Mu marasngáa itháan májánʼ ndayóoʼ matani rataminaʼ

A̱jma̱ nuthu nini ikháá má graxe̱ Jesús ga̱jma̱a̱ numuu dí makuwáanʼ kámuu mbiʼi. Náa mámbá, ikhaa niriʼña̱a̱ xó má ndayóoʼ xa̱bu̱ bi̱ niʼtámíjná ga̱jma̱a̱ (Luc. 10:25-28; 18:18-20). Xó má ikhaa, maski ajndu nduʼyáá má májánʼ tema dí nagájnuu náa Biblia rí muʼnigajmaa gajmiúlú mbáa xa̱bu̱, gíʼmaa muʼniratamijná wapháá mu xúʼko̱ gúndxaʼwáá edxu̱lúʼ ndiéjunʼ rí eyóoʼ xa̱bu̱ bi̱ nuʼsngáá. Ndiéjunʼ rí naʼniu mingíjyúuʼ makro̱ʼo̱o̱ o maʼnimbo̱o̱ xá. Náa biʼyaa versículos dí na̱ʼkha̱ náa kutriga̱ ndayóoʼ muraxnuu índo̱ kuwáanʼ má ruʼnigajmaa gajmiúlú xa̱bu̱ rá. Nguáthá mba̱a̱ gándoo gátanigajmaa ga̱jma̱ʼ xá. Mbáa mbaʼyóoʼ mundxaʼwamíjna̱ náa mbá xkri̱da, xú káʼnii gúʼthán o náa biʼyaa graxe̱ gámbáyúu makro̱ʼo̱o̱ bi̱ nuʼsngáá. Mú, Jeobá eʼni dí xa̱bu̱ ma̱ndoo majmañuu itháan. Ikha jngó, ndayóo munda̱ʼa̱a̱ dí maʼni tsajkurámaaʼ bi̱ nuʼsngáá, xúʼko̱ má índo̱ nuʼniratamijná mu muʼsngáa ga̱jma̱a̱ tsiakii dí nuʼni mu mumbayíí xa̱bu̱ maniniiʼ Dios (1 Cor. 3:6; Sant. 1:5).