Na̱nguá kúwáanʼ ndajkuáanʼ

1, 2. a) Náá numuu nuʼthá dí na̱nguá kúwáanʼ ndajkuáanʼ índo̱ nuraʼníí xkujndu rá. b) Ndiéjunʼ gúʼyáá náa artículo rígi̱ rá.

ÍNDO̱ nuraʼníí xkujndu nakumulú dí kúwáanʼ ndajkuáanʼ ga̱jma̱a̱ xóo dí nindátigáanʼ náa xaxi̱. Mú na̱nguá kúwáanʼ ndajkuáanʼ numuu rí Anu̱lú bi̱ xtáa mekhuíí nandoo kaʼyulú, ikhaa ndaʼyoo rí kúwáánʼ rumíniiʼ ga̱jma̱a̱ nikudaminaʼ rí maxtáa ga̱jma̱á nindxu̱lú. Jeobá naʼthúu̱n mámbáa dí ikháanʼ: “Ikhúún mambáyaaʼ” (Is. 41:10).

² Náa artículo rígi̱ mbuʼyáá a̱jkhu̱ enii xóo Jeobá nambáyulú: 1) Naxnúlú ikha, 2) naxnúlú dí ndayúlú, 3) nañewu̱nlú, ga̱jma̱a̱ 4) naʼni̱i̱ a̱jkiu̱lú. Ikhaa nikudaminaʼ dí tséʼniuu má ajndu ndiéjunʼ xkujndu gúraʼníí, nditháan xámbumuu kaʼyulú ga̱jma̱a̱ xániñatigáanʼlú. Ikha jngóo nditháan xákumulú dí kúwáanʼ ndajkuáanʼ.

JEOBÁ NAXNÚLÚ IKHA

3, 4. Xú káʼnii exnúlú ikha Jeobá rá. (Salmo 48:14.)

³ (Atraxnuu Salmo 48:14).a Jeobá ndaʼyoo dí á mu ndajkuáánʼ xájmáanʼlú gúraʼwíí dí mu̱ʼni̱. Ikha jngóo najmuu Biblia mu maxnúlú ikha (Sal. 119:105). Ajngá rawuunʼ nambáyulú muraʼwíí májánʼ dí mu̱ʼni̱ ga̱jma̱a̱ mu manindxu̱lú májáanʼ xa̱bu̱, dí maʼni makuwáanʼ gagi ma̱ngaa dí ma̱ndoo muguáʼthi̱i̱n makuwáanʼ kámuu.b Naʼsngúlú mu̱ʼni̱ mba̱a̱ a̱jkiu̱lú ga̱jma̱a̱ xúyejxíi sia̱nʼ, naʼsngúlú muʼthá dí gajkhun ma̱ngaa dí maʼndulú kuʼyamijná (Sal. 37:8; Heb. 13:18; 1 Ped. 1:22). Á mu natani̱ rígi̱, mi̱dxu̱ʼnú mani̱ndxa̱a̱ʼ mbáa májáanʼ xa̱bu̱ nikhi̱i̱, matani̱i̱ rí májánʼ bi̱ ndiyáa ga̱jma̱a̱ mani̱ndxa̱a̱ʼ mbáa bi̱ nambájxu̱u̱n májánʼ gajmiún.

⁴ Jeobá niniñuuʼ náa Ajngá rawuunʼ xkridún xa̱bu̱ bi̱ niraʼníí ikháá má xkujndu ga̱jma̱a̱ bi̱ nikumu̱ún xóo ikháanʼ (1 Cor. 10:13; Sant. 5:17). Índo̱ nuraxnuu ga̱jma̱a̱ nuʼnimbáníí dí najmañulú, rígá a̱jma̱ enii xóo embáyulú. Timbá, naʼni mbuʼyáá dí raʼkháa i̱ndó ikháánʼlú nuraʼníí xkujndu, dí kúwá eʼwíinʼ bi̱ niraʼníí ikháá má xkujndu xóo ikháanʼ ma̱ngaa dí Jeobá nimbáñún maʼngu̱u̱n (1 Ped. 5:9). Raga̱jma̱, naʼsngúlú ndiéjunʼ gámbáyulú muraʼníí xkujndu mu makuwáánʼlú gagi (Rom. 15:4).

