Xú káʼnii gáraxtaa tsímáá maski ajndu natamíniiʼ rá.

1. a) Ndiéjunʼ nindxu̱u̱ “tsímáá ndrígóo Dios” rá. b) Xú káʼnii eyambáá dí muguaʼdáá rá. (Filipenses 4:6, 7.)

RÍGÁ mbá tsímáá dí tséniʼnuuʼ xa̱bu̱ numbaaʼ. Ikhaa nindxu̱u̱ “tsímáá rí na̱ʼkha̱ náa Dios”, dí naʼni̱i̱ a̱jkiu̱ún xa̱bu̱ bi̱ nambájxúun májánʼ gajmiún anu̱ún bi̱ xtaa mekhuíí. Índo̱ kuaʼdáálú tsímáá ndrígóo Dios, tsémiñúlú (atraxnuu Filipenses 4:6, 7). Kuwáánʼ kambájxu̱lú gajmiúlú bi̱ nandún kuyáá Jeobá bi̱ nindxu̱u̱ mbáa “Dios bi̱ naxná rí tsímáá” (1 Tes. 5:23). Índo̱ nuniʼniiʼ Anu̱lú bi̱ xtáa mekhuíí, nakumulú kuʼyáá ga̱jma̱a̱ nuʼnimbulú, rúʼko̱ nambáyulú muguaʼdáá tsímáá rí na̱ʼkha̱ náa Dios. Ga̱jma̱a̱ tsímáá rúʼko̱ naʼni maʼni̱i̱ a̱jkiu̱lú índo̱ kuwáánʼlú ruraʼníí gamiéjunʼ.

2. Náá numuu rí nduʼyáá rí ma̱ndoo muguaʼdáá tsímáá ndrígóo Dios rá.

² Lá gajkhun nindxu̱u̱ rí ma̱ndoo makuwáánʼ tsímáá índo̱ kuwáánʼlú rumíniiʼ ráʼ. Lá ma̱ndoo rí xáxmiéjunlú wéñuʼ índo̱ naku̱mu̱u̱ mbá nandii o narígá mbá rí tséguaʼthi̱i̱n, nugi̱ʼdu̱u̱n xa̱bu̱ o naguma gínánʼlú ráʼ. Gamiéjunʼ rígi̱ ma̱ndoo maʼnimíñuu asndu tsáá. Mú Jesús nixnún consejo rígi̱ xa̱bi̱i̱: “Xáʼni tsiánguá a̱jkia̱la ga̱jma̱a̱ xámiñalaʼ” (Juan 14:27). Mbaʼin a̱ngiu̱lú nuni̱ xó má niʼthí Jesús. Ga̱jma̱a̱ numuu dí Jeobá nambáñún, nakúwá tsímáá maski ajndu mbaʼa gamiéjunʼ dí nuraʼníí.

GUʼNIMIJNA̱ MAKUWÁÁNʼ TSÍMÁÁ MASKI AJNDU NAKU̱MU̱U̱ MBÁ NANDII

3. Xú káʼnii gándoo gárígú kaʼyulú dí tsímáá índo̱ narígá mbá nandii rá.

³ Índo̱ narígá mbá nandii ma̱ndoo maxtiʼkhuu mbá kayuuʼ xóo kuwáánʼlú. Gundxaʼwamíjna̱lú dí nirígá índo̱ nigi̱ʼdu̱u̱ nandii COVID-19 náa mbaʼin xa̱bu̱. Náa mbá estudio rí niguma, mbaʼin xa̱bu̱ nithi rí índo̱ nixtáa rarígá pandemia niʼniún mingíjyúuʼ munuʼ. Ga̱jma̱a̱ numuu pandemia rígi̱ niʼni rí mbaʼin xa̱bu̱ majmúún wéñuʼ, muwan wéñuʼ iya najngaa ga̱jma̱a̱ majmún droga, ga̱jma̱a̱ dí munigíníin bi̱ kúwá náa guʼwún ga̱jma̱a̱ dí maʼndún muradímíjná ikhiin. Á mu naku̱mu̱u̱ mbá nandii náa ikháán xtaa, xú káʼnii gándoo gátani mu xáxmiéjuanʼ wéñuʼ ga̱jma̱a̱ maraʼdáá tsímáá ndrígóo Dios rá.

