Guguaʼthi̱i̱n xuajin dí marigá má xúʼko̱

1. Ndiéjunʼ niʼthí Jesús dí magíʼnuu Jerusalén nákhá timbá siglo rá.

NÁKHÁ Jesús xóó tsékháñuu, niʼthúún xa̱bi̱i̱ mbá kiʼtáriyaʼ. Timbá aʼphu̱ rí nimbánuu ninindxu̱u̱ nákhá timbá siglo índo̱ niguma gámbáa Jerusalén ga̱jma̱a̱ guʼwá náa nduyamajkuíí Dios. Jesús niʼthí mbuñún soldados muruguama̱ʼa̱a̱n Jerusalén (Luc. 21:20). Ga̱jma̱a̱ índo̱ gárígá rígi̱ mbaʼyóoʼ dí magáñún. Ajngáa dí niʼthí Jesús nimbánuu índo̱ soldados romanos niruguama̱ʼa̱a̱n Jerusalén (Luc. 21:​21, 22).

2. Ndiéjunʼ niʼthúún apóstol Pablo cristianos bi̱ nikúwá náa Jerusalén ga̱jma̱a̱ náa Judea rá.

² Nákhá soldados romanos xóó tséruguama̱ʼa̱a̱n Jerusalén. Tsiguʼ wapháá apóstol Pablo niʼnirámáʼ náa inún xa̱bu̱ bi̱ kúwá náa Jerusalén ga̱jma̱a̱ bi̱ kúwá náa xúgíʼ Judea mbá i̱yi̱i̱ʼ dí gíʼdoo wéñuuʼ numuu, xúgi̱ najmaʼnuuʼ xóo I̱yi̱i̱ʼ rí na̱jkha̱ inún Hebreos. Ikhí nixnún consejo mu maʼniratiin índo̱ gáguma gámbáa Jerusalén. Á mu cristianos buʼko̱ nandún muni̱ kawúmíjná, mbaʼyóoʼ muniñaaʼ guʼwún ga̱jma̱a̱ ñajunʼ rí guáʼdáá. Apóstol Pablo niʼthí rígi̱ ga̱jma̱a̱ numuu xuajin Jerusalén: “Gi̱i̱ na̱nguá kuaʼdáá mbá xuajen dí marigá má xúʼko̱, kuwáánʼ raguáʼti̱i̱n ga̱jma̱a̱ xúgíʼ a̱jkiu̱lú mbá xuajen rí ma̱ʼkha̱” (Heb. 13:14).

3. Ndiéjunʼ nindxu̱u̱ “xuajin dí ma̱ʼkha̱” ga̱jma̱a̱ ndíjkha dí naguáʼthi̱i̱n rá.

³ Índo̱ cristianos niraʼwíí dí magajníín náa Jerusalén ga̱jma̱a̱ náa Judea, mbáa mbaʼin xa̱bu̱ nithi dí nindxu̱ún skágunʼ ga̱jma̱a̱ ninduʼwajmiin. Mú dí niraʼwíí muni̱ cristianos niʼni dí muni̱ kawúmíjná. Dí mbiʼi xúgi̱ ma̱ngaa mbáa xa̱bu̱ muthi dí nindxu̱lú skágunʼ numuu dí nduʼyáá dí mbújkha̱a̱ xáʼni káwáánʼ ga̱jma̱a̱ dí tsékumulú kuʼñúún xa̱bu̱ bi̱ nuthi dí maʼngu̱u̱n muni̱ mbáníí xkujndu dí rígá náa numbaaʼ. Numuu dí nduʼyáá rí i̱ndó Reino ndrígóo Dios maʼngo̱o̱ maʼni gámbáa dí rígá náa numbaaʼ rígi̱, ga̱jma̱a̱ naguáʼthi̱i̱n “mbá xuajen rí niguma májánʼ”, “mbá xuajen rí ma̱ʼkha̱” xuajin rúʼko̱ nindxu̱u̱ Reino ndrígóo Dios (Heb. 11:10; Mat. 6:33).a Náa artículo rígi̱ mbuʼyáá tikhu consejos dí apóstol Pablo niʼnirámáʼ náa I̱yi̱i̱ʼ dí ni̱jkha̱ inún cristianos Hebreos. Náa mámbá consejo dí nixnún mbuʼyáá xú káʼnii nimbáñúún mu maguáʼthi̱i̱n “xuajin rí ma̱ʼkha̱”. Ga̱jma̱a̱ xú káʼnii niʼniratiin índo̱ gáguma gámbáa Jerusalén ma̱ngaa mbuʼyáá ndiéjunʼ eʼsngúlú dí mbiʼi xúgi̱.

