2 | “Rí naʼthí náa Kiʼniraʼmáʼ naʼni̱i̱ a̱jkiu̱lú”

NÁA BIBLIA NAʼTHÍ: “Xúgíʼ dí nigumarámáʼ nákha wájyúuʼ nigumarámáʼ mu maʼsngúlú, rí naʼthí náa Kiʼniraʼmáʼ naʼni rí maʼngulú ma̱ngaa naʼni̱i̱ a̱jkiu̱lú, rúʼko̱ naʼni rí maguaʼdáá mbá rí muguaʼthi̱i̱n nda̱wa̱á” (ROMANOS 15:4).

Ndiéjunʼ eyoo gáʼthúu̱n rá.

Biblia kagu̱ ajngáa dí maʼni̱i̱ a̱jkiu̱lú, nambáyulú mu maʼngulú ga̱jma̱a̱ naxnúlú tsiaki̱i̱ muʼni gajmiúlú ku̱ma̱ dí raʼkhí. Ma̱ngaa naʼthúlú dí na̱nguá ma mbayuuʼ dí ní xaguaʼdáá nandii dí maʼni majmulú.

Xú káʼnii embáyulú rá.

Nguáná xúgiáanʼ nakuwáanʼ ngíná o naxmiéjunlú, mú kúwíin tikhuin bi̱ numíníiʼ numuu dí xúgííʼ mbiʼi najmún wéñuuʼ ga̱jma̱a̱ naʼni maxmiéjuunʼ. Xú káʼnii gándoo gámbañún Biblia xá.

Biblia kagu̱ mbaʼa ku̱ma̱ rí májánʼ dí naʼni dí ní xúndxaʼwamíjna dí raʼkhí (Filipenses 4:8). Ikhaa ma̱ndoo mambáyulú mu mundxaʼwamíjna̱ dí májánʼ rí naʼni makuwáanʼlu tsímáá ga̱jma̱a̱ maʼni dí muñewa̱a̱n xóo kumulú (Salmo 94:18, 19).
Á mu nakumulú dí tséjmáálú mbá kayuuʼ Biblia ma̱ndoo mambáyulú mu muñewa̱a̱n xóo kumulú (Lucas 12:6, 7).
Rígá mbaʼa historia náa Biblia dí nambáyulú mbuʼyáá gajkhun dí na̱nguá kúwáanʼ ndajkuáanʼ. Ikhí naʼthúlú dí Dios, bi̱ niʼniwáanʼlu, nakro̱ʼo̱o̱ májánʼ xú káʼnii kumulú (Salmo 34:18; 1 Juan 3:19, 20).
Náa Biblia naʼthí dí Dios maʼni mambumulú xúgíʼ dí nigíʼnulu dí naʼni magawúnlú (Isaías 65:17; Apocalipsis 21:4). Xúgííʼ dí Dios nikudaminaʼ maʼni ga̱jma̱a̱ nindxu̱lú, mambáyulú mu xákanajkulú maʼngulú muʼni gajmiúlú mbá dí naʼni maxmiéjunlú.

Xkáʼnii embáyúu Biblia Jessica

Xú káʼnii eʼniuʼ maxtáá dí najmuʼ wéñuuʼ rá.

“Índo̱ nigúʼdoo 25 tsiguʼ, niʼñuu mbóoʼ gaʼkhu náa edxu̱ʼ, nithu̱nʼ dí nigúʼdoʼ mbóoʼ nandii dí naʼni maxtáá ngíná má xúʼko̱. Tsénigu̱ʼ wáa mba̱yo̱o̱ flashbacks, (xtiʼkhuu dí nirígá nákha ginii), rígi̱ naʼni marmáʼáan a̱jkiu̱nʼ xúgíʼ tsingíná dí nigíʼnuu nákha ginii ga̱jma̱a̱ tséʼngo̱ʼ gániñuuʼ randxaʼwáminaʼ ga̱jma̱a̱ numuu ikhaa. Médico nithu̱nʼ dí xúgíʼ rúʼko̱ eʼñu̱ʼ ga̱jma̱a̱ numuu gamíi dí nigúʼdoʼ. Rúʼko̱ niʼni dí i̱ndó mandxaʼwáminaʼ dí xámbáyúʼ ga̱jma̱a̱ majmuʼ wéñuuʼ. Ndiyóoʼ mixtambayúʼ májánʼ ga̱jma̱a̱ mathu̱u̱n mbáa médico bi̱ nakro̱ʼo̱o̱ ga̱jma̱a̱ numuu nandii rígi̱ mu xúʼko̱ mambáyuʼ mu maʼnii a̱jkiu̱nʼ”.

Xú káʼnii embáyuʼ Biblia rá.

“Índo̱ ra̱ʼkhá tháán ejmuʼ, naʼni dí mamiñún ga̱jma̱a̱ naxmiéjunʼ wéñuuʼ dí asndu tsíyóʼ gígú. Mbaʼa mbruʼun nagutáʼáan má xúʼko̱ edxu̱ʼ, naʼni néʼngo̱ʼ eʼni xúgííʼ dí naʼni maxmiéjunʼ. Mú, xó má naʼthí náa Salmo 94:19, Dios naʼni̱i̱ a̱jkiu̱lú ga̱jma̱a̱ gamiéjunʼ dí naʼni néʼngulú. Náa xia̱wuʼ natámáʼ mbá Biblia ga̱jma̱a̱ mbá cuaderno náa kiʼniraʼmáʼ texto ndrígóo Biblia dí naxnúʼ tsiaki̱i̱. Índo̱ na̱nguá endoʼ gígú, naniʼñúuʼ dí Dios maʼni̱i̱ a̱jkiu̱nʼ ga̱jma̱a̱ Ajngá rawuunʼ”.

“Biblia nambáyulú mu’ni gaʼduunʼ ku̱ma̱ dí ragájkhun ga̱jma̱a̱ numuu Dios. Mbá xkri̱da, nákha ginii niku̱mu̱ʼ dí na̱nguá ejmúún ga̱jma̱a̱ dí rakáʼyoʼ dí maʼdúún kuyoʼ. Mú nijkhánú ndi̱yo̱o̱ dí náa Biblia tséʼthi xúʼko̱ káʼnii. Ikhí na̱ʼkha̱ raʼthí dí Dios nindxu̱u̱ mbáa Anu̱lú bi̱ nandoo kaʼyulú ga̱jma̱a̱ nagáwíinʼ a̱jkiu̱u̱n ma̱ngaa naxmiéjuunʼ eʼni mámbáa dí ikháanʼlu. Rígi̱ niʼni dí ikhúún mañu mañúú mañewu̱u̱n dí nandxaʼwamínáʼ. Nijmañuʼ mbayamináʼ xó má Dios eʼyo̱. Rígi̱ niʼni dí maniʼñúuʼ randxa̱ʼwáminaʼ dí raʼkhí ga̱jma̱a̱ numuʼ”.

“Ra̱ʼkhá tháán nandoʼ maʼgánú mbiʼi dí ní xármáʼáan a̱jkiu̱nʼ eʼni dí nigíʼnuʼ ga̱jma̱a̱ ku̱ma̱ dí naʼni magawúnʼ. Nda̱yo̱o̱ kaʼwu rí nda̱wa̱á ní xaguaʼdáá nandii dí naku̱mu̱u̱ náa ngáñulú, rígi̱ naxnúʼ tsiaki̱i̱ mu maʼngo̱ʼ mani gajmúʼ nandii dí gúʼdoʼ, dí magúʼthu̱u̱n asndu índo̱ gáʼgánú mbiʼi rí maguma gámbáa nandii rígi̱”.