Gajmulú májánʼ libro Dí naʼsngáa náa Biblia

Xó má ejkha̱ rajmañún dí na̱ʼkha̱ raʼthí náa Biblia xa̱bu̱ bi̱ nuʼsngúún ga̱jma̱a̱ nugíʼ nuni dí najmañún, nugi̱ʼdi̱i̱ nusngajma dí nandún muni ñajunʼ Jeobá (Sal. 1:1-3). Á mu najmulú májánʼ libro Dí naʼsngáa náa Biblia, ma̱ndoo mumbáñuun muni itháan ñajunʼ Dios.

Graxe̱ dí tima náa nagi̱ʼdu̱u̱. Mámbá capítulo nagi̱ʼdu̱u̱ ga̱jma̱a̱ tikhuu graxe̱ dí naxtiʼña̱a̱ má náa kíxnuu rúʼko̱. Ma̱ndoo muʼni graxe̱ rígi̱, mú raʼkháa mu mariʼña̱a̱ bi̱ nuʼsngáá, muʼni mu manigu̱ʼ mbaʼyoo itháan. Imbo̱o̱ dí ma̱ndoo muʼni nindxu̱u̱ dí munda̱ʼa̱a̱ maʼthí ga̱jma̱a̱ numuu mámbá graxe̱ rúʼko̱. Mbáa mariʼña̱a̱ mbá dí ragájkhun, mú tséyóoʼ má muʼthán dí raʼkhí dí niriʼña̱a̱, mu xúʼko̱ ma̱ndoo mbuʼyáá náa gándoo gúmbaʼyíí índo̱ gúʼnigajmaa gajmiúlú (Prov. 16:23; 18:13).

Apéndice. Á mu xa̱bu̱ nikro̱ʼo̱o̱ má dí e̱ʼkha̱ raʼthí náa capítulo, ma̱ndoo muʼthán maguxnuu i̱ndó ikhaa apéndice ndrígóo tema rúʼko̱. Índo̱ gúʼnigajmaa gajmiúlú imbo̱o̱ mbiʼi, ma̱ndoo muʼni graxe̱ mu mbuʼyáá á mu rígá mbá rí na̱nguá nikro̱ʼo̱o̱. Á mu rí májánʼ gúʼyáá, guríyáʼ nguáthá minutos mu muʼnigajmaa gajmiúlú xa̱bu̱ mbá apéndice kañiʼ o mbá kutriga̱. Ma̱ndoo muraxnuu kutriga̱ ga̱jma̱a̱ muʼni tikhuu graxe̱ dí niʼniratháá nákha wapháá.

Kúgumaʼá náa na̱ʼkha̱ rí marmáʼáan a̱jkiu̱lú. Mámbá capítulo naguámbá ga̱jma̱a̱ mbá rí kúgumaʼá náa na̱ʼkha̱ rí marmáʼáan a̱jkiu̱lú náa naxtiʼña̱a̱ graxe̱ dí tima náa nagi̱ʼdu̱u̱. Á mu natangáanʼ nduʼyáá gajmiúlú bi̱ nuʼsngáá, xúʼko̱ gándoo gúʼyáá á mu nikro̱ʼo̱o̱ dí itháan gíʼdoo numuu ga̱jma̱a̱ á mu najmañuu naʼthí dí nigida̱ʼ edxu̱u̱. Nda̱wa̱á dí niraxnuu nájmáanʼ dí naxtiʼña̱a̱ ga̱jma̱a̱ textos dí tima má ikhí, gunda̱ʼa̱a̱ xa̱bu̱ rí majmuu versículos rúʼko̱ mu maʼthí ndíjkha dí gajkhun nindxu̱u̱ dí na̱ʼkha̱ raʼthí náa kúgumaʼá (Hech. 17:2, 3).