5. Tsíín ejmiuu Jeobá mu maxnúlú ikha rá.

⁵ Jeobá ma̱ngaa najmiuu a̱ngiu̱lú mu maxnúlú ikha.c A̱ngiu̱lú circuito nagún má xúʼko̱ náa mámbá congregación ga̱jma̱a̱ nuxna discurso rí naʼni maʼni̱i̱ gújkhúʼ fe ndrígulú ma̱ngaa nambáyulú mu makuwáánʼ mbá jnduʼ (Hech. 15:​40–16:5). Ancianos bi̱ kúwá náa congregación mangiin nuni̱ tsiakimíjna̱ mumbayíí mámbáa dí ikháanʼ mu makuwáánʼ mijngii náa Jeobá (1 Ped. 5:​2, 3). Xabuanii nusngúún e̱jñu̱ún mu maʼndún kuyáá Jeobá, mu muraʼwi̱i̱ májánʼ dí muni̱ ma̱ngaa mu mambájxuun májánʼ gajmiún Dios (Prov. 22:6). Ma̱ngaa a̱ngiu̱lú gu̱ʼu̱ bi̱ nambájxu̱u̱n májánʼ gajmiún Dios nugíʼ mbá májánʼ xkri̱da, nuxnún consejo ga̱jma̱a̱ tsiaki̱i̱ a̱ngiu̱lú bi̱ waʼxa̱áʼ (Tito 2:​3-5).

6. Ndiéjunʼ gúʼni mu mambáyulú ikha dí naxnúlú Jeobá rá.

⁶ Jeobá nixnúlú mbá xúgíʼ dí ndayúlú mu muraʼwíí májánʼ dí mu̱ʼni̱. Mu musngajmá dí nuxnáa núma̱aʼ ga̱jma̱a̱ numuu rí naxnúlú, ndayóoʼ mu̱ʼni̱ dí naʼthí náa Proverbios 3:​5, 6: “Gakuma̱a̱ʼ xtayáá Jeobá ga̱jma̱a̱ xúgíʼ a̱jkia̱a̱nʼ ga̱jma̱a̱ xátambáyuminaʼ i̱ndó náa dí nakrua̱ʼa̱a̱ʼ ikháán”. Á mu nuʼnilú xúʼkhíin ‹ikhaa maʼni jmbu kambu̱lú›. Xóo muʼthá, mambáyulú mu xáguáʼdáá wéñuuʼ xkujndu ma̱ngaa mu makuwáanʼ gagi. ¡Ra̱ʼkhá tháán nuxnáalu núma̱aʼ Jeobá dí ikhaa nandoo kaʼyulú, ma̱ngaa dí naxnúlú consejo rí ndayúlú! (Sal. 32:8).

JEOBÁ NAXNÚLÚ DÍ NDAYÚLÚ

7. Xó má eʼthí náa Filipenses 4:​19, xú káʼnii embáyulú Jeobá rá.

⁷ (Atraxnuu Filipenses 4:19). Jeobá nambáyulú mu mambájxulú májánʼ gajmiúlú ikhaa. Mú ma̱ngaa naʼni tsajkurámuunʼ tsiaki̱i̱ dí nu̱ʼni̱ mu mbuʼyáʼ rí ndayúlú, xóo ganitsu, xtíin ga̱jma̱a̱ náa makuwáánʼ (Mat. 6:33; 2 Tes. 3:12). Maski ajndu na̱nguá má raʼkhí dí mbuʼyáʼ rí ndayúlú, mú Jeobá naʼthúlú dí ragíʼmaa maxmiéjunlú wéñuuʼ ga̱jma̱a̱ numuu rígi̱ (atayáá timbá nota ndrígóo Biblia de estudio dí na̱ʼkha̱ náa Mateo 6:25). Numuu dí Anu̱lú nikudaminaʼ rí nditháan xaniñati̱gi̱i̱n xa̱bi̱i̱ bi̱ naguájun jmbu (Mat. 6:8; Heb. 13:5). Jeobá gajkhun maʼnimbánuu ajngóo ga̱jma̱a̱ maxnúlú dí ndayúlú.