4. Náá numuu nakuwáánʼ tsímáá ga̱jma̱a̱ numuu ajngáa rí niʼthí Jesús rí marigá iwáá mbiʼi rá.

⁴ Jesús niʼthí dí índo̱ gáʼni iwáá mbiʼi marigá “nandii asndu náá” má (Luc. 21:11). Índo̱ nduʼyáálú rúʼko̱ nakuwáánʼlú tsímáá. Náá numuu rá. Numuu rí nduʼyáá dí xúʼko̱ má gárígá ikha jngóo tséʼñulú má tsiánguá. Na̱jkha̱ rarígá xó má Jesús niʼthí. ikha jngóo, ikháánʼlú bi̱ kuwáánʼ náa iwáá mbiʼi rígi̱, nuʼnimbulú consejo rí niniñuuʼ Jesús rí niʼthí: “Xámíñálá” (Mat. 24:6).

5. a) Xó má eʼthí Filipenses 4:8, 9, ndiéjunʼ gúnda̱ʼa̱a̱lú Jeobá índo̱ naku̱mu̱u̱ mbá nandii rá. b) Ndiéjunʼ embáyulú rí muʼdxawíín audio ndrígóo Biblia rá.

⁵ Índo̱ naku̱mu̱u̱ mbá nandii, mbáa ikháanʼ maxmiéjunlú wéñuʼ ga̱jma̱a̱ mamiñúlú. Rúʼko̱ dí nigíʼnuu mbáa ndxájulú a̱ʼgu̱ bi̱ mbiʼyuu Desi.b Ndawa̱á dí a̱muu, prímiúu ga̱jma̱a̱ médico ndrígóo nikáñún ga̱jma̱a̱ COVID-19, ikha jngóo Desi nimíñuu rí ma̱ngaa mbayóo nandii ga̱jma̱a̱ ru̱dúu̱ bi̱ nikhi̱i̱ má. Ma̱ngaa nimíñuu dí ni xágiʼdoo ñajunʼ, ga̱jma̱a̱ nirajximínáʼ náá gákánuu mbújkha̱a̱ mu ma̱ʼtsi̱ dí mi̱khu̱ ma̱ngaa rí maʼni numuu guʼwá náa xtáa. Ra̱ʼkhá tháán xmiéjunʼ rí asndu tsíyoo gígú. Mú Desi niʼngo̱o̱ niʼni rí maxtáa tsímáá mbu̱júu̱ʼ. Xú káʼnii niʼni xá. Niʼtákáñuu Jeobá ga̱jma̱a̱ xúgíʼ a̱jkiu̱u̱n mu mambáyúu mandxaʼwáminaʼ rí májánʼ (atraxnuu Filipenses 4:8, 9). Mu maʼdxawuun rí naʼthí Jeobá nagrígú audio ndrígóo Biblia. Ikhaa naʼthí: “Aʼwóo bi̱ naguxnuu naʼni rí xáxmiéjunʼ wéñuʼ ga̱jma̱a̱ marmáʼáan a̱jkiu̱nʼ dí Jeobá naxmiéjuunʼ kaʼyoʼ” (Sal. 94:19).

6. Xú káʼnii embáyulú dí muʼnigajma̱a̱ ga̱jma̱a̱ dí muʼgualú reunión rá.

⁶ Gajkhun má rí índo̱ namidxu̱u̱ mbá nandii mbá nacha̱ naxtiʼkhuu xóo kuwáánʼ. Mú xúniʼñánʼ dí rúʼko̱ maʼni dí muniʼñánʼ ruʼnigajma̱a̱ o dí mu̱ʼgua̱ reunión. Náa iyulú ga̱jma̱a̱ náa video nuxkamaa experiencia ndrígu̱ún a̱ngiu̱lú bi̱ kúwíi̱n ruraʼníí ikhaa kayuuʼ xkujndu mú ikhiin guájun jmbu má xúʼko̱ náa Jeobá (1 Ped. 5:9). Náa reunión nambáyulú muguaʼdáá ku̱ma̱ rí na̱ʼkha̱ náa Biblia ga̱jma̱a̱ ikhí ma̱ndoo muxnún tsiakii eʼwíinʼ ga̱jma̱a̱ mundrígúlú tsiakii mangáánʼ (Rom. 1:11, 12). Á mu nundxaʼwamíjna̱lú xóo Jeobá embáñún xa̱bi̱i̱ bi̱ nandoo káñún, bi̱ namíñún o bi̱ naku̱mu̱ún rí kúwá ndajkuin, fe ndrígúlú maʼni gújkhúʼ ga̱jma̱a̱ xáʼni a̱jma̱ a̱jkiu̱lú dí ikhaa mambáyúlú.

