A̱jmi̱i̱n a̱ngiu̱lú nuxu̱u̱nʼ náa Cuerpo Gobernante

NÁKHA miércoles 18 ñajunʼ gu̱nʼ enero tsiguʼ 2023, nijuixná mbá anuncio kiejuunʼ náa ináa jw.org: A̱ngiu̱lú Gage Fleegle ga̱jma̱a̱ Jeffrey Winder nijuaxtaʼwíin mu mani̱ndxu̱ún Cuerpo Gobernante de los Testigos de Jeobá. Mbá najmiin nikúwá runi̱ ñajuunʼ Jeobá kájxi̱ mbayuuʼ má tsiguʼ.

Ndxájulú Fleegle ndija̱a̱ náa oeste ndrígóo Pensilvania (Estados Unidos). Anu̱u̱ ga̱jma̱a̱ ru̱dúu̱ nisngáa rí gajkhun. Índo̱ ikhaa nindxu̱u̱ xóó dxámá, nigún gákuwá náa mbá xuajin chíʼgíiʼ náa ndayóoʼ itháán maxtiembáá mu majuiʼtáraʼa. Nijngúun iyááʼ 20 ñajunʼ gu̱nʼ noviembre tsiguʼ 1988.

Anu̱u̱ ga̱jma̱a̱ ru̱dúu̱ nixnáá má xúʼko̱ tsiaki̱i̱ mu maʼni kájxi̱ ñajuunʼ Jeobá. Nuthúún a̱ngiu̱lú circuito ga̱jma̱a̱ betelitas mu maguanún náa guʼwún xúʼko̱ ni̱jkha̱nú ndiʼyoo dí ra̱ʼkhá tháán gagi kúwá a̱ngiu̱lú buʼko̱. Nákha 1 ñajunʼ gu̱nʼ septiembre tsiguʼ 1989, nda̱wa̱á rí nijngúun iyááʼ nigíʼdúu ninindxu̱u̱ xóo precursor regular. A̱jma̱ tsiguʼ nda̱wa̱á niʼni mbánúu rí niʼthí maʼni índo̱ nigiʼdoo 12 tsiguʼ, rí mayambáá náa Betel. Nigíʼdúu niyambáá náa Betel ndrígóo Brooklyn nákha octubre tsiguʼ 1991.

Migiñuʼ tsiguʼ nixtáa rayambáá náa nagájnuu i̱yi̱i̱ʼ, nda̱wa̱á nixuʼmaa mu mayambáá náa Departamento ndrígóo Servicio nákha ikhú nixtáa rayambáá náa mbá congregación náa nuthi ajngáa ruso. Nákha tsiguʼ 2006 ninigúnʼ ga̱jma̱a̱ Nadia, asndu má nákha kúwá ruyambáá náa Betel mbá najmiin. Nuyambáá náa najuiʼtáraʼa ajngáa portugués, ga̱jma̱a̱ itháán dí 10 tsiguʼ náa najuiʼtáraʼa ajngáa xtílóo. Mbayuuʼ tsiguʼ nda̱wa̱á Departamento ndrígóo Servicio ga̱jma̱a̱ ndxájulú nixuʼmaa maʼga gáyambáá náa Oficina ndrígóo Comité bi̱ naʼthí xóo Miʼsngáa ga̱jma̱a̱ nda̱wa̱á nixtáa náa Oficina ndrígóo Comité ndrígóo Servicio. Nákha marzo tsiguʼ 2022 nigíʼdúu ninindxu̱u̱ bi̱ nimbáyúu Comité ndrígóo Servicio náa Cuerpo Gobernante.

Ndxájulú Winder ndija̱a̱ náa xuajin Murrieta (California E.U.A). Anu̱u̱ ga̱jma̱a̱ ru̱dúu̱ ninindxu̱ún Testigos de Jeobá nisngáa rí gajkhun ga̱jma̱a̱ ikhaa nijngún iyááʼ nákha 29 ñajunʼ gu̱nʼ marzo tsiguʼ 1986. Mbá gu̱nʼ nda̱wa̱á nigíʼdúu ninindxu̱u̱ precursor auxiliar, ga̱jma̱a̱ ra̱ʼkhá tháán ninigu̱u̱ʼ rí tándoo ganiñuʼ ranindxu̱u̱. Nákha 1 ñajunʼ gu̱nʼ octubre tsiguʼ 1986, nguáthá gu̱nʼ nda̱wa̱á nijkhánú ninindxu̱u̱ precursor regular.

Índo̱ nákha nindxu̱u̱ xóó dxámá ndxájulú Winder nijkha gáʼñúún a̱jmi̱i̱n a̱ngui̱i̱n bi̱ guanuu, nákha ikhú, ikhiin kúwíin náa Betel. Rígi̱ niʼni dí maʼgíminaʼ makuʼma solicitud ndrígóo mu maʼga ikhí índo̱ gagiʼdoo tsiguuʼ mu ma̱ndoo maʼga. Rí mayo tsiguʼ 1990 niguma invitar náa Betel ndrígóo Wallkill.

Ikhí nigiʼdoo mixtiʼkhu ñajunʼ, nixtáa náa Departamento ndrígóo Limpieza, náa Departamento ndrígóo Hacienda ga̱jma̱a̱ náa Oficina ndrígóo Betel. Nákha tsiguʼ 1997 ninigúnʼ ga̱jma̱a̱ Angela, asndu nákha má ikhú niñejunʼ mbóó náa Betel. Tsiguʼ 2014 nigúun náa Warwick, náa ndxájulú Winder niñejunʼ gajmiún bi̱ nini̱ guʼwá náa dí phú na̱ʼkha̱ ikha. Tsiguʼ 2016 niguáan náa Patterson, náa Centro Educativo ndrígóo Watchtower, ga̱jma̱a̱ ikhiin niñejunʼ náa Servicios ndrígóo Audio ga̱jma̱a̱ Video. A̱jkhu̱ tsiguʼ nda̱wa̱á nitangi̱i̱n náa Warwick, ga̱jma̱a̱ ndxájulú Winder nixuʼmaa maʼga̱ náa oficina ndrígóo Comité náa nuñewu̱u̱n a̱ngiu̱lú bi̱ nuñejunʼ. Rí marzo tsiguʼ 2022 ninindxu̱u̱ bi̱ nambáyúu Cuerpo Gobernante.

Xa̱bu̱ bugi̱ gajkhun ni̱ndxu̱ún bi̱ Jeobá nimináanʼlú (Efes. 4:8). Nuʼtájkáan má xúʼko̱ rí magumaa tsajkurámiinʼ ga̱jma̱a̱ numuu ñajunʼ rí nuni̱ numuu Reino.