Jeobá gíʼdoo tsiaki̱i̱ mu mambáyáaʼ

1. Xú káʼnii nisngájma Moisés dí naku̱mu̱u̱ kaʼyoo Jeobá índo̱ niguwíin israelitas náa Egipto rá.

NÁA libro ndrígóo Hebreos naʼthí ga̱jma̱a̱ numún mbaʼin xa̱bu̱ bi̱ niguáʼdáá fe, xó má Moisés bi̱ niniñuuʼ mbá májánʼ xkri̱da ga̱jma̱a̱ numuu fe rí nigiʼdoo (Heb. 3:​2-5; 11:​23-25). Nisngájma dí nigiʼdoo fe índo̱ niguwíin israelitas náa Egipto, támiñuu kaʼyoo faraón ni má xa̱bi̱i̱. Nikumu̱u̱ kaʼyoo kájxi̱ Jeobá ga̱jma̱a̱ nixnúu ikha xa̱bu̱ xuajñuu náa lamáa Maña̱ʼ ga̱jma̱a̱ ku̱ba̱ʼ mijxooʼ (Heb. 11:​27-29). Mbaʼin israelitas niniñaaʼ rakumu̱ún kuyáá Jeobá, mú Moisés nikumu̱u̱ kaʼyoo má xúʼko̱ dí ikhaa má mañewu̱u̱n. Ra̱ʼkhá tháán májánʼ dí Moisés niʼni xígi̱. Numuu rí Jeobá má nixnún israelitas ganitsu ga̱jma̱a̱ iyaʼ mu ma̱ndoo makáwíin náa ku̱ba̱ʼ mijxooʼ (Éx. 15:​22-25; Sal. 78:​23-25).a

2. Ndíjkha dí Jeobá niʼthúu̱n Moisés dí naʼthí náa Números 11:​21-23 rá.

² Naʼni xóo mbá tsiguʼ nda̱wa̱á dí nigumaʼ káwíin israelitas náa Egipto. Jeobá niʼthí rí maxnún mba̱a̱ xuwiʼ muphu. Maski ajndu Moisés nigiʼdoo mba̱a̱ fe, mú niʼni a̱jma̱ a̱jkiu̱u̱n ga̱jma̱a̱ numuu rí Jeobá niʼthí dí ikhaa mbayáʼ xuwiʼ náa ku̱ba̱ʼ mijxooʼ, mu maxníʼtsún mbá 600,000 xa̱bekha ma̱ngaa mbaʼin gu̱ʼu̱ ga̱jma̱a̱ mbaʼin e̱ji̱nʼ. Ikha jngóo Dios nirajxu̱u̱: “Lá xáʼngo̱o̱ gáʼni̱ Jeobá rígi̱ ku̱ma̱a̱ʼ ráʼ.” (Atraxnuu Números 11:​21-23.) Gi̱i̱ náa ajngáa Hebreo naʼthí ñawúunʼ Jeobá, dí nandoo gáʼthúu̱n xi̱ʼ kaʼwu ndrígóo Jeobá, xóo muʼthá tsiaki̱i̱ rí najmuu mu maʼnimbánuu rí nakudaminaʼ maʼni. Ninindxu̱u̱ xóo Jeobá nirajxu̱u̱ Moisés: “Lá naku̱ma̱a̱ʼ dí xáʼngo̱ʼ gáni̱ rí nakuʼdáminaʼ ma̱ni̱ ráʼ.”

3. Ndíjkha gíʼdoo numuu muʼnigajmaa rí nigíʼnuu Moisés ga̱jma̱a̱ israelitas rá.

³ Ikháán rá. Lá mbá míʼtsú nitraximínáʼ á mu Jeobá ma̱ndoo maxnáaʼ dí gáʼyaaʼ ikháán gajmiáanʼ bi̱ kúwá náa guʼwáaʼ ráʼ. Á mu xúʼko̱, guʼyáá náá numuu rí Moisés ga̱jma̱a̱ israelitas tákumu̱ún kuyáá Jeobá dí ikhaa má gáxnúún rí gáʼñúunʼ. Ma̱ngaa muʼnigajmaa tikhu textos ndrígóo Biblia dí maʼni mbuʼyáá rí Jeobá ma̱ndoo mambáyulú má xúʼko̱.

