Nditháan tséniʼñúuʼ rajmañuʼ

Nigumún nákha tsiguʼ 1927 náa mbá xuajin chíʼgíiʼ dí rígá náa mijngii Chicago (Illinois, Estados Unidos). Mbá witsáanʼxu dí mbá xúgiáanʼ: Jetha, Don, ikhúún, Karl ga̱jma̱a̱ Joy. Xúgiáanʼ ninduxu̱ʼ mu̱ni̱ ñajuunʼ Jeobá ga̱jma̱a̱ xúgíʼ a̱jkiu̱xu̱. Ndxájuʼ Jetha ni̱jkha̱ náa dí maʼni raga̱jma̱ clase ndrígóo Galaad, dí nirígá nákha tsiguʼ 1943. Don, Karl ga̱jma̱a̱ Joy nithún dí magún gúyambáá náa Betel dí rígá náa Brooklyn (Nueva York) nákha tsiguʼ 1944, 1947 ga̱jma̱a̱ 1951. Dí xóo májánʼ xkri̱da niniña̱a̱nʼ a̱ngui̱nʼ ga̱jma̱a̱ xkridoo anu̱ʼ, nimbáyúʼ mu mangúún ma̱ni̱ ñajuunʼ Jeobá.

JEOBÁ NAʼSNGÚÚN DÍ GAJKHUN BI̱ KÚWÁ NÁA GOʼWÓʼ

Anu̱ʼ ga̱jma̱a̱ ru̱dúʼ naguʼwún dí muraxnuu Biblia ga̱jma̱a̱ nandún kuyáá Dios, ikha jngóo nisngúxu dí xúʼko̱ má gíʼmaa mu̱nixu̱ mangáanʼ. Mú anu̱ʼ nánguá ninigu̱u̱ʼ religión nda̱wa̱á dí nitanga̱a̱ dí ni̱jkha̱ gáxmína̱ʼ náa Europa nákha nirígá Timbá Guerra náa xúgíʼ Numbaaʼ. Ru̱dúʼ ra̱ʼkhá tháán edxuu dí nitanga̱a̱ náa dí ni̱jkha̱ guerra, ikha jngóo niʼthúu̱n: “Karl, guʼgua̱lú náa guʼwá dxájkuun, xó má eʼni nákha ginii”. Mú anu̱ʼ niriʼñuu: “Ma̱ndoo má mu̱ʼgua̱, mú ikhúún xáto̱ʼo̱ʼ”. Ikhú ru̱dúʼ nirajxu̱u̱: “Náá numuu rá.” Ikhú niʼthúu̱n: “Numuu dí nákha nixtáá náa guerra, ndi̱yo̱o̱ dí xa̱bu̱ ede̱ bi̱ kúwíin náa ikháá má religión nuni̱ tsajkurámiinʼ mbá grupo soldado ga̱jma̱a̱ xúʼko̱ má eni̱ tsajkurámiinʼ i̱mba̱ grupo soldado. Xú káʼnii gándoo gáxtáa Dios náa mbá nájmi̱i̱n soldado bugi̱ rá.”

Nguáthá mbiʼi nda̱wa̱á índo̱ ru̱dúʼ xtáa náa guʼwá dxájkuun, niguáʼnú a̱jmi̱i̱n testigos de Jeobá náa guʼwúxu. Nixnaraʼáá anu̱ʼ a̱jma̱ libro dí mbiʼyuu Luz, náa na̱ʼkha̱ raʼthí ga̱jma̱a̱ numuu libro ndrígóo Apocalipsis. Anu̱ʼ ninigu̱u̱ʼ libro rígi̱ ikha jngóo nigruigú. Índo̱ ru̱dúʼ ndiʼyoo, ikhú nigíʼdu̱u̱ niguxnuu. Nda̱wa̱á, ru̱dúʼ nixkamaa mbá anuncio dí na̱ʼkha̱ náa periódico náa naʼthúún xa̱bu̱ munigajmaa itháan ga̱jma̱a̱ numuu Biblia ga̱jma̱a̱ a̱jma̱ libro dí mbiʼyuu Luz, ikha jngóo ni̱jkha̱. Índo̱ ni̱jkha̱nú, ikhí mbáa a̱ʼgú nikhi̱i̱ nigruiguí. Ikhú ru̱dúʼ nisngájmuu libro ga̱jma̱a̱ nirajxu̱u̱: “Lá gi̱i̱ enigajma̱a̱ rígi̱ xáʼ.” Ikhú ikhaa niriʼñu̱u̱: “Aan, gi̱i̱ anújngaaʼ”. Mbá xmáná nda̱wa̱á, ru̱dúʼ ni̱jkha̱ kaguáanʼxu̱. Asndu má nákha ikhú tséniʼñááʼ rajkuáxu.

