XÓO KUWÁANʼ BI̱ NI̱NDXU̱LÚ CRISTIANOS

Xú káʼnii gáʼndulúʼ kuʼyáá Dios ga̱jma̱a̱ xa̱bu̱ numbaaʼ rá.

Maski ajndu ikháánʼ bi̱ ni̱ndxu̱lú cristianos na̱nguá guma tsudáánʼ mú munimbánii xtángoo ndrígóo Moisés, mú a̱jma̱ kiʼthá ñajunʼ rí itháán gíʼdoo numuu rí —maʼnda̱ʼ xtayáá Dios ga̱jma̱a̱ xa̱bu̱ numbaaʼ— ma̱ngaa gíʼdoo numuu rí mbiʼi xúgi̱, ikha jngó Dios nagíʼthu̱u̱n rí muni xa̱bi̱i̱ (Mt 22:37-39). Mbá ngajua xóo rígi̱ na̱nguá midxuu ikháá, ndaʼyoo muʼni mijna mú muguaʼdáá. Mú xóo gándoo gúʼni rá. Mbá rí gíʼdoo numuu muʼni, nindxu̱u̱ rí muraxnuu Biblia xúgíʼ mbiʼi. Mundxaʼwamíjná dí kuwáanʼ ruraxnuu, ikhú guʼyáá xú phú nindxu̱u̱ Jeobá ga̱jma̱a̱ mbuʼyáá rí ikhaa nindxu̱u̱ májánʼ wéñuʼ (Sl 27:4). Á mu nuʼni xúʼko̱, maʼni rí maʼndulú kuʼyáá itháan ga̱jma̱a̱ rí mundxaʼwamíjná xóo má ikhaa. Rúʼko̱ naxkaxáanʼ mu muʼnimbánii xtángoo ndrígóo, ma̱ngaa rí maʼndulú kuʼñúún eʼwíínʼ (Jn 13:34, 35; 1Jn 5:3). Guʼyáá ajtsú enii rí xóo gándoo gambáyulú mu muraxnuu Biblia.

Gundxaʼwamíjna̱ ga̱jma̱a̱ gajmulú rí kuaʼdáá. Gundxaʼwamíjna̱ rí kuwáanʼ ikhí. Guʼni mijna mbuʼyáá dí xtáa rarígá, gudxawíín xúgíʼ dí xtáa rarígá. Gundxaʼwamíjna̱ ndiéjunʼ ku̱mu̱u̱ bi̱ na̱ʼkha̱ raʼthí náa nuraxnuu.
Guriʼkuíí xóo muraxnuu. Ma̱ndoo muraxnuu ga̱jma̱a̱ aʼwá gakhi̱i̱ o mudxaʼwíín mbáa audio ga̱jma̱a̱ mu̱ʼgua̱ ruʼyáá xóo nagixnuu. I̱mba̱ rí ma̱ndoo muʼni, nindxu̱u̱ rí muraxnuu ga̱jma̱a̱ numuu mbá xa̱bu̱ bi̱ na̱ʼkha̱ raʼthí náa Biblia o rí muriʼyáʼ mbá edxu̱u̱ rí muraxnuu ra̱ʼkhá rí muraxnuu Biblia náa gi̱ʼdu̱u̱ asndu náa naguámbá. Mbá xkri̱da, ma̱ndoo majmúlú secciones 4 ga̱jma̱a̱ 16 ndrígóo folleto Mambáyulúʼ muʼnigajmaa Ajngáa rawunʼ Dios mu muraxnuu ga̱jma̱a̱ numuu Jesús. I̱mba̱ rí ma̱ndoo muʼni nindxu̱u̱ rí muraxnuu mbá káxi̱ capítulo náa nigájnuu texto rí nagixnuu mambá mbiʼi o rí muraxnuu libro rí na̱ʼkha̱ náa Biblia xóo má kiʼniraʼmáʼ.
Guraxnuu mu makru̱ʼu̱lú. Itháan májánʼ nindxu̱u̱ rí muraxnuu ka mbá capítulo mámbá mbiʼi mú gakru̱ʼu̱lú rí kuwáanʼ ruraxnuu raʼkháa i̱ndó muraxnuu mbaʼa capítulos mu nacha̱ mambúlú. Gundxaʼwamíjna̱ ga̱jma̱a̱ numuu rí kuwáanʼ ruraxnuu. Guʼyáá xóo phú nirígá. Gajmulú mapas ga̱jma̱a̱ referencias. Ga̱jma̱a̱ guʼyáaʼ itháan ga̱jma̱a̱ numuu mbá rí tsekru̱ʼu̱lu. Á mu nandoo, gajmulú itháán mbiʼi mu mundxaʼwamíjna̱ ki xóo rí muraxnuu.