Bi̱ nindxu̱lú xa̱bi̱i̱ Jeobá nandulú kuʼyáá dí májánʼ

1. Ndiéjunʼ tsáʼkhá niraʼnuu José ga̱jma̱a̱ ndiéjunʼ niʼni xá.

JOSÉ a̱ʼdióo Jacob, niraʼnuu mbá tsáʼkhá mingíjyúuʼ. Mbáa a̱ʼgu̱ niʼthúu̱n: “Atabáaʼ ga̱jma̱á nindxu̱ʼ”. Maski ajndu a̱ʼgu̱ buʼko̱ ninindxu̱u̱ a̱ʼgiu̱u̱ Potifar mbáa xa̱bu̱ bi̱ nambáyúu. José táʼni dí niʼthúu̱n. Mbáa ma̱ndoo maraximínáʼ. Náá numuu dí José na̱nguá nibóo̱ʼ ga̱jma̱a̱ xá. Numuu dí Potifar ndawa̱a̱ má ikhí ga̱jma̱a̱ José nindxu̱u̱ mbáa bi̱ nambáyúu. Ma̱ngaa ikhaa ma̱ndoo maʼni gínáa á mu tséʼni dí naʼthúu̱n maski ajndu xúʼko̱, José táʼni dí niʼthúu̱n. Náá numuu rá. Ikhaa niʼthí. “Xú káʼnii gándoo gáni̱ dí ra̱májánʼ ga̱jma̱a̱ makuʼdáminaʼ aʼkhá náa inuu Dios rá.” (Gén. 39:7-12.)

2. Ndíjkha dí José ndiʼyoo dí Dios ndaʼyoo dí mata̱ba̱a̱ʼ ga̱jma̱a̱ʼ mbáa nindxu̱u̱ mbá aʼkhá rá.

² Ndíjkha dí José ndiʼyoo dí Dios ndaʼyoo dí nindxu̱u̱ ra̱májánʼ kayuuʼ dí mata̱ba̱a̱ʼ ga̱jma̱a̱ʼ mbáa rá. Tígo̱o̱ xóó imbá 200 tsiguʼ dí majuiʼnirámáʼ Xtángoo dí nikánáa Moisés, náa naʼthí: “Ragíʼmaa mata̱ba̱a̱ʼ ga̱jma̱a̱ʼ bi̱ tíyáa” (Éx. 20:14). Mú dí nijmañuu José ga̱jma̱a̱ numuu Jeobá nimbáyúu mu mbaʼyoo xú káʼnii endxa̱ʼwáminaʼ Dios ga̱jma̱a̱ numuu dí mata̱ba̱a̱ʼ ga̱jma̱a̱ʼ bi̱ tíyáa. Mbá xkri̱da, ikhaa ndiʼyoo dí Dios niʼnii mbáa xa̱biya̱ ga̱jma̱a̱ a̱ʼgu̱ mu mudamijná. Ma̱ngaa niʼdxawun xú káʼnii Jeobá nirikhúún a̱jmi̱i̱n reyes bi̱ nindúún mubúúnʼ gajmiún Sara bi̱ nindxu̱u̱ xíñii egee. Xúʼko̱ kayuuʼ má niʼni mu mambáyúu Rebeca ma̱ngaa, a̱ʼgiu̱u̱ Isaac (Gén. 2:24; 12:14-20; 20:2-7; 26:6-11). Xúgíʼ rígi̱ niʼni dí José mbaʼyoo ndiéjunʼ nindxu̱u̱ dí májánʼ ga̱jma̱a̱ dí ra̱májánʼ eʼyoo Dios. Numuu dí ra̱ʼkhá tháán eyoo kaʼyoo Jeobá ma̱ngaa nindoo kaʼyoo ikha ndrígóo ikha jngóo nixtáa xawii mu maʼnimbo̱o̱.

