¡Nirígá rígi̱ ga̱jma̱a̱ mbá xnduʼwá!

A̱jmi̱i̱n wa̱ʼxa̱ʼ nagún kúʼún náa naxtangujua, náa xuajen rí mbiʼyuu Baguio, náa Filipinas. Ndiyáá rí wíji̱ mbá carrito ndrígu̱ún xa̱bi̱i̱ Jeobá, mú na̱nguá nigún gúyáá, ikhí wíji̱ mbáa ndxájulú bi̱ mbiʼyuu Helen ga̱jma̱a̱ mixnduʼwá inuu niʼni índo̱ ndiyáá wa̱ʼxa̱ʼ. Ikhiin nigún kúʼún má xúʼko̱, mú niguanún tsiánguá ga̱jma̱a̱ numuu dí niʼni xnduʼwá inuu Helen.

Índo̱ wa̱ʼxa̱ʼ kúwá ragúun náa guʼwún ga̱jma̱a̱ autobús, ndiyáá mbá letrero náa naʼthí jw.org, dí gíʼma náa Guʼwá Nagimbáanʼ. Ikhú ndiyáá dí ikháá má eʼthí rí ndiyáá náa carrito. Ikhú nájmiin niguájtaa náa autobus ga̱jma̱a̱ ndiyáá calendario náa hora dí narígá reunión náa mixtiʼkhu congregación dí gíʼma náa riejuun Guʼwá Nagimbáanʼ.

Índo̱ nirígá imbo̱o̱ʼ mi̱ʼtsu̱ reunión, a̱jmi̱i̱n wa̱ʼxa̱ʼ bugi̱ nigún náa reunión. Atatsaʼwáminaʼ tsáá ndiyáá ikhí. Ikhaa nindxu̱u̱ ndxájulú Helen, núkhu nirmáʼáan a̱jkiu̱ún dí ikhaa nindxu̱u̱ mbáa xa̱bu̱ xnduʼwáa. Helen naʼthí: “Índo̱ niguwáʼ kanuu náa ikhúúnʼ nimíñúʼ mbá chíʼgíiʼ, numuu rí niku̱mu̱ʼ dí rígá mbá dí raʼkhí ni̱ni̱”. Ikhú a̱jmi̱i̱n wa̱ʼxa̱ʼ bugi̱ nigi̱ʼdi̱i̱ nitháán Helen dí nini̱.

A̱jmi̱i̱n wa̱ʼxa̱ʼ ra̱ʼkhá tháán nidxún dí nikúwá náa reunión ga̱jma̱a̱ rí niniʼniunʼ a̱ngiu̱lú, nikumu̱ún rí asndu xóo náa guʼwún kúwá. Ma̱ngaa índo̱ ndiyáá dí eʼwíinʼ a̱ngiu̱lú nunikaʼwi̱i̱ náa Guʼwá Nagimbáanʼ índo̱ niguámbu̱u̱n niguáʼdáá reunión, wa̱ʼxa̱ʼ bugi̱ nirajxu̱u̱n a̱ngiu̱lú á mu ma̱ndoo mumbañún. Mbáa dí ikhaa xúgi̱, nánguá xtáa náa filipinas, mú imba̱a̱ na̱jkha̱ má xúʼko̱ reunión ga̱jma̱a̱ nigíʼdu̱u̱ niʼnigajmaa Biblia. ¡Nirígá xúgíʼ rígi̱ ga̱jma̱a̱ mbá xnduʼwá!