Nakríñunʼ numuu rí naku̱mu̱ʼ ka̱yo̱o̱ Jeobá

NANIʼNÍIʼ JEOBÁ GA̱JMA̱A̱ NAGÍʼDU̱U̱ NAKU̱MU̱ʼ KA̱YO̱O̱ IKHAA

Nigumún nákha 1948 náa mbá xuajen dí rígá xígií náa níjniúu dí narmáʼáan a̱jkha̱ʼ náa Nigeria. Nákha ikhú, a̱muʼ bi̱ mbiʼyuu Moustapha, bi̱ nindxu̱u̱ giʼtio̱o̱ anu̱ʼ ga̱jma̱a̱ Wahabi, ndxájuʼ bi̱ nindxu̱u̱ giʼnii, ninindxu̱ún testigos de Jeobá. Índo̱ ikhúún gúʼdoo mbá mijna gu̱wa̱ʼ, anu̱ʼ nikháñúu, rígi̱ niʼni gawúnʼ wéñuuʼ. Wahabi niʼthúunʼ dí ma̱ndoo mutangáanʼ mbuya̱a̱ anu̱xu̱ índo̱ gágabi̱i̱. Dí mandxaʼwáminaʼ rúʼko̱ nixnúʼ tsiakii mu manigajmaa Biblia. Nijngúnʼ iyááʼ nákha 1963 ga̱jma̱a̱ mbá ajtsíin a̱ngui̱nʼ ma̱ngaa ninindxu̱ún Testigos.

Nákha 1965 ni̱jkhá gáxtáá náa xuajen Lagos, náa xtáa má mbáa ndxájuʼ bi̱ mbiʼyuu Wilson. Ikhí nimbájxuxu májánʼ gajmiúnxu tikhuun precursores regulares bi̱ kúwá náa congregación dí mbiʼyuu Igbobi. Ndi̱yo̱o̱ dí ra̱ʼkhá tháán gagi kúwi̱i̱n ga̱jma̱a̱ ra̱ʼkhá tháán edxuu a̱jkiu̱ún, ikha jngóo niraʼwíi mani̱ndxu̱ʼ precursor nákha enero tsiguʼ 1968.

Mbáa ndxájulú bi̱ nixtáa rañajunʼ náa Betel, bi̱ mbiʼyuu Albert Olugbebi, niʼni mbá reunión kiejunʼ gajmíi̱n jiámá mu maʼthuxú rí ndañu̱únʼ precursores especiales náa xígíi norte ndrígóo Nigeria. Narmáʼáan a̱jkiu̱nʼ eʼni ajngáa dí niʼthí ndxájulú Olugbebi: “Ikháanʼ nindxa̱la xóó jiámá ga̱jma̱a̱ ma̱ndoo majmalaʼ mbiʼi ndrígala ga̱jma̱a̱ tsiakii ndrígala mu muxna̱a̱la̱ Jeobá. Rígá mbaʼa wéñuuʼ ñajunʼ dí maguma”. Ikhúún nindoʼ mani̱ndxu̱ʼ xóo gaʼyee Isaías ga̱jma̱a̱ maʼgá asndu náa má Jeobá gákungu̱n, ikha jngóo nini majtíí solicitud (Is. 6:8).

Nákha Mayo tsiguʼ 1968, nixumu̱u̱ maʼgá xóo precursor especial náa xuajen dí mbiʼyuu Kano, náa xígíi norte ndrígóo Nigeria. Ikháá má fecha rúʼko̱ náa xuajen Biafra, nirígá guerra rí ndijyúuʼ nákha 1967 asndu 1970. Guerra niʼni gámbóo xuajen rúʼko̱ ga̱jma̱a̱ nda̱wa̱á nigún ragi̱ʼdu̱u̱n má xúʼko̱ asndu xígií náa nagájnuu a̱jkha̱ʼ. Mbáa ndxájulú nindoo dí ikhúún xáʼgá náa xuajen Kano numuu rí tándoo dí maguma gawúunʼ. Mú ikhúún ni̱thu̱u̱n: “Núma̱aʼ. Nda̱yo̱o̱ má dí naxmiéjuanʼ ga̱jma̱a̱ numuʼ. Mú, á mu Jeobá nandoo dí maʼgá ikhí, nda̱yo̱o̱ gajkhun dí ikhaa má gáxtáa gajmá nindxu̱ʼ”.

