“Guraʼwi̱i̱ xúgi̱ tsáá gúyamajkuíí”

1. Ndiéjunʼ gúʼni mu makuwáánʼlu gagi ga̱jma̱a̱ náá numuu rá. (Isaías 48:​17, 18.)

ANU̱LÚ bi̱ xtáa mekhuíí ra̱ʼkhá tháán nandoo kaʼyulú ga̱jma̱a̱ nandoo dí makuwáanʼ gagi xúgi̱ ma̱ngaa nda̱wa̱á (Ecl. 3:​12, 13). Niʼniáanʼ mu majmáánʼlu muʼni mbaʼa dí ra̱ʼkhá tháán nagui̱i̱, mú na̱nguá niʼniáánʼ mu majmáánʼlu muʼtáñajumijnálú ní má dí muraʼwíí ndiéjunʼ nindxu̱u̱ dí májánʼ ga̱jma̱a̱ dí ra̱májánʼ (Ecl. 8:9; Jer. 10:23). Ikhaa ndaʼyoo dí mu makuwáánʼ gagi ndayóo muʼni ñajuunʼ ga̱jma̱a̱ muʼnimbulú kuʼyáá ikhaa (atraxnuu Isaías 48:​17, 18).

2. Ndiéjunʼ eyoo Gixa̱a̱ dí makumulú ga̱jma̱a̱ ndiéjunʼ niʼni Jeobá mu masngájma dí Gixa̱a̱ naʼni nduwaʼ rá.

² Gixa̱a̱ nandoo makumulú dí tséyóoʼ má muʼni ñajuunʼ Jeobá mu makuwáanʼ gagi ma̱ngaa dí majmáánʼlu má muʼtáñajumijnálú ikháanʼ (Gén. 3:​4, 5). Mu makujmaa dí Gixa̱a̱ naʼni nduwaʼ, Jeobá niniñuuʼ dí xa̱bu̱ mutañajumijná mbá nguáthá mba̱yu̱u̱ʼ. Mú nakujmaa kaʼwu dí xa̱bu̱ tséjmiin gútañajumijná. Náa Biblia rígá mbaʼa xkri̱da ndrígu̱ún xa̱bekha ga̱jma̱a̱ gu̱ʼu̱ bi̱ nikúwá gagi runi̱ ñajuunʼ Jeobá, bi̱ itháán nixtáa gagi nindxu̱u̱ Jesucristo. Náa artículo rígi̱ mbuʼyáá náá numuu rí Jesús niraʼwíí maʼni ñajuunʼ Jeobá, ma̱ngaa mbuʼyáá náá numuu dí Anu̱lú bi̱ xtáa mekhuíí kaʼyoo dí mbuʼyamajkuíí, nda̱wa̱á mbuʼyáá ndíjkha dí niraʼwíílu muʼni ñajuunʼ Jeobá.

NÁÁ NUMUU RÍ JESÚS NIRAʼWÍÍ MAʼNI ÑAJUUNʼ JEOBÁ RÁ.

3. a) Ndiéjunʼ niʼthúu̱n Gixa̱a̱ maxnúu Jesús rá. b) Ndiéjunʼ niraʼwíí maʼni Jesús rá.

³ Índo̱ Jesús nixtáa náa tsu̱du̱u̱ Ku̱ba̱ʼ, ndiyóo’ maraʼwíí tsáá gáʼni ñajuunʼ. Nda̱wa̱á dí ikhaa nijngúun iyááʼ, Gixa̱a̱ niʼthúu̱n maxnúu xúgíʼ xuajin mba̱ʼu̱ á mu nasmbáti̱go̱o̱ náa inuu. Mú Jesús niriʼñuu: “¡Ayuʼ kaníí Gixa̱a̱! Numuu rí náa kiʼnirámáʼ naʼthí: ‹I̱ndó Jeobá Dios ndrígáaʼ gátayamajkuíí ga̱jma̱a̱ i̱ndó ikhaa gátani̱ ñajuunʼ›” (Mat. 4:​8-10). Guʼyáá náá numuu rí Jesús niraʼwíí maʼni rígi̱.

4, 5. Aratá náá numuu dí Jesús niraʼwíí maʼni ñajuunʼ Jeobá.

