Jeobá nandoo rí xúgíinʼ matanga̱a̱ a̱jkiu̱ún

1. Ndiéjuunʼ eʼni mbáa xa̱bu̱ índo̱ natanga̱a̱ a̱jkiu̱u̱n rá.

ÍNDO̱ nu̱ʼni̱ mbá dí ra̱májánʼ gíʼdoo wéñuuʼ numuu dí matanga̱a̱ a̱jkiu̱lú. Náa Biblia naʼthí dí xa̱bu̱ bi̱ natanga̱a̱ a̱jkiu̱u̱n nagíʼdu̱u̱ nawiyu̱u̱ʼ kaʼyoo dí ra̱májánʼ dí niʼni, ga̱jma̱a̱ nánguá etanga̱a̱ maʼni mbu̱júu̱ dí raʼkhí (Mat. 3:9; Hech. 3:19; 2 Pedro 3:9).

2. Ndíjkha rí xúgiáanʼ gíʼmaa mbuʼyáá ndiéjuunʼ eyoo gáʼthúu̱n rí matanga̱a̱ a̱jkia̱a̱nʼ rá. (Nehemías 8:​9-11.)

² Xúgiáánʼ gíʼmaa mbuʼyáá ndiéjuunʼ eyoo gáʼthúu̱n rí matanga̱a̱ a̱jkiu̱lú. Náá numuu rá. Numuu rí xúgíʼ mbiʼi nakiéʼkulu, numuu rí naguwaʼlú náa Adán ga̱jma̱a̱ Eva, xúgiáánʼ nuxuʼdamíjná aʼkhá ga̱jma̱a̱ nakháñulú (Rom. 3:23; 5:12). Asndu xa̱bu̱ bi̱ guáʼdáá itháán mba̱a̱ fe xó má apóstol Pablo, niʼniún mingíjyúuʼ munimíjna̱ mu xúni̱ aʼkhá (Rom. 7:​21-24). Mú raʼkháa rígi̱ eyoo gáʼthúu̱n rí makuwáanʼ ngíná ga̱jma̱a̱ numuu rí nindxu̱lú xa̱bu̱ aʼkhá. Jeobá nagáwíinʼ a̱jkiu̱u̱n ga̱jma̱a̱ nandoo rí makuwáanʼ gagi gundxaʼwamíjna̱ ga̱jma̱a̱ numún judíos bi̱ nikúwá nákha nixtáa Nehemías (atraxnuu Nehemías 8:​9-11).a Jeobá na̱nguá nindoo rí makuwá ngíná ga̱jma̱a̱ numuu aʼkhá rí nixudamíjna̱ nákha niʼníí, ikhaa nindoo rí mbuyamajkuíí ga̱jma̱a̱ gagi. Jeobá ndaʼyoo dí índo̱ natanga̱a̱ a̱jkiu̱lú nambáyulú mu makuwáanʼ gagi, ikha jngóo naʼsngúlú ndiéjuunʼ eyoo gáʼthúu̱n rí matanga̱a̱ a̱jkiu̱lú. Nduʼyáá gajkhun dí Anu̱lú, bi̱ nagáwíinʼ a̱jkiu̱u̱n, maʼni mba̱a̱ a̱jkiu̱u̱n kaʼyulú á mu natanga̱a̱ a̱jkiu̱lú.

3. Ndiéjuunʼ guʼyáá náa artículo rígi̱ rá.

³ Náa artículo rígi̱ majmañulú itháán ndiéjuunʼ eyoo gáʼthúu̱n rí matanga̱a̱ a̱jkia̱a̱nʼ. Ginii kayuuʼ mbuʼyáá ndiéjuunʼ niʼsngúún Jeobá xa̱bu̱ Israel ga̱jma̱a̱ numuu rí matanga̱a̱ a̱jkiu̱ún. Ga̱jma̱a̱ mbuʼyáá xú káʼnii Jeobá nimbáñún xa̱bu̱ mu matanga̱a̱ a̱jkiu̱ún. Nda̱wa̱á kayuuʼ mbuʼyáá ndiéjuunʼ nijmañún xa̱bi̱i̱ Jesús ga̱jma̱a̱ numuu rí matanga̱a̱ a̱jkiu̱ún.

