XÓO KUWÁANʼ BI̱ NI̱NDXU̱LÚ CRISTIANOS

Guraʼwíí májánʼ xú káʼnii gúʼni gagimijná

Náa numuu gíʼmaa muraʼwíí májánʼ xú káʼnii muʼni gagimijná rá. Numuu rí índo̱ guraʼwíí película, ajmúú, Internet, libro o gitsíin, kuwáanʼ ruraʼwíí rí mundríyaaʼ náa ku̱ma̱ ndrígúlú. Rí nuraʼwíí nuʼni nakujmaa xóo ni̱ndxu̱lú. Phú ngíná rí mbiʼi xúgi̱, numuu dí rígá mbaʼa xóo muʼni gagimijná mú, tsénigu̱u̱ʼ Jeobá (Sl 11:5; Gál 5:19-21). Ikha jngó, náa Biblia naʼthúlúʼ rí mundxaʼwamíjna̱ náa rí naniguʼ Jeobá (Flp 4:8).

NDA̱WA̱Á RÍ NITAYÁÁ VIDEO NDIÉJUNʼ GÁNDOO GÁNI GAGIMINAʼ GA̱JMA̱A̱ RÁ. ATRIʼÑA̱A̱ GRAXE̱ RÍGI̱:

Ndiéjunʼ rí naʼni mbríguii ga̱jma̱a̱ bi̱ nixmijná náa Roma nákha wajyúuʼ tikhu náa rí xóo muʼni gagimijná dí rígá mbiʼi xúgi̱ rá.
Xú káʼnii gándoo gúni a̱ngiu̱lú bi̱ kuwa náa congregación mu mumbañún jiáma muraʼwíí xú káʼnii guni gagimijná rá.
Xú káʼnii embáyulú Romanos 12:9 mu muraʼwíí xú káʼnii gúʼni gagimijná rá.
Ndiéjunʼ dí rígá mijngii náa kuwáanʼ rí nanigu̱u̱ʼ Jeobá, náa rí ikháanʼ ma̱ndoo muʼni gagimijná rá.

RÍ MUʼNI GAGIMIJNÁ NÁA RÍ GAKHI̱I̱ GA̱JMA̱A̱ NÁA DÍ RAGÁKHÍI

Rí mbiʼi xúgi̱, rígá mbaʼa náa muʼni gagimijná dí ragákhíi. Xóo películas, libros ga̱jma̱a̱ rí nanújngoo náa televisión ikhí nakujmaa xú káʼnii eni mbaʼin xa̱bu̱, náa rí ikháanʼ i̱ndó mutrigáanʼ mbuʼyáá. Mú, rí xóo muʼni gagimijná ragákhíi na̱nguá má ra̱májánʼ nindxu̱u̱, mú mbaʼin naguánu nduyáá rí matani gagiminaʼ gakhi̱i̱ nayambáá itháan. Tikhun xa̱bu̱ nuni gagimijná índo̱ nudi̱i̱ ajua̱nʼ o nuxnííʼ. Eʼwíínʼ nanigu̱u̱nʼ magún náa paʼtati̱ga̱ náa ma̱ndoo mutsíin, rí magún i̱mba̱ níʼkhá o rí magún náa mañu. Tséʼniuu asndu xú káʼnii má gánindxu̱u̱ rí xóo muʼni gagimijná ga̱jma̱a̱, guʼni “xúgíʼ rígi̱ mu maʼga̱ gamajkhu náa Dios” (1Co 10:31).