GÁKUMULÚ KUʼYÁÁ JEOBÁ DÍ IKHAA NDITHÁAN XÁNIÑATIGÁANʼLÚ

4. Ndíjkha dí cristianos ndiyáá dí gíʼdoo numuu xuajin Jerusalén rá.

⁴ Cristianos ndiyáá dí gíʼdoo wéñuuʼ numuu Jerusalén numuu dí ikhí nigi̱ʼi̱ timbá congregación nákhá tsiguʼ 33, ma̱ngaa ikhí kúwá cuerpo gobernante ga̱jma̱a̱ mbaʼin guáʼdáá guʼwún ikhí. Mú Jesús niʼthúún xa̱bi̱i̱ dí mbaʼyóoʼ magajnún náa Jerusalén ga̱jma̱a̱ náa Judea (Mat. 24:16).

5. Ndiéjunʼ niʼni Pablo mu mámbáñún cristianos makuwá xawii rá.

⁵ Pablo nindoo mambáñún cristianos mu makuwá xawii magajníín náa Jerusalén, ikha jngóo nimbáñún makru̱ʼu̱u̱n ndiéjunʼ eʼthí Jeobá ga̱jma̱a̱ numuu xuajin rúʼko̱. Guʼwá náa nduyamajkuíí, ndxajkun ga̱jma̱a̱ náa nuxnajxi̱ tsigijñaʼ nánguá nindxu̱u̱ mitsúʼkháan (Heb. 8:13). Ma̱ngaa mbaʼin bi̱ kúwá náa Jerusalén túnimbu̱ún dí Jesús nindxu̱u̱ Mesías. Ikha jngóo templo dí rígá náa Jerusalén ni xánindxu̱u̱ guʼwá náa nduyamajkuíí Dios ga̱jma̱a̱ maguma gámbáa (Luc. 13:​34, 35).

6. Ndíjkha dí májánʼ nindxu̱u̱ consejo dí Pablo nixnún cristianos náa Hebreos 13:​5, 6 rá.

⁶ Índo̱ Pablo niʼnirámáʼ náa inún Hebreos, mbaʼin xa̱bu̱ kúwá gagi náa Jerusalén ga̱jma̱a̱ mbaʼin nanigu̱u̱nʼ magún ikhí. Plinio mbáa xa̱bu̱ romano niʼnirámáʼ dí Jerusalén nindxu̱u̱ xuajin dí itháan najmaʼnuuʼ (Historia Natural, libro V, dí niʼtájuíi Gerónimo de Huerta). Mámbá tsiguʼ mbaʼin judíos bi̱ kúwá náa mbaʼa xuajin nagún náa Jerusalén mu muniriya̱a̱ʼ ndxa̱a̱, rúʼko̱ naʼni dí marigá wéñuuʼ mbújkha̱a̱ ga̱jma̱a̱ numuu rígi̱ mbaʼin cristianos mbáa nidaaʼ mba̱a̱ mbújkha̱a̱. Mbáa ikha jngóo Pablo niʼthúún: “Gusngajmá rí tséyala ku̱ya̱a̱ mbújkha̱a̱ ga̱jma̱a̱ gakuwáanʼ gagi ga̱jma̱a̱ rí kuaʼdáá”, nda̱wa̱á niʼni marmáʼáan a̱jkiu̱ún mbá dí mínaaʼ má Jeobá nikudaminaʼ: “Nditháan xániʼñáánʼ ga̱jma̱a̱ nimbá miʼtsu xániʼñátíga̱a̱n” (atraxnuu Hebreos 13:​5, 6; Deut. 31:6; Sal. 118:6). Cristianos mbaʼyóoʼ marmáʼáan a̱jkiu̱ún dí Jeobá nditháan xániñati̱gi̱i̱nʼ, numuu dí mbaʼyóoʼ muniña̱a̱ʼ guʼwún, náa nuñajunʼ, dí guáʼdáá, mu magún gakuwá i̱mba̱ níʼkhá, ga̱jma̱a̱ rígi̱ maʼniún mingíjyúuʼ muni̱.

