Ndiéjunʼ guʼni á mu nuʼni a̱jma̱ a̱jkiu̱lú rá.

1, 2. a) Ndíjkha dí gamíi maʼni a̱jma̱ a̱jkiu̱lú rá. b) Ndiéjunʼ guʼyáá náa artículo rígi̱ rá.

XÚGIÁÁNʼ nguáná nuʼni a̱jma̱ a̱jkiu̱lú.a Mbá xkri̱da, atatsaʼwáminaʼ ga̱jma̱a̱ numuu mbáa dxáʼgú o dxámá bi̱ ndiʼkhún nindxu̱u̱ publicador, mbá narajximínáʼ á mu Jeobá naxmiéjunʼ kaʼyoo ga̱jma̱a̱ rígi̱ naʼni dí mamíñuu maxnáximinaʼ majngúun iyááʼ o atatsaʼwáminaʼ ga̱jma̱a̱ numuu mbáa ndxájulú bi̱ nákhá nindxu̱u̱ dxáma̱á niráʼwíí maʼni ginii ñajuunʼ Jeobá ki xóo rí mañajunʼ makhánáá mbújkha̱a̱. Mú, dí xúgi̱ gíʼdiin famílio̱o̱ ga̱jma̱a̱ naku̱mu̱u̱ rí tséʼngo̱o̱ mbújkha̱a̱ mu maxnún dí ndañúu̱nʼ bi̱ kúwá náa goʼwóo, mbáa narajximínáʼ á mu niráʼwíí májánʼ dí niʼni. Guʼyáá i̱mba̱ xkri̱da, mbáa ndxájulú a̱ʼgú nikhi̱i̱ bi̱ nánguá gíʼdoo tsiaki̱i̱ ga̱jma̱a̱ xtáa ngíná numuu rí nánguá eʼngo̱o̱ gáʼni ñajuunʼ Jeobá xó má nákhá ginii. Mbáa ikháán ma̱ngaa ni̱dxu̱ʼnú nitraximínáʼ rígi̱: “Lá naxmiéjuunʼ kaʼyoʼ Jeobá ráʼ. Lá giʼdoo numuu xúgíʼ tsiaki̱i̱ dí ninii ga̱jma̱a̱ numuu ikhaa xáʼ. Lá kaʼníí gúʼdoo numuʼ eʼyoo xáʼ.”

² Rí mundxaʼwamíjna̱ xígi̱ kaʼnii gamíi maʼni makáwabaaʼ fe ndrígulú ga̱jma̱a̱ maʼni rí asndu muniʼñááʼ ru̱ʼni̱ ñajuunʼ Jeobá. Náa artículo rígi̱ mbuyáá xóo Biblia ma̱ndoo mambáyulú á mu nakumulú rí Jeobá tsixmiéjunʼ kaʼyulú, á mu nuʼni a̱jma̱ a̱jkiu̱lú ga̱jma̱a̱ numuu dí niraʼwíí muʼni nákhá niʼníí o á mu nakumulú dí nánguá gíʼdoo numulú eʼyoo Jeobá.

NDIÉJUNʼ GÚʼNI Á MU NUʼNI A̱JMA̱ A̱JKIU̱LÚ RÁ.

3. Ndiéjunʼ gámbáyulú mu xúʼni̱ a̱jma̱ a̱jkiu̱lú rá.

³ Á mu rígá dí naʼni maʼni a̱jma̱ a̱jkiu̱lú, Biblia ma̱ndoo mambáyulú. Á mu nuraxnuu o nduʼyáá dí mambáyulú, fe rí kuáʼdáá náa Jeobá maʼni itháán gujkhuʼ ga̱jma̱a̱ mambájxulú itháán májánʼ gajmiúlú ikhaa ma̱ngaa ‹maguáʼdáá má xúʼko̱ fe› (1 Cor. 16:13).