NAKU̱MU̱ʼ KA̱YO̱O̱ JEOBÁ NÁA MBÁ MBAAʼ DÍ NARÍGÁ GUERRA

Ra̱ʼkhá tháán migíná rí ndi̱yo̱o̱, xúgíʼ dí nirígá numuu dí nirígá guerra náa Kano. Guerra niʼni maʼchúu xuajen rúʼko̱ índo̱ najkuaxu rutaraʼa, nguáná ndi̱ñu̱u̱nxu xa̱bu̱ bi̱ niradíin índo̱ nirígá guerra. Maski ajndu nirígá mbaʼa congregación náa Kano, mbaʼin a̱ngiu̱lú nigáñún nigún imbríʼkhá. Asndu tséʼni 15 publicadores bi̱ niguanún, ikhiin nikúwíin ngíná ga̱jma̱a̱ nikáguabiinʼ. ¡Ra̱ʼkhá tháán nikúwá gagi índo̱ niguánuxu náa xuajen, ikháanʼ mbá majuáanʼ precursores especiales! Ra̱ʼkhá tháán nimbáñún tsiakii dí nixnuxu. Nimbáñúnxu mu matangiín muriyaʼ awan mu muguaʼdáá reunión, mutaraʼa ga̱jma̱a̱ dí muxuʼma náa Betel informe ndrígún ga̱jma̱a̱ dí munda̱ʼa̱ i̱yi̱i̱ʼ dí majmúún.

Xúgiáanʼ bi̱ nindxu̱xu̱ precursores especiales, nigíʼdi̱i̱xu niʼnigajmaa ajngáa hausa. Numuu rí nitaráʼaxu náa ajngún xa̱bu̱, mbaʼin nindxawunxu. Mú, mbaʼin bi̱ nindxu̱ún náa mbá religión dí itháan najmaniún, tánigu̱u̱nʼ rí muʼtáraʼa. Ikha jngóo ndiyóoʼ dí muñewumíjna̱ʼxu índo̱ nitáraʼaxu. Mbá míʼtsú, ikhúún gajmíʼ compañeriʼ nixkujxu mbáa xa̱bu̱ ga̱jma̱a̱ mbá chílo náa ñawúunʼ. Májánʼ má dí tárígá mbá dí raʼkhí, numuu rí nigáyúxu̱ itháan nacha̱ ki xóo ikhaa ga̱jma̱a̱ niʼngo̱o̱ nikáwáanxu. Maski ajndu niraʼnííxu̱ gamíi, xóo má eʼthí Salmo 4:​8, Jeobá niʼni dí nda̱a̱ má gagíʼnuxu̱, mañu mañúú nijkha raʼni mbaʼin publicadores. Rí mbiʼi xúgi̱ náa xuajen Kano rígá mbá 11 congregación ga̱jma̱a̱ itháan dí 500 publicadores.

NUNI̱ NGÍNÁAXU NÁA NÍGER

Nákha agosto dí 1968, nguáthá igu̱nʼ nda̱wa̱á dí niguáʼnuxu̱ náa Kano, a̱jmi̱i̱n precursores especiales ga̱jma̱a̱ ikhúún, nixuʼmáanʼxu náa xuajen Niamey, capital ndrígóo República de Níger, náa África Occidental. Mbá nacha̱ má nijkuánun ndiya̱a̱ dí Níger nindxu̱u̱ mbá xuajen dí itháan eʼni mijkha náa xúgíʼ numbaaʼ. Raʼkháa i̱ndó ndiyóoʼ maguʼwunxu eʼni dí mijkha, ma̱ngaa ndiyóoʼ majmañuxu ajngáa francés, numuu dí ajngáa rúʼko̱ ethi xa̱bu̱ ikhí. Maski ajndu nirígá xkujndu rúʼko̱, niku̱mu̱xu ku̱ya̱a̱ Jeobá, nigíʼdii nitaráʼaxu náa xuajen rúʼko̱ gajmiúnxu̱ nguéjmi̱i̱n publicadores bi̱ kúwá ikhí. Tájyúuʼ má, mbaʼin xa̱bu̱ bi̱ kúwá náa Niamey bi̱ najmañún nuraxnuu, niguáʼdaa libro dí najmuxu mu muʼsngáa ga̱jma̱a̱ numuu Biblia: La verdad que lleva a vida eterna. Ma̱ngaa xa̱bu̱ naguwáʼ gúñáanʼxu mu mundu̱ʼu̱xu mbá libro.

