Guxnáá ‹rí májánʼ wéñuʼ› numuu rí májánʼ a̱jkiu̱lúʼ (Mat. 12:35a)

Nandulúʼ muxnún eʼwíínʼ ‹rí májánʼ wéñuʼ› rí kuaʼdáá, numuu rí xúʼko̱ nusngajmá ‹rí májánʼ a̱jkiu̱lú› (Rom. 12:13). Mú ginii bi̱ kuya̱ edxu̱u̱ gíʼmaa muriyaʼ awan mu a̱ngiu̱lú bi̱ naguwáʼ gúxna discurso mixníin núma̱aʼ ga̱jma̱a̱ muxniʼtsún o i̱ʼwáʼ rí ma̱ndoo muʼni ga̱jma̱a̱ numún ma̱ngaa mu mixníin mbújkha̱a̱ rí nikiéʼkúun mu maguwáʼ. Mú, mbáa tikhun publicadores na̱nguá eñún májánʼ gúthún a̱ngiu̱lú mu magún náa guʼwún numuu rí nundxa̱ʼwa̱ edxu̱ún rí migíníi o numuu rí naʼni maxmiéjunʼ dí ma̱ʼkha̱ mbáa ndxájulú mu maguanúu náa guʼwún o rí muxniʼtsí. Á mu xúʼko̱ ku̱ma̱ʼ mangáán, garmáʼáan a̱jkia̱nʼ xtágabu rí Jesús nixnúu Marta (Luc. 10:39-42). Ikhaa niʼthí rí itháan gíʼdoo numuu tsiakii rí nundrígú náa a̱ngiu̱lú bi̱ naguwáʼ ki xóo ganitsu o i̱ʼwáʼ rí minumuu. Á mu nuʼnimbulúʼ xtágabu rígi̱ mambáyulúʼ muxnún eʼwíínʼ dí kuaʼdáá rí nindxu̱u̱ ‹májánʼ wéñuʼ› xó má eʼthulú náa Ajngáa rawunʼ Dios (3 Juan 5-8).