8. Ndiéjunʼ niʼni Jeobá mu mambáyúu David rá.

⁸ Gundxaʼwámíjná ndiéjunʼ niʼni Jeobá mu mambáyúu David, índo̱ ikhaa nixtáa ragáyúu mu xáxíyáa rey Saul, náa xúgíʼ tsiguʼ rúʼko̱ Jeobá nixnúu David gajmíi̱nʼ xa̱bi̱i̱ rí ndiñúunʼ mu ma̱ndoo makáwíin. Índo̱ David nirmáʼáan a̱jkiu̱u̱n xóo Jeobá niñewu̱u̱n, niʼthí: “Ninindxu̱ʼ dxámá ga̱jma̱a̱ dí xúgi̱ nikiu̱u̱n má, mú nditháan táyóo dí niniña̱a̱nʼ mbáa xa̱bu̱ májáanʼ ni má dí e̱ji̱i̱n nunda̱ʼa̱ pan” (Sal. 37:25). Mbáa ikháán mangáán ni̱dxu̱ʼnú nitayáá xóo Jeobá nixnáʼ dí nda̱yáaʼ o xóo embáñún a̱ngiu̱lú índo̱ nuraʼníí gamiéjunʼ.

9. Ndiéjunʼ eʼni Jeobá mu maxnún rí nda̱ñúunʼ xa̱bi̱i̱ bi̱ nuraʼníí gamiéjunʼ rá. (Atayáá ma̱ngaa xtiʼkhuu.)

⁹ Jeobá ma̱ngaa naxnún rí nda̱ñúunʼ xa̱bi̱i̱ índo̱ narígá gamiéjunʼ. Mbá xkri̱da, nákhá siglo timbá cristianos bi̱ nikúwá náa mbaʼa xuajin nixuʼma rí nda̱ñúunʼ a̱ngiu̱lú bi̱ nikúwá náa Jerusalén índo̱ nirígá ewiʼ (Hech. 11:​27-30; Rom. 15:​25, 26). Xúʼko̱ má eni̱ a̱ngiu̱lú dí mbiʼi xúgi̱ ma̱ngaa, nuxna rí guáʼdáá. Jeobá naxkajxi̱i̱n mu muxnún ganitsu, iyaʼ, xtíin ga̱jma̱a̱ thana bi̱ kúwá náa nirígá gamiéjunʼ. Ma̱ngaa kúwá bi̱ nuni̱ májáanʼ guʼwún a̱ngiu̱lú ga̱jma̱a̱ Guʼwá náa nagimbáanʼ rí niguma gámbáa. Ma̱ngaa mbá nacha̱ nuri̱ya̱ʼ awan mu muni̱i̱ a̱jkiu̱ún, muxnún tsiaki̱i̱ ga̱jma̱a̱ Biblia bi̱ niguma gámbáa guʼwún o bi̱ ninimbáti̱ga̱a̱ mbáa bi̱ kuyáá.d

10, 11. Ndiéjunʼ eʼsngáaʼ rí nigíʼnuu Boris rá.