7. Náá numuu dí asndu nákha xúgi̱ gíʼmaa makumulú kuʼyáá Jeobá rá.

⁷ Dí naʼsngúlú mbiʼi xúgi̱: Xó má cristianos nákha timbá siglo, ndayóoʼ makuwáanʼ xawii ga̱jma̱a̱ muʼniratamijná (Luc. 21:​34-36). Numuu dí inuu má magi̱ʼdu̱u̱ mbá ga̱ʼkhu̱ rí majphú mba̱a̱, dí maʼni gámbáa numbaaʼ náa naʼtáñajunʼ Gixa̱a̱ (Mat. 24:21). Índo̱ gákuwáanʼ náa mbiʼi rúʼko̱ mbáa mbaʼyóoʼ muniʼñááʼ tikhu o asndu mbá xúgíʼ dí kuaʼdáá, mú ikháánʼ makumulú kuʼyáá Jeobá dí ikhaa nditháan xániñulú. Maski ajndu xúgi̱ xóó tségi̱ʼdu̱u̱ ga̱ʼkhu̱ rí majphú mba̱a̱, ma̱ndoo musngajmá dí nakumulú kuʼyáá Jeobá. Gurajximijnalú: “Lá dí na̱ni̱, ga̱jma̱a̱ dí naraʼwíí ma̱ni̱ nasngájma dí naku̱mu̱ʼ ka̱yo̱o̱ Jeobá dí ikhaa má gáñe̱wu̱nʼ ga̱jma̱a̱ na̱nguá eʼyáʼ magúʼdoo wéñuuʼ mbújkha̱a̱ ráʼ.” (1 Tim. 6:17.) Xkridún cristianos bi̱ nikúwá nákhá wajyúuʼ ma̱ndoo mambáyulú muguajún jmbu índo̱ gákuwáánʼ náa ga̱ʼkhu̱ rí majphú mba̱a̱. Mú, mani̱ndxu̱u̱ itháan gakhi̱i̱ ki xóo dí niraʼníí cristianos bi̱ nikúwá nákha timbá siglo. Ikha jngóo, xú káʼnii gúʼyáá ndiéjunʼ gúʼni rá.

GUʼNIMBULÚʼ KUʼÑÚÚN BI̱ NUXNULÚʼ IKHA

8. Ndiéjunʼ niʼthí Jesús dí gíʼmaa muni̱ xa̱bi̱i̱ rá.

⁸ Nguáthá tsiguʼ nda̱wa̱á dí Pablo niʼnirámáʼ inún hebreos, soldados romanos niruguama̱ʼa̱n Jerusalén. Índo̱ nirígá rígi̱ cristianos ndiyáá dí nijkha̱nú má mbiʼi dí magajníín náa Jerusalén numuu dí maguma gámbáa (Mat. 24:3; Luc. 21:​20, 24). Mú náá gágún xá. Jesús i̱ndó niʼthí: “Bi̱ kúwá náa Judea gagañútuʼún náa kúbá” (Luc. 21:21). Mú náa jmbaaʼ rúʼko̱ rígá mbaʼa kúbá, ikha jngóo xú kaʼnii gúyáá náá kúbá gágún xá.