JEOBÁ NIʼSNGÚÚN ISRAELITAS XÓO MATANGA̱A̱ A̱JKIU̱ÚN

4. Ndiéjuunʼ nisngúún Jeobá israelitas ga̱jma̱a̱ numuu rí matanga̱a̱ a̱jkia̱a̱nʼ rá.

⁴ Índo̱ Jeobá niraʼwíin israelitas mu mani̱ndxu̱ún xa̱bu̱ xuajñuu, ikhaa nimbánuminaʼ gajmíi̱nʼ, nixnúún tikhu xtángoo ga̱jma̱a̱ ikhiin nixudamíjna̱ rí munimbaníí. Jeobá nikudaminaʼ rí mañewu̱u̱n ga̱jma̱a̱ maʼni tsajkurámiinʼ á mu nunimbu̱u̱n má xúʼko̱ xtángoo ndrígóo. Ga̱jma̱a̱ niʼthúún: “Kiʼtáñajunʼ dí xtáá raxna̱a̱ʼ xúgi̱ na̱nguá gakhi̱i̱ matanimbáníí ni má na̱nguá rígá mitsínguánʼ” (Deut. 30:​11, 16). Mú, á mu tsénimbu̱u̱n kuyáá, mbá xkri̱da, xóo índo̱ nduyamajkhún eʼwíinʼ dioses, ikhaa ni xáñe̱wu̱u̱n. Mú, lá rígi̱ eyoo gáʼthúu̱n rí ni xándoo matangi̱ín náa Dios xáʼ. Na̱nguá, numuu rí náa Xtángoo naʼthí dí ma̱ndoo matangi̱ín náa Jeobá Dios ndrígu̱ún ga̱jma̱a̱ mudxawíín mbu̱júu̱ aʼwóo (Deut. 30:​1-3, 17-20). Xóo muʼthá, ma̱ndoo matanga̱a̱ a̱jkiu̱ún. Ga̱jma̱a̱ á mu nuni̱ xúʼko̱, Jeobá ma̱ʼkha̱a̱ kagui̱ínʼ ga̱jma̱a̱ maʼni tsajkurámiinʼ mbu̱júu̱.

5. Xú káʼnii nisngájma Jeobá rí niʼngo̱o̱ a̱jkiu̱u̱n kaʼyoo xuajñuu rá. (2 Reyes 17:​13, 14.)

⁵ Xuajin rí Jeobá niraʼwíí mu mani̱ndxu̱u̱ xuajñuu, mbaʼa nuthu nikujximínáʼ náa inuu, ndiyamajkhún mbaʼin xándú bi̱ ragájkhun ma̱ngaa nini̱ mbaʼa enii dí ra̱májánʼ kayuuʼ, ga̱jma̱a̱ numuu rígi̱ ikhiin nimíniiʼ. Mú Jeobá tániñúnʼ, nikuʼmiin mbaʼin profeta bi̱ mumbañún matanga̱a̱ a̱jkiu̱ún ga̱jma̱a̱ matangiín mbu̱júu̱ náa ikhaa (atraxnuu 2 Reyes 17:​13, 14).

6. Xú káʼnii nijmiuu Jeobá profetas mu maʼsngúún xa̱bu̱ xuajñuu, dí gíʼdoo numuu matanga̱a̱ a̱jkiu̱ún rá. (Atayáá ma̱ngaa xtiʼkhuu.)