Índo̱ kúwáanʼxu náa mbá reunión, ndxájulú bi̱ xtáa raʼthí náa reunión nindo̱ʼo̱ʼ dí magúxnuu náa Salmo 144:​15, náa naʼthí dí bi̱ nuni̱ ñajuunʼ Jeobá kúwá gagi. ¡Ra̱ʼkhá tháán ninigu̱ʼ texto rúʼko̱! Ma̱ngaa ninigu̱ʼ dí naʼthí náa i̱mbá gi̱jma̱ versículo: 1 Timoteo 1:​11, náa naʼthí dí Jeobá nindxu̱u̱ mbáa Dios gagi̱i̱, ga̱jma̱a̱ náa Efesios 5:​1, náa naʼsngúlú dí gíʼmaa mbuʼyaridáá Dios. Ikha jngóo ni̱jkhánú ndi̱yo̱o̱ dí ndayóoʼ manigu̱ʼ asndu ndiéjuunʼ má gáni̱ ga̱jma̱a̱ numuu Dios bi̱ Niʼniúún ma̱ngaa dí maxnáa núma̱aʼ ga̱jma̱a̱ numuu rí naniñuʼ ma̱ni̱ ñajuunʼ. Mbá nájma̱ rúʼko̱ ndi̱yo̱o̱ dí ra̱ʼkhá tháán gíʼdoo numuu.

Congregación dí itháan mijngii dí nirígá náa Chicago, naguanúu mbá 32 kilómetros dí náa nikúwáanʼxu. Mú, maski ajndu mitsínguánʼ ni̱jkuáxu reunión, xúʼko̱ kaʼnii dí ikhúún nijmañuʼ itháan dí naʼthí náa Biblia. Narmáʼáan a̱jkiu̱nʼ dí náa reunión Jetha nixnáá maxná mbá comentario. Índo̱ nidxawuun dí niʼthí, ikhú nindxaʼwamínaʼ: “Ikhúún mangúún má nda̱yo̱o̱ rúʼko̱, náá numuu dí tákujxi ñawúnʼ rá”. Ikha jngóo asndu má nákha ikhú nigíʼdu̱u̱ ninirataminaʼ maxna̱ comentario ga̱jma̱a̱ xóo má ekro̱ʼo̱ʼ ikhúún náa reunión. Mañu má xúʼko̱ ni̱jkhá rambájxuʼ itháan ga̱jmu̱ʼ Jeobá, xó má eʼwíinʼ a̱ngui̱nʼ. Ikha jngóo nijngúnʼ iyááʼ nákha tsiguʼ 1941.

JEOBÁ NAʼSNGÓʼ NÁA ASAMBLEA

Narmáʼáan a̱jkiu̱nʼ eʼni asamblea dí nirígá nákha tsiguʼ 1942 náa Cleveland (Ohio). Asamblea ma̱ngaa niwáán náa teléfono náa mbá 50 xuajen dí nirígá náa Estados Unidos. Bi̱ kúwá náa goʼwóʼ ga̱jma̱a̱ ikhúún niguanúxu náa guʼwá dí ma̱ndoo mi̱dxu̱ʼ jcháaʼ, dí nirígá náa mbá campamento náa rígá guʼwá dí niniratáá a̱ngiu̱lú, mijngii náa nirígá asamblea. Nákha kaʼníí xtáa rarígá Raga̱jma̱ Guerra dí nirígá náa xúgíʼ numbaaʼ, ga̱jma̱a̱ nuni̱ ngíníin xa̱bi̱i̱ Jeobá. Ikha jngóo a̱ngiu̱lú nustriga cárriu̱ún náa rawuunʼ campamento. Ga̱jma̱a̱ xúgíinʼ niriyaʼ awan dí maxtáa mbáa rayejngoo náa awúu̱n carro dí mbruʼun mu á mu nduyáá dí rígá gamíi, a̱ngiu̱lú muskamáá agiuuʼ carro dí inuu mu xúʼko̱ munimiñúún xa̱bu̱ bi̱ natu̱ʼu̱u̱n ma̱ngaa muni̱ dí mawáánʼ. Mu eʼwíinʼ a̱ngiu̱lú ma̱ndoo maguwáʼ mbá nacha̱ gumbañúún. Ikhú nindxa̱ʼwa̱mínáʼ: “Xuajñuu Jeobá xtáa xawii maraʼnuu asndu ndiéjunʼ má garigá”. Numuu rí nda̱a̱ má dí nirígá ikha jngóo nindoo nigú.