NDIÉJUNʼ EJMAÑULÚʼ NÁA XKRI̱DOO MOISÉS GA̱JMA̱A̱ ISRAELITAS RÁ.

4. Náá numuu rí mbaʼin israelitas niguáʼdi̱i̱ nini a̱jma̱ a̱jkiu̱ún dí Jeobá má gáñewu̱u̱n xá.

⁴ Náá numuu rí mbaʼin israelitas niguáʼdi̱i̱ nini a̱jma̱ a̱jkiu̱ún dí Jeobá má gáñewu̱u̱n xá. Xa̱bu̱ Israel ga̱jma̱a̱ xa̱bu̱ bi̱ naguwaáʼ, bi̱ nigájníin náa Egipto mbayuʼ má kúwá ragún náa ku̱ba̱ʼ mijxooʼ mu matu̱ʼu̱u̱n náa Ku̱ba̱ʼ rí Jeobá niʼthí maxnún (Éx. 12:38; Deut. 8:15). Xa̱bu̱ bi̱ naguwaáʼ nánguá nindúún gúphu̱ maná, ikha jngóo nixieʼkhá ga̱jma̱a̱ xúʼko̱ má nini mbaʼin israelitas mangiin (Núm. 11:​4-6). Ndiyáaʼ muphu ganitsu dí naʼphu̱ náa Egipto rúʼko̱ niʼni dí Moisés maku̱mu̱u̱ rí ikhaa kaʼyoo mbayáʼ xuwii mu maxnúún muphu (Núm. 11:​13, 14).

5, 6. Ndiéjunʼ eʼsngúlú rí niguáʼníí xa̱bu̱ israelitas ga̱jma̱a̱ numún xa̱bu̱ bi̱ na̱nguá nindxu̱ún israelitas rá.

⁵ Xa̱bu̱ bi̱ na̱nguá nindxu̱ún israelitas na̱nguá nixnáa núma̱aʼ Jeobá ga̱jma̱a̱ numuu xúgíʼ rí ikhaa nixnún, ma̱ngaa israelitas niguáʼdi̱i̱ nindxa̱ʼwa̱míjna̱ xóo ikhiin. Ikháanʼ ma̱ngaa gamíi muʼni xóo eni̱ xa̱bu̱ numbaaʼ dí xúxnáa núma̱aʼ Jeobá. Rígi̱ maʼni dí xákuwáánʼlu gagi ga̱jma̱a̱ numuu rí ikhaa naxnúlú. Mbáa magáwíinʼ a̱jkiu̱lú ga̱jma̱a̱ numuu rí niguáʼdáá nákhá ginii o maʼndulú muguáʼdáá rí eʼwíinʼ kuáʼdáá. Mú, itháán má makuwáánʼlu gagi á mu nadxulú ga̱jma̱a̱ numuu rí kuáʼdáá má.

⁶ Israelitas ndiyóoʼ marmáʼáan a̱jkiu̱ún dí Jeobá nikudaminaʼ maʼni. Ikhaa niʼthún dí maxnún xúgíʼ rí májánʼ índo̱ gáta̱ʼa̱a̱n náa Ku̱ba̱ʼ rí ikhaa niʼthí maxnún, raʼkháa índo̱ kúwá ragún náa ku̱ba̱ʼ mijxooʼ. Ikháánʼlu ma̱ngaa ragíʼmaa mundxa̱ʼwa̱míjna̱ ga̱jma̱a̱ numuu rí na̱nguá kuáʼdáá náa numbaaʼ rígi̱. Itháán májánʼ dí mundxa̱ʼwa̱míjna̱ ga̱jma̱a̱ numuu xúgíʼ rí Jeobá naʼthí maxnúlú náa numbaaʼ nuxi̱ʼ. Ma̱ngaa ma̱ndoo mundxa̱ʼwa̱míjna̱ tikhuu dí naʼthí náa textos ndrígóo Biblia dí maʼni makumulú kuʼyáá itháán Jeobá.

