Gajmulú jw.org mu muʼtáraʼa: “Gambaxáʼ ga̱jma̱ʼ Jeobá”

Náa jw.org náa naʼthí “Mbaʼa i̱yi̱i̱ʼ” na̱ʼkha̱ mbaʼa video mu mbuyáá e̱ji̱n rí nagumbiʼyuu “Gambaxáʼ májánʼ ga̱jma̱ʼ Jeobá”. (Náa xtíloo, sección rígi̱ tséʼkha̱ i̱ndó video, ma̱ngaa na̱ʼkha̱ ajmúú ga̱jma̱a̱ i̱ʼwáʼ rí ma̱ndoo matani.) Lá nijmulú má video rígi̱ náa nuʼtáraʼa ráʼ. Á mu mbáa bi̱ nuʼsngáá ga̱jma̱a̱ numuu Biblia gíʼdiin e̱ji̱n majkhinʼ, náa numuu rí tsisngajmún xá. Mbáa ikhaa rúʼko̱ gáxkaxi̱i̱ mbayááʼ i̱ʼwáʼ sección dí rígá náa ináa ndrígóo Internet ndrígúlú.

Índo̱ mbáa ndxájulú nixnúu i̱yi̱i̱ʼ Noticias del Reino número 38 mbá a̱ʼgu̱ bi̱ gíʼdiin a̱jmi̱i̱n e̱ji̱n majkhinʼ, a̱ʼgu̱ bugi̱ niguxnuu nacha̱. Mangiin e̱ji̱n nindúún mbuyáá ndiéjunʼ nindxu̱u̱ i̱yi̱i̱ʼ rúʼko̱. Ikhú, ndxájulú niʼthún ndiéjunʼ e̱ʼkha̱ raʼthí ga̱jma̱a̱ nisngájmún xú káʼnii gándoo gátu̱ʼu̱u̱n náa ináa ndrígóo Internet ndrígúlú, rí nakujmaa náa námbá ináa. Numuu dí rúʼko̱ nindoo mbaʼyoo a̱ʼgu̱, ikha jngó ndxájulú nisngájmún xúgínʼ mbá video ndrígóo Caleb ga̱jma̱a̱ celular dí kayá.

Mbáa ndxájulú a̱ʼgu̱ niʼthúu̱n ga̱jma̱a̱ numuu jw.org mbáa a̱ʼgu̱ bi̱ nañajunʼ ga̱jma̱a̱ bi̱ gíʼdiin e̱ji̱n majkhinʼ. Niʼthúu̱n dí náa ináa rúʼko̱ maxkamaa mbaʼa rí mambáñún bi̱ kúwi̱i̱n náa mbá guʼwíin. A̱ʼgu̱ nito̱ʼo̱o̱ náa ináa ndrígóo Internet gajmíi̱n e̱ji̱i̱n. Nda̱wa̱á, niʼthúu̱n ndxájulú dí e̱ji̱i̱n jngruigu̱u̱n náa guʼwá runi ajmúú “Predica la palabra”, rígá náa xtíloo, dí na̱ʼkha̱ náa sección “Gambaxáʼ ga̱jma̱ʼ Jeobá”.

Lá ragájkhun dí ra̱ʼkhá tháán gíʼdoo numuu rí mbuʼyáá tsejtsí mbiʼi rí nuxi̱ʼ egájnuu náa ináa jw.org ga̱jma̱a̱ rí mundrígú tikhuu videos, ajmúú o i̱ʼwáʼ dí rígá ikhí ráʼ. Á mu nuʼni xúʼko̱, makuwáanʼ xawii mu majmuluʼ ináa rígi̱ náa nuʼtáraʼa ga̱jma̱a̱ xúʼko̱ makuwáanʼ ruʼni ñajunʼ Señor xóo yumbáá (Hech. 20:19).