⁶ Mbaʼa nuthu Jeobá nikungui̱i̱nʼ profeta ndrígóo mu maʼthúún xa̱bu̱ xuajñuu ga̱jma̱a̱ maxprígún. Mbá xkri̱da, Dios niʼthúu̱n Jeremías dí maʼthúún israelitas: “Gatanga̱án Israel bi̱ tséʼnimbo̱o̱ [...]. Xáyala ga̱jma̱a̱ sia̱nʼ, numuu rí ikhúún na̱ni̱ rí jmbu [...]. Xákiʼnún asndu kámuu. Atayáá rí nikiéʼkháanʼ numuu rí nitaxújximinaʼ náa inuu Jeobá Dios ndrígáaʼ” (Jer. 3:​12, 13). Niʼthúu̱n Joel dí maʼthúún xa̱bu̱ xuajñuu: “Gatangáanʼla ga̱jma̱a̱ xúgíʼ a̱jkia̱la” (Joel 2:​12, 13). Niʼni rí Isaías maʼthúún: “Gunanla, guni̱ kaʼwumijnáa, guyejxingaa náa iduʼ xúgíʼ dí ra̱májánʼ dí nuni̱la, guniʼñááʼ runi̱ dí ra̱májánʼ” (Is. 1:​16-19). Ma̱ngaa nijmiuu Ezequiel mu marajxi̱: “Lá naʼni maʼdxuʼ índo̱ nakháñuu mbáa xa̱bu̱ ra̱májáanʼ ráʼ. [...] Lá tsíyóʼ dí maniñuuʼ kambo̱o̱ ga̱jma̱a̱ maxtáa má xúʼko̱ xáʼ”. “Tséʼni maʼdxuʼ índo̱ mbáa nakháñuu [...]. Ikha jngóo gagutangáanʼla náa ikhúún ga̱jma̱a̱ xúʼko̱ makuwáanʼla” (Ezeq. 18:​23, 32). Jeobá ra̱ʼkhá tháán nadxuu índo̱ ndaʼyoo dí xa̱bu̱ natanga̱a̱ a̱jkiu̱ún náa aʼkhá dí nini, numuu dí ikhaa nandoo dí makuwá kámuu mbiʼi. Xó má eʼyáá, Jeobá na̱nguá egi̱ʼthu̱u̱n dí asndu índo̱ xa̱bu̱ bi̱ nikudaminaʼ aʼkhá matanga̱a̱ a̱jkiu̱u̱n mu mambáyúu. Guʼyáá xóó tikhu xkri̱da.

7. Ndiéjunʼ niʼsngúún Jeobá xa̱bu̱ xuajñuu ga̱jma̱a̱ numuu xkri̱da ndrígóo Oseas ga̱jma̱a̱ a̱ʼgiu̱u̱ rá.

⁷ Guʼyáá ndiéjunʼ niʼsngúún Jeobá xa̱bu̱ xuajñuu ga̱jma̱a̱ dí xóo nixtáa profeta Oseas ga̱jma̱a̱ a̱ʼgiu̱u̱. Gómer nikudaminaʼ aʼkhá ga̱jma̱a̱ nda̱wa̱á niniñuuʼ Oseas ga̱jma̱a̱ numún eʼwíinʼ xa̱bekha. Lá Jeobá ndiʼyoo dí nánguá gíʼdoo numuu xáʼ. Jeobá bi̱ naʼngo̱o̱ ndaʼyoo dí gíwánʼ náa a̱jkiu̱ún xa̱bu̱, niʼthúu̱n Oseas: “Ayuʼ mbu̱júu̱, gaʼndaaʼ xtayáá a̱ʼgu̱ bi̱ nandoo kaʼyoo imba̱a̱ xa̱bu̱ bi̱ xtáa rakudaminaʼ aʼkhá gajmíi̱n eʼwíinʼ, xó má Jeobá nandoo kaʼyoo xuajin Israel, maski ajndu ikhiin nagún kidxu̱únʼ eʼwíinʼ dioses” (Os. 3:1; Prov. 16:2). Xámbulú dí Gómer kaʼníí xtáa rakudaminaʼ aʼkhá. Mú, Jeobá niʼthúu̱n Oseas dí ikhaa ginii maʼni mba̱a̱ a̱jkiu̱u̱n kaʼyoo ga̱jma̱a̱ dí matanga̱a̱ mbayáa mbu̱júu̱ mu mani̱ndxu̱u̱ a̱ʼgiu̱u̱.b Ga̱jma̱a̱ xkri̱da rígi̱ dí gajkhun nirígá, Jeobá nindoo maʼsngúún xa̱bu̱ xuajñuu dí ikhaa támbumuu kaʼñún. Maski ajndu kaʼníí kúwá ruxudamijna aʼkhá, mú ikhaa tániñuuʼ raʼndoo kaʼñúún ga̱jma̱a̱ nikungui̱i̱nʼ má xúʼko̱ profeta mu mambáñún matanga̱a̱ a̱jkiu̱ún ga̱jma̱a̱ muriʼkumijná. Lá rígi̱ eyoo gáʼthúu̱n dí Jeobá “bi̱ ndaʼyoo rí gíwánʼ náa a̱jkiu̱ún xa̱bu̱”, maʼniminaʼ mambáyúu matanga̱a̱ a̱jkiu̱u̱n mbáa xa̱bu̱ bi̱ kaʼníí xtáa rakudaminaʼ aʼkhá ráʼ. (Prov. 17:3.) Guʼyáá.

