii eʼni xa̱bu̱. Video nindxu̱u̱ májánʼ wéñuʼ rí mbaʼin xa̱bu̱ tsíniñaʼ ruyáá asndu índo̱ naguámbá. Nda̱wa̱á, ndxájulú naʼthí: “Xó má guámbáʼ nitadxawíín, ma̱ndoo matanda̱ʼa̱ musngááʼ ga̱jma̱a̱ numuu Biblia náa ináa dí rígá náa Internet jw.org. Xúgi̱ rí xtáá gi̱jyooʼ, ma̱ndoo masngajmáʼ xú káʼnii nindxu̱u̱”. Á mu xa̱bu̱ ndaʼyoo rí májánʼ, ndxájulú naʼsngóo xú káʼnii eʼsngáa ga̱jma̱a̱ numuu Biblia índo̱ najmuu folleto Ajngáa rí májánʼ. Á mu xa̱bu̱ tsíguaphaa, ma̱ndoo maʼni nda̱wa̱á rí gátanga̱a̱. Índo̱ na̱jkha̱ náa mbá caseta ndrígóo teléfono, nagíʼdu̱u̱ naʼthúu̱n xa̱bu̱ bi̱ naxkamaa ikhí ga̱jma̱a̱ naʼthí xó má niʼthí nákha ginii. Ikháanʼlu rá. Lá najmulú jw.org náa na̱jkua̱ gúʼtaraʼa ráʼ.