⁴ Jesús niraʼwíí maʼni ñajuunʼ Jeobá numuu rí nandoo kaʼyoo ga̱jma̱a̱ xúgíʼ a̱jkiu̱u̱n (Juan 14:31). Ma̱ngaa ndiʼyoo dí rúʼko̱ nindxu̱u̱ itháán májánʼ maʼni (Juan 8:​28, 29; Apoc. 4:11). Jeobá nindxu̱u̱ bi̱ niʼniáanʼlu, naxnulú dí gíʼdoo ga̱jma̱a̱ ma̱ndoo makumulú kuʼyáá (Sal. 33:4; 36:9; Sant. 1:17). Jeobá niʼthúu̱n Jesús ndiéjunʼ rí nindxu̱u̱ gajkhun ma̱ngaa nixnúu xúgíʼ rí nigiʼdoo (Juan 1:14). Mú Gixa̱a̱ mixtiʼkuii kayuuʼ, ikhaa niʼni rí xa̱bu̱ muxudamijná aʼkhá ga̱jma̱a̱ makhañún, naʼni nduwaʼ, naxígúu ga̱jma̱a̱ i̱ndó naxmiéjuunʼ kaʼyaminaʼ ikhaa (Juan 8:44). Jesús naniniiʼ májánʼ Jeobá ga̱jma̱a̱ naniniiʼ Gixa̱a̱, ikha jngóo tándoo mani̱ndxu̱u̱ xóo Gixa̱a̱ ni má tándoo makujximínáʼ náa Jeobá (Filip. 2:​5-8).

⁵ Ma̱ngaa Jesús niraʼwíí maʼni ñajuunʼ Jeobá numuu dí nindxa̱ʼwáminaʼ náa xúgíʼ dí májánʼ gárígá á mu nawi̱ji̱ jmbu (Heb. 12:2). Ikhaa ndiʼyoo dí á mu nawi̱ji̱ jmbu maʼni kaʼwi̱i̱ mbiʼyuu Anu̱u̱ ma̱ngaa rígi̱ maʼni dí xa̱bu̱ ní xákháñún itháán ni má xúmíniiʼ.

NÁÁ NUMUU DÍ JEOBÁ KAʼYOO MBUʼYAMAJKUÍÍ RÁ.

6, 7. a) Náá numuu rí mbaʼin xa̱bu̱ tséni ñajuunʼ Jeobá rá. b) Náá numuu dí i̱ndó Jeobá kaʼyoo dí mbuʼyamajkuíí rá.

⁶ Rí mbiʼi xúgi̱ mbaʼin xa̱bu̱ tséni ñajuunʼ Jeobá numuu dí na̱nguá eniʼniiʼ, na̱nguá eyááʼ dí májáanʼ a̱jkiu̱u̱n ni má dí ikhaa niʼni ga̱jma̱a̱ numún. Nindxu̱ún xóo xa̱bu̱ bi̱ apóstol Pablo niʼtárúʼún náa Atenas bi̱ na̱nguá eniʼniiʼ Dios (Hech. 17:​19, 20, 30, 34).

⁷ Pablo niʼthún dí Dios bi̱ gajkhun “naxnún xúgíinʼ xa̱bu̱ rí mbuya, giñánʼ mu mbuya̱ xi̱ʼ ga̱jma̱a̱ xúgíʼ dí rígá”. Ma̱ngaa dí “ga̱jma̱a̱ numuu ikhaa, ikháanʼ nduʼyalú nandoo numbayimíjna̱lu ga̱jma̱a̱ kuwáanʼ”. Ga̱jma̱a̱ niʼthún dí “náa mbáwíí xa̱bu̱ niʼni rí makuwá eʼwíinʼ xa̱bu̱”. Ikha jngóo, i̱ndó ikhaa kaʼyoo rí mbuʼyamajkuíí numuu dí ikhaa nindxu̱u̱ bi̱ Niʼniáanʼ (Hech. 17:​25, 26, 28).

8. Ndiéjunʼ rí nditháan xáʼni Jeobá rá.

⁸ Numuu rí Jeobá nindxu̱u̱ bi̱ Niʼniáanʼ ga̱jma̱a̱ bi̱ Kaʼyoo maʼtáñajunʼ ma̱ndoo matsudiinʼ xa̱bu̱ mu muni̱ ñajuunʼ. ¡Mú ikhaa nditháan tséʼni rígi̱! Jeobá nandoo dí xúgíinʼ xa̱bu̱ mambajxúún gajmiún ikhaa ajndu kámuu (1 Tim. 2:​3, 4). Ikha jngóo rígá mbaʼa dí nasngájmulú dí ikhaa xtáa ga̱jma̱a̱ dí nandoo kaʼyulú. Ma̱ngaa ga̱jma̱a̱ numuu rígi̱ dí Jeobá naʼniratháánʼ mu muʼsngúún eʼwíinʼ xa̱bu̱ dí ikhaa maʼni ga̱jma̱a̱ numulú ma̱ngaa xóo gáʼnimbánuu (Mat. 10:​11-13; 28:​19, 20). Ma̱ngaa nagimbáanʼ náa mámbá congregación mu ma̱ndoo mbuʼyamajkuíí ga̱jma̱a̱ nagruigi̱i̱n bi̱ muyégún edxu̱u̱ mu muñewu̱nlú májánʼ (Hech. 20:28).

