Gajmañulú má xúʼko̱ náa kiʼsngáa dí nijmañulúʼ ginii

1. Xú káʼnii niku̱ma̱a̱ʼ ikháán índo̱ nijmañaaʼ rí gajkhun rá.

RÍ NIJMAÑULÚ nákha niguáʼdii niʼniga̱jma̱a̱ Biblia niriʼkhu̱u̱ xóo kuwáánʼlú. Índo̱ nijmañulúʼ dí Dios mbiʼyuu Jeobá rúʼko̱ nindxu̱u̱ timbá dí niʼni mu mambaxúlúʼ gajmiúlú ikhaa (Is. 42:8). Niʼni̱i̱ a̱jkiu̱lú índo̱ nijmañulúʼ dí bi̱ nikháñún nánguá eyáá kayuuʼ (Ecl. 9:10). Ga̱jma̱a̱ índo̱ nijmañulúʼ dí Dios nikudaminaʼ maʼni̱i̱ mitsaanʼ Ku̱ba̱ʼ, rúʼko̱ niʼni dí ní xáxmiéjunlú dí gárígá nda̱wa̱á, numuu dí nijmañulúʼ dí xákuwáanʼ kááʼ 70 o 80 tsiguʼ, ma̱ndoo makuwáanʼ asndu kámuu (Sal. 37:29; 90:10).

2. Ndíjkha ndiyóoʼ marmáʼáan a̱jkiu̱ún cristianos bi̱ mba̱yu̱u̱ʼ má kúwá runi̱ ñajuunʼ Jeobá dí nijmañún nákhá niguáʼdi̱i̱ ninigajma̱a̱ rá. (2 Pedro 1:​12, 13.)

² Maski ajndu mba̱yu̱u̱ʼ má kuwáánʼlú ru̱ʼni̱ ñajuunʼ Jeobá, xámbumulú rí gíʼdoo wéñuuʼ numuu rí niguáʼdi̱i̱ nijmañulúʼ índo̱ niʼniga̱jma̱a̱ Biblia. Apóstol Pedro niʼnirámáʼ dí maʼni raga̱jma̱ i̱yi̱i̱ʼ mu maʼga inún cristianos bi̱ kúwá má xúʼko̱ “náa gajkhun” (atraxnuu 2 Pedro 1:​12, 13). Nákhá ikhú nikúwá mbaʼin xa̱bu̱ náa congregación bi̱ niguáʼdi̱i̱ nisngáa rí minduwaʼ ga̱jma̱a̱ nini̱ xúgíʼ enii dí xkawiʼ (2 Ped. 2:​1-3). Ikha jngóo Pedro nindoo maxnún tsiaki̱i̱ a̱ngiu̱lú mu xáguma nduwiinʼ, niʼni marmáʼáan a̱jkiu̱ún xúgíʼ rí niguáʼdi̱i̱ nijmañún nákhá ginii mu mambáñún maguajún jmbu náa Jeobá.

3. Ndíjkha rí xúgiáanʼ ndayúlú mundxaʼwamíjna̱ má xúʼko̱ ga̱jma̱a̱ numuu kiʼsngáa dí nijmañulúʼ índo̱ niguáʼdi̱i̱ niʼnigajmaa Biblia rá.