Tájyúuʼ má ndi̱ya̱a̱xu̱ dí xa̱bu̱ xuajen na̱nguá eñún gúñún testigos de Jeobá. Nákha julio dí tsiguʼ 1969 ninixu̱ timbá asamblea ndrígóo circuito náa xuajen rúʼko̱, káaʼ nikúwá mbá 20 xa̱bu̱. Ra̱ʼkhá tháán nidxuxu numuu rí majngún i̱ya̱a̱ʼ a̱jmi̱i̱n publicadores. Mú, nákha timbá mbiʼi dí nirígá asamblea, ni̱ʼkha̱nú policía ga̱jma̱a̱ niʼni dí mawiji̱ programa. Nigún kuya̱a̱ náa kúwá policía ndxájulú superintendente ndrígóo circuito gajmíi̱n precursores especiales. Ikhí niniuxu graxe̱ ga̱jma̱a̱ nitañájunxu dí mutangáanʼ imbo̱o̱ mbiʼi. Nikujmaa kaʼwu dí muguaʼdáá xkujndu gajmiúxu xa̱bu̱ ñajunʼ, ikha jngóo nini̱xu dí marigá discurso dí majngún i̱ya̱a̱ʼ náa mbá guʼwá, nda̱wa̱á ikhiin nijngúun náa mañu mu xúʼko̱ xúyáá mbaʼin.

Nguáthá xmáná nda̱wa̱á, xa̱bu̱ ñajunʼ nixkriñaánʼxu náa xuajen rúʼko̱, ikhúún gajmíʼ mbá witsiin precursores especiales. Nixnuxu 48 hora mu muniʼñááʼ Níger ga̱jma̱a̱ ikháanʼ ndiyóoʼ mbu̱ya̱a̱xu xú káʼni gúni. Ninimbuxu̱ ga̱jma̱a̱ ni̱jkuáxu mbájmbu náa Betel dí rígá náa Nigeria. Asndu ikhí nixuʼmáxu náa i̱ʼwáʼ xuajen.

Ikhúún nixuʼmún náa mbá xuajen chíʼgíiʼ ndrígóo Nigeria rí mbiʼyuu Orisunbare. Ikhí nijmún nitaráʼa gajmíʼ nguéjmi̱i̱n a̱ngiu̱lú bi̱ kúwíin ikhí ga̱jma̱a̱ nisngún xa̱bu̱ ga̱jma̱a̱ numuu Biblia. Mú majun igu̱nʼ nda̱wa̱á, Betel niʼthúnʼ matangaán náa Níger; mú rí xúgi̱ mbáwun. Nákha ginii, niʼniuʼ tsiánguá ga̱jma̱a̱ niʼni maxmiéjunʼ. Mú, gajkhun má dí ra̱ʼkhá tháán nindoʼ matangu̱ún mba̱ñu̱u̱n a̱ngiu̱lú bi̱ kúwá náa Níger.

Nitangu̱ún náa Niamey. I̱mba̱ mbiʼi nda̱wa̱á mbáa xa̱bu̱ bi̱ nagujua̱ náa Nigeria, ni̱jkha̱nú ndiʼyoo dí ikhúún nindxu̱u̱ Testigo ga̱jma̱a̱ nigíʼdu̱u̱ niʼniuʼ mbaʼa graxe̱ ga̱jma̱a̱ numuu Biblia. Niʼnigajmaaxu mbóó, nda̱wa̱á rí ikhaa niniñuuʼ ratsikhá ndíí ga̱jma̱a̱ niniñuuʼ iya najnga̱a̱, nijngúun iyááʼ. Ma̱ngaa nitaraʼa náa mbaʼa enii xuajen dí rígá ikhí ga̱jma̱a̱ ndi̱yo̱o̱ xú káʼni mañu mañúú xa̱bu̱ nigún rundrigú dí gajkhun. Índo̱ nákha nijkhánú náa Níger, káaʼ kúwíin 31 Testigo; índo̱ nijkháaʼ nikúwíin mbá 69.