¹⁰ Jeobá naxná dí gíʼdoo ga̱jma̱a̱ naxnún dí nda̱ñúunʼ bi̱ xóó na̱nguá nindxu̱ún xa̱bi̱i̱. Ikháanʼ nduʼyaridáá ga̱jma̱a̱ nuʼniu̱u̱n dí májánʼ bi̱ tsénimbu̱ún rí ikháanʼ nuʼnimbulú (Gál. 6:10). Índo̱ nuʼnilú rígi̱, nguáná mbaʼin nandún majmañún ga̱jma̱a̱ numuu Jeobá. Guʼyáá rí nigíʼnuu Boris bi̱ nindxu̱u̱ director náa mbá escuela dí rígá náa Ucrania, maski ajndu ikhaa na̱nguá nindxu̱u̱ testigo de Jeobá mú ndaʼyamajkhún e̱jín escuela bi̱ nindxu̱ún Testigos. Índo̱ nigi̱ʼdu̱u̱ guerra, ikhaa nigájnuu náa xtáa mu maʼga gáxtáa náa nda̱a̱ wéñuuʼ gamíi, ikhí a̱ngiu̱lú nimbayíí. Itháan nda̱wa̱á ikhaa ni̱jkha̱ náa Conmemoración. Ga̱jma̱a̱ índo̱ Boris nandxa̱ʼwáminaʼ xúgíʼ rí nini̱ ga̱jma̱a̱ numuu, naʼthí: “Naxni̱ín wéñuuʼ núma̱aʼ testigos de Jeobá numuu dí nikúwá xawii mumbayúʼ ga̱jma̱a̱ niñewu̱nʼ”.

¹¹ Xúgiáanʼ ma̱ndoo magáwíinʼ a̱jkiu̱lú xó má eʼni Anu̱lú bi̱ xtáa mekhuíí, índo̱ numbáñún bi̱ nda̱ñúunʼ maski ajndu na̱nguá nindxu̱ún Testigos (Luc. 6:​31, 36). Nuguaʼthi̱i̱n dí rígi̱ gáʼni dí maʼndún majmañún itháan ga̱jma̱a̱ numuu Jeobá ma̱ngaa rí nda̱wa̱á muni̱ mbóó ñajuunʼ Jeobá ga̱jma̱á nindxu̱lú (1 Ped. 2:12). Mú, tséʼniuu má asndu ndiéjunʼ dí ikhiin gúraʼwi̱i̱ muni̱, á mu numbáñún makuwáánʼlú gagi (Hech. 20:35).

JEOBÁ NAÑEWU̱NLÚ

12. Ndiéjunʼ nikudaminaʼ maʼni Jeobá ga̱jma̱a̱ numuu xuajñuu rá. (Salmo 91:​1, 2, 14.)

¹² (Atraxnuu Salmo 91:​1, 2,e 14).f Jeobá nikudaminaʼ mañewu̱u̱n xuajñuu mu xákha wabaaʼ fe ndrígu̱ún, xániñuuʼ rí Gixa̱a̱ maʼni gachúu rí nambájxu̱u̱ gajmíi̱n (Juan 17:15). Ga̱jma̱a̱ índo̱ gági̱ʼdu̱u̱ majphú mba̱a̱ ga̱ʼkhu̱, nduʼyáá gajkhun dí Jeobá maʼnimbánuu rí nikudaminaʼ mañewu̱u̱n xuajñuu. Mañewu̱nlú mu xákha wabaaʼ fe ndrígulú ga̱jma̱a̱ maʼni káwáánʼlú (Apoc. 7:​9, 14).