9. Xú káʼni esngájma Jeobá dí nandoo kaʼyulú rá.

⁹ Jeobá ma̱ngaa nasngájma dí nandoo kaʼñún xa̱bu̱ bi̱ tsénimbu̱ún rí ikhaa xtáa, numuu dí naxnún xúgíʼ dí májánʼ. Asndu nákha wajyúuʼ mbaʼin xa̱bu̱ nuni̱ má dí ikhiin nakumu̱ún dí nindxu̱u̱ májánʼ ga̱jma̱a̱ ra̱májánʼ. Mú ga̱jma̱a̱ numuu dí Jeobá májáanʼ a̱jkiu̱u̱n naxnún xúgíʼ dí ndañún mu makuwá ga̱jma̱a̱ (Mat. 5:​44, 45; Hech. 14:​16, 17). Ikhaa naniñuuʼ dí maguaʼdíin familiu̱ún, maguaʼdíin e̱jñu̱ún, maguaʼdíin bi̱ mambájxu̱u̱n gajmiún ma̱ngaa dí makuwá gagi ga̱jma̱a̱ numuu ñajunʼ rí nuni̱ (Sal. 127:3; Ecl. 2:24). Nduʼyáá gajkhun dí Anu̱lú bi̱ xtáa mekhuíí nandoo kaʼñún xúgíinʼ xa̱bu̱ (Éx. 34:6). Rí xúgi̱ guʼyáá náá numuu dí ikháánʼ niraʼwíí muʼni ñajuunʼ Jeobá ga̱jma̱a̱ guʼyáá xóo ikhaa eʼni tsajkurámáanʼlu.

NDÍJKHA DÍ NURAʼWÍÍ MUʼNI ÑAJUUNʼ JEOBÁ RÁ.

10. a) Náá numuu jngóo dí nuʼni ñajuunʼ Jeobá rá. (Mateo 22:37.) b) Xú káʼnii embáyáaʼ ikháán dí Jeobá naʼngo̱o̱ a̱jkiu̱u̱n kaʼyaaʼ rá. (Salmo 103:​13, 14.)

¹⁰ Ikháá má xóo Jesús, ikháanʼ mangáanʼ nuʼni ñajuunʼ Dios numuu dí nandulúʼ kuʼyáá ga̱jma̱a̱ xúgíʼ a̱jkiu̱lú (atraxnuu Mateo 22:37). Índo̱ itháan eniʼníiʼ Jeobá itháan má nanigulúʼ xóo nindxu̱u̱. Ikhaa naʼngo̱o̱ a̱jkiu̱u̱n kaʼyulú. Índo̱ israelitas túnimbu̱u̱n kuyáá, niʼthún: “Mbá péñu, guniʼñááʼ rajkuala náa kambala dí raʼkhí” (Jer. 18:11). Jeobá gíwa̱a̱nʼ a̱jkiu̱u̱n rí yujndaʼ ñajunlú (atraxnuu Salmo 103:​13, 14).a Índo̱ ikháán natatsaʼwáminaʼ ga̱jma̱a̱ rí Jeobá naʼngo̱o̱ a̱jkiu̱u̱n kaʼyaaʼ, lá tsénigua̱a̱ʼ matani̱ ñajuunʼ ajndu kámuu xáʼ.

11. Ndiéjunʼ nindxu̱u̱ i̱ʼwáʼ numuu dí nuraʼwíí muʼni ñajuunʼ Anu̱lú bi̱ xtáa mekhuíí rá.

¹¹ I̱mba̱ dí naxkajxáánʼ muʼni ñajuunʼ Jeobá nindxu̱u̱ dí nduʼyáá dí rígi̱ gíʼma muʼni (Mat. 4:10). Ma̱ngaa nduʼyáá dí á mu naguajún jmbu náa Dios maʼni dí maguma kaʼwi̱i̱ mbiʼyuu, musngajmá dí Gixa̱a̱ naʼni nduwaʼ ga̱jma̱a̱ muʼni dí maʼdxuu a̱jkiu̱u̱n Anu̱lú. Á mu dí xúgi̱ nuraʼwíí muʼni ñajuunʼ Jeobá, ma̱ndoo muʼni ñajuunʼ asndu kámuu mbiʼi (Juan 17:3).

