Graxe̱ rí nuni bi̱ nuraxnuu

Ndiéjunʼ nijuiʼthá ga̱jma̱a̱ numuu rí maguma kaʼwi̱i̱ mbiʼyuu Jeobá ma̱ngaa rí ikhaa kaʼyoo maʼtáñajunʼ, náa Bi̱ Nayejngoo dí nigájnuu junio tsiguʼ 2020 náa artículo dí kayá edxu̱u̱: “Gaguma kaʼwi̱i̱ mbiʼyaaʼ” rá.

Náa artículo rúʼko̱ nijuiʼthá mbá rí gíʼdoo wéñuʼ numuu muʼni ikháanʼ bi̱ nindxu̱lú xa̱bu̱ ga̱jma̱a̱ xúgíinʼ ángeles: Rí muʼni kaʼwi̱i̱ mbiʼyuu Jeobá. Maski ajndu májánʼ xóo naʼtáñajunʼ Jeobá, ikhaa nindxu̱u̱ káaʼ mbóó dí nambáyúu maʼni kaʼwi̱i̱ mbiʼyuu. Ga̱jma̱a̱ i̱mba̱ nindxu̱u̱ á mu ikháanʼ naguájun jmbu o na̱nguá náa Jeobá ma̱ngaa gíʼdoo wéñuʼ numuu dí xóo naguma kaʼwi̱i̱ mbiʼyuu.

Ndíjkha nuʼthá rí itháán gíʼdoo numuu mbiʼyuu Jeobá ga̱jma̱a̱ rí maguma kaʼwi̱i̱ rá. Guʼyáá mbá ajtsú numuu.

Timbá numuu, náa ixi̱ ri̱ʼi̱ Edén, Gixa̱a̱ niʼni gachúu mbiʼyuu Jeobá o xóo najmaʼniiʼ. Gixa̱a̱ ndiyáʼ májánʼ graxe̱ rí maʼniuu Eva mu mbaʼyoo dí Dios na̱nguá májánʼ a̱jkiu̱u̱n ga̱jma̱a̱ rí xtángoo rí nixnún nindxu̱u̱ gakhi̱i̱ wéñuuʼ. Nda̱wa̱á, Gixa̱a̱ nirtajxi̱i̱ xóo dí phú niʼthí Jeobá, ga̱jma̱a̱ xúʼko̱ nisngájma rí nindxu̱u̱ mbáa bi̱ minduwaaʼ. Índo̱ niʼni xúʼko̱, niʼni gachúu mbiʼyuu Jeobá. Mbiʼi má rúʼko̱, ninindxu̱u̱ “Gixa̱a̱”, rí nandoo gáʼthúu̱n “bi̱ naʼninduwaʼ” (Juan 8:44). Eva niʼnimbo̱o̱ rí niʼthúu̱n Gixa̱a̱ ga̱jma̱a̱ táʼnimbo̱o̱ kaʼyoo Dios, xúʼko̱ nisngájma rí nánguá nindoo maʼtáñajuunʼ ikhaa (Gén. 3:1-6). Xúʼko̱ má dí mbiʼi xúgi̱, Gixa̱a̱ naʼni gachúu mbiʼyuu Dios najmuu ikháá má minduwaʼ mu maʼni rí xa̱bu̱ munimbu̱u̱n xóo nindxu̱u̱ Jeobá. Bi̱ nindxu̱lú xa̱bi̱i̱ Dios nduʼyáá dí rígi̱ nindxu̱u̱ raʼkhí kayuuʼ rí najuiʼthá minduwaʼ ga̱jma̱a̱ numuu mbiʼyuu Jeobá. Rígi̱ niʼni dí marigá tsingíná ga̱jma̱a̱ dí ra̱májánʼ náa numbaaʼ.

Ragajma numuu, Jeobá xtáa xawii mambáyúu ga̱jma̱a̱ maʼni kaʼwi̱i̱ mbájkhu mbiʼyuu. Xúʼko̱ ma̱ndoo mambáñún mbá xúgíinʼ bi̱ niʼniwíin, Jeobá ndaʼyoo dí rígi̱ itháán gíʼdoo numuu. Ikha jngóo naʼthí: “Phú gajkhun dí ma̱ni̱ kaʼwi̱i̱ mbiʼyuuʼ” (Ezeq. 36:23). Náa rí niʼtájkháan, Jesús niʼthí: “kaʼwu gáʼni mbiʼyaaʼ”. Xúʼko̱ nisngájma ndiéjunʼ rí gíʼdoo numuu muʼthá índo̱ guʼtájkáan bi̱ nindxu̱lú xa̱bi̱i̱ Jeobá (Mat. 6:9). Náa Biblia naʼthí mbaʼa nuthu rí gíʼdoo wéñuuʼ numuu maguma kaʼwi̱i̱ mbiʼyuu Jeobá. Guʼyáá tikhuu xkri̱da. “Gu̱ni̱ mba̱a̱ mbiʼyuu Jeobá xó má kaʼyoo” (1 Crón. 16:29; Sal. 96:8). “Guni ajmúú mu muni mba̱a̱ mbiʼyuu” (Sal. 66:2). “Mani mba̱a̱ mbiʼyaaʼ asndu kámuu mbiʼi” (Sal. 86:12). Ma̱ngaa mbá miʼtsú, mínaaʼ má Jeobá niʼthí asndu mekhuíí, Jesús xtáa náa templo dí rígá náa Jerusalén ga̱jma̱a̱ nindo̱ʼo̱o̱ anu̱u̱: “Atani̱ mba̱a̱ mbiʼyaaʼ”. Jeobá niriʼñuu: “Ni̱ni̱ mba̱a̱ má ga̱jma̱a̱ ma̱ni̱ mba̱a̱ mbu̱júu̱” (Juan 12:28).a