“NA̱NGUÁ EYA̱A̱XU̱ MÁJÁNʼ XÚ KÁʼNII EJKHA̱ ÑAJUNʼ NÁA GUINEA”

Nákha diciembre tsiguʼ 1977, nitanga̱án náa Nigeria mu maxtáá mbá curso mbá ajtsú xmáná. Índo̱ niguámbá curso, mbáa ndxájulú bi̱ Naríyaʼ awan náa comité bi̱ kúwá náa Sucursal bi̱ mbiʼyuu Malcolm Vigo, nixnuʼ mbá carta dí nikunguanʼ Betel dí rígá náa Sierra Leona. A̱ngiu̱lú kúwá ru̱ya̱a̱ʼ mbáa ndxájulú bi̱ mbáwíí, bi̱ na̱nguá endo̱o̱ kháñuu, bi̱ najmañuu Inglés ga̱jma̱a̱ francés mu mani̱ndxu̱u̱ superintendente ndrígóo circuito náa Guinea-Conakri. Ndxájulú Malcolm niʼthúnʼ dí numuu rúʼko̱ jngóo nithu̱nʼ maʼgá náa curso mu majuiʼsngóʼ itháan. Niʼthúnʼ kaʼwu dí á mu nagruigú ñajunʼ rúʼko̱ maʼniuʼ mingíjyúuʼ ga̱jma̱a̱ ikhaa niʼthúnʼ: “Atatsaʼwáminaʼ májánʼ nákhá xóó tsetadrígú”. Mú, ikhúún táni a̱jma̱ a̱jkiu̱nʼ, mbá nacha̱ ni̱thu̱u̱n: “Numuu rí Jeobá nindxu̱u̱ bi̱ naʼthúnʼ maʼgá, ikha jngóo maʼgá má”.

Ni̱jkhá ga̱jma̱a̱ avión náa Sierra Leona, ikhí ndiyaminaʼ gajmíi̱nʼ a̱ngiu̱lú bi̱ kúwá náa Betel. Mbáa ndxájulú bi̱ nindxu̱u̱ comité náa Sucursal niʼthúnʼ: “Na̱nguá eya̱a̱xu̱ májánʼ xú káʼnii ejkha̱ ñajunʼ náa Guinea”. Maski ajndu Sucursal rígi̱ ndaʼyoo xóo ejkha̱ ñajunʼ náa Guinea, mú na̱nguá xóo mutamijná gajmiún a̱ngiu̱lú ga̱jma̱a̱ numuu xkujndu mba̱a̱ dí narígá náa xuajen. Mbaʼa nuthu nigíʼ muxungua̱a̱nʼ mbáa ndxájulú bi̱ maʼga̱ gáʼñúún a̱ngiu̱lú bi̱ kúwá náa Guinea, mú na̱nguá nindoo. Ikha jngóo nithu̱nʼ maʼgá náa Conakri, náa capital ndrígóo Guinea, ga̱jma̱a̱ dí maniminaʼ magúʼdoʼ permiso ndrígóo Xa̱bu̱ Ñajunʼ mu ma̱ndoo maxtáá ikhí.

Índo̱ ni̱jkhánú náa Conakri xuajen dí kaʼyoo Nigeria, ni̱jkhá náa nundriguíin xa̱bu̱ bi̱ naguwáʼ i̱mba̱ xuajen ga̱jma̱a̱ ndiyaminaʼ gajmuʼ bi̱ naʼtámbáñún xa̱bu̱ xuajñunʼ. Ikhú ni̱thu̱u̱n dí ikhúún nandoʼ maguanúʼ mataraʼa náa Guinea, mú ikhaa niʼthúnʼ dí xáguanúʼ numuu dí migamíi maʼgá guʼwá e̱jua̱nʼ o munigawúnʼ. Niʼthúnʼ: “Atanga̱án náa Nigeria ga̱jma̱a̱ aratáráʼa ikhí”. Mú ikhúún niriʼñuu: “Niraʼwíí dí maguanúʼ”. Ikhú ikhaa niʼnirámáʼ mbá carta náa inuu Xa̱bu̱ ñajunʼ bi̱ kaʼyoo mañewu̱u̱n xa̱bu̱ bi̱ kúwá náa Guinea dí mambáyuʼ, ga̱jma̱a̱ xúʼko̱ má niʼni.