12, 13. Ndiéjunʼ ejmañulúʼ náa xkridoo Jane ga̱jma̱a̱ Pam rá.

¹² Ajndu nákhá majkiáanʼ ma̱ndoo muguanú maʼndulú kuʼyáá Jeobá dí ma̱ndoo maʼgá ra̱ja̱a̱ má xúʼko̱. Guʼyáá xkri̱da ndrígu̱ún a̱jmi̱i̱n a̱ngiu̱lú gu̱ʼu̱ bi̱ niguáʼdi̱i̱ ninigajmaa Biblia asndu nákhá majkhiinʼ, nákhá Jane gíʼdoo 11 tsiguuʼ ga̱jma̱a̱ Pam gíʼdoo 10 tsiguuʼ.b Maski ajndu anu̱ún ga̱jma̱a̱ rudún túdrigú dí munigajmaa Biblia, mú niniñuuʼ dí ikhiin majuiʼsngúún i̱ndó á mu nagún má xúʼkhíin gajmiún náa guʼwá ndxajkun índo̱ naguámbáa xmáná. Jane naʼthí: “Dí nisngóʼ Testigos ga̱jma̱a̱ numuu Biblia nimbáyuʼ mu xájmuʼ droga ni má xáboʼ xkawiʼ gajmíʼ eʼwíinʼ xó má enii compañeriuʼ bi̱ nagún náa escuela”.

¹³ Nguáthá tsiguʼ nda̱wa̱á niguánú ninindxu̱ún publicadoras, ga̱jma̱a̱ itháan nda̱wa̱á ninindxu̱ún precursoras ma̱ngaa niñewa̱a̱n anu̱ún ga̱jma̱a̱ rudún bi̱ wanii má. Jane naʼthí rígi̱ ga̱jma̱a̱ numuu xóo nixtáa: “Ni̱jkhánú ndi̱yo̱o̱ gajkhun dí Jeobá nañewu̱u̱n má xúʼko̱ bi̱ nambájxu̱u̱ gajmíi̱n, numuu rí xó má naʼthí náa 2 Timoteo 2:19 ‹Jeobá naʼniniúúnʼ bi̱ kaʼñún›”. Nakujmaa kaʼwu dí Jeobá nañewu̱u̱n bi̱ nuraʼwi̱i̱ muni̱ ñajuunʼ ga̱jma̱a̱ bi̱ nandún kuyáá.

14. Xú káʼnii gándoo gúʼtámbáyííʼ mbiʼyuu Jeobá rá. (Atayáá ma̱ngaa xtiʼkhuu.)

¹⁴ Nandulúʼ dí mbiʼyuu Jeobá maguma kaʼwi̱i̱ mbá kayuuʼ. Atatsaʼwáminaʼ dí ikháán xtaʼdaa mbáa bi̱ natambájxa̱a̱ʼ ga̱jma̱a̱ʼ bi̱ májáanʼ a̱jkiu̱u̱n, naxná rí gíʼdoo ma̱ngaa nakro̱ʼo̱o̱ kaʼñún eʼwíinʼ. Mú mbóo mbiʼi natadxawíín rí bi̱ natambájxa̱a̱ʼ ga̱jma̱a̱ʼ nindxu̱u̱ ra̱májáanʼ ga̱jma̱a̱ naʼni nduwaʼ, ndiéjunʼ gátani̱ rá. Lá raʼkháa marata dí ragájkhun dí nuthi xáʼ. Ikháá má kayuuʼ índo̱ nuʼdxawíín dí mbáa naʼthí dí raʼkhí ga̱jma̱a̱ numuu Jeobá, nandulúʼ muʼthá dí gajkhun ga̱jma̱a̱ numuu ma̱ngaa muʼtámbáyííʼ ga̱jma̱a̱ xúgíʼ tsiaki̱i̱ ndrígulú (Sal. 34:1; Is. 43:10). Ajngáa dí nuʼthá ga̱jma̱a̱ dí nuʼni nasngájma rí nandulúʼ muʼni ñajuunʼ Jeobá ga̱jma̱a̱ xúgíʼ a̱jkiu̱lú.