³ Maski ajndu mba̱yu̱u̱ʼ má kuwáánʼ ru̱ʼni̱ ñajuunʼ Jeobá rígá xóó dí ma̱ndoo mambáyulú náa kiʼsngáa rí nijmañulúʼ índo̱ niguáʼdi̱i̱ niʼniga̱jma̱a̱ Biblia. Gundxaʼwamíjna̱ ga̱jma̱a̱ numuu mbáa wáxá ga̱jma̱a̱ ru̱dúu̱ bi̱ najmañuu má naʼni mújúunʼ ganitsu. Mbá nájmi̱i̱n ma̱ndoo majmúún ikha̱á rí najmaa mu maguma májáánʼ mbá ganitsu, mú numuu rí a̱ʼgú nikhi̱i̱ najmañuu naʼni mbaʼa enii ganitsu ndaʼyoo xóo gájmuu dí gíʼdoo mu maʼni mújúunʼ i̱ʼwáʼ ganitsu. Xúʼko̱ má kayuuʼ, bi̱ mba̱yu̱u̱ʼ má kúwá runi̱ ñajuunʼ Jeobá, ma̱ndoo majmañún i̱ʼwáʼ dí gíʼdoo numuu náa kiʼsngáa dí kúwá rajmañún ki xóo bi̱ ndiʼkúú kúwá runigajma̱a̱ Biblia. Ndíjkha rá. Numuu dí asndu nákhá nijngúúnʼ iyááʼ, mbáa nixtiʼkhu̱u̱ xóo kúwá o niguáʼdáá i̱ʼwáʼ ñajunʼ náa xuajñuu Jeobá. Índo̱ nundxaʼwamíjna̱ ga̱jma̱a̱ numuu rí nijmañulúʼ nákhá niguáʼdi̱i̱ niʼnigajmaa na̱jkua̱ ruʼyáá xóo gándoo gámbáyulú dí mbiʼi xúgi̱. Náa artículo rígi̱ mbuʼyáá ndiéjunʼ imbo̱o̱ ma̱ndoo majmañulú náa ajtsú kiʼsngáa dí nijmañulúʼ nákhá niguáʼdi̱i̱ niʼnigajmaa Biblia maski ajndu kuwáánʼ má mba̱yu̱u̱ʼ ru̱ʼni̱ ñajuunʼ Jeobá.

JEOBÁ NINDXU̱U̱ BI̱ NIʼNIÁANʼLÚ

4. Xú káʼnii niriʼkhu̱u̱ dí kuwáánʼlú índo̱ ndiʼyáá rí Jeobá nindxu̱u̱ bi̱ niʼniáánʼlú rá.

⁴ Hebreos 3:4 naʼthí: “Bi̱ niʼni xúgíʼ dí rígá nindxu̱u̱ Dios”. Nduʼyáá dí bi̱ niʼni Ku̱ba̱ʼ ga̱jma̱a̱ xúgíʼ dí rígá ikhí najmañuu wéñuuʼ ga̱jma̱a̱ gíʼdoo tsiaki̱i̱. Mú rígá i̱ʼwáʼ dí ma̱ndoo majmañulúʼ, numuu rí Jeobá niʼniáanʼlú ndaʼyoo xúgíʼ ga̱jma̱a̱ numulúʼ ma̱ngaa naxmiéjuunʼ kaʼyulú, ndaʼyoo ndiéjunʼ rí itháan mambáyulú. Índo̱ nijkhua̱nú ndiʼyáá dí Jeobá nindxu̱u̱ bi̱ niʼniáánʼ niʼni mbuʼyáá dí gíʼdoo numuu rí kuwáánʼ.

5. Ndiéjunʼ eʼsngúlú dí Jeobá nindxu̱u̱ bi̱ niʼniáanʼlú rá. (Isaías 45:​9-12.)

⁵ Rí mbuʼyáá dí Jeobá niʼniáánʼlú naʼsngúlú dí gíʼmaa manindxu̱lú xa̱bu̱ guabaaʼ. Gundxaʼwamíjna̱ ga̱jma̱a̱ numuu Job. Nda̱wa̱á dí ikhaa i̱ndó nindxa̱ʼwáminaʼ ga̱jma̱a̱ numuu ikhaa ma̱ngaa niʼthí dí raʼkhí ga̱jma̱a̱ numuu Jeobá. Mú Jeobá niʼni marmáʼáan a̱jkiu̱u̱n dí ikhaa nindxu̱u̱ bi̱ niʼniwíi dí rígá ga̱jma̱a̱ bi̱ gíʼdoo xúgíʼ tsiaki̱i̱ (Job 38:​1-4). Rígi̱ nimbáyúu Job, mu mbaʼyoo dí xúgíʼ dí naʼni Jeobá nindxu̱u̱ májánʼ ga̱jma̱a̱ jmbu. Nda̱wa̱á profeta Isaías niʼthí rí xa̱bu̱ ragíʼmaa mundxaʼwamíjná dí itháán najmañún ikhiin ki xóo bi̱ niʼniwíin (atraxnuu Isaías 45:​9-12).