13. Xú káʼnii eñawu̱u̱n Jeobá mámbáa xa̱bi̱i̱ rá.

¹³ Xú káʼnii eñawu̱u̱n Jeobá mámbáa xa̱bi̱i̱ rá. Naxnúlú Ajngá rawuunʼ mu mbuʼyáá ndiéjunʼ nindxu̱u̱ dí májánʼ ga̱jma̱a̱ dí ra̱májánʼ (Heb. 5:14). Rí muʼnimbáníí dí najmañulú náa Biblia nambáyulú muñewa̱a̱n rí nambájxulú gajmiúlú Jeobá ma̱ngaa mu muraʼwíí májánʼ dí mu̱ʼni̱, dí maʼni makuwáanʼ gagi ga̱jma̱a̱ xáʼniulú nandii (Sal. 91:4). Ma̱ngaa Jeobá najmiuu a̱ngiu̱lú mu mañewu̱nlú (Is. 32:​1, 2). Índo̱ nakuwáanʼ mbóó gajmiúlú xa̱bu̱ bi̱ nandún kuyáá ga̱jma̱a̱ bi̱ nunimbu̱ún kuyáá, nakhánáaʼlú tsiaki̱i̱ mu xúʼni̱ dí ra̱májánʼ (Prov. 13:20).

14. a) Ndíjkha dí nguáná Jeobá naniñuuʼ dí mumíniiʼ rá. b) Ndiéjunʼ eʼthúlú náa Salmo 9:10 rá. (Atayáá ma̱ngaa nota.)

¹⁴ Nákhá wajyúuʼ, nirígá mbiʼi dí Jeobá niñewu̱u̱n xa̱bi̱i̱, mú nguáná nirígá mbiʼi dí táñewu̱u̱n. Náa Biblia naʼthí dí xúgiáanʼ ma̱ndoo muraʼníí xkujndu náa mbá “mbiʼi dí tséguáʼthi̱i̱n” (Ecl. 9:11). Xó má nákhá wajyúuʼ ga̱jma̱a̱ dí mbiʼi xúgi̱, Jeobá naniñuuʼ dí xa̱bi̱i̱ maguma ngíníi o asndu makhañún, mu masngájma rí Gixa̱a̱ naʼni nduwaʼ (Job 2:​4-6; Mat. 23:34). Maski ajndu nguáná Jeobá xáʼni gambáa rí naʼni mumíniiʼ, mú ma̱ndoo mbuʼyáá gajkhun dí ikhaa nditháan xániñúúnʼ bi̱ nandoo kaʼñún (Sal. 9:10).g

JEOBÁ NAʼNI̱I̱ A̱JKIU̱LÚ

15. Xú káʼnii eʼni̱i̱ a̱jkiu̱lú Jeobá índo̱ nuraxnuu Biblia, índo̱ nuʼtákáñíí ga̱jma̱a̱ índo̱ nakuwáanʼ mbóó gajmiúlú a̱ngiu̱lú rá. (2 Corintios 1:​3, 4.)

¹⁵ (Atraxnuu 2 Corintios 1:​3, 4). Na̱jkha̱nú mbá mbiʼi dí xúgiáanʼ numíniiʼ, nakuwáánʼ ngíná o naxmiéjunlú. Mbáa xúgi̱ ikháán xtaa ratraʼníí mbá gamiéjunʼ dí naʼni maraxtaa ngíná o dí naʼni makumaaʼ dí xtaa mbáwíín. Mbáa naku̱ma̱a̱ʼ dí nimbáa tsékro̱ʼo̱o̱ʼ xóo xtaa ratamíniiʼ, mú gármáʼáan a̱jkia̱a̱nʼ rí Jeobá nakro̱ʼo̱o̱ kaʼyaaʼ. Ikhaa “naʼni̱i̱ a̱jkiu̱lú náa xúgíʼ gamiéjunʼ” índo̱ nuʼtákáñíí, índo̱ nuraxnuu Biblia ma̱ngaa najmiuu a̱ngiu̱lú. Índo̱ nuʼtákáñíí naxnúlú “tsímáá ndrígóo Dios dí rígá itháan ñuʼún rí nimbáa xa̱bu̱ numbaaʼ tséʼngo̱o̱ gíkro̱ʼo̱o̱” (Filip. 4:​6, 7). Índo̱ nuraxnuu Biblia nduʼyáá dí ikhaa nandoo kaʼyulú, nuxkamaa consejo ndrígóo ma̱ngaa naʼni̱i̱ a̱jkiu̱lú índo̱ nduʼyáá dí rígá dí kuáʼti̱i̱n nda̱wa̱á. Ga̱jma̱a̱ índo̱ najkua̱lú reunión, a̱ngiu̱lú nusngajma dí nandún kuyulú ma̱ngaa najmún Biblia mu muxnáaʼlú tsiaki̱i̱.