7. Xú káʼnii gándoo gúʼyaridáá apóstol Juan rá.

⁷ Gu̱ʼni̱ asndu xó má eʼngo̱o̱ mu muʼtámijná gajmiúlú a̱ngiu̱lú. Mbá nandii ma̱ndoo maʼni rí xándoo gúʼyamijná gajmiúlú a̱ngiu̱lú. Mbáa ikháanʼ makumulú xóo má nikumu̱u̱ apóstol Juan índo̱ nindoo mbaʼyaminaʼ ga̱jma̱a̱ bi̱ nimbájxu̱u̱ ga̱jma̱a̱ bi̱ mbiʼyuu Gayo (3 Juan 13, 14). Mú ikhaa ndiʼyoo dí xándoo mbaʼyoo mbá nacha̱. Ikha jngóo niʼni xó má niʼngo̱o̱ mu makunguanʼ mbooʼ carta. Á mu xúʼko̱ eguáʼníílú mangáánʼ dí tsíyoo mbuʼyamijná gajmiúlú a̱ngiu̱lú, mbá dí ma̱ndoo mu̱ʼni̱, guʼtáruʼúún o gu̱ʼni̱ mbá videollamada gajmiúlú, mangaa ma̱ndoo muxuʼnguánʼ mbá mensaje inún. Índo̱ nuʼtámijná gajmiúlú a̱ngiu̱lú nayambáá mu xákumulú rí kuwáanʼ ndajkuánʼ ga̱jma̱a̱ nakuwáánʼ itháan gagi. Á mu nakumulú dí naxmiéjunlú wéñuʼ rá. Guʼtámijná gajmiúlú a̱ngiu̱lú bi̱ kuya̱ edxu̱u̱ ga̱jma̱a̱ gundrígú tsiakii rí gúxnulú (Is. 32:1, 2).

MA̱NDOO MAKUWÁANʼ TSÍMÁÁ ÍNDO̱ NARÍGÁ MBÁ DÍ TSÉGUAʼTHI̱I̱N

8. Xú káʼnii gáʼni dí xákuwáánʼ tsímáá índo̱ narígá mbá dí tséguaʼthi̱i̱n rá.

⁸ Á mu ikháán nitamíniiʼ ga̱jma̱a̱ numuu rí nijnííʼ iyaʼ náa xtaa o gaxma o náa nakríya̱a̱ʼ aguʼ mbáa mba̱yu̱u̱ʼ má eʼni rí naxmiéjuanʼ. O, á mu nitanimbatiga̱a̱ mbáa bi̱ xtayáá o nitanimbatiga̱ xúgíʼ dí xtaʼdáá, mbáa rúʼko̱ naʼni rí maxmiéjuanʼ, naraxtaa ngíná o asndu nakiʼnán. Gajkhun má dí rúʼko̱ tsíyoo gáʼthí rí nandaaʼ maraʼdáá wéñuʼ o dí na̱nguá xtaʼdáá fe. Mbáa ikháán ninújngaaʼ náa mbá ga̱ʼkhu̱ gakhi̱i̱ wéñuʼ ga̱jma̱a̱ dí tikhuiin naguáʼthi̱i̱n dí ikháán majmaaʼ (Job 1:11). Maski ajndu gakhi̱i̱ dí kuwáánʼlú ruraʼníí, mú ma̱ndoo makuwáánʼlú tsímáá. Guʼyáá xú káʼnii gúʼni̱.