Mbayuuʼ tsiguʼ nda̱wa̱á, índo̱ nindxaʼwamínaʼ ga̱jma̱a̱ numuu asamblea rúʼko̱, ni̱jkhánú ndi̱yo̱o̱ dí ru̱dúʼ, nditháan na̱nguá nisngájma dí nixmiéjuun o dí nimíñuu. Ikhaa nikumu̱u̱ kaʼyoo kájxi̱ Jeobá ga̱jma̱a̱ xuajñuu. Nditháan xámbumuʼ xkri̱da májánʼ dí ikhaa niniñuuʼ.

Nákha xóó tsérígá asamblea rúʼko̱, ru̱dúʼ nigíʼdu̱u̱ ninindxu̱u̱ precursora regular. Ikha jngóo nigíʼ májánʼ edxu̱u̱ maʼdxawuun xúgíʼ discurso náa naʼthí ga̱jma̱a̱ numuu dí matani̱ kájxi̱ ñajuunʼ Jeobá. Índo̱ nagutangáanʼxu náa guʼwúxu, ikhaa niʼthúxu: “Manigu̱ʼ mani̱ndxu̱ʼ má xúʼko̱ precursora. Mú, xú káʼnii gándoo ma̱ni̱ rúʼko̱ ga̱jma̱a̱ dí ikháá má mbiʼi ma̱ni̱ xúgíʼ dí ndayóoʼ náa guʼwá rá.” Nirajxuxu á mu ma̱ndoo mumbáyííxu, ikha jngóo nita̱a̱nxu dí ma̱ndoo. Ikha jngóo mámbáa dí ikháanʼxu̱ niʼthúxu dí muni̱ kaʼwi̱i̱xu mbóó o a̱jma̱ cuarto nákha xóó tsephiʼtsuxu dí miʼcha̱. Nda̱wa̱á dí najkua̱a̱xu escuela, ikhaa ndaʼyoo xúgíʼ guʼwá á mu kaʼwu nda̱wa̱á na̱jkha̱ gáʼtaraʼa. Maski ajndu ninindxu̱u̱ mbáa a̱ʼgu̱ bi̱ niñajunʼ gakhi̱i̱ wéñuuʼ nditháan tániñúúnʼ xúʼkhíin e̱ji̱i̱n. Índo̱ nagutanga̱ánxu náa guʼwáá mu mupiʼtsuxu, ikhaa xtáa má ikhí ga̱jma̱á nindxu̱xu̱. Nguáná na̱jkuá gajmiúxu gutaráʼa nda̱wa̱á dí nagajnáaʼxu náa escuela, rúʼko̱ nimbáyuxu makru̱ʼu̱xu xú káʼnii nindxu̱u̱ dí mani̱ndxa̱a̱ʼ precursor.

NAGÍʼDU̱U̱ RANI̱ ÑAJUUNʼ JEOBÁ KÁXI̱

Ninindxu̱ʼ precursor índo̱ nigúʼdoʼ 16 tsiguʼ. Maski ajndu anu̱ʼ xóó na̱nguá nindxu̱ʼ Testigo mú ikhaa nindoo mbaʼyoo xú káʼnii ejkhá náa nataráʼa. Mbá wakíʼ, ni̱thu̱u̱n, dí maski ajndu naniminaʼ wéñuuʼ náa nataráʼa, mú xóó na̱nguá exkamaa nimbáa bi̱ manigu̱u̱ʼ maʼniga̱jma̱a̱ Biblia ga̱jma̱á nindxu̱ʼ. Ikhú wíí nitrigáanʼxu̱ ga̱jma̱a̱ ikhú nirajxu̱u̱: “Lá manigua̱a̱ʼ matanigájmaa ga̱jma̱á nindxu̱ʼ ráʼ.” Nindxa̱ʼwáminaʼ mbá xngaa ga̱jma̱a̱ niriʼña dí ma̱ndoo maʼnigajmaa. Xúʼko̱ kaʼnii, timbáa bi̱ nisngóo ga̱jma̱a̱ numuu Biblia ninindxu̱u̱ anu̱ʼ, rúʼko̱ ninindxu̱u̱ kiejunʼ wéñuuʼ ndi̱yo̱o̱ ikhúún.