6. Ndiéjunʼ gámbáyulú dí mundxaʼwamíjna̱ dí bi̱ niʼniáanʼlú gíʼdoo xúgíʼ tsiaki̱i̱ rá. (Atayáá ma̱ngaa xtiʼkhuu.)

⁶ Índo̱ mba̱yu̱u̱ʼ má kuwáanʼ ru̱ʼni̱ ñajuunʼ Jeobá gamíi dí i̱ndó makumulú kuʼyamijná ikháanʼ ki xóo rí mbuʼyáá ndiéjunʼ endxa̱ʼwáminaʼ Jeobá ga̱jma̱a̱ dí naʼthí náa Ajngá rawuunʼ (Job 37:​23, 24). Mu xágíʼnulú xúʼko̱ kaʼnii, gíʼmaa muríyaʼ mbiʼi mu mundxaʼwamíjna̱ xúgíʼ rí najmañuu bi̱ Niʼniáanʼlú ga̱jma̱a̱ xúgíʼ tsiaki̱i̱ dí gíʼdoo (Is. 40:22; 55:​8, 9). Rígi̱ mambáyúlú mu manindxu̱lú xa̱bu̱ guabáanʼ ga̱jma̱a̱ marmáʼáan a̱jkiu̱lú dí xóo nandxa̱ʼwáminaʼ Jeobá gíʼdoo itháan numuu ki xóo rí nundxaʼwamíjnalú ikháanʼ.

7. Ndiéjunʼ nimbáyúu Rahela mu maʼnimbo̱o̱ mbá rí nixtiʼkhu̱u̱ náa xuajñuu Dios rá.

⁷ Rí nimbáyúu ndxájulú Rahela bi̱ xtáa náa Eslovenia mu maʼnimbo̱o̱ mbá dí niraʼwíí maʼni xuajñuu Jeobá, nindxu̱u̱ rí mandxaʼwaminaʼ rí Jeobá niʼniáanʼlú. Ikha naʼthí: “Naʼniuʼ gakhi̱i̱ maʼnimbo̱ʼ dí nuraʼwi̱i̱ muni̱ bi̱ nuyégún edxu̱u̱. Xóo índo̱ ndi̱yo̱o̱ video Rí itháán nuxi̱ rí naríyáʼ Cuerpo Gobernante tsiguʼ 2023, número 8, nijuiʼthá dí xa̱bekha ma̱ndoo muniña̱a̱ʼ mbaʼya stawúúnʼ, mú timbá míʼtsú dí ikhúún ndi̱yo̱o̱ mbáa ndxájulú xúʼko̱, niʼniuʼ tsiánguá. Ikha jngóo nitakáñuu Jeobá mu mambáyuʼ makro̱ʼo̱ʼ náá numuu dí a̱ngiu̱lú niraʼwi̱i̱ muni̱ rígi̱”. Rahela ni̱jkha̱nú ndiʼyoo dí bi̱ niʼni mekhu ga̱jma̱a̱ Ku̱ba̱ʼ najmañuu naxnúu ikha xuajñuu. Á mu ikháán mangáánʼ naʼniaaʼ gakhi̱i̱ matatsi̱mba̱a̱ʼ mbá dí nixtiʼkhu̱u̱ o matanimbáníí mbá ikha nuxi̱ʼ dí nakánulú, atríya̱ʼ mbiʼi mu matatsaʼwamínáʼ ga̱jma̱a̱ numuu bi̱ Niʼniáanʼlú, ikhaa ra̱ʼkhá tháán ejmañuu ga̱jma̱a̱ gíʼdoo tsiaki̱i̱ (Rom. 11:​33-36).

NÁÁ NUMUU RÍ DIOS NANIÑUUʼ RÍ MUMÍNIIʼ RÁ.

