Ní xárígá guerra ga̱jma̱a̱ dí nuxmijná xa̱bu̱

DIOS MAʼNI GÁMBÍIN XA̱BU̱ ÑAJUNʼ BI̱ KÚWÁ NÁA NUMBAAʼ

Dios majmuu mbá guerra dí náa Biblia naxná mbiʼyuu Armagedón mu maʼni gámbíin xúgíinʼ xa̱bu̱ ñajunʼ bi̱ kúwá náa numbaaʼ (Apocalipsis 16:16).a Índo̱ gáʼkha̱nú mbiʼi rúʼko̱ ‹reyes [o xa̱bu̱ ñajunʼ] bi̱ kúwá náa xúgíʼ ku̱ba̱ʼ magimbíin náa guerra dí marigá náa mbiʼi mba̱a̱ ndrígóo Dios bi̱ gíʼdoo xúgíʼ tsiakii› (Apocalipsis 16:14). Dios majmuu Armagedón mu maʼni gámbáa xúgíʼ guerra dí rígá.

Dios mariʼkuwi̱ín xa̱bu̱ ñajunʼ bi̱ kúwá náa numbaaʼ rígi̱ ga̱jma̱a̱ magíiʼ Reino ndrígóo ikhaa. Reino bugi̱ maʼtáñajunʼ asndu náa mekhuíí ga̱jma̱a̱ nditháan xáʼga̱nú mambáa (Daniel 2:44). Dios niraʼwíi Jesucristo, bi̱ nindxu̱u̱ A̱ʼdióo, mu mani̱ndxu̱u̱ Rey (Isaías 9:​6, 7; Mateo 28:18). Reino bugi̱b nindxu̱u̱ bi̱ Jesús niʼthí ga̱jma̱a̱ numuu índo̱ niʼsngúún xa̱bi̱i̱ xóo mutajkáan (Mateo 6:​9, 10). Xúgíinʼ xa̱bu̱ numbaaʼ makuwá jnduʼ numuu dí mbáwíí bi̱ maʼtáñajunʼ, ikhaa nindxu̱u̱ Jesús.

Índo̱ Jesús gáʼtañajunʼ, xáʼni xó má eyoo ikhaa, xóo eni̱ xa̱bu̱ bi̱ kúwá rí mbiʼi xúgi̱, numuu rí ikhaa nindxu̱u̱ mbáa rey májáanʼ ga̱jma̱a̱ tséraʼwíin xa̱bu̱. Ikhaa maʼndoo kaʼñún mbá xúgíinʼ, ikha jngóo nimbáa xa̱bu̱ xámínúuʼ ga̱jma̱a̱ numuu raza ndrígóo o numuu xuajin náa ndija̱a̱ (Isaías 11:​3, 4). Nimbáa xa̱bu̱ xákiʼnáa numuu dí tséni̱i̱ dí májánʼ, numuu dí Jesús maxmiéjuunʼ kaʼñúún mbá xúgíinʼ xa̱bu̱. “Ikhaa maʼni kríya̱a̱ʼ xa̱bu̱ ngínáa bi̱ nandxaʼwá mixtambáyíí, ga̱jma̱a̱ xúgíinʼ bi̱ ndawa̱a̱ tsáa mambáñún […]. Maʼni káwíin bi̱ naguma ngíníi ga̱jma̱a̱ bi̱ nuxnún” (Salmo 72:​12-14).

Reino ndrígóo Dios maʼni gámbáa xúgíʼ ajua̱nʼ dí najmún mu muradíin mbaʼin wéñuuʼ xa̱bu̱ (Miqueas 4:3). Ma̱ngaa maʼni gámbíin xúgíinʼ xa̱bu̱ ra̱míjíinʼ bi̱ nanigu̱u̱nʼ muxmijná o bi̱ nanigu̱u̱nʼ muniu̱u̱ dí ra̱májánʼ eʼwíinʼ (Salmo 37:​9, 10). Xúgíinʼ xa̱bu̱, gu̱ʼu̱ ga̱jma̱a̱ e̱ji̱n, ní xámíñún magún asndu náá má gáʼndún ikhiin (Ezequiel 34:28).

