Gagiwanʼ a̱jkiu̱lú rí gíʼmaa muʼni náa asamblea rí ajtsú mbiʼi
Hora rí marigá programa. Mambaʼto xkrugua a las 8:00 rí miʼcha̱. Magi̱ʼdu̱u̱ mawán ajmúú a las 9:20 nájtsu mbiʼi. Núkhu má ikhú gíʼmaa matrigáanʼ xúgiáanʼ mu xúʼko̱ programa magi̱ʼdu̱u̱ xó má gíʼmaa. Viernes ga̱jma̱a̱ sábado asamblea ma̱mbá xóo a las 5:00 rí wakhííʼ, ga̱jma̱a̱ domingo ma̱mbá xóo a las 4:00.
Ajmúú rí muʼni mba̱a̱ ga̱jma̱a̱ Jeobá. Nákha wajyúúʼ, xuajñu Dios nini mba̱a̱ Jeobá ga̱jma̱a̱ ajmúú. Rí mbiʼi xúgi̱, ajmúú nagiʼdoo wéñuʼ numuu náa nduʼyamajkuíí Jeobá (Sal. 28:7). Xúgíʼ sesión ndrígóo asamblea dí ajtsú mbiʼi nagi̱ʼdu̱u̱ ga̱jma̱a̱ ajmúú. Raʼkháa i̱ndó nagrigu mu mawán; niguma májáánʼ mu mbuʼyamajkuíí Jeobá ga̱jma̱a̱ majmañulúʼ numuu ikhaa. Ikha jngó, índo̱ bi̱ nayéjkha̱ edxu̱u̱ náa mámbá sesión gáʼthi rí magi̱ʼdu̱u̱ mawán ajmúú, gíʼmaa mutrigáanʼ ga̱jma̱a̱ muxnátiʼñamijná mudxawíín, ní ragíʼmaa muʼtámíjná itháan. Xúʼko̱ esngajmá rí gíʼdoo wéñuʼ numuu tsiakii rí eni a̱ngiu̱lú bi̱ nuñambá náa orquesta ndrígóo Watchtower. Nagún náa Patterson (Nueva York) a̱jma̱ nuthu rí mbá tsiguʼ ga̱jma̱a̱ ikhiin má eni numáá pasaje ndrígu̱ún mu muni grabar ajmúú rí mitsaan rí xúgiáanʼ enigulúʼ. Nda̱wa̱á rí niʼdxawíín ajmúú, muʼni mba̱a̱ Jeobá índo̱ muʼni ajmúú ndrígóo Reino.
Náa naguáju̱n carro. Xáxtumáán náa matatsiji carro á mu ikháanʼxu kúwáanʼ ruña̱wa̱a̱n, ikhí majmaʼ xó má eʼkha̱nú mámbáa ga̱jma̱a̱ carro ndrígóo. Numuu rí náa naguáju̱n carro na̱nguá mba̱a̱, najuiʼthála á mu ma̱ndoo muwáanʼ mbaʼánʼ mu mu̱ʼgua̱la náa mbá carro. Carro bi̱ nagún kudiin xa̱bu̱ bi̱ nandún kañun ma̱ndoo muguajún náa kaʼñúún á mu kuya̱ mbá letrero o placa ndrígóo carro rí kaʼñúún xa̱bu̱ bi̱ nandún kañun.