3. Ndiéjunʼ gúʼyáá náa artículo rígi̱ rá.

³ Lá nandaaʼ xtayáá ikháán dí májánʼ eʼyoo Dios ráʼ. Xúʼko̱, xúgiáánʼ nindxu̱lú xa̱bu̱ aʼkhá, á mu tséñawumíjna̱lú mbuʼyáá ma̱ngáánʼ ndiéjunʼ nindxu̱u̱ rí májánʼ ga̱jma̱a̱ dí ra̱májánʼ xó má eʼyoo numbaaʼ rígi̱ (Is. 5:20; Rom. 12:2). Ikhaa jngóo mbuʼyáá ndiéjunʼ nindxu̱u̱ dí májánʼ ga̱jma̱a̱ ndíjkha jngóo dí májánʼ maʼndulú kuʼyáá, nda̱wa̱á mbuʼyáá mbá ajtsú enii dí ma̱ndoo mu̱ʼni̱ mu maʼndulú kuʼyáá itháan ikha dí na̱ʼkha̱ náa Jeobá.

NDIÉJUNʼ NINDXU̱U̱ DÍ MÁJÁNʼ EʼYOO DIOS RÁ.

4. Ndiéjunʼ dí tsénigu̱u̱ʼ Dios xóo eguma rá.

⁴ Índo̱ Jesús nixtáa náa tsu̱du̱u̱ Ku̱ba̱ʼ, ndxajkun bi̱ kuya̱ edxu̱u̱ nikumu̱ún dí nindxu̱ún míjíinʼ ga̱jma̱a̱ dí nditháan tsikiéʼkún. Mú Jesús niʼthún ndiéjunʼ gúgiʼníí numuu dí nuni̱ gínii eʼwíinʼ ga̱jma̱a̱ ikhiin endri̱ga̱ ikha ndiéjunʼ nindxu̱u̱ rí májánʼ ga̱jma̱a̱ dí ra̱májánʼ (Ecl. 7:16; Luc. 16:15). Xúʼko̱ má dí mbiʼi xúgi̱ ma̱ngaa, kúwi̱i̱n xa̱bu̱ bi̱ kaʼniún xó má ikhiin. Naku̱mu̱ún rí nditháan tséni dí ra̱májáanʼ, ma̱ngaa dí ikhiin nindxúu̱n itháan míjíinʼ ki xóo eʼwíinʼ ga̱jma̱a̱ i̱ndó dí raʼkhí ethi jma̱a̱ numún. Xúgíʼ rígi̱ Jeobá tsénigu̱u̱ʼ kayuuʼ ga̱jma̱a̱ tséguma nditháan wáa dí májánʼ eʼyoo ikhaa.

5. Xó má eʼthí náa Biblia, ndiéjunʼ eyoo gáʼthúu̱n dí mani̱ndxa̱a̱ʼ májáanʼ xa̱bu̱ rá. Arathá tikhuu xkri̱da.

⁵ Dí mu̱ʼni̱ dí jmbu nindxu̱u̱ mbá cualidad dí mitsaanʼ. Nandoo gáʼthúu̱n dí matani̱ dí májánʼ xó má Jeobá eyoo. Náa Biblia ajngáa dí “jmbu” nandoo gáʼthúu̱n dí maraxtaa xó má Jeobá enda̱ʼa̱. Mbá xkri̱da, Jeobá niʼtañajúnʼ bi̱ nagujua̱ dí gíʼmaa ‹mugiewan mbájmbu ga̱jma̱a̱ májánʼ› (Deut. 25:15). Mbáa cristiano bi̱ nanigu̱u̱ʼ maʼni dí májánʼ náa inuu Dios ragíʼmaa maʼthí nduwaʼ náa xúgíʼ ñajunʼ dí gíʼdoo. Xa̱bu̱ bi̱ nanigu̱u̱ʼ maʼni dí nindxu̱u̱ májánʼ eʼyoo Jeobá tsénigu̱u̱ʼ dí nuni̱ gíníin eʼwíinʼ. Mu Dios manigu̱u̱ʼ xúgíʼ dí gáʼni, maraʼwíí maʼni má xúʼko̱ xó má Jeobá e̱nda̱ʼa̱ (Col. 1:10).