15. Xú káʼnii niguma tsajkurámaaʼ apóstol Pablo nda̱wa̱á dí niriʼkhu̱u̱ dí nindoo maʼni xá. (Filipenses 3:​7, 8.)

¹⁵ Kúwáanʼ xawii muriʼkui̱i̱ dí nandulúʼ muʼni mu Jeobá maʼdxuu ma̱ngaa mu muʼni itháán ñajuunʼ ikhaa. Xúʼko̱ niʼni apóstol Pablo, ikhaa táʼniuu gakhi̱i̱ maniñuuʼ rí magiʼdoo numuu náa xa̱bu̱ judíos mu maʼga kidxuuʼ Cristo ma̱ngaa mu maʼni ñajuunʼ Jeobá (Gál. 1:14). Ga̱jma̱a̱ numuu rígi̱ ikhaa nixtáa gagi ma̱ngaa nigruigú dí maʼtáñajunʼ ga̱jma̱a̱ Cristo náa mekhuíí. Pablo nditháan tágáwíinʼ a̱jkiu̱u̱n dí niraʼwíí maʼni ñajuunʼ Jeobá. Á mu ikháánʼlú mangáanʼ nuraʼwíí mu’ni ñajuunʼ Jeobá nditháan xátanga̱a̱ a̱jkiu̱lú (atraxnuu Filipenses 3:​7, 8).

16. Ndiéjunʼ eʼsngúlú rí nigíʼnuu Julia rá. (Atayáá ma̱ngaa xtiʼkhuu.)

¹⁶ Á mu nuraʼwíí muʼni ñajuunʼ Jeobá ikhaa maʼni tsajkurámáánʼlú xúgi̱ ga̱jma̱a̱ nda̱wa̱á. Xúʼko̱ nigíʼnuu ndxájulú Julia, ikhaa nákha chíʼgíiʼ naʼni ajmúú náa guʼwá ndxájkun, mú mbáa xa̱bu̱ bi̱ najmañuu naʼni ajmúú ópera ninigu̱u̱ʼ xóo eʼni ajmúú Julia, ikha jngóo niʼthúu̱n dí maʼsngóo. Nguáthá mba̱yu̱u̱ʼ nda̱wa̱á nijkha̱nú nijmaʼniiʼ wéñuuʼ ga̱jma̱a̱ ni̱jkha̱ raʼni ajmúú náa mbaʼa concierto dí najmaʼnuuʼ. Índo̱ xtáa raʼnigajma̱a̱ náa mbá escuela dí nuni̱ ajmúú, mbáa compañeriúu niʼthúu̱n dí Dios mbiʼyuu Jeobá. Nda̱wa̱á dí rígi̱ Julia nigíʼdúu niʼnigajma̱a̱ Biblia a̱jma̱ nuthu rí mbá xmáná, itháán nda̱wa̱á ikhaa niniñuuʼ raʼni ajmúú ópera mu maʼni ñajuunʼ Jeobá, mú niʼniuu gakhi̱i̱. Ikhaa naʼthí: “Mbaʼin xa̱bu̱ nithu̱nʼ dí raʼkhí ni̱ni̱ dí niniʼñúuʼ ra̱ni̱ ajmúú. Mú ikhúún nindoʼ ma̱ni̱ ñajuunʼ Jeobá”. Xú káʼnii ku̱mu̱u̱ Julia xúgi̱ ga̱jma̱a̱ numuu dí niraʼwíí maʼni nákhá 30 tsiguʼ kidííʼ rá. Ikhaa naʼthí: “Nadxuʼ ga̱jma̱a̱ nda̱yo̱o̱ dí nda̱wa̱á Jeobá maxnúʼ dí nandoʼ” (Sal. 37:4).

XÁTATSIʼÑÁÁʼ RATANI̱ ÑAJUUNʼ JEOBÁ

17. a) Ndiéjunʼ gíʼmaa muni̱ bi̱ xóó tséraʼwi̱i̱ muni̱ ñajuunʼ Jeobá ga̱jma̱a̱ náá numuu rá. b) Ndiéjunʼ dí nduʼyáá ikháánʼlú bi̱ nuʼni má ñajuunʼ Jeobá rá.

