Experiencia

Rí magáwíinʼ a̱jkia̱a̱nʼ xtañún xúgíinʼ xa̱bu̱ nayambáá

Mbá mbiʼi mbáa ndxájulú bi̱ xtáa náa Nueza Zelanda, ndiʼyoo video rí mbiʼyuu: Preocupémonos unos por otros. Náa naʼthí dí Jeobá raʼkháa i̱ndó nagáwíinʼ a̱jkiu̱u̱n ma̱ngaa nasngájma rí xúʼko̱ nindxu̱u̱ (Is. 63:​7-9). Ikhú nigíminaʼ maʼni ga̱jma̱a̱ mambáyúu mbáa. Ga̱jma̱a̱ ikhaa má mbiʼi rúʼko̱ nigájnuu gáʼtsi̱ tikhuʼ ga̱jma̱a̱ ndiʼyoo mbáa a̱ʼgu̱ náa calle ma̱ngaa niʼthúu̱n dí maʼtsi mbá dí mikhu. A̱ʼgu̱ niʼthí dí ma̱ndoo. Índo̱ ndxájulú nitanga̱a̱ ga̱jma̱a̱ kayá ganitsu, ikhú niʼtároʼoo ga̱jma̱a̱ mbá tratado dí mbiʼyuu: Lá maʼga̱nú mbóo mbiʼi rí ní xakuwáanʼ tsingíná rá.

A̱ʼgu̱ nimbi̱ya̱ʼ. Niʼthúu̱n ndxájulú dí ikhaa ma̱ngaa nijmañuuʼ dí naʼthí náa Biblia, mu niʼni má mba̱yu̱u̱ʼ tsiguʼ dí niniñuuʼ na̱jkha̱ reunión náa congregación. Ga̱jma̱a̱ rí xíjkhóó nindo̱ʼo̱o̱ Jeobá dí mambáyúu mata̱nga̱a̱ mbu̱júu̱ náa congregación. Ndxájulú nixnúu mbá Biblia ga̱jma̱a̱ niʼthúu̱n dí maʼnigajma̱a̱ ga̱jma̱a̱.a

Xó má Jeobá xúʼko̱ má ma̱ndoo muʼni mangáánʼ dí musngajmúún xa̱bu̱, bi̱ kúwá náa guʼwulú ga̱jma̱a̱ a̱ngiu̱lú bi̱ kúwá náa congregación dí nagáwíinʼ a̱jkiu̱lú kuʼñúún. I̱mba̱ xóo ma̱ndoo musngajmúún ma̱ngaa rí nagáwíinʼ a̱jkiu̱lú kuʼñúún nindxu̱u̱ rí mbuʼyáʼ i̱mba̱ xóo muʼtáruʼúún.