4. Xú káʼnii ma̱ndoo mbuʼyáá “á mu xúgíʼ nindxu̱u̱ gajkhun” xó ma eʼthí náa 1 Tesalonicenses 5:21 rá.

⁴ (Atraxnuu 1 Tesalonicenses 5:21). Náa Biblia naʼthúlú: “Gu̱ya̱a̱ á mu xúgíʼ nindxu̱u̱ gajkhun”. Xú káʼnii guʼni rá. Guʼni mbríguíi dí nundxaʼwamíjná ga̱jma̱a̱ dí naʼthí náa Biblia. Atatsaʼwáminaʼ ga̱jma̱a̱ numuu xkri̱da ndrígóo mbáa dxámá o dxáʼgú bi̱ naʼni a̱jma̱ a̱jkiu̱u̱n á mu Jeobá naxmiéjuunʼ kaʼyoo. Lá májánʼ gáʼni dí mbayáʼ mbaʼyoo á mu Jeobá naxmiéjuunʼ kaʼyoo xáʼ. Xúʼko̱, itháán máján’ rí mbayáʼ náa Biblia mu mbaʼyoo ndiéjunʼ endxa̱ʼwáminaʼ Jeobá ga̱jma̱a̱ numuu ikhaa.

5. Xú káʼnii gándoo “muʼdxawíín” dí Jeobá naʼthúlúʼ ga̱jma̱a̱ numuu dí naʼni maʼni a̱jma̱ a̱jkiu̱lú rá.

⁵ Índo̱ nuraxnuu Biblia nindxu̱u̱ xóo Jeobá xtáa raʼtulúʼ. Mu ma̱ndoo muʼdxawíín dí ikhaa naʼthúlú ga̱jma̱a̱ numuu rí naʼni maʼni a̱jma̱ a̱jkiu̱lú, ndayóoʼ mbuʼyáʼ texto ndrígóo Biblia náa naʼthí ga̱jma̱a̱ numuu dí naʼni naxmiéjunlú ma̱ngaa ma̱ndoo muʼnigajmaa xúgíiʼ i̱yi̱i̱ʼ dí naguwíi xuajñuu Jeobá, mu mbuʼyáaʼ itháán (Prov. 2:​3-6). Ndayóoʼ muʼtákáñii Jeobá mu muxkamaa dí mambáyulú mu xúʼni̱ a̱jma̱ a̱jkiu̱lú. Guʼyáʼ ikha ndrígóo Biblia ga̱jma̱a̱ guʼyáʼ dí ma̱ndoo mambáyulú. Ma̱ngaa májánʼ gaʼni dí muraxnuu ga̱jma̱a̱ numún xa̱bu̱ bi̱ niguájun jmbu nákhá wájyúuʼ, bi̱ niguánu nikúwá xó ma ikháanʼ.

6. Xú káʼnii embáyulú reunión mu xúʼni̱ a̱jma̱ a̱jkiu̱lú rá.

⁶ Ma̱ngaa “nuʼdxawíín” Jeobá índo̱ najkua̱lú reunión, á mu tsetígulú nimbá reunión ma̱ndoo muʼdxawíín náa mbá discurso o náa mbá comentario rí phú ndayúlú mu xúʼni̱ a̱jma̱ a̱jkiu̱lú (Prov. 27:17). Rí xúgi̱ guʼthá ga̱jma̱a̱ numuu grajxe̱ dí nguáná nurajximíjna̱ ga̱jma̱a̱ ndiéjunʼ gámbáyulú mu maxtiʼña̱a̱.

“LÁ NAXMIÉJUUNʼ KAʼYOʼ JEOBÁ RÁʼ.”