JEOBÁ NAMBÁÑÚÚN XA̱BU̱ MU MATA̱NGA̱A̱ A̱JKIU̱ÚN

8. Ndiéjunʼ niʼni Jeobá mu mambáyúu Caín mata̱nga̱a̱ a̱jkiu̱u̱n rá. (Génesis 4:​3-7; atayáá ma̱ngaa xtiʼkhuu.)

⁸ Caín ninindxu̱u̱ timbáa a̱ʼdióo Adán ga̱jma̱a̱ Eva. Ga̱jma̱a̱ nikudaminaʼ aʼkhá xó má ikhiin. Ma̱ngaa, náa Biblia naʼthí dí “niʼni nindxu̱u̱ ra̱májánʼ” (1 Juan 3:12). Ga̱jma̱a̱ numuu rígi̱, índo̱ ikhaa nixnájxi̱ mbá tsigijñaʼ, Jeobá ‹tánigu̱u̱ʼ rí niʼni Caín ni má tsigijñaʼ ndrígóo›. Mú, na̱nguá nindoo gáriʼkhu̱u̱ xóo nindxu̱u̱ “Caín ra̱ʼkhá tháán nikiʼnáa ga̱jma̱a̱ nijmáa a̱jkiu̱u̱n”. Ndiéjunʼ niʼni Jeobá rá. Ikhaa niʼtámíjná ga̱jma̱a̱ (atraxnuu Génesis 4:​3-7). Jeobá niʼthúu̱n ga̱jma̱a̱ ajngáa májánʼ dí ma̱ndoo mata̱nga̱a̱ mambájxu̱u̱ ga̱jma̱a̱, ma̱ngaa niʼthúu̱n dí migamíi maʼni mbá dí ra̱májánʼ á mu na̱nguá eriʼkumina. Phú ngíná ninindxu̱u̱ dí Caín na̱nguá niʼdxawuun dí niʼthúu̱n Jeobá ga̱jma̱a̱ tániñaminaʼ dí mambáyúu mu mata̱nga̱a̱ a̱jkiu̱u̱n. Maski ajndu Caín táʼndoo gaʼdxawuunʼ Dios, mú Jeobá na̱nguá niraʼwíí dí xámbáñún eʼwíinʼ xa̱bu̱ mu mata̱nga̱a̱ a̱jkiu̱ún.

9. Xú káʼnii nimbáyúu Jeobá David mu matanga̱a̱ a̱jkiu̱u̱n rá.

⁹ Jeobá nindoo kaʼyoo wéñuuʼ rey David. Ikhaa niʼthí dí nindxu̱u̱ ‹mbáa xa̱bu̱ bi̱ naʼni a̱jkiu̱u̱n kaʼyoo› (Hechos 13:22). Mú, David nikudaminaʼ aʼkhá mbiiʼ, xóo dí nikudaminaʼ aʼkhá ga̱jma̱a̱ a̱ʼgiu̱u̱ imba̱a̱ xa̱bu̱, ga̱jma̱a̱ niríyaʼ awan mu xa̱bu̱ buʼko̱ makhañúu, náa Xtángoo dí niʼnirámáʼ Moisés naʼthí dí kaʼyoo makhañúu (Lev. 20:10; Núm. 35:31). Mú, Jeobá ra̱ʼkhá tháán májánʼ a̱jkiu̱u̱n, nimbáyúu David mu mata̱nga̱a̱ a̱jkiu̱u̱n, nikuʼmaa profeta Natán mu maʼtámíjná ga̱jma̱a̱, maski ajndu David na̱nguá nisngájma dí natanga̱a̱ a̱jkiu̱u̱n.c Natán nijmuu mbá xkri̱da mu mambáyúu maʼga̱nú ajndu náa a̱jkiu̱u̱n David. Ikhú rey nikro̱ʼo̱o̱ dí nikudaminaʼ aʼkhá náa Jeobá ga̱jma̱a̱ nitanga̱a̱ a̱jkiu̱u̱n (2 Sam. 12:​1-14). Niʼnirámáʼ mbá salmo náa nasngájma dí ra̱ʼkhá tháán nigáwi̱i̱nʼ a̱jkiu̱u̱n ga̱jma̱a̱ numuu dí niʼni (Sal. 51, rí kayá edxu̱u̱). Mbaʼin xa̱bu̱ bi̱ nixudamijna aʼkhá naʼni̱i̱ a̱jkiu̱ún índo̱ nuraxnuu salmo rígi̱, ga̱jma̱a̱ naxkajxi̱i̱n mata̱nga̱a̱ a̱jkiu̱ún. Lá ragájkhun dí asndu mangáánʼ nadxulú dí Jeobá nimbáyúu David mu mata̱nga̱a̱ a̱jkiu̱u̱n ráʼ.