9. Náá numuu rí cristianos ma̱ndoo murajximíjna̱ náá gágún rá. (Atayáá ma̱ngaa mapa.)

⁹ Cristianos bi̱ nikúwá nákha ikhú mbaʼa náa ma̱ndoo magún, xóo náa kúbá dí rígá náa Samaria, kúbá dí rígá náa Galilea, kúbá Hermón ga̱jma̱a̱ kúbá dí rígá náa Líbano ma̱ngaa kúbá dí rígá náa i̱mba̱ ridoo mañu Jordán (atayáá mapa). Náa mbaʼa kúbá rúʼko̱ rígá xuajin náa xa̱bu̱ nakumu̱ún dí ndaa gamíi. Mbá dí ikhaa nindxu̱u̱ Gamala, mbá xuajin dí naguanúu asndu inuu kúbá, naʼni gakhi̱i̱ mi̱dxu̱ʼnú ikhí. Tikhuun judíos nikumu̱ún dí ma̱ndoo muni̱ kawúmíjná ikhí, mú romanos nitu̱ʼu̱u̱n ga̱jma̱a̱ nini gámbáa Gamala ma̱ngaa niradíin mbaʼin bi̱ kúwá ikhí.b

10, 11. a) Ndiéjunʼ niʼni Jeobá mu maxnúu ikha xuajñuu rá. (Hebreos 13:​7, 17.) b) Ndiéjunʼ niguáʼníí bi̱ ninimbu̱ún rá. (Atayáá ma̱ngaa xtiʼkhuu.)

¹⁰ Xú káʼnii ndiyáá cristianos náá gágún rá. Mbáa Jeobá nijmiuu bi̱ nuyégún edxu̱u̱ náa congregación mu maxnún ikha. Nguáthá mba̱yu̱u̱ʼ nda̱wa̱á Eusebio bi̱ naʼthí dí nirígá nákha wajyúuʼ niʼthí dí Dios nisngájmúún tikhuun a̱ngiu̱lú bi̱ kúwá náa Jerusalén dí cristianos mbaʼyóoʼ magajnún náa Jerusalén ga̱jma̱a̱ magún náa Pella, mbá xuajin dí rígá náa mbayuuʼ Perea (Historia eclesiástica, tomo I, dí niʼtájuíi George Grayling). Pella o Pela ninindxu̱u̱ mbá májánʼ xuajin náa cristianos ma̱ndoo magún numuu dí na̱nguá eguanúu mitsínguánʼ náa Jerusalén. Ikha jngóo xáʼniún gakhi̱i̱ magún ikhí, ma̱ngaa mbaʼin bi̱ kúwá náa xuajin rúʼko̱ na̱nguá nindxu̱ún judíos. Ikha jngóo na̱nguá eyáʼ magi̱ʼdu̱u̱n gajmiún romanos (atayáá mapa).

¹¹ Pablo niʼnirámáʼ inún cristianos: “Gunimbala ku̱ñu̱u̱n [...] bi̱ nuxna ikhala” (atraxnuu Hebreos 13:​7, 17). Bi̱ ninimbu̱ún consejo rígi̱ nigáñún nigún náa kúbá ga̱jma̱a̱ nini̱ kawúmíjná. Jeobá nditháan tániñati̱gi̱i̱n numuu dí ikhiin ninimbu̱ún kuyáá Reino ndrígóo Dios rí nindxu̱u̱ “xuajen rí niguma májánʼ” (Heb. 11:10).

12, 13. Ndiéjunʼ niʼni Jeobá mu maxnúlú ikha náa mbiʼi dí itháan mingíjyúuʼ rá.

¹² Dí naʼsngúlú dí mbiʼi xúgi̱: Jeobá najmiuu bi̱ nuyégún edxu̱u̱ mu maʼthúlú mbájmbu ndiéjunʼ gíʼmaa muʼni. Náa Biblia rígá mbaʼa xkri̱da náa nasngájma xú káʼnii Jeobá nijmiuu xa̱bu̱ bi̱ niguájun jmbu mu maxnún ikha xuajñuu índo̱ nikúwá náa mbiʼi mingíjyúuʼ (Deut. 31:23; Sal. 77:20). Dí mbiʼi xúgi̱ nduʼyáá kaʼwu dí Jeobá najmiuu bi̱ nuyégún edxu̱u̱ mu majxnúlú ikha.