7. Ndiéjunʼ dí nguáná nurajximíjnalu rá.

⁷ Mbáa ni̱dxu̱ʼnú mbá miʼtsú nitraximínáʼ á mu Jeobá naxmiéjuunʼ kaʼyáaʼ. Á mu naku̱ma̱a̱ʼ dí na̱nguá xtaʼdáá wéñuuʼ numaaʼ, mbáa makumaaʼ dí xándoo mambájxa̱a̱ʼ ga̱jma̱a̱ʼ bi̱ niʼniwíi xúgíʼ dí rígá. Mbáa xígi̱ má nikumu̱u̱ rey David ma̱ngaa. Ikhaa niʼniuu tsiánguá rí Jeobá naxmiéjuunʼ kaʼñún bi̱ nindxu̱ún xa̱bu̱ numbaaʼ, ikha jngóo nirajxi̱: ‹Tátá Jeobá, tsáá lá nindxu̱u̱ mbáa xa̱biya̱ mu maʼndaaʼ xtayáá, mbáa a̱ʼdióo xa̱biya̱ bi̱ nakháñuu mu maxmiéjuanʼ xtayáá rá.› (Sal. 144:3.) Guʼyáá xú káʼnii exti̱ʼña̱a̱ grajxe̱ rígi̱.

8. Xó má eʼthí 1 Samuel 16:​6, 7, 10-12, ndiéjunʼ dí ndaʼyoo Jeobá rá.

⁸ Náa Biblia naʼsngúlú dí Jeobá naxmiéjunʼ kaʼñún bi̱ nakujmaa dí na̱nguá guáʼdáá numún. Mbá xkri̱da, nikuʼmaa Samuel maʼga̱ náa goʼwóo Jesé mu maraʼwíi bi̱ mani̱ndxu̱u̱ nuxi̱i̱ʼ rey náa Israel. Jesé nindxaʼwún bi̱ mbá juwiin e̱ji̱i̱n mu maguwáʼ náa Samuel, mú tándxaʼwóo David bi̱ nindxu̱u̱ gi̱ʼtha̱á.b Mú, ¡Ikhaa nindxu̱u̱ bi̱ phú Jeobá niraʼwíí! (Atraxnuu 1 Samuel 16:​6, 7, 10-12). Náá numuu rá. Numuu dí Jeobá ndiʼyoo dí gíwánʼ náa a̱jkiu̱u̱n ga̱jma̱a̱ ndiʼyoo dí David nindxu̱u̱ mbá dxámá bi̱ ra̱ʼkhá tháán nindoo kaʼyoo.

9. Ndíjkha ma̱ndoo matayaa gajkhun dí Jeobá naxmiéjuunʼ kaʼyaaʼ rá. (Atayáá ma̱ngaa xtiʼkhuu.)

⁹ Atatsaʼwáminaʼ ga̱jma̱a̱ numuu rí Jeobá naʼni mu masngájma dí naxmiéjunʼ kaʼyáaʼ, naxná májánʼ consejo dí phú ndayáaʼ (Sal. 32:8). Rígi̱ nasngájma rí ikhaa naninííʼ májánʼ, numuu dí ndaʼyoo dí ndayáaʼ (Sal. 139:1). Á mu natanimbaníí consejo dí naxnáaʼ ga̱jma̱a̱ natayáá xóo embáyáaʼ mi̱dxu̱ʼnú matayaa dí Jeobá naxmiéjunʼ kaʼyaaʼ (1 Crón. 28:9; Hech. 17:​26, 27). Ikhaa ndaʼyoo xúgíʼ tsiaki̱i̱ rí natani̱ mu matani̱ ñajuunʼ (Jer. 17:10). Ma̱ngaa ndaʼyoo xóo májáanʼ xa̱bu̱ nindxa̱a̱ʼ ga̱jma̱a̱ ikhaa nandoo mambájxu̱u̱ ga̱jma̱á nindxa̱a̱ʼ, ikhaa maxtáa gagi á mu ikháán mangáánʼ nandaaʼ mambájxa̱a̱ʼ gajmaaʼ (1 Juan 4:19).

“LÁ MÁJÁNʼ DÍ NIRAʼWÍÍ NINI RÁʼ.”

10. Índo̱ nundxaʼwamíjna̱ ga̱jma̱a̱ numuu dí niraʼwíí niʼni, ndiéjunʼ e̱jkuánú erajximíjna̱lu rá.