Ninigajma̱a̱xu̱ libro “Dí gajkhun maʼni káwáanʼ” (La verdad os hará libres). Índo̱ na̱jkuá runigajma̱a̱xu ni̱jkhánú ndi̱yo̱o̱ dí anu̱ʼ xtáa rambáyuʼ manigájmaa itháan májánʼ ga̱jma̱a̱ bi̱ naʼsngáa májánʼ ga̱jma̱a̱ numuu Biblia. Mbá xkri̱da, mbá wakíʼ, nda̱wa̱á dí niráxnuxu mbá kutriga̱ niʼthúnʼ: “Rúʼko̱ dí naʼthí náa libro. Mú xú káʼnii tayáá ikháán dí rúʼko̱ nindxu̱u̱ gajkhun rá.” Ikhúún na̱nguá ndi̱yo̱o̱ dí mata, ikha jngóo nithu̱u̱n: “Xúgi̱ na̱nguá e̱yo̱o̱ dí matha̱a̱nʼ mú i̱mba̱ aʼphu̱ dí gúʼnigajma̱a̱, mariʼña̱a̱”. ¡Xúʼko̱ má nini! Nixkamaa tikhu versículo dí nambánii ga̱jma̱a̱ dí nikúwáanʼxu runigájmaa. Ga̱jma̱a̱ asndu má nákha ikhú nijmañuʼ mbaʼyáʼ itháan mu xúʼko̱ maxtáá xawii índo̱ gánigajmaa gajmuʼ. Xúgíʼ rúʼko̱ nimbáyuʼ Anu̱ʼ ga̱jma̱a̱ ikhúún mu mambájxuxu itháan gajmiúxu Dios. Ikhaa niʼnimbánuu xúgíʼ dí xtáa rajmañuu ga̱jma̱a̱ nijngúun iyááʼ nákha tsiguʼ 1952.

I̱ʼWÁʼ META DÍ NIMBÁYUʼ MAJMAÑUʼ

Nigájnuʼ náa goʼwóʼ nákha gúʼdoʼ 17 tsiguʼ. Ikháá má tsiguʼ rúʼko̱, Jethaa ni̱jkha̱nú ninindxu̱u̱ misionera ga̱jma̱a̱ Don nitháán maʼga̱ Betel. Mbá nájmi̱i̱n nadxún wéñuʼ ga̱jma̱a̱ dí kúwá runi̱, dí asndu nini dí ikhúún ma̱ngaa manigu̱ʼ ma̱ni̱ xóo ikhiin. Ikha jngóo nini majtíí solicitud dí maʼgá Betel ga̱jma̱a̱ dí maʼgá náa Escuela ndrígóo Galaad ga̱jma̱a̱ ikhú niniʼñúuʼ náa ñawúunʼ Jeobá. Nda̱wa̱á nithu̱nʼ maʼgá Betel nákha tsiguʼ 1946.

Náa xúgíʼ tsiguʼ dí xtáá náa Betel, nigúʼdoʼ mixtiʼkhu ñajunʼ. Ga̱jma̱a̱ numuu rúʼko̱ nindoo majmañuʼ mbaʼa enii dí ma̱ndoo ma̱ni̱. Mbá xkri̱da, nijmañuʼ maniu̱u̱ imprimir libro, maʼgá ka̱yo̱ʼ cuenta, ma̱ngaa nijmañuʼ xú káʼnii matsi dí ndayóoʼ náa Betel ga̱jma̱a̱ mu̱ʼgua̱ kuyuxu imbríʼkha dí rígá ikhí. Mú dí itháan niniguʼ náa xúgíʼ dí mbá 75 tsiguʼ dí xtáá náa Betel nindxu̱u̱ dí najuiʼsngóʼ náa nunigajma̱a̱xu texto dí miʼcha̱ ga̱jma̱a̱ i̱ʼwáʼ náa najuiʼsngúxu.