6. Náá numuu rí ma̱ndoo makumulú kuʼyáá ikha dí Jeobá nagrui̱ga̱ rá. (Isaías 55:8, 9.)

⁶ Náa Biblia naʼthí rí náa Jeobá ‹rígá dí jmbu›. Rúʼko̱ eʼyoo gáʼthúu̱n dí ikhí phú e̱ʼkha̱ dí jmbu (Jer. 50:7). Numuu dí ikhaa Niʼniwáánʼlú i̱ndó ikhaa kaʼyoo magruiga̱ ikha dí májánʼ ga̱jma̱a̱ dí ra̱májánʼ. Numuu dí nindxu̱u̱ jmbii ga̱jma̱a̱ naʼngo̱o̱ ndaʼyoo itháan ki xóo naʼngu̱lú nduʼyáá ikháánʼ, numuu dí ragíʼdoo aʼkhá (Prov. 14:12; atraxnuu Isaías 55:8, 9).b Mú, lá ma̱ndoo makuwáánʼ xó má ikhaa e̱nda̱ʼa̱ xáʼ. Xúʼko̱, numuu dí kiʼniwáánʼ xó má ikhaa, ma̱ngaa ra̱ʼkhá tháán nanigulúʼ mu̱ʼni̱. Dí nandulúʼ kuʼyáá Anu̱lú rúʼko̱ naxkajxáánʼ dí mbuʼyaridáá xó má eʼngo̱o̱ (Efes. 5:1).

7. Ndíjkha dí gíʼdoo numuu marigá ikha rá. Atagíʼ mbá xkri̱da.

⁷ Índo̱ nuʼnimbulú ikha dí Jeobá nagrui̱ga̱, ndiéjunʼ nindxu̱u̱ dí májánʼ ga̱jma̱a̱ dí ra̱májánʼ, nakuwáanʼlú má májánʼ ikháánʼ. Guʼyáá náá numuu. Mbá xkri̱da, á mu náa mbá hospital, mámbáa médico mámbáa enfermera gúni̱ thanún xa̱bu̱ xó má ekro̱ʼo̱o̱ mámbáa, rúʼko̱ gáʼni dí tikhun makhañún. Nakujmaa kaʼwu dí muʼnimbulú ikha dí rígá nañewu̱nlú, ikhaa má kayuuʼ erígá ga̱jma̱a̱ ikha ndrígóo Dios nindxu̱u̱ mu makuwáanʼlu májánʼ má ikháán.

8. Ndiéjunʼ gúndrígúu bi̱ nuni̱ dí májánʼ rá.

⁸ Jeobá naʼni tsajkurámiinʼ bi̱ nuni̱ tsiakimíjna̱ mu munimbu̱u̱n ikha ndrígóo. Ikhaa nakudaminaʼ: “Dí Xa̱bu̱ bi̱ nuni̱ rí májánʼ mundrigúu ku̱ba̱ʼ ga̱jma̱a̱ makuwá kámuu mbiʼi ikhí” (Sal. 37:29). Lá naʼngo̱o̱ natatsaʼwáminaʼ xóo gákuwáanʼlú índo̱ xúgíinʼ xa̱bu̱ gúnimbu̱u̱n ikha ndrígóo Jeobá ráʼ. Makuwáánʼlú gagi ga̱jma̱a̱ tsímáá ma̱ngaa mbá kambáxulú. Jeobá nandoo dí ikháán mangáán maraxtaa xúʼko̱, na̱jkua̱nulúʼ nduʼyáá dí gíʼdoo wéñuʼ numuu dí maʼndulú kuʼyáá dí gajkhun. Ndiéjunʼ gíʼmaa mu̱ʼni̱ mu maʼndulú kuʼyáá itháan cualidad rígi̱ rá. Guyáá ajtsú enii dí ma̱ndoo mu̱ʼni̱.