9. Xú káʼnii embáyulú ajngáa rí niʼthí Jesús rí makuwáánʼ xawii náa mbá gamiéjunʼ rí tséguaʼthi̱i̱nlú rá.

⁹ Náa numbaaʼ rígi̱, tikhun xa̱bu̱ nakumu̱ún dí xárígá mbá rí na̱nguá kuáʼthi̱i̱n. Mú ikháánʼlú nduʼyáá dí marigá xó má niʼthí Jesús. Nduʼyáá má dí xkawiʼ dí rígá náa numbaaʼ maʼga rajoo itháan rí asndu mangáánʼ gamíi maguáʼníí. Jesús niʼthúún discípulos ndrígóo rí índo̱ gáʼni iwáá mbiʼi marigá “gaʼxma” ga̱jma̱a̱ i̱ʼwáʼ gamiéjunʼ (Luc. 21:11). Ma̱ngaa niʼthí rí maʼga rajoo rí xkawiʼ, makujmaa rígi̱ índo̱ xa̱bu̱ nugiʼdu̱u̱n o nuni̱ xkujndu ga̱jma̱a̱ índo̱ nuni gíníi eʼwíinʼ (Mat. 24:12). Jesús na̱nguá niʼthí dí rígi̱ i̱ndó muguáʼníí xa̱bu̱ bi̱ na̱nguá eniʼniiʼ Jeobá. Mbaʼin xa̱bi̱i̱ Jeobá bi̱ guájun jmbu kúwá rumíniiʼ ga̱jma̱a̱ xkujndu rígi̱ (Is. 57:1; 2 Cor. 11:25). Mbáa Jeobá xáʼni mbá milagro mu maʼnikáwáánʼ náa mbá gamiéjunʼ dí tseguaʼthi̱i̱nlú, mú ikhaa maxnúlú rí gáʼyulú mu maʼngu̱lú muraʼníí gamiéjunʼ rúʼko̱ ga̱jma̱a̱ makuwáánʼ májánʼ ga̱jma̱a̱ tsímáá.

10. Náá numuu nuʼthá rí índo̱ nuʼniratamijná muraʼníí mbá rí tséguaʼthi̱i̱n nusngajmá dí kuaʼdáá fe rá. (Proverbios 22:3.)

¹⁰ Á mu kuwáánʼlú xawii xáʼniulú miʼskhaa muraʼníí mbá gamiéjunʼ rí na̱nguá kua̱ʼthi̱i̱n. Lá rúʼko̱ eyoo gáʼthúu̱n rí na̱nguá ekumulú kuʼyáá Jeobá ráʼ. Na̱nguá. Á mu nuʼniratamijná májánʼ índo̱ gárígá mbá rí tséguaʼthi̱i̱n, nusngajmá rí kuaʼdáá fe náa Jeobá dí ikhaa má gáñewunlú. Numuu rí náa Biblia naxnúlú consejo ndiéjunʼ gándoo gúʼni̱ índo̱ kuwáánʼ ruraʼníí mbá gamiéjunʼ (atraxnuu Proverbios 22:3).c Jeobá naʼthúlú náa artículo ndrígóo revista, náa reunión dí narígá náa guʼwá nagimbáánʼ ga̱jma̱a̱ awan dí naríyaʼ xuajñuu Jeobá, ma̱ngaa asndu nángí eʼníí ethulú xú káʼnii gúʼniratamijná muraʼníí asndu xkáʼníí má gamiéjunʼ.d Ndiéjunʼ gúʼni á mu nakumulú kuʼyáá Jeobá rá. Lá muʼnimbulú xúgi̱ consejo rígi̱, maski ajndu xóó tsérígá gamiéjunʼ dí xóó tséguaʼthi̱i̱n ráʼ.

11. Ndiéjunʼ gándoo gájmañulú náa xkri̱da ndrígóo Margaret rá.

¹¹ Gundxaʼwamíjna̱ dí nigíʼnuu ndxájulú Margaret. Xa̱bu̱ ñajunʼ nitháán dí magajnúu náa goʼwóo numuu rí nakha xaná náa xtáa. Ga̱jma̱a̱ numuu rí mbaʼin xa̱bu̱ ndiyóoʼ magajnún mbiʼi má rúʼko̱, ikha jngóo niʼni miʼskhaa manújngún carro. Numuu rí ni̱jni̱ʼ wéñuʼ gúní ikha jngóo Margaret ndiyóoʼ maguanúu náa awúu̱n kárriu̱u̱. Ga̱jma̱a̱ numuu dí ikhaa niʼnirataminaʼ májánʼ niʼngo̱o̱ nikríya̱a̱ʼ. Náa cartera ndrígóo kajua̱nʼ mbá mapa dí nijmuu mu mbaʼyoo náa maʼga. Ikhaa ni̱jkha̱ má wapháá náa carretera rúʼko̱ ga̱jma̱a̱ rúʼko̱ nimbáyúu mu xáʼniuu miʼskhaa maʼga índo̱ narígá mbá rí tségiʼthu̱u̱n. Numuu rí niʼnirataminaʼ májánʼ, nindoo nikríya̱a̱ʼ.