7. Náá numuu ma̱ndoo mbuʼyáá gajkhun rí Jeobá mambáyulú má xúʼko̱ rá.

⁷ Mbáa nurajximíjna̱ náá numuu rí Dios nirajxu̱u̱ rígi̱ Moisés: “Lá xáʼngo̱o̱ gáʼni̱ Jeobá rígi̱ ku̱ma̱a̱ʼ ráʼ.” Mbáa nindoo mambáyúu makro̱ʼo̱o̱ dí tsiaki̱i̱ ndrígóo nditháan tsétumuu, ga̱jma̱a̱ rí ma̱ndoo majmuu tsiaki̱i̱ ndrígóo tséʼniuu má ajndu náá mínaaʼ xtáa. Ikha jngóo maski ajndu israelitas kúwá náa ku̱ba̱ʼ mijxooʼ Jeobá ma̱ndoo maxnún mba̱a̱ xuwiʼ. Dios nikruiyaʼ ñawúunʼ mu masngájma tsiaki̱i̱ ndrígóo (Éx. 6:​6, nota). Ikha jngóo tséʼniuu á mu nuraʼníí mbá gamiéjunʼ, ma̱ndoo mbuʼyáá gajkhun dí Jeobá mambáyulú mámbáa dí ikháanʼ tséʼniuu má náá mínaaʼ kuwáánʼlu (Sal. 138:​6, 7).

8. Ndiéjunʼ gambáyúlú mu xúʼni̱ xóo nini̱ mbaʼin israelitas rá. (Atayáá ma̱ngaa xtiʼkhuu.)

⁸ Jeobá niʼnimbánuu dí nikudaminaʼ maʼni ga̱jma̱a̱ ra̱ʼkhá tháán mbaʼin ñu̱ʼu̱ rami̱xti̱ nikuʼmiin. Mú israelitas na̱nguá nixnáa númaaʼ ga̱jma̱a̱ numuu milagro rígi̱, numuu rí ikhiin nindúún maguaʼdáá. Ma̱ngaa ndijñúúnʼ mbá mbiʼi tikhuu nirajxi̱ín ñu̱ʼu̱. Jeobá nikiʼnáa kaʼñún bi̱ nisngajma rí i̱ndó nandún muphu ganitsu rí májánʼ ga̱jma̱a̱ nigúdíin (Núm. 11:​31-34). Xkri̱da rígi̱ naʼsngúlú dí ragíʼmaa manigulúʼ maguáʼdáá wéñuuʼ. Tséʼniuu á mu kuáʼdáá o na̱nguá dí itháán gíʼdoo numuu muʼni nindxu̱u̱ rí murajxi̱i̱ dí gíʼdoo numuu mekhuíí xóo dí mambájxulú itháán májánʼ gajmiúlú Jeobá ga̱jma̱a̱ Jesús (Mat. 6:​19, 20; Luc. 16:9). Á mu xúʼko̱ eʼni ma̱ndoo mbuʼyáá gajkhun dí Jeobá má gáxnulú rí gáʼyulúʼ.

9. Ndiéjunʼ dí ma̱ndoo mbuʼyáá gajkhun rá.

⁹ Rí mbiʼi xúgi̱ Jeobá xtáa xawii má xúʼko̱ mambáñún xa̱bi̱i̱, mú raʼkháa rígi̱ eyoo gáʼthí rí nditháan xáʼyulú mbújkha̱a̱ o ganitsu.b Mu ma̱ndoo mbuʼyáá gajkhun dí Jeobá nditháan xániñulú, ikhaa maxnúlú tsiaki̱i̱ mu muraʼníí ajndu ndiéjunʼ má gamiéjunʼ. Xú káʼnii gándoo gusngajmá dí nakumulú kuʼyáá Jeobá dí ikhaa má gáñewunlú rá. Guʼyáá a̱jma̱ enii náa ma̱ndoo musngajmá, 1) índo̱ gáʼyulúʼ mbújkha̱a̱, 2) índo̱ gundxa̱ʼwámi̱jna̱ ga̱jma̱a̱ numuu xóo gákuwáanʼ índo̱ gaʼni guániáanʼ.