16. Ndiéjunʼ eʼsngáaʼ rí nigíʼnuu Nathan ga̱jma̱a̱ Priscilla rá.

¹⁶ Mu mbuʼyáá xóo ejmuu Jeobá Ajngá rawuunʼ mu maʼni̱i̱ a̱jkiu̱lú, guʼyáá rí nigíʼnuu Nathan ga̱jma̱a̱ Priscilla bi̱ kúwá náa Estados Unidos, nákhá niʼníí ikhiin nigún gákúwá náa xuajen rí ndayóo miʼtáraʼa itháan. Nathan naʼthí: “Nikumuxuʼ dí Jeobá má gáʼni tsájkurámáanʼxu”. Mú índo̱ niguánú ikhí niʼniún gakhi̱i̱ makánún mbújkha̱a̱ ga̱jma̱a̱ niʼniún nandii, ikha jngóo ndiyóoʼ matangi̱ín náa xuajñún, mú ikhí ma̱ngaa na̱nguá nixkamaa mbá ñajunʼ náa makánún mbújkha̱a̱. Nathan naʼthí xóó: “Nirajximínáʼ náá numuu rí Dios na̱nguá niʼni tsájkurámáanʼxu, ma̱ngaa niku̱mu̱ʼ dí ni̱ni̱ mbá dí ra̱májánʼ”. Mú itháan nda̱wa̱á mbá najmiin niguánú ndiyáá dí Dios nditháan má tániñúúnʼ. Nathan naʼthí: “Índo̱ niraʼnííxu xkujndu rígi̱, dí muraxnuu Biblia ninindxu̱u̱ xóo mbáa bi̱ nambáxu̱jxu̱ gajmiúxu xtáa raxnúxu consejo ga̱jma̱a̱ tsiaki̱i̱. Nijmañuxuʼ dí xáxmiéjunxu wéñuuʼ ga̱jma̱a̱ numuu xkujndu ma̱ngaa dí mbu̱ya̱a̱ xóo Jeobá xtáa rambáyuxu. Ga̱jma̱a̱ rígi̱ niʼni ratháanʼxu muraʼníí xkujndu dí gáʼkha̱ nda̱wa̱á”.

17. Xú káʼnii ndiyáa tsiaki̱i̱ mbáa ndxájulú bi̱ mbiʼyuu Helga rá. (Atayáá ma̱ngaa xtiʼkhuu.)

¹⁷ Xó má ndiʼyáá, a̱ngiu̱lú mangiin ma̱ndoo muni̱i̱ a̱jkiu̱lú. Guʼyáá xkri̱da ndrígóo Helga bi̱ xtáa náa Hungría. Mba̱yu̱u̱ʼ tsiguʼ ikhaa niraʼnuu xkujndu dí niʼni maxmiéjuunʼ ga̱jma̱a̱ niʼni maxtáa ngíná. Mú xúgi̱ rí narmáʼáan a̱jkiu̱u̱n xóo nixtáa, ndiʼyoo dí Jeobá nijmiuu a̱ngiu̱lú mu muni̱i̱ a̱jkiu̱u̱n, ikhaa naʼthí: “Jeobá nimbáyuʼ índo̱ nánguá nigúʼdoo tsiaki̱i̱ mu mañajunʼ, mañewu̱u̱n a̱ʼdióʼ bi̱ naʼniuu nandii ga̱jma̱a̱ índo̱ nigúʼdoo i̱ʼwáʼ xkujndu. Náa mbá 30 tsiguʼ dí ninújngoo ndi̱yo̱o̱ gajkhun dí Jeobá niʼni̱i̱ a̱jkiu̱nʼ xó má nikudaminaʼ maʼni, nimbá mbiʼi tániñuʼ, mbaʼa nuthu nijmiuu a̱ngiu̱lú mu maʼni̱i̱ a̱jkiu̱nʼ índo̱ nuthu̱nʼ ajngáa wa̱ba̱ʼ ga̱jma̱a̱ dí naxnáaʼ tsiaki̱i̱. ¡Índo̱ itháan nixtáá ngíná, mbaʼa nuthu a̱ngiu̱lú nuxuʼma mbá mensaje, mbá tarjeta o nuthu̱nʼ rí májánʼ dí xtáá ra̱ni̱!”.