12. Náá numuu nuʼnimbulú ikha dí naxná xuajñuu Jeobá índo̱ narígá mbá gamiéjunʼ dí tseguaʼthi̱i̱nlú rá.

¹² Mu ma̱ndoo makáwáánʼlú ikháánʼ ga̱jma̱a̱ eʼwíinʼ ndayóoʼ muʼnimbulú dí gúthulú Xa̱bu̱ ñajunʼ mu̱ʼni̱, o i̱ʼwáʼ ikha dí gúxnulú. Mbaʼin xa̱bu̱ tsíñún gúndrigú ikha dí nuxna Xa̱bu̱ ñajunʼ numuu rí tsíñún gúniña̱a̱ʼ mbañúúnʼ. Mú, xú káʼnii e̱ʼni̱ ikháanʼlú bi̱ nindxu̱lú cristianos rá. Náa Biblia naʼthúlú: “Ga̱jma̱a̱ numuu Señor gunimbala kuñu̱u̱n xúgínʼ xa̱bu̱ numbaaʼ: Xóo mbáa rey bi̱ mba̱a̱, o Xa̱bu̱ Ñajunʼ bi̱ nakunguinʼ” (1 Ped. 2:13, 14). Náa xuajñuu Jeobá nuxnulú ikha xóo muñewumíjnalú. Nángí eʼníí enikuma̱a̱ʼlú rí ndayóoʼ muxnún a̱ngiu̱lú bi̱ kuya̱ edxu̱u̱ número ndrígóo teléfono ndrígulú náa kuwáánʼlú rí mbiʼi xúgi̱, mu xúʼko̱ ikhiin ma̱ndoo muthulú índo̱ narígá mbá rí tséguaʼthi̱i̱n. Lá nixnúnʼlú número ndrígóo teléfono ikháanʼ xáʼ. Mbáa náa xuajñuu Jeobá maxnúlú awan rí maguanúlú náa guʼwúlú mu xúʼko̱ mbaʼyoo xú káʼnii gándoo gáxnulú rí gáʼyulú ga̱jma̱a̱ nguáná gándoo gúmbáñún eʼwíinʼ. Á mu tséʼnimbulú migamíi mumíniiʼlú ikháánʼ ga̱jma̱a̱ a̱ngiu̱lú bi̱ kuya̱ edxu̱u̱ bi̱ nindxu̱ún xa̱bekha bi̱ naguájun jmbu bi̱ nuñewu̱nlú ikháánʼ (Heb. 13:17). Margaret niʼthí: “Nda̱yo̱o̱ gajkhun rí manimboʼ ikha dí nuxna bi̱ kuya̱ edxu̱u̱ ma̱ngaa awan rí naríyaʼ xuajñuu Jeobá niʼnikríñu̱u̱nʼ”.

13. Ndiéjunʼ eni̱ tikhuin a̱ngiu̱lú bi̱ nagájnún náa xuajñún mu makuwá tsímáá ga̱jma̱a̱ gagi má xúʼko̱ rá.

¹³ Ga̱jma̱a̱ numuu mbaʼa gamiéjunʼ dí tseguaʼthi̱i̱nlú, guerra o nuni̱ gíníi eʼwíinʼ, ikha jngóo mbaʼin a̱ngiu̱lú ndayóoʼ maganún náa guʼwún mu magún i̱mba̱ níʼkhá. Ikhiin nuni̱ asndu xó má eʼngo̱o̱ mu muni̱ guʼumijná náa xuajin rí gágún ga̱jma̱a̱ mutaraʼa má xó nákhá ginii. Nutaraʼa má xúʼko ‹ajngáa rí májánʼ›, xó má nini̱ timbíin cristianos índo̱ nigandriʼiin mámbá xuajin índo̱ niguma gíníi (Hech. 8:4). Índo̱ nutaraʼa nambáñún mundxaʼwami̱jna̱ ga̱jma̱a̱ numuu Reino, raʼkháa xkujndu rí guáʼdáá. Xúʼko̱ eʼni dí makuwíi̱n gagi ga̱jma̱a̱ tsímáá.