¹⁰ Mbáa tikhuun naguánu nurajximíjna̱ á mu dí niraʼwíí muni̱ nákhá niʼníí nindxu̱u̱ májánʼ. Mbáa ikháán nitatsíñáánʼ mbá ñajunʼ dí xtaʼdáá mu matani̱ itháán ñajuunʼ Jeobá. Mú, xúgi̱ dí nijngoo má mbayuʼ tsiguʼ mbáa tikhuun bi̱ natatsiniúnʼ, bi̱ niraʼwi̱i̱ muñajunʼ mu makánún mbújkha̱a̱ nakujmaa dí kúwá itháan májánʼ. Ikha jngóo mbáa natraximínáʼ: “Lá gajkhun nigiʼdoo numuu xúgíʼ tsiaki̱i̱ dí nini̱ ga̱jma̱a̱ numuu Jeobá ráʼ. O lá itháán májánʼ á mu niñajunʼ mu madaaʼ itháan mbújkha̱a̱ dxe̱ʼ.”

11. Ndíjkha dí nixtáa ngíná bi̱ niʼnirámáʼ Salmo 73 rá.

¹¹ Á mu ni̱dxu̱ʼnú nitraximínáʼ rígi̱, atatsaʼwáminaʼ xú káʼnii nikumu̱u̱ bi̱ niʼnirámáʼ Salmo 73. Ikhaa ndaʼyoo dí bi̱ tséni ñajuunʼ Jeobá nakujmaa dí tséʼniún nandii, kúwá tsímáá ga̱jma̱a̱ kuáʼdáá mbújkha̱a̱ (Sal. 73:​3-5, 12). Índo̱ Salmista ndiʼyoo dí ikhiin nakujmaa dí kúwá itháán májánʼ ni̱jkha̱nú nindxa̱ʼwáminaʼ dí nditháan na̱nguá gíʼdoo numuu dí naʼni ga̱jma̱a̱ numuu Jeobá. “Káñii mbiʼi xtáa ngíná” ga̱jma̱a̱ nandxa̱ʼwáminaʼ dí raʼkhí (Sal. 73:​13, 14). Ndiéjunʼ nimbáyúu xá.

12. Xó má eʼthí Salmo 73:​16-18, ndiéjunʼ nimbáyúu salmista mu mandxaʼwáminaʼ májánʼ rá.

¹² (Atraxnuu Salmo 73:​16-18).c Salmista nijkha náa guʼwá dí nduyamajkuíí Jeobá. Ikhí rígá dí tsímáá, nindoo nindxa̱ʼwáminaʼ májánʼ ga̱jma̱a̱ ni̱jkha̱nú nikro̱ʼo̱o̱ dí maski ajndu tikhuun kuáʼdáá mbújkha̱a̱ ga̱jma̱a̱ kúwá májánʼ, mú na̱nguá kuáʼdáá mbá rí kuáʼti̱i̱n marigá nda̱wa̱á. Ikha jngóo nánguá nixtáa ngíná, numuu rí ni̱jkha̱nú ndiʼyoo dí itháán májánʼ rí matraʼwíí matani̱ ginii ñajuunʼ Jeobá, rígi̱ niʼni maʼnii a̱jkiu̱u̱n ga̱jma̱a̱ nixtáa xawii maʼni má xúʼko̱ ñajuunʼ Jeobá (Sal. 73:​23-28).

13. Ndiéjunʼ gátani̱ á mu natani̱ a̱jma̱ a̱jkia̱a̱nʼ ga̱jma̱a̱ numuu rí nitraʼwíí matani̱ nákha niʼníí rá. (Atayáá ma̱ngaa xtiʼkhuu.)