Xílí. Índo̱ gámbaʼto xkrugua, xátagayáʼ nacha̱ wéñuʼ mu mi̱dxu̱ʼ gáraʼwún náa nandaʼ ikháánʼ. Gíʼmaa maxmiéjunʼlú kuʼñúún eʼwíínʼ, maski ajndu ikháanʼ muguaʼún náa tsínigulú. Rígi̱ naʼni rí makujmáanʼ xóo cristiano bi̱ gajkhun ga̱jma̱a̱ iʼwíínʼ bi̱ nduyulú naʼni rí mbuyamajkuíí Dios (Juan 13:34, 35; 1 Cor. 13:5; 1 Ped. 2:12). I̱ndó ma̱ndoo matani apartar xílí mu matrigi̱i̱n bi̱ xtaa gajmiáanʼ náa guʼwáaʼ, bi̱ ni̱dxa̱ʼ gajmiáanʼ náa carro o xa̱bu̱ bi̱ narasngúún. Xátandrámáʼ nimbá náa xílí á mu xájmáʼ. Mu xúʼko̱ ma̱ndoo mbiʼyáá dí xóo tségiʼi nimbáa ikhí. Xílí dí rígá matrigi̱i̱n xa̱bu̱ wanii o bi̱ nandún kañun na̱nguá mbaʼa, ikha jngó xándoo matrigi̱i̱n xúgínʼ bi̱ kuwa náa mbá guʼwíin. Mbá péñu, atatsíñaʼ xílí rúʼko̱ mu matrigi̱i̱n xa̱bu̱ wanii ga̱jma̱a̱ xa̱bu̱ bi̱ nandoo kañun ga̱jma̱a̱ bi̱ nuña̱wu̱u̱n.
Xtíin rí nakujmaa májánʼ. Xtíin rí maguʼunlú náa asamblea gíʼmaa maʼni mikaʼwu ga̱jma̱a̱ makujmaa májánʼ, ga̱jma̱a̱ ragíʼmaa mbuʼyaridáá xtíñún xa̱bu̱ bi̱ tsénigajmaa (1 Tim. 2:9). Xúʼko̱ má ragíʼmaa muʼgíʼ xtíin rí ní xáʼni makujmáanʼ xóo xa̱bi̱i̱ Dios xó má xtíin rí xa̱ʼ wéñuʼ, xtíin rí nitho, xtíin rí ma̱ja̱nʼ wéñuʼ, mbá xtíin rí chíjua̱ wéñuʼ asndu má ragíʼmaa muʼgíiʼ xtíin rí nakutaʼa. Xúʼko̱ má índo̱ na̱jkua̱nú náa hotel o índo̱ gúxnaxíi cuarto, ga̱jma̱a̱ índo̱ nagájnaʼlú náa asamblea. Á mu nuʼni xúgi̱ kaʼnii asndu maʼdxulú rí mbuʼyá tarjeta ndrígóo asamblea ga̱jma̱a̱ xátiyulú muʼtáraʼa índo̱ gándoo. Rí xú káʼnii gákujmáanʼ ga̱jma̱a̱ dí xú káʼnii gúʼni índo̱ gárígá asamblea rí ajtsú mbiʼi raʼkháa i̱ndó maʼni rí maguwáʼ xa̱bu̱ bi̱ gajkhun nandún mudxawíín rí naʼthí náa Biblia, rí phú maʼni, manigu̱ʼ wéñuʼ Jeobá (Sof. 3:17).
Rí xú káʼnii majmaʼ dispositivos electrónicos. Á mu natatsaʼwáminaʼ mayédxuʼ celular, atani dí xáwáán mu xájngarígi̱i̱n eʼwíínʼ. Á mu majmaʼ cámara dí naguwíi fotos, cámara dí naʼni grabar ga̱jma̱a̱ tableta, atie̱wa̱a̱n dí xátanigajmún bi̱ kuwa ikhí ga̱jma̱a̱ rí xátatsiʼñáʼ muyexi náa plataforma. Numuu rí kuaʼdáá gamajkhulúʼ na̱nguá exunʼguánʼ mensaje o correo á mu tséyóoʼ índo̱ xtáa rarígá programa.
Ganitsu. Itháan májánʼ mayédxuʼ ganitsu mu xágajnáʼ gáratsi wakhaʼ. Ma̱ndoo majmaʼ mbáa toper chíʼgíʼ rí maʼngo̱o̱ magida̱ʼ náa agoo xílí. Ikhí xándoo mayédxuʼ mbá daan mba̱a̱ ga̱jma̱a̱ ragíʼmaa mayédxuʼ mbá rí nindxu̱u̱ vidrio.