8. Xú káʼnii embáyulú índo̱ nduʼyáá dí Dios tséʼni dí mumíniiʼ rá.

⁸ Mbaʼin xa̱bu̱ tséyáá náá numuu rí Dios naniñuuʼ rí mumíniiʼ. Ikha jngóo nakiʼníin kuyáá o nánguá enimbu̱u̱n rí xtáa Dios (Prov. 19:3). Mú ikháanʼlú nijmañulúʼ dí numíníiʼ ga̱jma̱a̱ nakháñulú numuu rí nindxu̱lú xa̱bu̱ aʼkhá, raʼkháa ga̱jma̱a̱ numuu aʼkhúun Jeobá. Ma̱ngaa nijmañulúʼ dí Jeobá ra̱ʼkhá tháán naʼngo̱o̱ a̱jkiu̱u̱n. Ikha jngóo xóó tséʼni gámbáa dí naʼni mumíniiʼ, ga̱jma̱a̱ numuu rígi̱ mbaʼin xa̱bu̱ niguánú niniʼniiʼ, ga̱jma̱a̱ nijmañún ndiéjunʼ gáʼni mu maʼni gámbáa dí naʼni mumíniiʼ (2 Ped. 3:​9, 15). Rígi̱ niʼni̱i̱ a̱jkiu̱lú ga̱jma̱a̱ niʼni rí mu̱ʼgua̱ kanuu itháan náa ikhaa.

9. Nguáná ndayóoʼ marmáʼáan a̱jkiu̱lú náá numuu rí Jeobá naniñuuʼ rí mumíniiʼ rá.

⁹ Ndayóoʼ maʼngo̱o̱ a̱jkiu̱lú muguaʼthi̱i̱n asndu índo̱ Jeobá gáʼni gámbáa dí numíniiʼ. Mú índo̱ nuguaʼdáá mbá xkujndu, nuniu̱lú mbá dí ra̱májánʼ o nakháñuu mbáa bi̱ nandulú kuʼyáá, mbáa naʼni murajximíjnalú náá numuu dí Jeobá tséʼnimbánuu dí nikudaminaʼ maʼni (Hab. 1:​2, 3). Índo̱ gákuwáánʼ xígi̱ kaʼnii, mbáa májánʼ gáʼni dí marmáʼáan a̱jkiu̱lú náá numuu rí Jeobá naniñuuʼ dí xa̱bu̱ míjíinʼ muraʼníí dí ra̱májánʼ (Sal. 34:19).a Ma̱ngaa ma̱ndoo mundxaʼwamíjná májánʼ rí ikhaa nikudaminaʼ maʼni gámbáa dí naʼni mumíniiʼ asndu kámuu.

10. Ndiéjunʼ nimbáyúu Anne mu xáxtáa wéñuuʼ ngíná ga̱jma̱a̱ numuu dí nikháñúu ru̱dúu̱ rá.

¹⁰ Índo̱ nduʼyáá náá numuu rí Jeobá naniñuuʼ rí mumíníiʼlú nambáyulú mu maʼngulú muraʼníí gamiéjunʼ. Anne, mbáa ndxájulú bi̱ xtáa náa isla ndrígóo Mayotte, dí gíʼ náa océano Índico, naʼthí: “Niʼni má nguáthá tsiguʼ dí ru̱dúʼ nikháñúu, ra̱ʼkhá tháán nixtáá ngíná. Mú ni̱ni̱ marmáʼán a̱jkiu̱nʼ má xúʼko̱ dí raʼkháa Jeobá eʼni mamínuuʼ. Ikhaa nandoo maʼni gámbáa mbá xúgíʼ tsíginá ga̱jma̱a̱ maʼni ga̱bi̱ín bi̱ nikháñún. Índo̱ nandxa̱ʼwáminaʼ ga̱jma̱a̱ numuu rígi̱, naʼni̱i̱ a̱jkiu̱nʼ ga̱jma̱a̱ naxnáaʼ tsiaki̱i̱”.