¹³ Índo̱ nigi̱ʼdu̱u̱ nandii COVID-19, bi̱ nuyégún edxu̱u̱ nixnulu ikha dí ndayúlú. Ancianos nikhánún ikha mu mbuyáá ndiéjunʼ gúni̱ bi̱ kúwá náa congregación mu magimbíin ga̱jma̱a̱ mbuyamajkuíí má xúʼko̱ Jeobá. Nguáthá igu̱nʼ nda̱wa̱á dí nigi̱ʼdu̱u̱ pandemia, niguaʼdáá asamblea regional náa itháan rí 500 ajngáa. A̱ngiu̱lú nindoo ndiyáá asamblea náa Internet, náa televisión asndu nidxawíín náa radio, nimbá míʼtsú tárígá asamblea xóo rígi̱. Índo̱ nikuwáánʼlú náa pandemia nikhánúlú má xúʼko̱ ikha dí na̱ʼkha̱ náa Jeobá. Ga̱jma̱a̱ numuu rígi̱ nindoo nikuwáánʼlú mbá kambájxulú. Tséʼniuu má dí gárígá nda̱wa̱á, nduʼyáá gajkhun dí ma̱ndoo makumulú kuʼyáá Jeobá, dí maxnún ikha bi̱ kuya̱ edxu̱u̱ mu muraʼwíí májánʼ dí muni̱. Ndayóoʼ dí makumulú kuʼyáá Jeobá ga̱jma̱a̱ muʼnimbulú ikha dí gáxnulú. Xú kaʼnii gúʼni ratamíjná mu mbuʼyáá ndiéjunʼ gúʼni índo̱ gakuwáanʼlu náa ga̱ʼkhu̱ rí majphú mba̱a̱ rá.

GAʼNDULÚʼ KUʼYAMIJNÁ GA̱JMA̱A̱ GUNDRÍGÚUN MÁJÁNʼ EʼWÍINʼ

14. Xó ma eʼthí náa Hebreos 13:​1-3, ndiéjunʼ dí ndiyóoʼ musngajma cristianos índo̱ nijkha ratumuu mbiʼi dí mambáa Jerusalén rá.

¹⁴ Índo̱ gági̱ʼdu̱u̱ ga̱ʼkhu̱ dí majphú mba̱a̱, mbaʼyóoʼ maʼndulú kuʼyamijná itháan, mbuʼyaridúún cristianos bi̱ nikúwá náa Jerusalén ga̱jma̱a̱ náa Judea. Ikhiin nisngajma dí nandún kuyamíjna̱ (Heb. 10:​32-34). Mú índo̱ nijkha ratumuu mbiʼi dí mambáa Jerusalén ndiyóoʼ musngajmá itháan dí nandún kuyamijná ga̱jma̱a̱ dí nundriguíin májánʼ eʼwíinʼ (atraxnuu Hebreos 13:​1-3).c Xúʼko̱ má mbaʼyóoʼ muʼni mangáánʼ índo̱ gákuwáanʼ náa ga̱ʼkhu̱ rí majphú mba̱a̱.

15. Ndíjkha ndiyóoʼ dí cristianos hebreos musngajma dí nandún kuñún eʼwíinʼ ga̱jma̱a̱ dí mundriguíin májánʼ xá.

¹⁵ Índo̱ soldados romanos niruguama̱ʼa̱n Jerusalén ga̱jma̱a̱ nda̱wa̱á niguáan, ikhú cristianos ndiyóoʼ magajnún mbá nacha̱. Mú i̱ndó ma̱ndoo mudégún káaʼ tikhuu dí guáʼdáá (Mat. 24:​17, 18). Ndiyóoʼ mumbayumíjná kaníkhíín índo̱ nigún náa kúbá. Ga̱jma̱a̱ índo̱ niguánú náa Pella ndiyóoʼ mumbayumíjná mu muxkamaa náá ma̱ndoo maguanún ga̱jma̱a̱ náá muñajunʼ. Mbaʼin a̱ngiu̱lú ndiyóoʼ maguáʼdáá ganitsu, xtíin ga̱jma̱a̱ náa ma̱ndoo makuwá. Índo̱ nimbayúmíjná, nixná dí guáʼdáá, ikhiin nisngajma dí nandún kuyamijná ga̱jma̱a̱ dí nundriguíin májánʼ eʼwíinʼ (Tito 3:14).