RÍ MA̱NDOO MU̱ʼNI̱ MU MAʼNDULÚ KUʼYÁÁ ITHÁAN IKHA NDRÍGÓO JEOBÁ

9. Ndiéjunʼ gámbáyulú mu maʼndulú kuʼyáá dí májánʼ rá.

⁹ Timbá, gaʼndulúʼ kuʼyáá bi̱ naxnúlú ikha. Á mu maʼndulú kuʼyáá dí míjiánʼ. Gíʼmaa maʼndulú kuʼyáá bi̱ naʼthúlú ndiéjunʼ nindxu̱u̱ dí májánʼ ga̱jma̱a̱ dí ra̱májánʼ. Índo̱ gáʼndulúʼ kuʼyáá itháan Jeobá rúʼko̱ gáʼni dí maʼndulú makuwáánʼ xó má ikhaa e̱nda̱ʼa̱. Á mu Adán ga̱jma̱a̱ Eva nindúún kuyáá Jeobá nditháan xákiéʼkhúún náa ikhaa (Gén. 3:1-6, 16-19).

10. Ndiéjunʼ niʼni Abrahán mu makro̱ʼo̱o̱ xóo káʼnii endxa̱ʼwáminaʼ Jeobá rá.

¹⁰ Tsíyulú mu̱ʼni̱ xó má niʼni Adán ga̱jma̱a̱ Eva mu xúʼko̱ xákiéʼkúlú xó má ikhiin nikiéʼkhún. Gíʼmaa muʼninuʼwíinʼ itháan májánʼ Jeobá, maʼndulú kuʼyáá cualidad ndrígóo ga̱jma̱a̱ muʼnimíjna̱ makru̱ʼu̱lú xó má ikhaa endxa̱ʼwáminaʼ, rúʼko̱ gáʼni dí maʼndulú kuʼyáá itháán. Guʼyáá ga̱jma̱a̱ numuu Abrahán, ikhaa nindoo kaʼyoo wéñuʼ Dios maski ajndu niʼniuu mingíjyúuʼ makro̱ʼo̱o̱ dí niraʼwíí maʼni Jeobá ikhaa niʼnimbo̱o̱ má xúʼko̱ kaʼyoo. Ikhaa niʼni xúgíʼ xó má eʼngo̱o̱ mu maniniiʼ májánʼ. Mbá xkri̱da, xú káʼnii niʼni índo̱ ndiʼyoo dí Jeobá niraʼwíí maʼnigámbáa Sodoma ga̱jma̱a̱ Gomorra xá. Nákha ginii nimíñuu dí “Bi̱ nindxu̱u̱ Juez náa xúgíʼ tsu̱du̱u̱ ku̱ba̱ʼ” magudíin bi̱ míjíinʼ ga̱jma̱a̱ bi̱ ra̱míjíinʼ. Nikumu̱u̱ rí Dios nditháan má xáʼni rúʼko̱ ikha jngóo nirajxu̱u̱. Jeobá nixnátiʼñaminaʼ niʼdxawuun ga̱jma̱a̱ niriʼñuu. Nda̱wa̱á dí niʼtámijná ga̱jma̱a̱ Abrahán ni̱jkha̱nú ndiʼyoo dí Jeobá ndaʼyoo dí gíwánʼ náa a̱jkiu̱ún xúgíinʼ xa̱bu̱ ga̱jma̱a̱ dí ikhaa nditháan xáʼni dí mumíniiʼ bi̱ nda̱a̱ aʼkhúún gajmiún bi̱ guáʼdáá aʼkhúún (Gén. 18:20-32).

