XÓO KUWÁANʼ BI̱ NI̱NDXU̱LÚ CRISTIANOS
Náa asamblea rí ajtsú mbiʼi nandoo nusngajmá ngajua
Náá numuu rí nanigulúʼ wéñuʼ asamblea dí ajtsú mbiʼi rá. Numuu rí ikhí nandoo nuxnáá gamajkhu Jeobá gajmiúlú mbaʼin wéñuʼ a̱ngiu̱lú xó má nini̱ israelitas nákha wájyúuʼ. Ikhí nundrígú ganitsu rí na̱ʼkha̱ náa Jeobá, mú raʼkháa i̱ndó rúʼko̱, ikhí ma̱ngaa nandoo nakuwáanʼ gajmiúlú bi̱ kúwá náa guʼwúlú ga̱jma̱a̱ bi̱ nambájxu gajmiúlú. Nduʼyamajkuíí wéñuʼ mbiʼi rúʼko̱, ikha jngó nuʼni tsiakimíjna̱ makuwáanʼ mbá najtsú mbiʼi.
Índo̱ nagimbáanʼlu ikhí, xúndxaʼwamíjna̱ i̱ndó rí nandulú makhánulúʼ, gudxa̱ʼwa̱míjna̱ xóo gusngajmá ngajua náa eʼwíinʼ (Gál 6:10; Heb 10:24, 25). Nusngajmá rí naxmiéjunlú kuʼñúún eʼwíinʼ índo̱ nuʼni apartar xílí rí i̱ndó mbaʼyulú mu muguaʼwún o nurmbáʼtáá xkrugua mu manújngoo ndxájulú (Flp 2:3, 4). Ma̱ngaa náa asamblea ma̱ndoo muxkamiin bi̱ mambaxú gajmiúlú. Guʼnimíjna̱ muʼthán mbáa bi̱ tséniʼníiʼ. Ma̱ndoo muʼni rígi̱ nákha xóó tségi̱ʼdu̱u̱ o nda̱wa̱á rí niguámbá programa o índo̱ nagájnulú guphiʼtsu (2Co 6:13). Rí mambaxú gajmiúlú eʼwíinʼ nditháan xátumuu. Índo̱ eʼwíinʼ gúyáá rí nandulú kuʼyamijná mbáa mangiin maʼndún muni ñajuunʼ Jeobá (Jn 13:35).
NDA̱WA̱Á RÍ NITAYÁÁ VIDEO ASAMBLEAS INTERNACIONAL “NGAJUA NDITHÁAN XÁMBÁA”, ATRIʼÑA̱A̱ GRAXE̱ RÍGI̱:
Dí nini̱ a̱ngiu̱lú mu musngajmúún ngajua bi̱ nigún náa asamblea internacional dí nirígá nákha tsiguʼ 2019 rá.
Ndíjkha jngó mbaʼin wéñuʼ ninigu̱u̱nʼ índo̱ ndiyáá rí kúwá mbá jnduʼ ga̱jma̱a̱ rí nandún kuʼyamijná náa xuajñuu Jeobá rá.
Ndiéjunʼ rí itháan nigájnuriyooʼ dí nithi Cuerpo Gobernante ga̱jma̱a̱ numuu ngajua rá.
Dí gándoo matani mu matasnga̱jmá ngajua náa asamblea rá.
Xú káʼnii niyambáá ngajua náa Alemania ga̱jma̱a̱ náa Corea del Sur rá.
Ndiéjunʼ rí gíʼmaa muʼni ikháanʼlu rá.