Índo̱ gáʼni Conmemoración, ikháanʼ ma̱ndoo mbuʼyaridáá xkridoo Jeobá ga̱jma̱a̱ Jesucristo
1. Ndiéjunʼ tsiakii kiejunʼ eni bi̱ nutaraʼa numuu Jeobá índo̱ na̱jkha̱nú maʼni Conmemoración rá.
1 Jeobá naʼnimbánuu tsiakii rí eyoo. Tikhuu dí májánʼ dí ma̱ʼkha̱ kayóo Reino ndrígóo Dios, náa Isaías 9:7 naʼthí rí Jeobá maʼnimbánuu májánʼ wéñuʼ. Jesús a̱ʼdióo Dios, ma̱ngaa nisngájma rí nindoo mbaʼyamajkuu ga̱jma̱a̱ xúgíʼ a̱jkiu̱u̱n Dios (Juan 2:13-17; 4:34). Gu̱nʼ dí marigá Conmemoración, mbaʼánʼ wéñuʼ bi̱ ñajunlú testigos nuʼni mbá tsiakii mu muʼtáraʼa itháan ga̱jma̱a̱ xúʼko̱ nduʼyaridáá xkridoo Jeobá ga̱jma̱a̱ Jesús. Lá xúʼko̱ gátani ikháánʼ rí tsiguʼ rígi̱ ráʼ.
2. Ndiéjunʼ gugíʼdi̱i̱ muʼni índo̱ gáʼni 7 ñajunʼ gu̱nʼ marzo ga̱jma̱a̱ ndiéjunʼ gákánulúʼ á mu nuʼni ga̱jma̱a̱ gagi rá.
2 Campaña ndrígóo Conmemoración. Campaña dí miʼtá ga̱jma̱a̱ numuu Conmemoración dí marigá tsiguʼ rígi̱ magi̱ʼdu̱u̱ sábado 7 ñajunʼ gu̱nʼ marzo. Májánʼ gáʼni rí muríyaʼ awan asndu nákha xúgi̱ mu muʼtáraʼa ga̱jma̱a̱ gagi índo̱ gárígá campaña rígi̱. Náa mbaʼa congregación makuwá ruñajunʼ wéñuʼ, numuu rí mugíʼ muñajunʼ náa xúgíʼ territorio rí kaʼñúún. Guʼniratamijná mu muxnaxí invitación rígi̱, o musngajmún náa ináa jw.org, bi̱ nuʼsngúún ga̱jma̱a̱ numuu Biblia, xa̱bu̱ bi̱ na̱jkua̱ gúʼñún náa territorio, xa̱bu̱ bi̱ nuñajunʼ gajmiúlú, bi̱ nuʼnigajmaa gajmiúlú náa escuela ga̱jma̱a̱ a̱ngiu̱lú bi̱ kuʼñúún.
3. Ndiéjunʼ gándoo gúʼni mu muʼtáraʼa itháan gu̱nʼ marzo ga̱jma̱a̱ abril rá.
3 Precursor auxiliar. Á mu nuʼni ga̱jma̱a̱ xúgíʼ a̱jkiu̱lú ma̱ndoo maxkaxáanʼ muʼtáraʼa itháan. Xúʼko̱, mbaʼánʼ manindxu̱lúʼ precursor auxiliar índo̱ gáʼni gu̱nʼ marzo ga̱jma̱a̱ abril, numuu rí ma̱ndoo muraʼwíí muxnaxíi 30 horas. Índo̱ gúʼnigajmaa mbá guʼwáanʼ, o índo̱ gúʼnigajmaa ndajkuáanʼ, ma̱ndoo muʼtájkáan mu mbuʼyáá xú káʼnii gúʼni (Prov. 15:22). Gagi rí gusngajmá índo̱ gáʼni campaña rígi̱ ma̱ndoo mambáñún eʼwíínʼ mu mutaraʼa ga̱jma̱a̱ xúgíʼ a̱jkiu̱ún. Á mu nuríyaʼ awan mu muʼtáraʼa itháan, makuwáanʼ ruʼyaridáá xkridoo Jesús (Mar. 6:31-34).
4. Ndiéjunʼ gákhánulúʼ á mu nduʼyaridáá xkridoo Jeobá ga̱jma̱a̱Jesús rá.
4 Á mu nduʼyaridáá xkridoo Jeobá ga̱jma̱a̱ Jesús índo̱ marigá Conmemoración, ra̱ʼkhá tháán májánʼ rí gákhánulúʼ. Timbá, mbaʼin xa̱bu̱ bi̱ kuwa náa territorio ma̱ndoo mudxawíín ajngáa rí májánʼ. Ma̱ngaa maʼdxulúʼ numuu rí kuwáanʼ ruʼni ñajunʼ Jeobá ga̱jma̱a̱ rí numbáñún eʼwíínʼ xa̱bu̱ (Hech. 20:35). Mú rí itháan gíʼdoo numuu, dí muʼni gagi a̱jkiu̱u̱n Dios ga̱jma̱a̱ A̱ʼdióo.