ÍNDO̱ GÁʼYULÚʼ MBÚJKHA̱A̱

10. Ndiéjunʼ ga̱ʼkhu̱ gúraʼníí ga̱jma̱a̱ numuu mbújkha̱a̱ rá.

¹⁰ Índo̱ gáʼga ratumuu itháán mbiʼi, mbáa maʼniulú itháán gakhi̱i̱ makhánulúʼ itháán mbújkha̱a̱, mbáa mandáti̱gu̱lú ñajunʼ, mandáti̱gu̱lú rí kuáʼdáá, guʼwúlú ga̱jma̱a̱ numuu rí naxtiʼkhu̱u̱n xa̱bu̱ ñajunʼ, narígá guerras, gamiéjunʼ o eʼwáʼ nandii. Mbáa mbaʼyóoʼ mbuʼyáʼ i̱mba̱ ñajunʼ rí muʼnilú o muʼgua gákúwá i̱mba̱ níʼkhá mu maguáʼdáá rí ndayúlú. Mú, ndiéjunʼ gámbáyulú muraʼwíí muʼni dí masngájma rí nakumulú kuʼyáá Jeobá rá.

11. Ndiéjunʼ gámbáyulú rí muraʼníí gamiéjunʼ ga̱jma̱a̱ numuu mbújkha̱a̱ rá. (Lucas 12:​29-31.)

¹¹ Mbá dí gíʼdoo wéñuuʼ numuu dí mambáyulú nindxu̱u̱ rí muʼthán Jeobá dí naʼni maxmiéjunlú (Prov. 16:3). Guʼtháán maxnúlú ku̱ma̱ mu muraʼwíí májánʼ dí muʼni ga̱jma̱a̱ tsímáá ndrígóo “mu xáxmiéjunlú wéñuuʼ” (atraxnuu Lucas 12:​29-31). Guʼtháán mambáyulú mu makuwáanʼ gagi ga̱jma̱a̱ rí kuaʼdáá (1 Tim. 6:​7, 8). Guʼyáʼ náa i̱yi̱i̱ʼ rí naguwíi xuajñuu ikha rí ma̱ndoo mambáyulú mu muraʼníí gamiéjunʼ ga̱jma̱a̱ numuu mbújkha̱a̱. Mbaʼin nambáñúún video ga̱jma̱a̱ artículo dí rígá náa jw.org dí naʼthí ga̱jma̱a̱ numuu mbújkha̱a̱.

12. Ndiéjunʼ grajxe̱ gámbáyúu mbáa cristiano mu bi̱ kúwíin náa goʼwóo makuwá májánʼ rá.

¹² Mbaʼin nundrígú muni̱ mbá ñajunʼ náa ndayóoʼ magún gákúwá mitsínguánʼ ga̱jma̱a̱ rígi̱ eʼni rí ni xákúwá gajmiún bi̱ kúwá náa guʼún, mú itháán nda̱wa̱á naguánú nduyáá dí raʼkhí rí niraʼwíí muni. Ikha jngóo índo̱ nundrígú mbá ñajunʼ dí muʼni raʼkháa i̱ndó nundxaʼwamíjna̱ nguáthá mbújkha̱a̱ gúʼdaaʼ ma̱ngaa gíʼmaa mbuʼyáá á mu xáʼni gachúu rí nambájxulú gajmiúlú Dios (Luc. 14:28). Atrajxi̱mínáʼ: “Xú káʼnii gaxtáa gajmuʼ a̱ʼgiu̱ʼ o a̱jmbio̱ʼ á mu na̱jkhá mitsínguánʼ gañejunʼ rá. Lá ma̱ndoo maʼgá xúgíʼ reunión, maʼgá gáʼtaraʼa o maxtáa mbóó gajmíʼ a̱ngiu̱lú ráʼ.” Á mu xtaʼdiin ejña̱a̱nʼ gíʼdoo numuu matrajximínáʼ rígi̱: “Xú káʼnii gajmuʼ ikha ga̱jma̱a̱ consejo ndrígóo Jeobá mu maxprígún e̱ji̱nʼ á mu na̱nguá xtáá mbóó gajmíʼ xá.” (Efes. 6:4.) Índo̱ gátraʼwíí mbá rí matani atayáʼ ikha ndrígóo Dios raʼkháa consejo rí gúxnanʼ bi̱ xtañún o bi̱ nambájxáaʼ gajmiáanʼ bi̱ tsénimbu̱u̱n ikha rí na̱ʼkha̱ náa Biblia.c Tony, bi̱ xtáa náa mbá xuajin dí rígá náa Asia nixnán mbaʼa enii ñájunʼ náa madaaʼ itháán mba̱a̱ mbújkha̱a̱ náa i̱mba̱ níʼkhá xuajin. Mú, nda̱wa̱á rí niʼtákáñuu Jeobá ma̱ngaa niʼtáminaʼ ga̱jma̱a̱ a̱ʼgiu̱ʼ, ikhaa tágruigú maʼni ñajunʼ rígi̱. Ma̱ngaa ikhiin nindxa̱ʼwami̱jna̱ ndiéjunʼ gúni̱ mu xájmúún wéñuuʼ mbújkha̱a̱. Tony eʼthí ga̱jma̱a̱ numuu rí niraʼwíí: “Nindoo nimbáñún mbaʼin xa̱bu̱ mu muniʼniiʼ Jeobá ga̱jma̱a̱ ejñu̱nxu̱ nandún kuyáá Jeobá ma̱ngaa nanigu̱u̱nʼ muni̱ rí ikhaa naniguu, nijmañuxuʼ rí á mu nuʼgíʼ nuni̱ dí naʼthí náa Mateo 6:33 Jeobá má gáñewu̱u̱nxu”.

