Lá natayáá má ráʼ.

Xú káʼnii nindxu̱u̱ carro dí gíwánʼ ra̱jkha̱ eunuco etíope índo̱ nikuʼmaminaʼ Felipe rá.

NÁA ajngáa griego náa Traducción del Nuevo Mundo ajngáa carro nandoo gáʼthúu̱n mixtiʼkhu enii carro (Hech. 8:​28, 29, 38). Nakujmaa dí carro náa gíwánʼ ra̱jkha̱ etíope na̱nguá nindxu̱u̱ mbá carro xkáʼnii dí xóo najmún náa nuxmijná o nagáñún, nindxu̱u̱ mbá carro mba̱a̱. Guʼyáá náá numuu nuʼthá xúʼko̱ káʼnii.

Etíope nindxu̱u̱ mbáa xa̱bu̱ bi̱ gíʼdoo mbá ñajunʼ mba̱a̱ ga̱jma̱a̱ ni̱jkha̱ má mbaʼ. Nindxu̱u̱ “mbáa xa̱bu̱ bi̱ gíʼdoo numuu bi̱ nañajunʼ náa reina bi̱ xtáa náa Etiopía ga̱jma̱a̱ ikhaa nagujxi̱i̱ xúgíʼ mbújkho̱o̱ reina” (Hech. 8:27). Nákha tsiguʼ rúʼko̱, xuajin Etiopía na̱jkha̱nú asndu náa xuajin Sudán rí nuniʼnuuʼ rí mbiʼi xúgi̱ ga̱jma̱a̱ náa xígií sur ndrígóo Egipto. Gajkhun má dí Etíope, raʼkháa ikháá má carro ni̱jkha̱ ga̱jma̱a̱ náa xúgíʼ mbiʼi rúʼko̱, mu mbaʼa rí kagu̱ ni̱jkha̱ numuu rí mitsínguánʼ ejkha̱. Nákha siglo timbá najmún mixtiʼkhu enii carro mu magún kudiin xa̱bu̱. Mbá dí ikhaa nindxu̱u̱ carruajes rí gíʼdoo a̱jkhu̱ llantoo ga̱jma̱a̱ kúgoo. Mbáa bi̱ naʼnigajma̱a̱ Biblia naʼthí: “Carruajes rúʼko̱, naʼngo̱o̱ najti mbaʼa ma̱ngaa nandoo nagún májánʼ xa̱bu̱, mbáa asndu maʼngo̱o̱ maʼga̱ mitsínguánʼ” (Acts—An Exegetical Commentary).

Índo̱ Felipe ni̱ʼkha̱ kanuuʼ, etíope gíwánʼ raguxnuu. Náa relato na̱ʼkha̱ raʼthí “Felipe nigáyúu ni̱jkha̱ níjñúu ga̱jma̱a̱ niʼdxawuun dí ikhaa xtáa raguxnuu gakhi̱i̱ ajngáa rí niʼnirámáʼ profeta Isaías” (Hech. 8:30). Carruajes rí nagún ga̱jma̱a̱ xa̱bu̱, na̱nguá niguma rí maʼga̱ nacha̱, niguma mu maʼga̱ mañuu má wáa. Ikha jngóo etíope nandoo naguxnuu ga̱jma̱a̱ rí Felipe maʼngo̱o̱ maxkamaa índo̱ nigáyúu.

Etíope “niʼtákáñuu Felipe rí matsimuu mu magi̱ʼi̱ ga̱jma̱a̱”. (Hech. 8:31). Náa mbá carro dí nuxmijná ga̱jma̱a̱, bi̱ nagún kuñu̱u̱n, nguáná nagún ga̱jma̱a̱ rajkúún. Mú carruaje rí nagún ga̱jma̱a̱ xa̱bu̱ na̱nguá ma̱ja̱nʼ ikhaa. Ikha jngóo niʼngo̱o̱ nigiwa̱nʼ eunuco ga̱jma̱a̱ Felipe.

Xó má na̱ʼkha̱ raʼthí náa Capítulo 8 ndrígóo Hechos ga̱jma̱a̱ i̱ʼwáʼ náa nasngájma, nánguá muniri̱ya̱a̱xu etíope rí gíwánʼ náa carro dí nuxmijná ga̱jma̱a̱ náa i̱yi̱ʼ ndrígu̱lú, muni̱xu náa mbá carro dí itháán mba̱a̱.