Donaciones. Ma̱ndoo musngajma rí gíʼdoo wéñuʼ numuu asamblea náa najmañulúʼ ga̱jma̱a̱ numuu Dios índo̱ nuxná mbújkha̱a̱ rí najmaa náa ñajunʼ rí naguma xúgíʼ tsu̱du̱u̱ numbaaʼ. Náa tikhuu asamblea bi̱ nandún muxna cheque ndayóoʼ muni ga̱jma̱a̱ mbiʼyuu “La Torre del Vigía, A.R.” Ma̱ngaa ma̱ndoo muxná donación ga̱jma̱a̱ tarjeta.
Thana. Á mu rí ikháánʼ nagi̱i̱n thana rí nitha̱nʼ, májánʼ gáʼni rí mayédxuʼ thanaʼ, numuu rí náa asamblea nda̱a̱ thana rúʼko̱. Á mu rí xtaʼdáá diabetes ga̱jma̱a̱ ndayóoʼ majmaʼ jeringa mú nda̱wa̱á rí nijmaʼ gíʼmaa ma̱ta̱ya̱a̱ náa minaʼ gátadaʼ, numuu rí gamíi maʼni kambi̱yu̱ʼ imba̱a̱. Ragíʼmaa matada̱ʼ náa bote rí najthi náska dí rígá náa asamblea o náa hotel.
Atiewumínaʼ mu xágawánʼ. Gíʼdoo wéñuʼ numuu rí matiewumínaʼ mu xáxkanundínʼ o rí xáxpátri̱ga̱a̱n. Xúgíʼ tsiguʼ nakámbiñu̱u̱nʼ ga̱jma̱a̱ numuu chádún, mú itháan índo̱ mitsidanʼ wéñuʼ cháda. Atajngráʼaʼ mbá rí xáʼni maxpátri̱ga̱a̱n ga̱jma̱a̱ mbá rí makujmaa májánʼ, mu xúʼko̱ xákambiyaʼ á mu natatsimaʼ náa mbá escalera o náa kamba̱a̱.
Xa̱bu̱ bi̱ tsédxuun májánʼ. Náa tikhuu asamblea ma̱ndoo mudxawíín náa radio (FM). Mu ma̱ndoo majmaʼ rígi̱, mbaʼyoo mayédxuʼ mbá radio rí na̱ʼkhu̱u̱ pila ga̱jma̱a̱ audífonos.
Carriola ndrígu̱ún e̱ji̱n ga̱jma̱a̱ xílí rí najmigo̱o̱ʼ. Ragíʼmaa mayédxuʼ carriola ndrígu̱ún cháñaʼ náa asamblea. Ma̱ndoo mayédxuʼ mbá xílí náa xágandrígi̱i̱n e̱ji̱n.
Mbaʼa asamblea naguma náa guʼwá rí kúgoo náa najmaa ventilador. Ikha jngó, ragíʼmaa muxtajmami̱jná wéñuʼ perfume rí gakhii xu̱ʼ mu xúʼko̱ xáʼniun mbá dí raʼkhí iʼwíínʼ a̱ngiu̱lú (1 Cor. 10:24).
Restaurantes. Rí xú káʼnii xa̱bu̱ gánindxa̱ʼ náa restaurante maʼni rí maʼga̱ gamajkhu náa mbiʼyuu Jeobá. Atagúwanʼ mbá xtíñaaʼ rí májánʼ, xó má gíʼmaa maʼni mbáa cristiano. Atatsíñaʼ propina á mu nuni xúʼko̱.
Hoteles:
Xátani apartar mbaʼa cuarto á mu xájmáʼ ga̱jma̱a̱ xátaxuʼdíinʼ itháan xa̱bu̱ náa awúu̱n cuarto á mu na̱nguá eyoo bi̱ ndrígóo.