Índo̱ Reino ndrígóo Dios gáʼtañajunʼ náa tsu̱du̱u̱ Ku̱ba̱ʼ, xúgiáanʼ makuwáanʼlu májánʼ. Mambáa xkujndu dí naʼni muxmijná xa̱bu̱, xóo tsingíná, ewiʼ, dí nda̱a̱ náa makuwá. Ra̱ʼkhá tháán marigá mbaʼa ganitsu dí májánʼ mu muphu mbá xúgíinʼ ga̱jma̱a̱ xa̱bu̱ maguaʼdáá guʼwún náa makuwá tsímáá (Salmo 72:16; Isaías 65:​21-23).

Índo̱ Reino ndrígóo Dios gáʼtañajunʼ náa tsu̱du̱u̱ Ku̱ba̱ʼ maʼni májáanʼ mbá xúgíʼ dí niʼni gachúu guerra. Raʼkháa i̱ndó maʼni̱i̱ náa nigawúúnʼ ma̱ngaa maʼni̱i̱ a̱jkiu̱ún xa̱bu̱ bi̱ nimíníiʼ ga̱jma̱a̱ numuu nandii depresión o xúgíʼ dí niʼni mumíníiʼ ga̱jma̱a̱ numuu guerra. Maʼni ga̱bi̱ín bi̱ nikháñún mu makuwá mbu̱júu̱ náa tsu̱du̱u̱ Ku̱ba̱ʼ (Isaías 25:8; 26:19; 35:​5, 6). Familias matangi̱ín makuwá mbóó, ni xármáʼáan a̱jkiu̱ún dí niʼni mumíníiʼ numuu dí “xúgíʼ dí nirígá nákha ginii nindáti̱ga̱a̱ gáʼni̱ ikhú” (Apocalipsis 21:4).

DIOS MARÍGÚU AʼKHÁ

Núma̱aʼ má ga̱jma̱a̱ numuu Reino ndrígóo Dios, xúgíinʼ xa̱bu̱ numbaaʼ ma̱ndoo mbuyamajkuíí mbáwíi Jeobá,c ‹bi̱ nandoo kaʼyulú, bi̱ gíʼdoo rí tsímáá› (2 Corintios 13:11). Xa̱bu̱ majmañún makuwá tsímáá (Isaías 2:​3, 4; 11:9). Bi̱ gúgíʼ munimbáníí rí gájmañún maguánú mani̱ndxu̱ún xa̱bu̱ jmbiin (Romanos 8:​20, 21).

DIOS MAXÍYÁA GIXA̱A̱ GAJMÍI̱N XA̱BU̱ WÉÑIIʼ

Reino ndrígóo Dios maxíyáa Gixa̱a̱ gajmíi̱n xa̱bu̱ wéñiiʼ, ikha jngóo ni xákúwá mu muxkajxi̱i̱n xa̱bu̱ mu̱ni̱ guerra (Apocalipsis 20:​1-3, 10). Índo̱ ikhiin ni xákúwá dí “tsímáá mbajyúuʼ asndu kámuu” (Salmo 72:7).

Ma̱ndoo matayaa gajkhun dí Dios maʼnimbánuu rí nikudaminaʼ, rí maʼni gámbáa guerra ga̱jma̱a̱ dí nuxmijná xa̱bu̱, numuu rí ikhaa nandoo ga̱jma̱a̱ maʼngo̱o̱ maʼni.

• Dios gíʼdoo tsiaki̱i̱ mu maʼni gámbóo guerra ga̱jma̱a̱ dí nuxmijná xa̱bu̱, ikhaa ndaʼyoo xú káʼnii gáʼnii (Job 9:4). Ikhaa maʼngo̱o̱ maʼni rígi̱ (Job 42:2).

• Dios tsénigu̱u̱ʼ mbaʼyoo xóo emíníiʼ xa̱bu̱ (Isaías 63:9). Ga̱jma̱a̱ ikhaa “nawi̱yu̱u̱ʼ kaʼñúún xúgíinʼ bi̱ nandún kuyáá dí ra̱májánʼ” (Salmo 11:5).

• Dios naʼnimbánuu dí naʼthí maʼni, ikhaa tséʼni nduwaʼ (Isaías 55:​10, 11; Tito 1:2).