11. Xú káʼnii nisngájma Abrahán dí nindoo kaʼyoo ga̱jma̱a̱ nikumu̱u̱ kaʼyoo Jeobá rá.

¹¹ Índo̱ niʼtámíjná Abrahán ga̱jma̱a̱ Jeobá numuu Sodoma ga̱jma̱a̱ Gomorra nimbáyúu wéñuʼ. Niʼni dí ma̱ndoo kaʼyoo ga̱jma̱a̱ mbaʼyamajkuu itháan anu̱u̱. Tsiguʼ nda̱wa̱á, Abrahán niraʼnuu mbá dí mingíjyúuʼ wéñuʼ náa ndiyóoʼ masngájma á mu dí gajkhun naku̱mu̱u̱ kaʼyoo Dios. Jeobá nindo̱ʼo̱o̱ dí matsikárámaaʼ a̱ʼdióo bi̱ nandoo kaʼyoo Isaac, mú Abrahán niʼniniiʼ má májánʼ wéñuʼ Dios ikhú ikha jngóo nimbá tárajxu̱u̱. Niʼniratamina’ mu maʼni dí Jeobá nindo̱ʼo̱o̱, maski má rúʼko̱ tánindxu̱u̱ gua̱ba̱ʼ kayuuʼ, ikhaa nindxa̱ʼwáminaʼ xúgíʼ dí nijmañuu náa Jeobá. Ikhaa nijkha̱nú ndiʼyoo rí nditháan xáʼni mbá dí ra̱májánʼ o dí raʼkhí, xó ma niʼthí apóstol Pablo. Abrahán ni̱jkha̱nú ndiʼyoo dí Jeobá ma̱ndoo maʼnigabi̱i̱ Isaac (Heb. 11:17-19). Gajkhun ninindxu̱u̱ rúʼko̱ numuu dí Jeobá nikudaminaʼ dí náa Isaac maguwáʼ mbaʼin wéñuʼ xa̱bu̱, ga̱jma̱a̱ nákhá ikhú ikhaa xóó na̱nguá gíʼdiin e̱ji̱n. Numuu rí Abrahán nindoo kaʼyoo Jeobá, ndiʼyoo gajkhun dí ikhaa maʼni má xúʼko̱ dí jmbu. Ikhaa nigiʼdoo fe ga̱jma̱a̱ niʼnimbo̱o̱ kaʼyoo anu̱u̱, maski ajndu mingíjyúuʼ wéñuʼ ninindxu̱u̱ (Gén. 22:1-12).

12. Xú káʼnii gándoo gúʼyaridáá Abrahán rá. (Salmo 73:28.)

¹² Xú káʼnii gándoo gúʼyaridáá Abrahán rá. Ndayóoʼ dí muniʼniiʼ itháan májánʼ Jeobá. Á mu nu̱ʼni̱ rígi̱ mambajxúlú itháan májánʼ gajmiulúʼ ikhaa ga̱jma̱a̱ maʼndulú kuʼyáá itháan (atraxnuu Salmo 73:28).c Ma̱ngaa muʼniratháá ku̱ma̱ ndrígúlú mu mundxaʼwamíjna̱ xó má dí Dios endoo (Heb. 5:14). Índo̱ mbáa gátsudáánʼ muʼnilú mbóo dí raʼkhí, muʼtháán dí xúʼni̱. Ni xúndxaʼwamíjna̱ nimbá dí maʼni magawúuʼ Anu̱lú o maʼni dí xámbájxu̱lú gajmiúlú ikhaa. Ndiéjunʼ gándoo mu̱ʼni̱ itháan mu musngajmá dí nandulú kuʼyáá dí májánʼ eʼyoo Dios rá.

13. Ndiéjunʼ gúʼni̱ mu mbuʼyáʼ má xúʼko̱ rí májánʼ rá. (Proverbios 15:9.)

¹³ Raga̱jma̱: Guʼnimíjna̱ má xúʼko̱ maʼndulú kuʼyáá rí májánʼ. Rí mu̱ʼni̱ mbaja̱a̱ má xúʼko̱ ngajua ndrígúlú náa ikha ndrígóo Jeobá nindxu̱u̱ xóo dí mu̱ʼni̱ ejercicio mu maʼni gújkiáánʼlú. Ndayóoʼ dí muríyaʼ tsiakii mámbá mbiʼi. Jeobá nakro̱ʼo̱o̱ kaʼyulú ga̱jma̱a̱ tségiʼthu̱u̱n dí mu̱ʼni̱ itháan rí xáʼngulú gúʼni̱ (Sal. 103:14). Ikhaa naʼthúlú rí “nandoo kaʼyoo bi̱ ndayáʼ má xúʼko̱ dí májánʼ” (atraxnuu Proverbios 15:9).d Lá ragájkhun dí á mu mbáa nandoo maʼni itháan ñajunʼ Dios tségiminaʼ asndu maxkamaa xáʼ. Xúʼko̱ má kayuuʼ eʼnilú dí mbuʼyáʼ dí májánʼ ma̱ngaa. Ga̱jma̱a̱ Jeobá má gámbáyulú mu maʼngulú mu̱ʼni̱ rí májánʼ (Sal. 84:5, 7).