ÍNDO̱ GÚNDXAʼWÁMÍJNÁ GA̱JMA̱A̱ NUMUU XÓO GÁKUWÁANʼ ÍNDO̱ GÁʼNIÁANʼ

13. Ndiéjunʼ gándoo gúʼni xúgi̱ mu maguáʼdáá mbá chíʼgíiʼ mbújkha̱a̱ nda̱wa̱á rí majmulú índo̱ gaʼni guaniáanʼ rá.

¹³ Ma̱ngaa ma̱ndoo musngajmá rí nakumulú kuʼyáá Jeobá índo̱ gúndxaʼwámíjná ga̱jma̱a̱ numuu xóo índo̱ gaʼni guaniáanʼ. Náa Biblia naʼthúlú rí gíʼma muñajunʼ gakhi̱i̱ mu muguáʼdáá mbújkha̱a̱ rí makuwá ga̱jma̱a̱ nda̱wa̱á (Prov. 6:​6-11). Ikha jngóo á mu naʼngo̱o̱ ma̱ndoo muyejxíi mbá chíʼgíiʼ mbújkha̱a̱ dí majmulú itháán nda̱wa̱á. Maski ajndu mbújkha̱a̱ ma̱ndoo mañewu̱nlú mú ragíʼmaa magiʼdoo itháán numuu náa vida ndrígulú (Ecl. 7:12).

14. Xú káʼnii embáyulú Hebreos 13:5 índo̱ nundxa̱ʼwa̱míjna̱ xóo gakuwáánʼ índo̱ gáʼni guaniáanʼ rá.

¹⁴ Jesús niʼthí mbá xkri̱da náa nasngájma dí mbáa xa̱bu̱ bi̱ ndayáʼ magiʼdoo wéñuuʼ, “gínáa náa iduu Dios” (Luc. 12:​16-21). Na̱nguá eʼyáá xóo gákuwáanʼlu gájtsíí (Prov. 23:​4, 5; Sant. 4:​13-15). Ma̱ngaa Jesús niʼthí dí xúgíinʼ bi̱ nandún mani̱ndxu̱ún xa̱bi̱i̱ gíʼmaa makuwá xawii muniñaaʼ dí kuáʼdáá (Luc. 14:33). Nákha timbá siglo, cristiano bi̱ nikúwá náa Judea nikúwá xawii muniñaaʼ dí kuáʼdáá (Heb. 10:34). Ma̱ngaa dí mbiʼi xúgi̱ mbaʼin a̱ngiu̱lú nandáti̱gu̱u̱n ñajunʼ o dí kuaʼdáá numuu rí tséxudamíjna̱ náa política (Apoc. 13:​16, 17). Nusngajma dí nakumu̱ún kuyáá kájxi̱ ajngóo Jeobá náa naʼthí: “Nditháan xániʼñáánʼ ga̱jma̱a̱ nimbá miʼtsu xániʼñátíga̱a̱nʼ” (atraxnuu Hebreos 13:5). Ikha jngóo nuʼni tsiakimíjna̱lu rí maguaʼdáá rí gáʼyulúʼ índo̱ gáʼni guaniáanʼ ga̱jma̱a̱ nakumulú kuʼyáá kájxi̱ Jeobá dí ikhaa má gámbáyulú á mu nuguáʼníí mbá rí tséguaʼthi̱i̱n.