GAKUWÁÁNʼLÚ TSÍMÁÁ MASKI NAGUMA GÍNÁÁNʼ

14. Náá numuu maʼni rí xákuwáánʼ tsímáá dí naguma gínáánʼlú rá.

¹⁴ Rí naguma gínáánʼ ma̱ndoo marígú káʼyulú rí nambáyulú makuwáanʼ gagi ga̱jma̱a̱ tsímáá, xóo rí magimbáánʼ náa reunión o muʼtáraʼa asndu xó má eyulú o mu̱ʼni̱ i̱ʼwáʼ ñajunʼ rí asndu xámíñulú rí Xabu̱ ñajunʼ muruguánʼlú. Índo̱ nuthulú dí ni xándoo gúʼtáraʼa xó má gíʼmaa, mbáa rúʼko̱ gáʼni dí maxmiéjunlú wéñuʼ ga̱jma̱a̱ muguáʼdilú mundxaʼwamíjna̱ ndiéjunʼ gárígá itháan nda̱wa̱á, xáxmiéjuanʼ raʼkháa i̱ndó ikháán etagíʼnii rúʼko̱. Xúniʼñánʼ dí fe ndrígulú makáguabaaʼ ga̱jma̱a̱ numuu dí naguma gínáánʼlú. Xó má niʼthún discípulos ndrígóo Jesús (Juan 16:1, 2). Ndiéjunʼ gándoo gúʼni̱ mu makuwáánʼ tsímáá maski ajndu naguma gínáánʼlú rá.

15. Náá numuu dí ragíʼmaa mamiñúlú maski ajndu naguma gínáánʼlú rá. (Juan 15:20; 16:33.)

¹⁵ Náa Ajngá rawuunʼ Dios naʼthúlú: “Xúgíinʼ bi̱ nandún makuwá ruyamajkuíí Dios gajmiún Cristo Jesús, mangiin mumíniiʼ” (2 Tim. 3:12). Mbáa ndxájulú bi̱ mbiʼyuu Andréi niʼñuu miʼskhaa maguʼuun índo̱ nithi Xa̱bu̱ ñajunʼ rí naxájuiʼtáraʼa náa xuajin rí xtáa. Ikhaa nindxa̱ʼwáminaʼ: “Gi̱i̱ kúwíi̱n mbaʼin wéñuʼ Testigos, maʼni miʼskhoo dí maxtu̱gui̱i̱n xúgíinʼ”. Mú rúʼko̱ na̱nguá embáyúu mu maʼni̱i̱ a̱jkiu̱u̱n, rúʼko̱ naʼni dí iwáá maxmiéjuunʼ. Mú eʼwíinʼ a̱ngiu̱lú nuniña̱a̱ʼ náa ñawúunʼ Jeobá ga̱jma̱a̱ na̱nguá endxaʼwamíjna̱ dí nimbá miʼtsú xúrugui̱i̱n ikhiin. Ikhiin nduyáá dí xúʼko̱ maguáʼníí mú na̱nguá nixmiéjúnʼ wéñuʼ xó má Andréi. Ikha jngóo Andréi ndiʼyáridoo xkri̱da ndrígu̱ún a̱ngiu̱lú bugi̱ ga̱jma̱a̱ nikumu̱u̱ kaʼyoo kájxi̱ Dios. Táʼni má mba̱yu̱u̱ʼ dí ikhaa nindoo nixtáa tsímáá ga̱jma̱a̱ gagi maski ajndu rígá wéñuʼ xkujndu. Mangáánʼ ma̱ndoo makuwáánʼlú xúʼko̱. Gajkhun má dí Jesús niʼthí rí maguma gínáánʼlú, mú ma̱ngaa niʼthí dí ma̱ndoo maguajúun jmbu (atraxnuu Juan 15:20; 16:33).

