Maʼni tsajkurámáánʼ bi̱ Niʼniáanʼ kámuu mbiʼi

Dios nikudaminaʼ náa gaʼyee Abrahán, rí “xúgí’ xuajin mba̱ʼu̱ dí rígá náa tsu̱du̱u̱ ku̱ba̱ʼ” maguma tsajkurámiinʼ ga̱jma̱a̱ numuu mbáa bi̱ ma̱ʼkha̱ náa ikhaa (Génesis 22:18). Tsáa niʼthí ga̱jma̱a̱ numuu xá.

Maʼni a̱jma̱ míi tsiguʼ rí Dios nixnúu Jesús tsiakii mu maʼni milagros. Milagros rúʼko̱ nisngájma rí nikudaminaʼ Dios náa Abrahán rí maʼni tsajkurámuuʼ xúgíʼ xuajen mba̱ʼu̱, mbáa bi̱ ni̱ʼkha̱ náa Abrahán (Gálatas 3:14).

Milagros rí niʼni Jesús nimbáñun xa̱bu̱ mu mbuyáá rí ikhaa ninindxu̱u̱ gaʼyee bi̱ Dios ndiyáaʼ mu maʼni tsajkurámiinʼ. Ma̱ngaa rúʼko̱ nisngájma xú káʼnii Dios gájmiuu Jesús mu maʼni tsajkurámiinʼ xa̱bu̱ numbaaʼ kámuu mbiʼi. Guʼyáá xú káʼnii milagros rí niʼni Jesús nasngájma xú káʼnii xa̱bu̱ ninindxu̱u̱.

Nisngájma ngajua ga̱jma̱a̱ niʼni thanún bi̱ nandoo káñuun.

Mbá miʼtsú mbáa xa̱bu̱ bi̱ gíʼdoo nandii lepra niʼtákáñuu Jesús rí á mu nandoo maʼni thanuu. Jesús nixkajmaa ga̱jma̱a̱ niʼthúu̱n: “Nandoʼ”. Núkhu niʼni̱i̱ a̱jkiu̱u̱n (Marcos 1:40-42).

Nixná rí gíʼdoo ga̱jma̱a̱ nixníʼtsun bi̱ naxkidxu̱u̱n.

Jesús táʼndoo rí xa̱bu̱ maʼniún ewiiʼ. Ikhaa niʼni milagros mu maxniʼtsun mbaʼin wéñuʼ xa̱bu̱, índo̱ niʼni makuwi̱i̱n nguáthá pan ga̱jma̱a̱ nguéjmi̱i̱n e̱gi̱ʼ (Mateo 14:17-21; 15:32-38). Xúgínʼ nigiʼmún ga̱jma̱a̱ asndu mba̱a̱ ganitsu nipíduunʼ.

Nigáwiinʼ a̱jkiu̱u̱n ga̱jma̱a̱ niʼni gabi̱ín bi̱ nikháñun.

Índo̱ Jesús ndiʼyoo rí a̱ʼdióo mbáa a̱ʼgú xuáʼa̱ bi̱ mbáwíi nikháñuu ga̱jma̱a̱ rí nda̱wa̱a̱ tsáa mañawu̱u̱n, Jesús “nigáwiinʼ a̱jkiu̱u̱n kaʼyoo” ga̱jma̱a̱ niʼniga̱bi̱i̱ dxámá (Lucas 7:12-15).