14. Ndiéjunʼ eyoo gáʼthúu̱n “ajua̱nʼ dí nañewu̱u̱n tsuxtulú rí nindxu̱u̱ jmbu” ga̱jma̱a̱ ndíjkha rí ndayúlú rá.

¹⁴ Jeobá naʼni marmáʼáan a̱jkiu̱lú dí mu̱ʼni̱ rí májánʼ dí ikhaa naʼthúlú na̱nguá má mingíjyúuʼ (1 Juan 5:3). Rí mu̱ʼni̱ rígi̱ nañewu̱nlú, ga̱jma̱a̱ ndayúlú mu makuwáánʼ xúgíʼ mbiʼi. Gundxaʼwamíjna̱ ga̱jma̱a̱ ajua̱nʼ dí na̱ʼkha̱ náa Dios dí niʼthí Apóstol Pablo (Efes. 6:14-18). Ndiéjunʼ eñawu̱u̱n a̱jkiu̱u̱n mbáa cristiano rá. Ikhaa nindxu̱u̱ “ajua̱nʼ dí nañewu̱u̱n tsúxtulu rí nindxu̱u̱ jmbu”, dí nandoo gáʼthúu̱n, ikha rí na̱ʼkha̱ náa Jeobá. Xó má ajua̱nʼ dí nañewu̱u̱n tsuxtulú nañewu̱u̱n a̱jkiu̱lú, ikha ndrígóo Jeobá nañewu̱u̱n xóo xa̱bu̱ ni̱ndxu̱lú ikha jngóo gíʼdoo wéñuʼ numuu. Dí muguaʼdáá ajua̱nʼ dí nañewu̱u̱n tsuxtulú rí nindxu̱u̱ jmbu” (Prov. 4:23).

15. Xkáʼnii eʼgíʼ ajua̱nʼ dí nañewu̱u̱n tsuxtulú rí nindxu̱u̱ jmbu rá.

¹⁵ Xkáʼnii eʼgíʼ ajua̱nʼ dí nañewu̱u̱n tsuxtulú rí nindxu̱u̱ jmbu rá. Índo̱ gúraʼwíí mu̱ʼni̱ mámbá mbiʼi rí Dios nanigu̱u̱ʼ. Nákha xóó tséraʼwíí dí muʼthá, ajmúú dí muʼdxawíín, dí mbuʼyáá mu mu̱ʼni̱ gagimijnálú o libro dí muraxnuu, gurajximíjna̱: Ndiéjunʼ dí gágiwa̱nʼ náa a̱jkiu̱nʼ rá. Lá nindxu̱u̱ mbóo dí Jeobá nanigu̱u̱ʼ ráʼ. O lá ma̱ni̱ mbá dí ikhaa tsénigu̱u̱ʼ che̱ʼ. Xóo dí mata̱ba̱a̱ʼ ga̱jma̱a̱ʼ mbáa, náa nagiʼdu̱u̱n xa̱bu̱, rí manigua̱a̱ʼ maraʼdáá ga̱jma̱a̱ dí maxmiéjuanʼ xtayaminaʼ i̱ndó ikháánʼ ráʼ. (Filip. 4:8). Á mu dí gúraʼwíí mu̱ʼni̱ nindxu̱u̱ dí nanigu̱u̱ʼ Jeobá, ikha ndrígóo mañewu̱u̱n a̱jkiu̱lú náa dí ra̱májánʼ.

16, 17. Xú káʼnii embáyulú Isaías 48:18 mu mbuʼyáá dí maʼngulú muʼnimbulú má xúʼko̱ ikha ndrígóo Jeobá rá.