¹⁷ Kuwáánʼlú náa iwáá mbiʼi, apóstol Pablo niʼnirámáʼ: “Numuu rí, ‹nánguá má mba̱yu̱u̱ʼ tígo̱o̱›, ‹xájyúuʼ má gáʼkanú bi̱ na̱ʼkha̱›” (Heb. 10:37). Rígi̱ nandoo gáʼthúu̱n dí nánguá guanúu mba̱yu̱u̱ʼ mbiʼi mu xa̱bu̱ muraʼwi̱i̱ muni̱ ñajuunʼ Jeobá (1 Cor. 7:29). Ga̱jma̱a̱ á mu niraʼwííʼlu má muʼni ñajuunʼ Dios mbáa muraʼníí tikhuu tsáʼkhá mú xájyúuʼ má mba̱yu̱u̱ʼ.

18. Ndiéjunʼ eyoo muʼni Jeobá ga̱jma̱a̱ Jesús rá.

¹⁸ Jesús niʼthúún xa̱bi̱i̱ dí magún kidxuuʼ ga̱jma̱a̱ dí xúniña̱a̱n ragún má xúʼko̱ kidxuuʼ (Mat. 16:24). Ikha jngóo á mu mba̱yu̱u̱ʼ má kuwáánʼ ru̱ʼni̱ ñajuunʼ Jeobá, xákhá guabáanʼlu. Gajkhun má dí nguáná ndayóoʼ muʼni tsiakimi̱jna̱ muʼni ñajuunʼ Jeobá. Mú índo̱ nuʼni ñajuunʼ ikhaa nakuwáánʼlú gagi ga̱jma̱a̱ ikhaa naʼni tsajkurámáánʼlú (Sal. 35:27).

19. Ndiéjunʼ eʼsngúlú dí nigíʼnuu Gene rá.

¹⁹ Mbaʼin nakumu̱ún dí matani̱ ñajuunʼ Jeobá nindxu̱u̱ gakhi̱i̱ wéñuuʼ. Á mu ikháán nindxa̱a̱ʼ dxámá o dxáʼgú, lá naku̱ma̱a̱ʼ dí á mu natani̱ ñajuunʼ Jeobá marigá dí ní xándoo matani̱ ráʼ. Mbáa dxámá bi̱ mbiʼyuu Gene naʼthí: “Niku̱mu̱ʼ dí bi̱ nindxu̱lú testigos de Jeobá rígá mbaʼa dí xándoo muʼni, nda̱yo̱o̱ dí mbaʼin jiámá bi̱ mbóó tsiguʼ gajmíʼ nagún ndxa̱a̱, najngrui̱gu̱u̱n gajmiún wa̱ʼxa̱ʼ o nutsíin videojuego náa nuxmijná. Mú ikhúún gíʼmaa maʼgá reunión ga̱jma̱a̱ maʼgá gátaráʼa”. Ndiéjunʼ ni̱jkha̱ kayáa maʼni Gene numuu dí xígi̱ endxa̱ʼwáminaʼ rá. Ikhaa naʼthí: “Mangúún nigíʼdu̱u̱ ni̱ni̱ dí ra̱májánʼ dí eʼwíinʼ jiámá kúwá runi̱, ni̱ni̱ gagimina̱ʼ mbá xngaa, mú na̱nguá nixtáá gagi. Ikhú nindxa̱ʼwa̱mínáʼ ga̱jma̱a̱ numuu dí nijmañuʼ náa Biblia ga̱jma̱a̱ xú káʼnii gáxtáá á mu naʼgíʼ nanimbánuu. Ikha jngóo niraʼwi̱i̱ ma̱ni̱ ñajuunʼ Jeobá ga̱jma̱a̱ xúgíʼ a̱jkiu̱nʼ, naku̱mu̱ʼ dí asndu nákha ikhú Jeobá nariʼña̱a̱ xúgíʼ dí natakáñuu”.

20. Ndiéjunʼ dí gíʼmaa muʼnilú rá.

²⁰ Bi̱ niʼnirámáʼ Salmo 65:4 niʼthúu̱n Jeobá: “Gagi xtáa xa̱bu̱ bi̱ natraʼwíi ga̱jma̱a̱ nadxuʼ jcháa náa ikháán mu maxtáa náa rexo̱o̱ guʼwáaʼ”. Guraʼwi̱i̱ muʼni má xúʼko̱ ñajuunʼ Jeobá. Guʼthá xó má niʼthí Josué: “Ikhúún gajmíʼ bi̱ kúwá náa goʼwóʼ mu̱ni̱xu̱ʼ ñajuunʼ Jeobá” (Jos. 24:15).