Atayaridáá xkri̱da ndrígu̱ún gaʼyee: Habacuc
1. Náa numuu rí nakru̱ʼu̱lú májánʼ dí nikumu̱u̱ gaʼyee Habacuc rá.
1 Índo̱ nduʼyáá xóo ejkha̱ rajoo rí tséjmaa náa numbaaʼ rí kuwáanʼ, ra̱mingíjyúuʼ makumulúʼ xóo Habacuc, bi̱ niraxu̱u̱ Jeobá ndíjkha naniñuʼ marigá dí tséjmaa (Hab. 1:3; 2 Tim. 3:1, 13). Rí mundxaʼwamíjna̱ dí nitaraʼa Habacuc ga̱jma̱a̱ xkri̱da ndrígóo dí niwi̱ji̱ jmbu ma̱ndoo mambáyulúʼ mu maʼngulú muguaʼthi̱i̱n mbiʼi dí gánda̱ʼa̱a̱ cuenta Jeobá (2 Ped. 3:7).
2. Xú káʼnii gándoo guguajún jmbu xó má Habacuc rá.
2 Gakuwáanʼ jmbu. Habacuc táxtáa gíná numuu dí xtáa rarígá, ikhaa nixtáa xawii ga̱jma̱a̱ niʼni má xúʼko̱ ñajunʼ Dios (Hab. 2:1). Jeobá niʼthúu̱n gaʼyee dí Ajngóo mambanúu ga̱jma̱a̱ bi̱ nakuwa jmbu makuwíin má xúʼko̱ (Hab. 2:2-4). Ndiéjunʼ eyoo gáʼthúu̱n rígi̱ náa cristianos bi̱ kuwáanʼ iwáá mbiʼi rá. Itháan gíʼdoo numuu muʼnimbulúʼ dí ma̱ʼkha̱ fin ki xóo rí maʼndulú mbuʼyáá nguáná gáʼkha̱. Fe rí kuaʼdáá mambáyulúʼ makuwáanʼ xawii ga̱jma̱a̱ dí muʼtáraʼa itháan (Heb. 10:38, 39).
3. Ndíjkha dí gíʼmaa muʼni má xúʼko̱ ga̱jma̱a̱ gagi ñajunʼ Jeobá rá.
3 Nakuwáanʼ gagi numuu rí nuʼni ñajunʼ Jeobá. Fe ndrígúlú magiʼdoo xkujndu índo̱ Gog ndrígóo Magog gáʼne gínáa xuajñu Jeobá (Ezeq. 38:2, 10-12). Mámbá índo̱ narígá mbá guerra, naʼni itháan mingíjyúuʼ, asndu bi̱ naʼngu̱u̱n nudaʼ. Xa̱bu̱ nandáti̱gu̱u̱n dí guáʼdáá, nda̱a̱ wéñuʼ ganitsu ga̱jma̱a̱ asndu maʼga̱nú maʼni gíníi. Xú káʼnii gúʼni índo̱ gúraʼní xkujndu rígi̱ rá. Habacuc ndiʼyoo má dí marigá xkujndu, ikha jngó tandáti̱go̱o̱ gagi dí maʼni ñajunʼ Jeobá (Hab. 3:16-19). Ma̱ngaa ‹gagi dí na̱ʼkha̱ náa Jeobá› mambáyulúʼ mu muraʼníí xkujndu (Neh. 8:10; Heb. 12:2).
4. Ndiéjunʼ gándoo gúʼni rí mbiʼi xúgi̱ ga̱jma̱a̱ nda̱wa̱á rá.
4 Jeobá maʼsngúún má xúʼko̱ bi̱ gáñewu̱u̱n mbiʼi dí gánda̱ʼa̱a̱ cuenta (Hab. 2:14). Xa̱bu̱ bi̱ magabiín mangiin majmañún ga̱jma̱a̱ numuu Jeobá. Rí mbiʼi xúgi̱ ma̱ndoo muʼtáruʼun asndu náa xa̱bu̱ ga̱jma̱a̱ numuu ikhaa ma̱ngaa xúgíʼ dí mitsaan niʼni (Sal. 34:1; 71:17).