¹⁶ Xí naxmiéjunlú dí xáʼngulú gúʼnimbáníí má xúʼko̱ ikha ndrígóo Jeobá rá. Gundxa̱ʼwa̱míjná dí niʼnimbríguíi Jeobá ga̱jma̱a̱ rígi̱, nuxkamaa náa Isaías 48:18 (atraxnuu).e Jeobá nakudaminaʼ dí jmbu dí natani̱ mani̱ndxu̱u̱ “xóo olas ndrígóo lamáa”. Gundxa̱ʼwa̱míjná dí kuajún náa rawuunʼ lamáa nduʼyáá xú káʼnii tsigui̱jui̱i̱ e̱ʼkha̱ ola. Ikhú tséndxaʼwa̱míjna̱lú dí mbá mbiʼi maniñu̱u̱ʼ ra̱ʼkha̱ ola numuu dí niʼníí má tsiguʼ eʼni má xúʼko̱ ola ga̱jma̱a̱ maʼni má xúʼko̱.

¹⁷ Ndiéjunʼ gíʼmaa mu̱ʼni̱ mu jmbu dí gúʼni̱ mani̱ndxu̱u̱ xóo ola ndrígóo lamáa rá. Índo̱ gúraʼwíí mbá dí mu̱ʼni̱ ginii gundxa̱ʼwa̱míjná ndiéjunʼ dí Jeobá nandoo mu̱ʼni̱, nda̱wa̱á dí rúʼko̱ gúraʼwíí dí mu̱ʼni̱. Maski ajndu mingíjyúuʼ nindxu̱u̱ mbóoʼ dí gúraʼwíí mu̱ʼni̱, mú Anu̱lú maxtáa má xúʼko̱ xawii mambáyulú mu muʼnimbulú má xúʼko̱ ikha ndrígóo (Is. 40:29-31).

18. Ndíjkha dí ragíʼmaa muʼthá numún eʼwíinʼ ga̱jma̱a̱ numuu xó má májánʼ kumulú ikháánʼ rá.

¹⁸ Ragajtsú: Guniʼñááʼ dí Jeobá gáʼnimbánuu ga̱jma̱a̱ numún eʼwíinʼ. Maski ajndu nuʼnimíjna̱ muʼnimbulú ikha ndrígóo Jeobá, xáʼyoo muʼthá numún eʼwíinʼ ní makumulú dí ikháánʼ nu̱ʼni̱ itháan dí májánʼ ki xóo ikhiin. Tséʼyáá dí ikháánʼlú kuaʼdáá itháan numulú dí asndu makumulú dí kaʼyulú muʼthá numún eʼwíinʼ ga̱jma̱a̱ numuu xó má májánʼ kumulú ikháánʼ. Nduʼyáálu dí Jeobá nindxu̱u̱ “Juez náa xúgíʼ tsu̱du̱u̱ ku̱ba̱ʼ” (Gén. 18:25). Ikhaa na̱nguá nigruigáánʼ mu muʼnimbáníí numún a̱ngiu̱lú. Jesús niʼtáñajunlú: “Xútha rí guáʼdáá aʼkhúún a̱ngia̱la, mu Dios xáʼthi rí kuaʼdáá aʼkhála mangáanʼ” (Mat. 7:1).f

19. Xú káʼnii nisngájma José dí nikumu̱u̱ kaʼyoo Jeobá dí ikhaa má gáʼni dí jmbu xá.

¹⁹ Gutanga̱ánʼlú ga̱jma̱a̱ xkri̱doo José, ikhaa ni̱jkha̱ mbáa májáanʼ xa̱bu̱. Na̱nguá niʼthí ndiéjunʼ dí gáguáʼníí eʼwíinʼ maski ajndu nini̱i̱ dí ra̱májánʼ. A̱ngui̱i̱n nini̱ gínáa nigujua̱a̱ mu mani̱ndxu̱u̱ xóo mbáa ñumbáá ga̱jma̱a̱ nitháán anu̱ún dí nikháñúu. Nda̱wa̱á dí José ninindxu̱u̱ mbáa xa̱bu̱ ñajunʼ nixkami̱i̱n a̱ngui̱i̱n, ikhaa ma̱ndoo maʼni gíníi ga̱jma̱a̱ mata̱nga̱a̱ maʼniún xó má nini̱i̱. Ikhaa rúʼko̱ dí nimíñúún a̱ngui̱i̱n dí maʼniún maski ajndu ikhiin nigáwíinʼ a̱jkiu̱ún ga̱jma̱a̱ numuu dí nini̱i̱. Mú José niʼthúún: “Xámiñala, lá ikhúún nindxu̱ʼ Dios ráʼ.” (Gén. 37:18-20, 27, 28, 31-35; 50:15-21.) José ninindxu̱u̱ mbáa xa̱bu̱ wabaaʼ ga̱jma̱a̱ ndiʼyoo dí i̱ndó Jeobá kaʼyoo maʼnimbánuu numún a̱ngui̱i̱n.