Ma̱ngaa nijmañuʼ wéñuuʼ náa giʼtioʼ bi̱ mbiʼyuu, Karl, bi̱ ni̱jkha̱nú náa Betel nákha tsiguʼ 1947. Ninindxu̱u̱ mbáa bi̱ naniguuʼ maʼnigajmaa májánʼ ga̱jma̱a̱ niʼsngáa májánʼ numuu Biblia. Mbá miʼtsú, ni̱thu̱u̱n mambáyuʼ ga̱jma̱a̱ mbá discurso dí ndiyóoʼ maxna. Ni̱thu̱u̱n dí niru̱wa̱a̱ má mbaʼa dí ma̱ndoo mata mú dí naʼniuʼ mingíjyúuʼ ma̱ni̱ dí xúgíʼ maraʼni̱i̱ʼ ga̱jma̱a̱. Ikhaa i̱ndó niʼniuʼ mbá graxe̱ dí niʼniuʼ mandxa̱ʼo̱o̱ edxu̱ʼ: “Joel, xú káʼnii phú kayá edxu̱u̱ discurso ndrígá rá.” Ikhú mbá nacha̱ nikro̱ʼo̱ʼ ndiéjunʼ eyoo gáʼthí: Dí i̱ndó ndiyóoʼ majmuʼ náa nagájnuriyoʼ itháan ga̱jma̱a̱ dí i̱ʼwáʼ maniʼñúuʼ. Nditháan xámumuʼ dí nijmañuʼ ikhú.

Mu maraxtaa gagi náa Betel, ndayóoʼ marataráʼa xó má eʼngo̱o̱. Á mu nuʼni, muguaʼdáá mbaʼa experiencia dí maxnúlú tsiaki̱i̱. Mbá xkri̱da, narmáʼáan a̱jkiu̱nʼ dí niguáʼnííxu mbá wakíʼ índo̱ ni̱jkuá gutaráʼaxu náa Bronx, Nueva York. Índo̱ nigíʼdi̱i̱xu ni̱jkuá gúya̱a̱xu mbáa a̱ʼgu̱ bi̱ nigruigú revista Bi̱ Nayejngoo ga̱jma̱a̱ ¡Awaxunʼ! Nigíʼdi̱i̱ nitha̱a̱nʼxu: “Wakíʼ rígi̱ kúwáanʼxu rusngúúnxu xa̱bu̱ dí na̱ʼkha̱ náa Biblia dí maxnún tsiaki̱i̱”. Ikhú ikhaa niriʼña̱a̱: “Á mu nindxu̱u̱ dí na̱ʼkha̱ náa Biblia, anújngala”. Niráxnuxu mbaʼa texto náa na̱ʼkha̱ raʼthí ga̱jma̱a̱ numuu Reino ndrígóo Dios ma̱ngaa ga̱jma̱a̱ numbaaʼ nuxi̱ʼ dí inu ma̱ʼkha̱. Nijkuánuxu ndiya̱a̱ dí rúʼko̱ ninigu̱u̱ʼ, numuu dí i̱mba̱ xmáná nda̱wa̱á ikhí kúwá eʼwíinʼ bi̱ nimbájxu̱u̱ gajmíi̱n bi̱ ikhaa niʼthún magún. Nda̱wa̱á ikhaa ga̱jma̱a̱ ajmbio̱o̱ niguánu ninindxu̱ún xa̱bi̱i̱ Jeobá bi̱ niguájun jmbu.

NAJMAÑUʼ NÁA A̱ʼGIU̱ʼ

Maski ajndu niraʼwi̱i̱ dí nindoʼ maniʼgúúnʼ, mú ninújngoo mbá gu̱wa̱ʼ tsiguʼ índo̱ niniʼniiʼ a̱ʼgiu̱ʼ. Ndiéjunʼ nimbáyuʼ mu maxkamaa mbáa aʼgu̱ bi̱ májáanʼ rá. Nindo̱ʼo̱o̱ Jeobá dí mambáyuʼ ga̱jma̱a̱ nirajximinaʼ: “Ndiéjunʼ nandoʼ ma̱ni̱ nda̱wa̱á dí gániʼgún rá.”