Nda̱wa̱á, nitanga̱án náa Betel dí rígá náa Sierra Leona ga̱jma̱a̱ ni̱thu̱u̱n a̱ngiu̱lú dí nimbayúʼ Xa̱bu̱ ñajunʼ maguanúʼ. A̱ngiu̱lú ra̱ʼkhá tháán nidxúún índo̱ ndiyáá dí Jeobá nimbáyuʼ mu Xa̱bu̱ ñajunʼ muxnuʼ permiso maguanúʼ náa Guinea.

Nákha 1978 asndu 1989 ninindxu̱ʼ superintendente ndrígóo circuito náa Guinea ga̱jma̱a̱ náa Sierra Leona, ga̱jma̱a̱ ninindxu̱ʼ superintendente sustituto ndrígóo circuito náa Liberia. Nákha ginii nindoo káñuʼ wéñuuʼ. Índo̱ na̱jkhá náa xuajen dí mitsínguánʼ, mú a̱ngiu̱lú nuni̱ xúgíʼ xó má eʼngo̱o̱ mu magún kuñu̱u̱n náa hospital.

Mbá miʼtsú, ra̱ʼkhá tháán nindoo káñuʼ niʼniuʼ nandii malaria ga̱jma̱a̱ niguʼdi̱i̱n ñu̱u̱ náa awúnʼ. Índo̱ niʼni̱i̱ a̱jkiu̱nʼ, nijkhánú nidxawu̱u̱n dí a̱ngiu̱lú nikúwá ruthi náá gúdiu̱u̱n. Maski ajndu nigíʼnuʼ mbaʼa dí asndu migamíi makhañúʼ, mú nditháan tadxaʼwamínaʼ maniʼñúuʼ ñajuunʼ dí xtáá rani̱. Ga̱jma̱a̱ na̱jkhánú nda̱yo̱o̱ ga̱jma̱a̱ xúgíʼ a̱jkiu̱nʼ dí i̱ndó Jeobá ma̱ndoo maʼni dí makuwáánʼ má xúʼko̱, numuu dí maski ajndu nakháñulú, ikhaa ma̱ndoo maʼni dí mbuʼyalu mbu̱júu̱.

A̱ʼGIU̱ʼ GA̱JMA̱A̱ IKHÚÚN NAKUMUXU KUYA̱A̱ JEOBÁ

Nákha 1988, niniʼníi Dorcas, mbáa precursora bi̱ ninindxu̱u̱ xa̱bu̱ guabaaʼ ga̱jma̱a̱ nimbájxu̱u̱ májánʼ ga̱jma̱a̱ Dios. Nidamijnáxu ga̱jma̱a̱ nuñajunʼxu mbóó náa circuito. Dorcas nimbáyúʼ wéñuuʼ ga̱jma̱a̱ nixtáa xawii maʼni gínáminaʼ ga̱jma̱a̱ numuu Jeobá. Mu mu̱ʼguáxu náa mixtiʼkhu enii congregación, nguáná ndiyóoʼ mu̱ʼguáxu ga̱jma̱a̱ rajkúxu mbá 25 kilómetro, ga̱jma̱a̱ kudáxu xóo xtíñuxu o i̱ʼwáʼ dí ndayúxuʼ. Índo̱ na̱jkuáxu̱ náa congregación dí itháan mitsínguánʼ, nutsijiixu asndu xkáʼnii carro bi̱ nuxkamaaxu. Na̱jkuáxu̱ náa kamba̱a̱ dí rígá wéñuuʼ ngaʼcháʼ ga̱jma̱a̱ iñáʼ.