18. Ndiéjunʼ gúʼni mu muʼni̱i̱ a̱jkiu̱ún eʼwíinʼ rá.

¹⁸ Ma̱ndoo muʼni̱i̱ a̱jkiu̱ún eʼwíinʼ xó má eʼni Dios, gudxawíín májánʼ rí nutulúʼ, guxnúúnlú tsiaki̱i̱ ma̱ngaa guxnúún rí nda̱ñúunʼ (Prov. 3:27). Raʼkháa i̱ndó a̱ngiu̱lú numbáñún ma̱ngaa numbáñún eʼwíinʼ xa̱bu̱ bi̱ numíniiʼ ajndu bi̱ tséni ñajuunʼ Jeobá. Á mu nuraʼníí mbá xkujndu, guáʼdáá mbá nandii o nakháñuu mbáa bi̱ kuyáá na̱jkua̱ gúʼñún, nuʼdxawíín rí nuthi ma̱ngaa nuxnún tsiaki̱i̱ ga̱jma̱a̱ Biblia. Índo̱ nduʼyaridáá “Dios bi̱ naʼni̱i̱ a̱jkiu̱lú náa xúgíʼ” numbáñún a̱ngiu̱lú mu maʼngu̱u̱n muraʼníí xkujndu, mú, mbáa ma̱ngaa ma̱ndoo mumbáñún xa̱bu̱ bi̱ tséni ñajuunʼ Jeobá mu maʼndún majmañún ga̱jma̱a̱ numuu (Mat. 5:16).

JEOBÁ MAXTÁA MÁ XÚʼKO̱ GA̱JMA̱A̱ NINDXU̱LÚ

19. Ndiéjunʼ eʼni Jeobá ga̱jma̱a̱ numulúʼ ga̱jma̱a̱ xú káʼnii gúʼyaridáá xá.

¹⁹ Jeobá naxmiéjuunʼ kaʼyulú ga̱jma̱a̱ nditháan tséniñatigáanʼlú índo̱ nuraʼníí mbá gamiéjunʼ, nandoo kaʼyulú ga̱jma̱a̱ nañewu̱nlú xó má eʼni mbáa xa̱bu̱ nikhi̱i̱ ga̱jma̱a̱ a̱ʼdióo. Naxnúlú ikha, naxnúlú dí ndayúlú, nañewu̱nlú ga̱jma̱a̱ naʼni̱i̱ a̱jkiu̱lú. Ikháanʼ ma̱ndoo mbuʼyaridáá á mu numbáñún ga̱jma̱a̱ nuxnún tsiaki̱i̱ bi̱ nuraʼníí gamiéjunʼ. Tséʼniuu má ajndu ndiéjunʼ xkujndu gúraʼníí ma̱ndoo mbuʼyáá gajkhun dí Jeobá maxtáa ga̱jma̱a̱ nindxu̱lú, numuu dí ikhaa naʼthúlú: “Xámíñáaʼ, numuu dí xtáá ga̱jma̱á nindxa̱a̱ʼ” (Is. 41:10). ¡Naʼni̱i̱ a̱jkiu̱lú numuu rí nditháan xákuwáanʼ ndajkuáanʼ!