16. Xú káʼnii gándoo gúsngajmún a̱ngiu̱lú dí nandulúʼ kuʼñúún rá. (Atayáá ma̱ngaa xtiʼkhuu.)

¹⁶ Dí naʼsngúlú dí mbiʼi xúgi̱: Numuu dí nandulúʼ kuʼñúún a̱ngiu̱lú ikha jngóo numbáñún índo̱ nda̱ñúunʼ. Mbaʼin a̱ngiu̱lú nuxnajximíjna mumbañún a̱ngiu̱lú bi̱ nagájnún náa xuajñún numuu dí narígá guerra ga̱jma̱a̱ gamiéjunʼ, ikhiin nuxnún dí nda̱ñúunʼ mu makuwá, ma̱ngaa nuxnún tsiaki̱i̱ mu xúniña̱a̱nʼ runi̱ ñajuunʼ Jeobá. Mbáa ndxájulú bi̱ nigájnuu náa Ucrania ga̱jma̱a̱ numuu dí narígá guerra, niʼthí: “Ndi̱ya̱xu̱ xóo Jeobá najmiuu a̱ngiu̱lú mu maxnúxu̱ ikha ga̱jma̱a̱ mu mañewu̱nxu̱. Ra̱ʼkhá tháan májánʼ nindriguáanʼxu ga̱jma̱a̱ nimbayúxu̱ wéñuuʼ náa Ucrania, Hungría..., ¡ga̱jma̱a̱ xúgi̱ dí kuwáanʼxu náa Alemania!”. Nuñajunʼ mbóó gajmiúlú Jeobá índo̱ nundriguíin májánʼ a̱ngiu̱lú ga̱jma̱a̱ nuxnún rí nda̱ñúunʼ (Prov. 19:17; 2 Cor. 1:​3, 4).

17. Ndíjkha gíʼdoo numuu rí asndu nákha xúgi̱ musngajmá dí nandulúʼ kuʼñúún ga̱jma̱a̱ dí nundriguíin májánʼ a̱ngiu̱lú rá.

¹⁷ Índo̱ gákuwáanʼ náa ga̱ʼkhu̱ rí majphú mba̱a̱, mbaʼyóoʼ mumbáʼyumíjná kaníkháánʼ itháán ki xóo rí nuʼni xúgi̱ (Hab. 3:​16-18). Ikha jngóo Jeobá naʼsngúlú dí maʼndulú kuʼyamíjná ga̱jma̱a̱ dí mundríguíin májánʼ eʼwíinʼ. Ra̱ʼkhá tháan magiʼdoo numuu dí manindxu̱lú xígi̱ kaʼnii índo̱ gákuwáanʼ náa ga̱ʼkhu̱ rí majphú mba̱a̱.

NDIÉJUNʼ GÁRÍGÁ RÁ.

18. Xú káʼnii gándoo gúʼyaridúún cristianos hebreos rá.

¹⁸ Cristianos bi̱ ninimbu̱ún ga̱jma̱a̱ bi̱ nigáñún nigún náa kúbá, nikáwíin índo̱ Jerusalén niguma gámbáa, ikhiin niniña̱a̱nʼ xuajin mú Jeobá na̱nguá niniñati̱gi̱i̱n. Xú káʼnii gúʼyaridúún xá. Mangáanʼ na̱nguá eʼyáá májánʼ ndiéjunʼ phú gárígá nda̱wa̱á, mú Jesús niʼthúlú dí gíʼmaa makuwáanʼ xawii muʼnimbulú (Luc. 12:40). Ma̱ngaa kuáʼdáá i̱yi̱i̱ʼ dí niʼnirámáʼ Pablo dí nambáyulú asndu rí mbiʼi xúgi̱. Ga̱jma̱a̱ mínaaʼ má Jeobá nikudaminaʼ dí nditháan xániñatigáanʼlú (Heb. 13:​5, 6). Ikha jngóo xúniʼñáánʼ ruguáʼthi̱i̱n Reino ndrígóo Dios rí nindxu̱u̱ xuajin dí marigá má xúʼko̱. Á mu nuʼni rígi̱ maguma tsajkurámáánʼlú asndu kámuu (Mat. 25:34).