10. Xú káʼnii ku̱ma̱a̱ʼ ikháán índo̱ natayáá dí Jeobá naʼngo̱o̱ a̱jkiu̱u̱n kaʼyulú ga̱jma̱a̱ dí naʼni mba̱a̱ a̱jkiu̱u̱n kaʼyulú rá.

¹⁰ Jeobá naguiyu̱u̱ʼ kaʼyoo xúgíʼ enii aʼkhá (Sal. 5:​4, 5). Mú, ndaʼyoo má dí xúgiáánʼ nindxu̱lú xa̱bu̱ aʼkhá, numuu dí nandoo kaʼyulú, ikha jngóo nambáyulúʼ muʼnimi̱jna̱ gajmiúlú aʼkhá. Asndu naʼniminaʼ mambáñún xa̱bu̱ bi̱ ra̱ʼkhá tháán nixudami̱jna̱ aʼkhá mu matanga̱a̱ a̱jkiu̱ún ga̱jma̱a̱ magún kanuu náa ikhaa. ¡Ra̱ʼkhá tháán naʼni̱i̱ a̱jkiu̱lú índo̱ nduʼyáá dí Jeobá naʼni mba̱a̱ a̱jkiu̱u̱n kaʼyulú! Índo̱ nundxaʼwamíjna̱ rí Jeobá naʼngo̱o̱ a̱jkiu̱u̱n ga̱jma̱a̱ naʼni mba̱a̱ a̱jkiu̱u̱n, naxkajxáánʼ muguajún má xúʼko̱ jmbu, ga̱jma̱a̱ matanga̱a̱ mbá nacha̱ a̱jkiu̱lú á mu nakiéʼkulu. Dí xúgi̱, guʼyáá ndiéjunʼ nijmañún xa̱bi̱i̱ Jesús ga̱jma̱a̱ numuu dí matanga̱a̱ a̱jkiu̱ún.

DÍ NIJMAÑÚN XA̱BI̱I̱ JESÚS GA̱JMA̱A̱ NUMUU DÍ MATANGA̱A̱ A̱JKIA̱A̱Nʼ

11, 12. Xú káʼnii xkri̱da nijmuu Jesús mu masngájma dí Anu̱u̱ xtáa má xúʼko̱ xawii maʼni mba̱a̱ a̱jkiu̱u̱n rá. (Atayáá ma̱ngaa xtiʼkhuu.)

¹¹ Nákha siglo timbá, ni̱jkha̱nú mbiʼi dí ma̱ʼkha̱nú Mesías. Xó má ndiʼyáá náa artículo dí nijngoo, Jeobá nijmiuu Juan bi̱ nakumíinʼ iyááʼ xa̱bu̱ ga̱jma̱a̱ Jesús mu maʼsngúún xa̱bu̱ dí gíʼdoo numuu matanga̱a̱ a̱jkiu̱ún (Mat. 3:​1, 2; 4:17).