15. Xú káʼnii gíʼmaa mbuñún e̱jñu̱ún, xabuanii bi̱ nandún kuyáá Jeobá rá. (Atayáá ma̱ngaa xtiʼkhu.)

¹⁵ Náa tikhu xuajin, xabuanii nuguáʼdiin e̱jñu̱ún mu xúʼko̱ ikhiin mudaaʼ mba̱a̱ mbújkha̱a̱ ga̱jma̱a̱ muñewu̱u̱n índo̱ gáʼni guanii. Mú náa Biblia naʼthí dí xabuanii gíʼmaa muxnún e̱jñu̱ún dí nda̱ñúunʼ (2 Cor. 12:14). Gajkhun má dí índo̱ xabuanii naʼni guanii, mbáa mbaʼñúunʼ dí e̱jñu̱ún mumbañún ga̱jma̱a̱ mbújkha̱a̱ o muxnún i̱ʼwáʼ dí gáʼñúunʼ ga̱jma̱a̱ mbaʼin e̱ji̱n nuni̱ rígi̱ ga̱jma̱a̱ xúgíʼ a̱jkiu̱ún (1 Tim. 5:4). Mú xabuanii bi̱ naku̱mu̱ún kuyáá itháán Jeobá, nduyáá dí makuwá itháán gagi á mu numbañún dí muni̱ ñajuunʼ Jeobá, raʼkháa dí muni̱ mba̱ji̱i̱n mu mudaaʼ mba̱a̱ mbújkha̱a̱ mu xúʼko̱ muxnún ikhiin nda̱wa̱á (3 Juan 4).

16. Xú káʼnii gándoo xabuanii mumbañún e̱jñu̱ún mu makánún rí makuwá ga̱jma̱a̱ nda̱wa̱á xá. (Efesios 4:28.)

¹⁶ Xabuanii, índo̱ gúnirathiin e̱jña̱la mu makánún rí makuwá ga̱jma̱a̱ nda̱wa̱á, guʼgíʼ mbá májánʼ xkri̱da ga̱jma̱a̱ gusngún maku̱mu̱ún kuyáá Jeobá. Gusngún asndu nákha majkhiinʼ dí gíʼmaa muñajunʼ gakhi̱i̱ (Prov. 29:21; atraxnuu Efesios 4:28). Xó má gáʼga ra̱ji̱i̱n ejña̱a̱nʼ atambáñúún mu muni̱ xó má eʼngo̱o̱ mu mugíʼ májánʼ edxu̱ún náa escuela. Guʼyáʼ náa i̱yi̱i̱ʼ ndrígulú ikha dí ma̱ndoo mambáñún mu muraʼwi̱i̱ májánʼ ndiéjuunʼ gúniga̱jma̱a̱. Xabuanii, gumbáñún e̱jña̱la mu muxkamaa mbá ñajunʼ náa ma̱ndoo makánún rí makuwá ga̱jma̱a̱ rí maguaʼdáá mbiʼi magajnún gútaraʼa itháán o mbáa asndu mani̱ndxu̱ún precursores.

17. Ndiéjuunʼ dí nduʼyáá gajkhun rá.

¹⁷ Xa̱bi̱i̱ Jeobá bi̱ naguájun jmbu nduyáá gajkhun dí ikhaa nandoo ga̱jma̱a̱ maʼngo̱o̱ maxnún dí nda̱ñúunʼ. Xó má na̱jkha̱ ratumuu mbiʼi ndrígóo numbaaʼ rígi̱ xúʼko̱ má ndayóoʼ itháán rí makumulú kuʼyáá itháán Jeobá. Mú makumulú kuʼyáá kájxi̱ Jeobá asndu ndiéjuunʼ má dí gárígá, ikhaa majmuu tsiaki̱i̱ ndrígóo mu maxnúlú rí ndayúlú. Nduʼyáá gajkhun dí ikhaa mambáyulú má xúʼko̱, tséʼniuu má asndu náá mínaaʼ kuwáanʼ.