Gajmañaaʼ marataráʼa májánʼ: Á mu bi̱ narasngáá tségíʼ maʼni, atatsíñaʼ rarasngáá

NDÍJKHAA GÍʼDOO NUMUU. Xa̱bu̱ gíʼmaa muthi mbiʼyuu Jeobá mu makáwíin (Ro 10:13, 14). Mú, ra̱ʼkhá xúgínʼ Bi̱ nindrigú muʼsngúún ga̱jma̱a̱ numuu Biblia gaʼndún munimbu̱u̱n xtángoo ndrígóo Jeobá. Ikha jngó, mu majmulúʼ májánʼ mbiʼi ndrígúlú índo̱ nuʼtáraʼa, gíʼmaa musngúún bi̱ gajkhun nandún muni rí nandoo Jeobá. Á mu mbáa bi̱ narasngáá tsiriʼkuminaʼ mbáa kayuʼ, itháan májánʼ gaʼni rí muniʼñáʼ ruʼsngáá ga̱jma̱a̱ mumbáñún bi̱ Jeobá e̱ʼkha̱ kagui̱i̱n náa xuajñu (Jn 6:44). Xúʼko̱, á mu nda̱wa̱á nariʼkuminaʼ ga̱jma̱a̱ nasngájma rí nindxu̱u̱ bi̱ ‹nandoo maxtáa kámuu mbiʼi› maʼdxulú rí musngáá mbu̱júu̱ (Hch 13:48).

XÚ KÁʼNII GUʼNI

• Aratháán bi̱ naʼnigajmaa̱ rí májánʼ eʼni rí nandoo majmañuu rí gajkhun rí na̱ʼkha̱ náa Biblia (1Ti 2:4).

• Atani rí marmáʼáan a̱jkiu̱u̱n rí gíʼdoo wéñuʼ numuu rí maʼnimbánuu rí nijmañuu (Lu 6:46-49).

• Aratháán ga̱jma̱a̱ ajngáa gua̱ba̱ʼ, atayáá ga̱jma̱ʼ bi̱ narasngá xkri̱da ndrígóo mbá bi̱ naʼdu ga̱jma̱a̱ araxnáá tsiakii mbaʼyoo ndiéjunʼ rí eʼniuu mingíjyúuʼ maʼni (Mt 13:18-23).

• Aratháán ga̱jma̱a̱ gamajkhu náa numuu rí matatsiʼñáʼ rarasngáá ga̱jma̱a̱ numuu Biblia.

• Aratháán rí mi̱dxu̱ʼ gátaya mbóo mbiʼi ga̱jma̱a̱ matanigajmaa mbu̱júu̱ ga̱jma̱ʼ á mu ikhaa nagíʼ naʼni rí nijmañuu.

NDA̱WA̱Á RÍ NITAYÁÁ VIDEO, ATRIʼÑA̱A̱ GRAXE̱ RÍGI̱:

• Ndiéjunʼ eʼyoo publicador náa bi̱ naʼsngóo índo̱ naʼtámíjná ga̱jma̱a̱, rí tségíʼ maʼni rí nandoo Dios xá.

• Ndiéjunʼ niʼni publicador mu mambáyúu bi̱ naʼsngóo makro̱ʼo̱ʼ rí gíʼmaa mariʼkhu̱u̱ vida ndrígóo xá.

• Xú káʼnii niʼni publicador mu maʼthúu̱n bi̱ naʼsngóo rí nda̱wa̱á maʼnigajmáʼ ga̱jma̱a̱ mbu̱júu̱ xá.