¹³ Ikháá má xóo salmista, ikháánʼ maʼngaaʼ mataniminaʼ gajmaaʼ dí naʼni maxmiéjuanʼ. Xú káʼnii gándoo gátani̱ rá. Atatsaʼwáminaʼ ga̱jma̱a̱ numuu xúgíʼ rí májánʼ dí xtaʼdáá, xóo Jeobá eʼni tsajkurámááʼ ga̱jma̱a̱ xúgíʼ dí gíʼdoo numuu rí xtaa ratrajxi̱i̱ mekhuíí. Mú mbaʼin xa̱bu̱ bi̱ tséni ñajuunʼ Jeobá na̱nguá kuáʼti̱i̱n mbá dí marigá nda̱wa̱á, numuu dí ikhiin nduyáá dí itháán gíʼdoo numuu dí maraʼdáá mbá májánʼ ñajunʼ ga̱jma̱a̱ dí maraʼdáá mbújkha̱a̱. Mú ma̱ngaa Jeobá nakudaminaʼ náa ikháánʼ dí maxnáa mbá dí ra̱ʼkhá tháán nagui̱i̱ nda̱wa̱á (Sal. 145:16). Atatsaʼwáminaʼ xú káʼnii gáraxtaa á mu i̱ʼwáʼ dí nitraʼwíí matani̱. Mú, nduʼyáá gajkhun rí á mu dí niraʼwíí muʼni nindxu̱u̱ ga̱jma̱a̱ numuu dí nandulúʼ kuʼyáá Jeobá ga̱jma̱a̱ eʼwíinʼ, maguaʼdáá má xúʼko̱ dí maʼni makuwáánʼ gagi.

“LÁ GÚʼDOO NUMUʼ EʼYOO JEOBÁ RÁ.”

14. Xú káʼnii kúwá tikhuun xa̱bi̱i̱ Jeobá ga̱jma̱a̱ ndiéjunʼ eguánú erajximíjna̱ xá.

¹⁴ Tikhuun xa̱bi̱i̱ Jeobá, tséʼngo̱o̱ guni̱ xó má ikhiin nandún, mbáa ga̱jma̱a̱ numuu dí wanii má o naʼniún nandii ga̱jma̱a̱ rígi̱ naʼni mundxaʼwamíjna̱ dí nánguá guáʼdáá numún náa Jeobá ma̱ngaa nurajximíjna̱: “Lá xóó gúʼdoʼ numuʼ eʼyoo Jeobá rá.”

15. Ndiéjunʼ dí ndiʼyoo gajkhun bi̱ niʼnirámáʼ Salmo 71 rá.

¹⁵ Bi̱ niʼnirámáʼ Salmo 71 ma̱ngaa nixmiéjuunʼ numuu rí nánguá gíʼdoo tsiaki̱i̱, ikhaa niʼtákáñuu Jeobá: “Xátatsiʼñúʼ índo̱ nándáa tsiaki̱i̱ ndrígóʼ” (Sal. 71:​9, 18). Mú, maski ajndu nikáguabaaʼ ga̱jma̱a̱ numuu rígi̱, salmista ndiʼyoo rí á mu naʼni kájxi̱ ñajuunʼ Jeobá, ikhaa má gaxnúu ikha ga̱jma̱a̱ ikhaa má gámbáyúu. Nikro̱ʼo̱o̱ dí Jeobá xtáa gagi ga̱jma̱a̱ numún bi̱ nuni̱ mbá tsiaki̱i̱ muni̱ ñajuunʼ asndu xó má eʼngo̱o̱ (Sal. 37:​23-25).

16. Ndíjkha nuʼthá dí guáʼdáá numún a̱ngiu̱lú guanii eʼyoo Jeobá rá. (Salmo 92:​12-15.)

¹⁶ Á mu ikháán nindxa̱a̱ʼ mbáa xa̱bu̱ nikhi̱i̱, ataniminaʼ matayaminaʼ xó má eʼyaaʼ Jeobá. Maski ajndu nánguá xtaʼdáá tsiaki̱i̱ mu matani̱ xó ma eʼnga̱a̱ʼ, mú Jeobá ma̱ndoo mambáyáaʼ mu matani̱ ñajuunʼ (atraxnuu Salmo 92:​12-15).d Xáraxtaa ngíná ga̱jma̱a̱ numuu dí tséʼnga̱a̱ʼ gátani̱, atayáá rí najmaa natani̱, ma̱ndoo maraxnu̱u̱n tsiaki̱i̱ eʼwíinʼ ga̱jma̱a̱ xkri̱da ndrígáaʼ ma̱ngaa dí maxmiéjuanʼ xtañún. Ma̱ngaa ma̱ndoo marathu̱u̱n eʼwíinʼ xú káʼnii Jeobá nimbáyaaʼ náa xúgíʼ tsiguʼ dí xtaa ga̱jma̱a̱ dí nandaaʼ matayaa xóo gambánuu rí ikhaa nikudaminaʼ maʼni. Xámbumaaʼ dí naratájkáan ga̱jma̱a̱ numuu eʼwíinʼ gíʼdoo wéñuuʼ numuu (1 Ped. 3:12). Tséʼniuu má asndu xó ma kuwáanʼlú, xúgiáanʼ ma̱ndoo muʼni ñajuunʼ Jeobá ga̱jma̱a̱ mumbáñún eʼwíinʼ.

