1 | Rí muʼtájkáan “Guniʼñáánʼ náa ikhaa xúgíʼ rí naʼni maxmiéjuanla”

NÁA BIBLIA NAʼTHÍ: “Ga̱jma̱a̱ guniʼñáánʼ náa ikhaa xúgíʼ rí naʼni maxmiéjuanla, numuu rí ikhaa naxmiéjuunʼ kaʼyala” (1 PEDRO 5:7).

Ndiéjunʼ eyoo gáʼthúu̱n rá.

Jeobá naʼthúlú rí muʼthán xúgíʼ xkujndu rí kuaʼdáá ga̱jma̱a̱ rí naʼni maxmiéjunlú (Salmo 55:22). Tséʼniuu á mu mba̱a̱ xkujndu rí kuaʼdáá o chíʼgíiʼ ma̱ndoo muʼtháánlu Dios. Á mu naxmiéjunlú, Jeobá ma̱ngaa naxmiéjunʼ. Rí muʼtájkáan nindxu̱u̱ rí gíʼmaa muʼni ginii, mu maʼnii a̱jkiu̱lú rí naxmiéjunlú (Filipenses 4:6, 7).

Xú káʼnii embáyulú rá.

Índo̱ rígá dí naʼni maxmiéjunlú wéñuʼ, mbáa makumulúʼ dí kuwáánʼ ndajkuáánʼ. Maski ajndu xúʼkhíin, mbáa tikhun tsékru̱ʼu̱u̱n xóo kuwáanʼ (Proverbios 14:10). Mú, Dios nakro̱ʼo̱o̱ kaʼyulú ga̱jma̱a̱ naʼdxawu̱nlú, ma̱ndoo muʼthán xúgíʼ rí nakumulú. Jeobá nañewu̱nlú ga̱jma̱a̱ xtáa xawii mu mambáyulú, naninuʼ májánʼ rí kuwáánʼ ruraʼníí ikha jngóo nandoo muʼtákáñii má xúʼkhíin asndu ndiéjunʼ má eʼni maxmiéjunlú (2 Crónicas 6:29, 30).

Índo̱ nuʼtákáñii Jeobá, naʼni mbuʼyáá gajkhun dí ikhaa nandoo mañewu̱nlú. Ma̱ndoo mbuʼyáá mangáánʼ xóo nikumu̱u̱ bi̱ niʼnirámáʼ Biblia, bi̱ niʼthúu̱n Dios: “Ikháán natayáá dí namínuʼ ga̱jma̱a̱ xtaa xawii matambáyuʼ índo̱ xtáá ngíná” (Salmo 31:7). Índo̱ nduʼyáá rí Jeobá nakro̱ʼo̱o̱ kaʼyulú índo̱ kuwáánʼ ngíná, ma̱ndoo maxnúlú itháán tsiakii mu maʼngulú má xúʼko̱. Ikhaa raʼkháa i̱ndó ndaʼyoo rí numíniiʼlú. Ikha nakro̱ʼo̱o̱ itháán kaʼyulú ki xóó eʼwíinʼ, ma̱ngaa nambáyulú maʼni̱i̱ a̱jkiu̱lú ga̱jma̱a̱ naxnúlú tsiakii dí nda̱yúlúʼ náa Ajngá rawuunʼ rí nindxu̱u̱ Biblia.

Xkáʼnii embáyúu Biblia Julián

Xú káʼnii eʼniuʼ maxtáá dí najmuʼ wéñuuʼ rá.

“Naniminaʼ rí xajmuʼ wéñuuʼ ga̱jma̱a̱ rí xandxa̱ʼwa̱mínaʼ wéñuuʼ gúʼdoʼ dí nutháán TOC (náa ajngáa xtílóo nindxu̱u̱ trastorno obsesivo compulsivo). Nguáná najmuʼ wéñuʼ mbiʼi rí nditháan na̱nguá gúʼthúu̱n. Nguáná xtáá májánʼ mú mbá nacha̱ asndu nda̱a̱ mbá numuu dí nagíʼdu̱u̱ najmuʼ wéñuʼ. Rígi̱ itháán nagíʼnuʼ índo̱ xtáa náa kúwá mbaʼin xa̱bu̱, numuu dí naxmiéjunʼ ndiéjunʼ gundxaʼwámíjná ga̱jma̱a̱ numuʼ”.

“Bi̱ nduʼyáá xú káʼnii xtáá nuni̱ tsiakimijna mumbayúʼ xó ma eʼngo̱o̱, maski ajndu nguáná na̱nguá ethu̱nʼ mbóoʼ dí mambáyuʼ. Mú naxníí núma̱aʼ wéñuuʼ rí numbayúʼ xó ma eʼngo̱o̱ mu maxtáá itháán májánʼ”.

“Nguáná numuu rí najmuʼ wéñuʼ ma̱ngaa ga̱jma̱a̱ numuu rí nandxa̱ʼwa̱mínáʼ wéñuʼ (TOC), naʼniuu gakhi̱i̱ rí matajkáan. Ndayóoʼ mani mbá tsiakii mba̱a̱ mu magíʼ májánʼ edxu̱ʼ mu matamíjná gajmuʼ Jeobá. Nguáná ra̱ʼkhá tháán mbaʼa dí endxa̱ʼo̱o̱ edxu̱ʼ rí asndu nánguá eyoo dí endxáʼwamínaʼ. Índo̱ na̱nguá eʼgíʼ májánʼ edxu̱ʼ dí matha̱, naʼniu miʼskhaa mathu̱u̱n Jeobá rí nandxa̱ʼwáminaʼ ga̱jma̱a̱ rí naku̱mu̱ʼ”.

Xú káʼnii embáyuʼ Biblia rá.

“Náa Biblia nijmañuʼ rí nguáná na̱nguá má eyóoʼ mata wéñuuʼ o rí maniratoo wéñuʼ dí matha̱ índo̱ natajkháan mu Dios magruigú. Nguáná, na̱nguá eyoo rí mata, i̱ndó natha̱: ‹Jeobá mbá péñu atambáyuʼ›. Maski i̱ndó rúʼko̱ eʼngo̱o̱ mata, naku̱mu̱ʼ rí Jeobá nambáyúʼ ga̱jma̱a̱ naxnúʼ rí ndayóʼ mbiʼi rúʼko̱. Raʼkháa i̱ndó natajkáan ma̱ngaa ndaʼñíinʼ xa̱bu̱ bi̱ nakru̱ʼu̱u̱n muni̱ thanuʼ. Ga̱jma̱a̱ na̱dxu̱ʼ wéñuuʼ numuu rí a̱jma̱ numuu rígi̱ niʼni rí maxtáá itháán májánʼ. Maski ajndu ikhúún ndayóoʼ mani tsiakimijna mu makuʼmaminaʼ náa Anu̱ʼ bi̱ xtáa mekhuíí, mú naniminaʼ numuu rí nda̱yo̱o̱ dí ikha nandoo kaʼyoʼ ga̱jma̱a̱ nandoo mambáyuʼ”.