11. Náá numuu dí Jeobá naniñuuʼ dí mumíniiʼ, ga̱jma̱a̱ xú káʼnii gambáyúlú rúʼko̱ mu xúniʼñáánʼ ruʼtáraʼa rá.

¹¹ Rí nduʼyáá náá numuu rí Jeobá naniñuuʼ mumíníiʼlú naxkajxáánʼ muʼtáráʼa má xúʼko̱. Nda̱wa̱á dí Pedro niʼthí dí xa̱bu̱ ma̱ndoo makáwíin ga̱jma̱a̱ numuu dí Jeobá naʼngo̱o̱ a̱jkiu̱u̱n ikhaa niʼthí xóó: “¡Gundxaʼwa̱míjna̱ xú káʼnii xa̱bu̱ gíʼmaa manindxa̱la! Gíʼmaa manindxu̱u̱ kaʼwu rí gúnila ga̱jma̱a̱ rí maxnúu gamajkhu Dios” (2 Ped. 3:11). Dí muʼtáraʼa nindxu̱u̱ mbá rí ‹naxnúu gamajkhu Dios›. Ikhaa má xóo Anu̱lú nandulúʼ kuʼñúún xa̱bu̱ ga̱jma̱a̱ dí makuwá náa numbaaʼ nuxi̱ʼ. Numuu rí Jeobá naʼngo̱o̱ a̱jkiu̱u̱n, naniñuuʼ dí xa̱bu̱ bi̱ kúwá náa nuʼtáraʼa muniʼniiʼ ga̱jma̱a̱ mbuyamajkuíí. Ra̱ʼkhá tháán mitsaanʼ ñajunʼ nikhánulú rí mumbáyíí Jeobá mu mbaʼin xa̱bu̱ muniʼniiʼ nákhá xóó tsértumuu mbiʼi (1 Cor. 3:9).

“KUWÁÁNʼLÚ NÁA IWÁÁ MBIʼI”

12. Xú káʼnii embáyulú dí mbuʼyáá dí nambánuu dí eʼthí náa Biblia ga̱jma̱a̱ numuu “iwáá mbiʼi” rá.

¹² Náa Biblia naʼthí kuduunʼ xú káʼnii gánindxu̱ún xa̱bu̱ náa “iwáá mbiʼi” (2 Tim. 3:​1-5). Nduʼyáá dí nambánuu profecía rígi̱ índo̱ nduʼyáá xóo nindxu̱ún xa̱bu̱ náa kuwáánʼlú ga̱jma̱a̱ índo̱ nduʼyáá rí xa̱bu̱ na̱jkha̱ ranindxu̱ún itháan ra̱míjíinʼ, rígi̱ naʼni makumulú kuʼyáá itháan Ajngá rawuunʼ Dios (2 Tim. 3:​13-15).

13. Ndiéjunʼ dí májánʼ murajximíjnalú rá. (Lucas 12:​15-21.)

¹³ Dí mbuʼyáá rí kuwáánʼlú náa “iwáá mbiʼi” nambáyulú mu majmulú májánʼ mbiʼi ndrígulú ga̱jma̱a̱ mbuʼyáá ndiéjunʼ dí itháán gíʼdoo numuu. Jesús niʼthí ga̱jma̱a̱ numuu rígi̱ índo̱ niʼthí xkri̱da dí nuxkamaalú náa Lucas 12:​15-21 (atraxnuu). Náá numuu niʼthí rí xa̱bu̱ bi̱ gíʼdoo nindxu̱u̱ “skágunʼ”. Numuu dí na̱nguá ndiyáaʼ dí itháan gíʼdoo numuu. I̱ndó nigujxi̱i̱ dí gíʼdoo numuu eʼyoo ikhaa, mú ngínáa náa iduu Dios. Ndíjkha ndiyóoʼ majmuu májánʼ mbiʼi ndrígóo xá. Dios niʼthúu̱n dí mbruʼun má rúʼko̱ makhañúu. Dí eʼsngúlú ikháanʼ rá. Nánguá má mba̱yu̱u̱ʼ ndayóoʼ mambáa dí rígá náa numbaaʼ rígi̱, ikha jngóo gíʼdoo numuu murajximíjnalú: “Lá dí naʼgíminaʼ ma̱ni̱ nasngájma dí nda̱yo̱o̱ ndiéjunʼ dí itháan gíʼdoo numuu ráʼ. Ndiéjunʼ ethu̱u̱n e̱ji̱nʼ dí mugímíjna̱ mu̱ni̱ rá. Lá najmuʼ tsiaki̱i̱ ndrígóʼ, mbiʼi ga̱jma̱a̱ dí gúʼdoo mu mbaʼyáʼ dí gíʼdoo numuu eyoo ikhúún o mu magujxíi dí gíʼdoo numuu mekhuíí dxe̱ʼ.”