16. Ndiéjunʼ ikha gíʼmaa muʼnimbulú índo̱ naguma gínáánʼlú rá.

¹⁶ Á mu tséniñulú muʼtáraʼa, mbáa sucursal ndrígulú o bi̱ kuya̱ edxu̱u̱, muxnulú ikha xú káʼnii gándoo gúñewumíjnalú, mu xúʼko̱ mundrígú má xúʼko̱ ganitsu dí na̱ʼkha̱ náa Jeobá ga̱jma̱a̱ muʼtáraʼa asndu náá má nandoo. Á mu dí xúʼko̱, guʼnimbulúʼ itháan, maski ajndu tsékru̱ʼu̱lú mbá xúgíʼ náá numuu rí nuxnulú ikha rúʼko̱ (Sant. 3:17). Nditháan xúʼthún eʼwíinʼ mbá dí rakáʼyoo mudxuun ga̱jma̱a̱ numún a̱ngiu̱lú o dí narígá náa congregación (Ecl. 3:7).

17. Xó má apóstoles bi̱ nikúwá nákhá siglo timbá ndiéjunʼ dí kuwáánʼlú xawii mu̱ʼni̱ ikháanʼ rá.

¹⁷ Mbá numuu dí Gixa̱a̱ naʼni gínáa xuajñuu Dios, nindxu̱u̱ numuu rí “guáʼdáá ñajunʼ rí mutaraʼa ga̱jma̱a̱ numuu Jesús” (Apoc. 12:17). Xúniʼñáánʼ dí Gixa̱a̱ ga̱jma̱a̱ xa̱bu̱ numbaaʼ bi̱ naʼtáñajúnʼ muni̱ míñulúʼ. Dí muʼtáraʼa ga̱jma̱a̱ dí muʼsngúún xa̱bu̱ maski ajndu naguma gínánʼlú ikháánʼlú nakuwáánʼ gagi ga̱jma̱a̱ tsímáá. Índo̱ Xa̱bu̱ ñajunʼ judío nitañajúúnʼ apóstoles dí muniña̱a̱ʼ rutaraʼa, ikhiin niguájun jmbu ga̱jma̱a̱ ninimbu̱ún kuyáá Dios. Nitaraʼa má xúʼko̱ ga̱jma̱a̱ nikúwá gagi (Hech. 5:27-29, 41, 42). Índo̱ tséniña̱a̱ʼ marigá ñajunʼ ndrígulú, gíʼmaa muʼtáraʼa ga̱jma̱a̱ tsu̱máá (Mat. 10:16). Á mu nu̱ʼni̱ tsiakimíjna̱ makuwáánʼlú gagi, numuu rí ni̱ʼni̱ dí Jeobá maxtáa gagi ga̱jma̱a̱ dí nijkua̱ kuyulú ajngáa rí maʼnikáwíin eʼwíinʼ.

“DIOS BI̱ NAXNÁ DÍ TSÍMÁÁ MAXTÁA GA̱JMA̱Á NINDXA̱LA”

18. Náá e̱ʼkha̱ tsímáá rí ndayúlú rá.

¹⁸ Guʼyáá gajkhun dí maski ajndu nuraʼníí mbaʼa gamiéjunʼ ma̱ndoo makuwáánʼlú tsímáá. Índo̱ kuwáánʼ ruraʼníí xkujndu rúʼko̱ garmáʼáan a̱jkiu̱lú dí tsímáá rí ndayúlú nindxu̱u̱ tsímáá ndrígóo Dios, xóo muʼthá, tsímáá rí i̱ndó Jeobá ma̱ndoo maxnúlú. Gákumulú kuʼyáá ikhaa índo̱ naku̱mu̱u̱ mbá nandii o narígá mbá dí tseguaʼthi̱i̱nlú o naguma gínáánʼlú. Gakuwáánʼlú mijngii náa xuajñuu Jeobá ga̱jma̱a̱ gundxa̱ʼwa̱míjna̱ dí gárígá nda̱wa̱á dí ikhaa mína̱a̱ʼ nikudaminaʼ maʼni. Á mu nu̱ʼni̱ xúʼko̱, “Dios bi̱ naxná rí tsímáá” maxtáa ga̱jma̱á nindxu̱lú (Filip. 4:9). Náa imbo̱o̱ artículo mbuʼyáá xú káʼnii gándoo gúmbáñún a̱ngiu̱lú mu muguaʼdáá tsímáá rí na̱ʼkha̱ náa Dios índo̱ kúwá nuraʼníí mbá gamiéjunʼ gakhi̱i̱.