¹² Índo̱ Jesús niʼtáráʼa, niʼsngáa dí Anu̱u̱ xtáa má xúʼko̱ xawii maʼni mba̱a̱ a̱jkiu̱u̱n kaʼyulú. Mu maʼni makru̱ʼu̱u̱n nijmuu mbá xkri̱da ndrígóo mbáa xa̱bu̱ nikhi̱i̱ ga̱jma̱a̱ a̱ʼdióo. Dxámá bugi̱ niraʼwíí magajnúu náa goʼwóo ga̱jma̱a̱ niʼni xúgíʼ enii dí ra̱májánʼ. Nda̱wa̱á dí nijngoo mbayuuʼ mbiʼi, “nigíiʼ a̱jkiu̱u̱n” ga̱jma̱a̱ nitanga̱a̱. Ndiéjunʼ niʼni anu̱u̱ xá. Jesús niʼthí dí “índo̱ ka̱ʼníí e̱ʼkha̱a̱ mitsínguánʼ, anu̱u̱ ndiʼyoo, ikhú nigáwiinʼ a̱jkiu̱u̱n kaʼyoo. Ni̱jkha̱ ragáyúu gátsijnuu, ndiyáraʼaa ga̱jma̱a̱ nixnúu beso”. Dxámá nikumu̱u̱ maʼthúu̱n anu̱u̱ dí mani̱ndxu̱u̱ mbáa ñumbáá ndrígóo. Mú xa̱bu̱ nikhi̱i̱ ra̱ʼkhá tháán nindoo maʼni mba̱a̱ a̱jkiu̱u̱n kaʼyoo ga̱jma̱a̱ niʼthí: “A̱ʼdióʼ bugi̱ [...] nindáti̱ga̱a̱ mú nikujma̱a̱” (Luc. 15:​11-32). Nákha Jesús xóó tséʼkha̱ náa tsu̱du̱u̱ Ku̱ba̱ʼ, mbaʼa nuthu ndiʼyoo xú káʼnii Jeobá nigáwi̱i̱nʼ a̱jkiu̱u̱n kaʼñúún xa̱bu̱ aʼkhá bi̱ nitanga̱a̱ a̱jkiu̱ún. Ikha jngóo nindoo nijmuu mbá xkri̱da dí nagui̱i̱ wéñuuʼ mu maʼthí xú káʼni Anu̱lú Jeobá nagáwi̱i̱nʼ a̱jkiu̱u̱n kaʼyulú.

13, 14. Ndiéjunʼ nijmañuu Pedro ga̱jma̱a̱ numuu dí mata̱nga̱a̱ a̱jkia̱a̱nʼ, ga̱jma̱a̱ ndiéjunʼ niʼsngáa numuu rígi̱ xá. (Atayáá ma̱ngaa xtiʼkhuu.)

¹³ Apóstol Pedro nijmañuu náa Jesús mbaʼa ikha ga̱jma̱a̱ numuu dí mata̱nga̱a̱ a̱jkia̱a̱nʼ ga̱jma̱a̱ dí matani mba̱a̱ a̱jkia̱a̱nʼ. Pedro mbaʼa nuthu nikiéʼkúun, mú Jesús nixtáa má xúʼko̱ xawii maʼni mba̱a̱ a̱jkiu̱u̱n kaʼyoo. Mbá xkri̱da, ajtsú nuthu niʼni gaʼduunʼ dí na̱nguá eniniiʼ Jesús ga̱jma̱a̱ nda̱wa̱á ra̱ʼkhá tháán nigawúunʼ ga̱jma̱a̱ numuu dí niʼni (Mat. 26:​34, 35, 69-75). Mú, nda̱wa̱á dí Jesús nitujxi̱i̱ nisngájmaminaʼ náa Pedro índo̱ ikhaa xtáa mbáwíi mu maʼtámíjná ga̱jma̱a̱ (Luc. 24:​33, 34; 1 Cor. 15:​3-5). Jesús ndiʼyoo dí Pedro nitanga̱a̱ a̱jkiu̱u̱n ikha jngóo nindoo dí maʼni̱i̱ a̱jkiu̱u̱n ga̱jma̱a̱ maʼthúu̱n dí niʼni mba̱a̱ a̱jkiu̱u̱n kaʼyoo (Mar. 16:7).