17. Ndíjkha dí ragíʼmaa muʼni mbrígumijná gajmiúlú eʼwíinʼ rá.

¹⁷ Á mu xtaa ngíná ga̱jma̱a̱ numuu rí tséʼnga̱a̱ʼ gátani̱ ñajuunʼ Jeobá xó má nandaʼ, garmáʼáan a̱jkia̱a̱nʼ dí ikhaa ndaʼyoo rí gíʼdoo numuu tsiaki̱i̱ dí natani̱. Mbáa ikháán ma̱ngaa nandaaʼ matani̱ xó má enii eʼwíinʼ, mú xátani̱ mbríguminaʼ gajmiáanʼ. Náá numuu rá. Numuu dí Jeobá tséʼni̱ mbríguáanʼ gajmiúlú eʼwíinʼ (Gál. 6:4). Mbá xkri̱da, María nixtrámuuʼ aceite náa rajkhúu Jesús rí ndataun ga̱jma̱a̱ minumuu wéñuuʼ (Juan 12:​3-5). Mú, a̱ʼgú xuáʼa̱ nigruiʼyáʼ a̱jma̱ mbújkha̱a̱ dí rambáa numuu náa templo (Luc. 21:​1-4). Mú, Jesús na̱nguá niʼni mbríguii a̱jmi̱i̱n gu̱ʼu̱ bugi̱. Ikhaa ndiʼyoo dí María ga̱jma̱a̱ a̱ʼgú xuáʼa̱ nisngajmá rí guáʼdáá fe. Jesús ndiʼyaridoo májánʼ Anu̱u̱, ikha jngóo ma̱ndoo matayaa gajkhun dí Jeobá ndaʼyoo xúgíʼ dí ikháán natani̱ ga̱jma̱a̱ numuu dí xtaʼdáá fe ma̱ngaa dí nandaaʼ xtayáá, ikhaa ndaʼyoo dí gíʼdoo numuu dí natani̱ maski má ikháánʼ naku̱ma̱a̱ʼ dí na̱nguá nindxu̱u̱ mba̱a̱.

18. Ndiéjunʼ gámbáyáaʼ mu xátani̱ a̱jma̱ a̱jkia̱a̱nʼ rá. (Atayáá ma̱ngaa kúgumaʼá “Biblia mambáyáaʼ mu xátani̱ a̱jma̱ a̱jkia̱a̱nʼ”.)

¹⁸ Xúgiáánʼ nuʼni a̱jma̱ a̱jkiu̱lú nguáná. Mú, xó má ndiʼyáá, Biblia ma̱ndoo mambáyulú mu xúʼni̱ a̱jma̱ a̱jkiu̱lú. Ikha jngóo ataniminaʼ mataxkamaa xóo exti̱ʼña̱a̱ grajxe̱ ndrígáaʼ ga̱jma̱a̱ dí naʼni maxmiéjuanʼ mu xúʼko̱ ni xáraxtaa ngíná. Jeobá naninííʼ májánʼ ikháánʼ, ma̱ngaa ndaʼyoo dí gíʼdoo numuu tsiaki̱i̱ rí natani̱ mu matani̱ ñajuunʼ, ikha jngóo ikhaa nakudaminaʼ dí maʼni numa̱a̱ʼ. Nditháan xámbumaaʼ: Jeobá nandoo kaʼyoo ga̱jma̱a̱ nañewu̱u̱n mámbáa xa̱bi̱i̱ bi̱ nawi̱ji̱ jmbu.