Ragajtsú numuu, rí nandoo Jeobá ikhaa nindxu̱u̱ rí mbiʼyuu maguma mba̱a̱ má xúʼko̱. Gundxaʼwamíjna̱ nguáthá gagiʼdoo numuu mbiʼyuu Jeobá índo̱ gájngoo dí Niʼtáñajunʼ Cristo náa mbá Mil Tsiguʼ. Ndiéjunʼ gundxaʼwamíjna̱ ikhú xa̱bu̱ numbaaʼ ga̱jma̱a̱ ángeles náa rí nijuiʼthá xóo maguma kaʼwi̱i̱ mbiʼyuu Jeobá rá. Mu ma̱ndoo mbuʼyáá guʼthá mbu̱júu̱ a̱jma̱ numuu: Rí maguajún jmbu xa̱bu̱ ga̱jma̱a̱ rí xóo naʼtáñajunʼ Dios. Ikhú xa̱bu̱ nánguá ma̱ʼkha̱ tsáʼkhá náa inún. Náá numuu rá. Numuu rí nánguá maguaʼdáá aʼkhá ga̱jma̱a̱ makuwíin kámuu mbiʼi. Ga̱jma̱a̱ nánguá murajximíjna̱ á mu rí xóo naʼtáñajunʼ Dios nindxu̱u̱ májánʼ. Ndíjkha rá. Numuu rí xúgíinʼ bi̱ gákúwá ikhú mbuyáá gajkhun dí xóo naʼtáñajunʼ Dios nindxu̱u̱ itháán májánʼ. Xúʼko̱, xó má xa̱bu̱ numbaaʼ ga̱jma̱a̱ ángeles mbuyáá dí xúʼko̱ nindxu̱u̱. Mú, ndiéjunʼ gárígá ga̱jma̱a̱ numuu mbiʼyuu Jeobá rá.

Mbiʼyuu maʼni kaʼwu kámuu ga̱jma̱a̱ na̱nguá marigá nduwaʼ rí maʼni gachúu. Ga̱jma̱a̱ mbiʼyuu Jeobá mani̱ndxu̱u̱ mbá rí magiʼdoo numuu náa xa̱bi̱i̱. Náá numuu rá. Numuu rí mbuyáá dí Jeobá maʼni mbá rí tséguaʼthi̱i̱n. Mbá xkri̱da, numuu rí Jesús mani̱ndxu̱u̱ xa̱bu̱ guabaaʼ ga̱jma̱a̱ maxnáa Anu̱u̱ rí naʼtáñajunʼ, ga̱jma̱a̱ xúʼko̱ Dios mani̱ndxu̱u̱ “xúgíʼ náa xúgíinʼ xa̱bu̱” (1 Cor. 15:28). Nda̱wa̱á dí rúʼko̱, bi̱ gákuwá náa tsu̱du̱u̱ Ku̱ba̱ʼ makuwíin “xó má nikáwíin e̱ji̱i̱n Dios” (Rom. 8:21). Ga̱jma̱a̱ Jeobá maʼnimbánuu rí nindoo nákha ginii rí makuwíin mbá jnduʼ bi̱ kúwá náa goʼwóo xó má náa mekhuíí ga̱jma̱a̱ náa tsu̱du̱u̱ Ku̱ba̱ʼ (Efes. 1:10).

Xú káʼnii gákuwá bi̱ kúwá náa goʼwóo Jeobá índo̱ gájngoo xúgíʼ rígi̱ rá. Xúgíinʼ bi̱ kúwá mekhuíí ga̱jma̱a̱ náa tsu̱du̱u̱ Ku̱ba̱ʼ maʼndún ga̱jma̱a̱ xúgíʼ a̱jkiu̱ún rí asndu xóo nakha náa a̱jkiu̱ún gakumu̱ún dí muni mba̱a̱ mbiʼyuu Jeobá. David bi̱ niʼnirámáʼ Salmo niʼthí rígi̱: “Gaguma mba̱a̱ Jeobá Dios [...]. Gaguma mba̱a̱ mbiʼyaaʼ kámuu mbiʼi” (Sal. 72:18, 19). Náa mbá xúgíʼ mbiʼi rí gákuwáanʼ mbuʼyáá má xúʼko̱ xúgíʼ mitsaanʼ rí gáʼni Jeobá, ga̱jma̱a̱ rúʼko̱ gáxkajxáánʼ mu mu̱ʼni̱ mba̱a̱ mbiʼyuu.

Ga̱jma̱a̱ mbiʼyuu Jeobá nasngájma xóo nindxu̱u̱ ikhaa. Ikha jngóo nundxaʼwamíjna̱ mbiʼyuu, mbá nacha̱ na̱ʼkha̱ náa edxu̱lúʼ ngajua ndrígóo (1 Juan 4:8). Marmáʼáan má xúʼko̱ a̱jkiu̱lú dí Jeobá niʼniáánʼ ga̱jma̱a̱ ngajua, rí nixnájxi̱i̱ a̱ʼdióo ga̱jma̱a̱ ngajua ma̱ngaa rí naʼtáñajunʼ ga̱jma̱a̱ ngajua. Ma̱ngaa mbuʼyáá xú káʼnii Jeobá nasngájma ngajua ndrígóo náa xúgíʼ rí niʼniwíi. Náa mbá xúgíʼ mbiʼi rí gákuwáanʼ mbuʼyáá má xúʼko̱ numuu rí maxkajxáánʼ mu mu̱ʼgua̱ itháán mijngii náa Anu̱lú bi̱ xtáa mekhuíí ga̱jma̱a̱ muʼni ajmúú mu muʼni mba̱a̱ mbiʼyuu (Sal. 73:28).