Nda̱wa̱á dí nijngoo asamblea nákha tsiguʼ 1953 náa Estadio ndrígóo Yankees, niniʼníi mbáa ndxájulú bi̱ mbiʼyuu Mary Aniol. Ikhaa ga̱jma̱a̱ ndxájuʼ nikúwá mbóó náa raga̱jma̱ clase ndrígóo Galaad ga̱jma̱a̱ rí nigún mbóó náa mutaraʼa. Mary naʼthúnʼ má xúʼko̱ ga̱jma̱a̱ gagi rí xóo xtáa raʼtáraʼa náa Caribe ma̱ngaa ga̱jma̱a̱ numún bi̱ naʼsngúún numuu Biblia náa xúgíʼ tsiguʼ dí xtáa ikhí. Índo̱ ni̱jkuá runiʼnumijnáxu itháan, nijkuánuxu ndiya̱a̱ dí mbá najmáaʼxu ninduxu mu̱ni̱ ñajuunʼ Jeobá káxi̱. Ninduxu kuyamijná itháan má xúʼko̱ ikha jngóo nidamijnáxu nákha abril tsiguʼ 1955. Mary ninindxu̱u̱ mbá regalo ndrígóo Jeobá ga̱jma̱a̱ ninindxu̱u̱ mbá májánʼ xkri̱da náa ikhúún. Mbaʼa enii xóo nisngájma dí xúʼko̱ kaʼnii. Nadxuu má xúʼko̱ ga̱jma̱a̱ numuu asndu káʼnii má ñajunʼ dí nikhánáá maʼni. Ra̱ʼkhá tháán nañajunʼ, naxmiéjuunʼ gajkhun kaʼñúún eʼwíinʼ ga̱jma̱a̱ nagíʼ naʼni má xúʼko̱ ginii ñajuunʼ Jeobá (Mat. 6:33). Ninindxuxu viajante mbá ajtsú tsiguʼ ga̱jma̱a̱ nákha tsiguʼ 1958 nituxu̱ mu̱ʼguáxu náa Betel.

Mbaʼa dí nijmañuʼ náa Mary. Mbá xkri̱da, nákha ndiʼkhú nidamijnáxu, niraʼwi̱i̱xu dí munigajma̱a̱xu mbóó jndu Biblia ga̱jma̱a̱ dí muráxnuxu mbá 15 versículo. Nda̱wa̱á dí mbáa dí ikháanʼxu naguxnuu nutaxu ga̱jma̱a̱ numuu dí niráxnuxu ga̱jma̱a̱ ndu̱ya̱a̱xu xú káʼnii gándoo gúnimbániixu. Mbaʼa nuthu Mary naʼthúnʼ mbaʼa nuthu dí nijmañuu náa Galaad o índo̱ nixtáa xóo misionera. Xúgíʼ dí nitamíjnáxu rúʼko̱ nimbáyuʼ, mandxa̱ʼo̱o̱ májánʼ edxu̱ʼ, maniminaʼ maxna itháan májánʼ discurso ma̱ngaa xóo gáni̱ mu maxnuu tsiaki̱i̱ a̱ngiu̱lú gu̱ʼu̱ (Prov. 25:11).

Mary bi̱ nindoʼ ka̱yo̱o̱ wéñuuʼ nikháñúu nákha 2013. ¡Ra̱ʼkhá tháán nandoʼ mba̱yo̱o̱ mbu̱júu̱ náa numbaaʼ nuxi̱ʼ! Nákha xóó tséʼkha̱nú mbiʼi rúʼko̱, nandoʼ majmañuʼ má xúʼko̱ ga̱jma̱a̱ dí maku̱mu̱ʼ ka̱yo̱o̱ Jeobá ga̱jma̱a̱ xúgíʼ a̱jkiu̱nʼ (Prov. 3:​5, 6). Índo̱ nandxa̱ʼwa̱mínáʼ ndiéjunʼ gáʼni xuajñuu Dios náa numbaaʼ nuxi̱ʼ, nakánáaʼ tsiaki̱i̱ ga̱jma̱a̱ naʼni maʼdxuu a̱jkiu̱nʼ. Ikhú, bi̱ Naʼsngúlú Májánʼ wéñuuʼ maʼsngúlú i̱ʼwáʼ dí nuxi̱ʼ ma̱ngaa marigá i̱ʼwáʼ dí majmañulú numuu ikhaa. Jeobá ra̱ʼkhá tháán mbaʼa dí niʼsngóʼ ga̱jma̱a̱ mbaʼa enii xóo nisngájmuʼ dí nandoo kaʼyoʼ dí asndu nda̱a̱ ajngáa mata mu maxnáa núma̱aʼ xóo kaʼyoo.