20, 21. Ndiéjunʼ gámbáyulú mu xákumulú dí nindxu̱lú itháan májáanʼ xa̱bu̱ ki xóo eʼwíinʼ rá.

²⁰ Xó má José ikháánʼlú ma̱ngaa nuniʼñááʼ dí Jeobá má gáʼnimbánuu numún eʼwíinʼ. Mbá xkri̱da, na̱nguá kumulú dí nduʼyáá náá numuu dí a̱ngiu̱lú nuraʼwíí mbá dí muni̱. Numuu dí tséʼngulú gúʼyáá ndiéjunʼ dí rígá náa awúu̱n a̱jkiu̱ún, i̱ndó Jeobá naʼngo̱o̱ ndaʼyoo ndiéjunʼ dí endoo maʼni (Prov. 16:2). Ikhaa nandoo kaʼñúún xúgíinʼ enii xa̱bu̱ tséʼniuu má náa eguwáʼ o náa nigaji̱i̱n. Ikhaa naʼtáñajunlú rígi̱: “Gurmbáʼtáá a̱jkia̱la” (2 Cor. 6:13). Gíʼmaa maʼndulú kuʼñúún xúgíinʼ a̱ngiu̱lú bi̱ nu̱ʼni̱ ñajuunʼ Dios gajmiúlú, raʼkháa muʼthá numún.

²¹ Ní má tséʼthá numún bi̱ na̱nguá kúwi̱i̱n náa congregación (1 Tim. 2:3, 4). Mbá xkri̱da, tséʼthá numún bi̱ kuʼñúún bi̱ na̱nguá kúwi̱i̱n náa dí gajkhun ní má tséndxaʼwamíjna̱ dí nditháan xáguánú mani̱ndxu̱ún Testigos. Á mu nundxa̱ʼwa̱míjnalú rúʼko̱ nuxujxímijnálú ga̱jma̱a̱ nakumulú dí ikháánʼ nindxu̱lú itháan májáanʼ xa̱bu̱ ki xóo eʼwíinʼ. Jeobá xtáa ragíʼthu̱u̱n xóó dí xúgíinʼ xa̱bu̱ náa “xúgíʼ xuajen” murtangamijnáá (Hech. 17:30). Nditháan xámbumulú dí Jeobá ndaʼyoo dí nindxu̱u̱ ra̱májáanʼ mbáa bi̱ naku̱mu̱u̱ dí itháan májáanʼ ki xóo eʼwíinʼ.

22. Ndiéjunʼ exkajxi̱i̱n matani̱ dí májánʼ ikháán rá.

²² Á mu nu̱ʼni̱ dí májánʼ dí Jeobá naʼthí, makuwáanʼlu gagi ga̱jma̱a̱ manindxu̱lú mbá xkrida náa eʼwíinʼ. Rúʼko̱ gáʼni dí maʼndún kuyulú ikháánʼ ga̱jma̱a̱ maʼndún kuyáá Dios ndrígúlú. Gaʼndulú má xúʼko̱ “maguma rí jmbu” (Mat. 5:6). Nduʼyáálu gajkhún dí Jeobá ndaʼyoo tsiakii dí nu̱ʼni̱ mámbá mbiʼi mu muʼnimbulú ikha ndrígóo ga̱jma̱a̱ rúʼko̱ eʼni dí maxtáa gagi wéñuuʼ. Maski ajndu náa numbaaʼ rígi̱ narígá itháan dí ra̱májánʼ mú xákanájkulú, garmáʼáan a̱jkiu̱lú dí Jeobá nandoo kaʼñúún bi̱ nuni̱ dí májánʼ (Sal. 146:8).