I̱ndó á mu nirígá mbá rí tséraʼti̱i̱n ma̱ndoo matani cancelar, ga̱jma̱a̱ aratháán nákha wapháá xa̱bu̱ bi̱ gajkuáa ñawúunʼ náa hotel mu xúʼko̱ majmúún eʼwíínʼ xa̱bu̱ (Mat. 5:37). Á mu na̱dxu̱ʼnú natani, atayáá á mu ikhí número dí nitaniraʼmáʼ mu matani cancelar ga̱jma̱a̱. Á mu natani cancelar cuarto a̱jma̱ mbiʼi rí inu má majmaʼ, mandáti̱ga̱ʼ mbújkha̱ʼ.
Á mu najmaʼ mbá tarjeta mu mataxuʼdááʼ mbiʼyaaʼ náa hotel, gagiwanʼ a̱jkia̱nʼ rí ikhí naguanúu xóó mbújkha̱ʼ mu matsinumáá káxi̱ cuarto ga̱jma̱a̱ rí gákiéʼkháanʼ índo̱ gáraxtaa ikhí. Xákhánáʼ xóó mbújkha̱ʼ asndu nda̱wa̱á rí gáguguáa cuenta ndrígáʼ, nguáthá mbiʼi nda̱wa̱á rí nidxu̱ʼ.
Á mu rígá carro rí marangoo ga̱jma̱a̱ maleta, ma̱ndoo mayédxuʼ mú gíʼmaa mi̱dxa̱ʼ jchááʼ nacha̱ mu xúʼko̱ majmúún eʼwíínʼ.
Araxnún chíʼgíʼ mbújkha̱a̱ xa̱bu̱ bi̱ nuñajunʼ náa hotel bi̱ numbayáaʼ magún kudúún maleta ga̱jma̱a̱ atatsíñaʼ chíʼgíʼ mbújkha̱a̱ náa xa̱bu̱ bi̱ naʼni kaʼwu̱u̱ cuarto, atani rígi̱ á mu xúʼko̱ má eni xúgínʼ.
Atani májáánʼ ganitsu á mu nandoo matani.
Ragíʼmaa mayédxuʼ náa asamblea ganitsu, café o hielo rí nuxnaʼ náa hotel.
Gaʼni má xúʼko̱ májánʼ a̱jkia̱nʼ índo̱ gátañu̱u̱n o índo̱ garatamíjna gajmiáanʼ xa̱bu̱ bi̱ nuñajunʼ náa hotel. Gagiwanʼ a̱jkia̱nʼ rí naguanún mbaʼin wéñuʼ xa̱bu̱ náa hotel ikha jngó nandún rí ikháanʼ xákiʼnáanʼ nacha̱, muʼni rí májánʼ ga̱jma̱a̱ maʼngo̱o̱ a̱jkiu̱lú.
Gíʼdoo wéñuʼ numuu rí matie̱wu̱u̱n e̱jña̱ʼ índo̱ xtaa náa hotel, xó má náa elevador, náa rígá alberca, náa natriʼkhu̱u̱ xtíñaaʼ ga̱jma̱a̱ náa gimnasio.
Náa Lista de hoteles recomendados na̱ʼkha̱ nguáthá gatatsinumáá mámbá mbiʼi, mú tséʼkha̱ ikhí rí impuesto. Á mu naxtumán itháan, arathá rí xátani numáá ga̱jma̱a̱ arathá nacha̱ náa Departamento náa naʼtháanʼ Maguanáʼ dí rígá náa asamblea.
Á mu narígá xkujndu náa cuartiaʼ arathán nacha̱ náa Departamento náa naʼtháanʼ Maguanáʼ índo̱ gáraxtaa náa asamblea.
Náa matruguambáá. Xúgínʼ bi̱ nandún muruguambá gíʼmaa magún náa Departamento dí naʼtháanʼ náa gándoo matruguambáá. Bi̱ guáʼdáá 16 tsiguúnʼ o itháan majkhinʼ ma̱ndoo muñajunʼ gajmiún anu̱ún, ru̱du̱ún o imba̱a̱ ndxájulú bi̱ nikhi̱i̱ á mu anu̱u̱ o ru̱dúu̱ nandoo.