¹⁴ Pedro nikro̱ʼo̱o̱ ndiéjunʼ nindxu̱u̱ dí matanga̱a̱ a̱jkia̱a̱nʼ ga̱jma̱a̱ dí muni̱ mba̱a̱ a̱jkiu̱ún kuyaaʼ. Ikha jngóo nindoo niʼsngúún eʼwíinʼ ga̱jma̱a̱ numuu rígi̱. Nda̱wa̱á rí nijngoo Ndxa̱a̱ Pentecostés, nixná mbá discurso náa kúwá mbaʼin judío ga̱jma̱a̱ niʼthúún dí ikhiin nixiyáa Mesías, mú ma̱ngaa niʼthúún ga̱jma̱a̱ ajngáa gua̱ba̱ʼ: “Gatanga̱a̱ a̱jkia̱la ga̱jma̱a̱ aguwa̱ʼla mu aʼkhá ndrígála majngudi̱i̱, ga̱jma̱a̱ mínaaʼ má Jeobá gáʼni rí ma̱ʼkha̱ mbiʼi rí maʼni̱i̱ a̱jkia̱la” (Hech. 3:​14, 15, 17, 19). Ga̱jma̱a̱ ajngáa rígi̱, Pedro niʼsngáa dí bi̱ nagáwi̱i̱nʼ a̱jkiu̱u̱n gíʼmaa mata̱nga̱a̱, xóo muʼthá, mariʼkhu̱u̱ xóo endxa̱ʼwáminaʼ, maniñuuʼ raʼni dí ra̱májánʼ mu magíʼdu̱u̱ maʼni dí Dios naniguuʼ. Apóstol niʼthí dí Jeobá maʼnigu̱di̱i̱ aʼkhúún, maʼnimbáti̱ga̱a̱ mbá kayuuʼ. Ga̱jma̱a̱ mbayuuʼ tsiguʼ nda̱wa̱á, niʼthí: “Ikhaa naʼngo̱o̱ a̱jkiu̱u̱n kaʼyala numuu rí tsíyóo rí nimbáa maguma gámbáa, ikhaa nandoo rí xúgíinʼ maguánú matanga̱a̱ a̱jkiu̱ún” (2 Pedro 3:9). ¡Ra̱ʼkhá tháán nagui̱i̱ índo̱ nduʼyáá dí Jeobá ma̱ndoo maʼni mba̱a̱ a̱jkiu̱u̱n mbá kayuuʼ, maski ajndu nixuʼdámíjná mbá aʼkhá mbiiʼ!

15, 16. a) Ndiéjunʼ nijmañuu Pablo ga̱jma̱a̱ numuu dí nini mba̱a̱ a̱jkiu̱ún kuyáá xá. (1 Timoteo 1:​12-15.) b) Ndiéjuunʼ guʼyáá náa imbo̱ʼ artículo rá.

¹⁵ Saulo bi̱ nixtáa náa Tarso niʼni mbaʼa enii dí ra̱májánʼ. Ra̱ʼkhá tháán niʼni ngíníin xa̱bi̱i̱ Jesús índo̱ nixkúún. Ikha jngóo dí mbaʼin cristianos nikumu̱ún dí nditháan xaríʼkuminaʼ. Mú Jesús ndiʼyoo dí Saulo ma̱ndoo mariʼkuminaʼ ga̱jma̱a̱ mata̱nga̱a̱ a̱jkiu̱u̱n. Jesús ga̱jma̱a̱ Anu̱u̱ ndiyáá dí májánʼ náa Saulo. Jesús niʼthí: “Xa̱bu̱ bugi̱ ndiʼyáaʼ mu majmiuʼ” (Hech. 9:15). Asndu nijmuu mbá milagro mu mambáyúu matanga̱a̱ a̱jkiu̱u̱n (Hech. 7:58–8:3; 9:​1-9, 17-20). Itháan nda̱wa̱á, índo̱ Saulo ni̱jkha̱nú ninindxu̱u̱ cristiano ga̱jma̱a̱ nijmaʼniiʼ xóo apóstol Pablo, mbaʼa nuthu nixnáa núma̱aʼ Jeobá ga̱jma̱a̱ Jesús ga̱jma̱a̱ numuu dí nigáwi̱i̱nʼ a̱jkiu̱ún kuyáá (atraxnuu 1 Timoteo 1:​12-15). Pablo niʼsngáa: “Dios nandoo mambáyaaʼ mu mata̱nga̱a̱ a̱jkia̱a̱nʼ náa dí ra̱májánʼ dí nitani̱” (Rom. 2:4).

¹⁶ Mbá miʼtsú, Pablo niʼdxawuun dí náa congregación dí nirígá náa Corinto niniña̱a̱nʼ dí maxtáa mbáa xa̱bu̱ bi̱ nakudaminaʼ aʼkhá ga̱jma̱a̱ imba̱a̱. Ndiéjunʼ niʼni mu maʼnimbánuu xkujndu xá. Dí xóo niʼni naʼsngúlú xú káʼnii Jeobá nasngájma ngajua ga̱jma̱a̱ dí naxprígulú ma̱ngaa dí gíʼdoo numuu magáwi̱i̱nʼ a̱jkiu̱lú. Náa i̱mba̱ artículo mbuʼyáá ndiéjunʼ nirígá náa congregación dí nirígá náa Corinto.