Dorcas ninindxu̱u̱ mbáa bi̱ támíñúu. Nguáná ndiyóoʼ manújnguxu̱ mañu náa kajtiin cocodrilo. Mbá miʼtsú, náa na̱jkuáxu̱ mbá witsu mbiʼi náa kamba̱a̱, ndiyóoʼ manújnguxu̱ mbá mañu ga̱jma̱a̱ Canoa numuu dí nichúu puente. Índo̱ Dorca niwi̱ji̱ mu magajnáa náa Canoa, nixpátriguíi ga̱jma̱a̱ nixpatuáan náa mañu dí kajchún cocodrilo. Nimbáa dí ikháanʼxu̱ na̱nguá ejmañuu gaʼñuu nadar. Mú, májánʼ nirígá numuu dí a̱jmi̱i̱n jiámá nijngún náa iyaʼ gúnikríyaaʼ. Nda̱wa̱á dí nirígá rúʼko̱, nájmáanʼxu nugunda̱a̱xu má xúʼko̱ dí na’nimíñuxu xóo nirígá mbiʼi rúʼko̱, mú, nunixu má xúʼko̱ ñajunʼ ndrígúxu̱.

Nákha nigi̱ʼdu̱u̱ tsiguʼ 1992, ra̱ʼkhá tháán niʼniuxu̱ tsiánguá numuu dí Dorcas kagu̱ ewan mbáa ada̱. Lá ndiyóoʼ muʼniñááʼxu runi̱ káxi̱ ñajunʼ Jeobá ráʼ. Nita̱xu: “Ada̱ bugi̱ nindxu̱u̱ mbá regalo ndrígóo Jeobá”. Ikha jngó, niraʼwííxu muxna mbiʼíí Jahgift wáxiuxu (dí nandoo gáʼthúu̱n “regalo ndrígóo Jah”). A̱jkhu̱ tsiguʼ nda̱wa̱á nixtáa a̱ʼdiúxu Eric. Mbá nájmi̱i̱n ninindxu̱ún mbá regalo ndrígóo Jeobá. Jahgift nixtáa rayambáá nguáthá mbayuuʼ náa Oficina dí nutajuíi ajngáa náa Conakri ga̱jma̱a̱ Eric nindxu̱u̱ siervo ministerial.

Maski ajndu Dorcas ndiyóoʼ maniñuuʼ ranindxu̱u̱ precursora especial, mú ninindxu̱u̱ má xúʼko̱ xóo precursora regular maski ajndu e̱ji̱n majkhiinʼ. Ga̱jma̱a̱ numuu dí Jeobá má nimbáyuʼ, ikhúún ninindxu̱u̱ má xúʼko̱ precursor especial. Índo̱ e̱jñu̱xu̱ niʼni guanii, Dorcas nitanga̱a̱ ninindxu̱u̱ precursora especial ga̱jma̱a̱ rí xúgi̱ nájmáanʼxu nindxuxu misioneros náa xuajen Conakri.

JEOBÁ NAʼNI KÁWÁANʼ MÁ XÚʼKO̱

Ikhúún na̱jkhá má xúʼko̱ náa Jeobá na̱jkha̱ kañún. Mbaʼa nuthu ikhúún gajmuʼ a̱ʼgiu̱ʼ ndi̱ya̱a̱xu̱ xú káʼni ikhaa niñewu̱u̱nxu̱ ga̱jma̱a̱ niʼni tsajkurámáanʼxu. Índo̱ nakumuxu ku̱ya̱a̱ Jeobá raʼkháa dí rígá náa numbaaʼ rígi̱, naʼni dí xúguaʼdááxu wéñuuʼ xkujndu ga̱jma̱a̱ dí xaxmiéjunxu wéñuuʼ. Dorcas ga̱jma̱a̱ ikhúún ndi̱ya̱a̱xu̱ xú káʼni embáyuxu̱ Jeobá bi̱ nindxu̱u̱ “Dios bi̱ naʼni káwáanʼxu, i̱ndó ikhaa ma̱ndoo maʼni kawáanʼlu (1 Crón. 16:35). Nájkhánú nda̱yo̱o̱ gajkhun dí Jeobá nañewunlú “xó má mbáa nañewu̱u̱n dí gíʼdoo numuu dí kajti náa murrióo” (1 Sam. 25:29).