Tsumáá gúʼni mu xúʼthá ajngáa dí ragájkhun

Rí mbiʼi xúgi̱ mbaʼin xa̱bu̱ najmún mbaʼa ajua̱nʼ xóo radio, televisión, Internet mu maʼga̱nú noticias náa mbaʼin wéñuʼ xa̱bu̱. Mú, ikháanʼ bi̱ nduʼyamajkuíí ‹Dios gajkhun› tsíyulú rí muʼni mawári̱go̱o̱ ajngáa dí ragájkhun (Sl 31:5; Éx 23:1). Migamíi maʼni gawúunʼ eʼwíinʼ rí gúʼthúún, mu ma̱ndoo mbuʼyáá á mu gajkhun nindxu̱u̱ mbá información guraximíjna̱:

• Lá makumulúʼ kuʼyáá bi̱ niʼthí ráʼ. Rígáa má bi̱ niʼthí tseʼyoo májánʼ xóo phú nirígá rá. Numuu rí xóo naʼthí mbáa, imba̱a̱ nagrígu̱u̱ itháan. Ikha jngó tsumáá gíʼmaa mu̱ʼni̱ á mu tséʼyáá náa phú ni̱ʼkha̱ información. Bi̱ kuya̱ edxu̱u̱ náa congregación gíʼmaa mbuyáá á mu gajkhun nindxu̱u̱ mbá información, raʼkháa gáʼni rí nduwaʼ ni̱ndxu̱u̱.

• Lá maʼni gachúu mbiʼyuu mbáa ráʼ. Á mu xúʼko̱, ragíʼmaa muʼthá (Pr 18:8; Flp 4:8).

• Lá ma̱ndoo matanimbaaʼ ráʼ. Tsumáá gátani ga̱jma̱a̱ tikhu historias o experiencias dí ragájkhun.

NDA̱WA̱Á RÍ NITAYÁÁ VIDEO ¡XÁTANI XTUJTAA!, ATRIʼÑA̱A̱ GRAXE̱ RÍGI̱:

• 

  Xó má eʼthí náa Proverbios 12:18, nguáthá mba̱a̱ eʼni gawúunʼ mbáa rí nuʼthá rá.

• 

  Xú káʼnii embáyulú rí naʼthí náa Filipenses 2:4 mu mbuʼyáá májánʼ xú káʼnii gúʼthúún eʼwíinʼ rá.

• 

  Ndiéjunʼ gíʼmaa mu̱ʼni̱ á mu mbáa naʼthúlú ajngáa rí tséyambáá o rí naʼni gawúunʼ eʼwíinʼ rá.

• 

  Nákha xóó tsegíʼdi̱i̱ muʼthá ga̱jma̱a̱ numún eʼwíinʼ xa̱bu̱, ndiéjunʼ gíʼmaa murajximíjna̱ rá.