14. Xú káʼnii embáyulú dí nigíʼnuu Miki mu mbuʼyáá dí gíʼdoo numuu marmáʼáan a̱jkiu̱lú dí kuwáánʼ náa iwáá mbiʼi rá.

¹⁴ Índo̱ nundxaʼwamíjna̱ rí kuwáánʼlú náa “iwáá mbiʼi” nambáyulú mbuʼyáá ndiéjunʼ rí itháán májánʼ dí ma̱ndoo mu̱ʼni̱. Rúʼko̱ dí nigíʼnuu Miki, mbáa ndxájulú a̱ʼgu̱. Ikhaa naʼthí: “Índo̱ niguámboʼ escueloʼ, ra̱ʼkhá tháán nindoʼ maʼgá universidad mu majmañuʼ ga̱jma̱a̱ numún xujkhúʼ, mú ma̱ngaa nindoʼ mani̱ndxu̱ʼ precursora regular ga̱jma̱a̱ maʼgá gátaraʼa náa ndayóoʼ. Mú tikhuun a̱ngiu̱lú bi̱ nikúwá náa congregación ndrígóʼ nithu̱nʼ dí mandxa̱ʼwa̱mínáʼ májánʼ á mu majmúún ma̱ni̱ xúgíʼ rí nandoʼ. Ni̱ni̱ marmáʼáan a̱jkiu̱nʼ dí inu mambáa xúgíʼ dí rígá náa numbaaʼ rígi̱, ga̱jma̱a̱ dí náa numbaaʼ nuxi̱ʼ magúʼdoo xúgíʼ mbiʼi mu majmañuʼ ga̱jma̱a̱ numuu asndu tsáá má xujkhúʼ. Ikha jngóo ndiʼyáʼ ma̱ni̱ mbá ñajunʼ dí maniñuʼ mani̱ndxu̱ʼ precursora regular ga̱jma̱a̱ itháan nda̱wa̱á ni̱jkhá náa Ecuador mu mataráʼa náa ndayóoʼ”. Rí mbiʼi xúgi̱ Miki ga̱jma̱a̱ ajmbio̱o̱ kúwá náa xuajin rúʼko̱ xóo superintendente de circuito.

15. Ndiéjunʼ eʼsngúlú xkri̱doo Santiago rá. (Atayáá ma̱ngaa xtiʼkhuu.)

¹⁵ Ragíʼmaa makanájkulú á mu xa̱bu̱ tsíñún gúdxawíín índo̱ nuʼtáraʼa. Garmáʼáan a̱jkiu̱lú dí ma̱ndoo muriʼkumijnáa nda̱wa̱á. Gundxaʼwamíjna̱ ga̱jma̱a̱ numuu Santiago, giʼtio skojo̱o̱ Jesús. Ikhaa ndiʼyoo xóo ni̱jkha̱ ra̱ja̱a̱ Jesús, xóo ni̱jkha̱nú ninindxu̱u̱ Mesías ga̱jma̱a̱ dí ndawa̱a̱ imba̱a̱ bi̱ niʼsngáa itháan májánʼ ki xóo ikhaa. Maski ajndu xúʼko̱ ninújngoo mba̱yu̱u̱ʼ tsiguʼ mu Santiago mani̱ndxu̱u̱ xa̱bi̱i̱ Jesús. Asndu nda̱wa̱á dí nigabi̱i̱ ndxájuu, Santiago nigiʼdoo fe náa ikhaa ga̱jma̱a̱ niʼni má xúʼko̱ ñajuunʼ Dios (Juan 7:5; Gál. 2:9).b Ikha jngóo, xákánájkulú á mu bi̱ kuʼñúún tsénigu̱u̱nʼ mudxawunlú ga̱jma̱a̱ xúniʼñáánʼ ruʼtárúʼúún bi̱ tsédxawíín índo̱ na̱jkua̱ náa guʼwún. Garmáʼáan a̱jkiu̱lú rí kuwáánʼlú náa iwáá mbiʼi, gíʼmaa muʼtáraʼa má xúʼko̱ numuu dí mbáa nda̱wa̱á xa̱bu̱ muraʼwi̱i̱ muni̱ ñajuunʼ Jeobá, mbáa ma̱ndoo marigá rígi̱ asndu nda̱wa̱á dí gági̱ʼdu̱u̱ ga̱ʼkhu̱ rí majphú mba̱a̱.c

XÚNIʼÑÁÁNʼ RUXNÁA NÚMA̱Aʼ JEOBÁ DÍ NAʼNI MARMÁʼÁAN A̱JKIU̱LÚ

16. Xóo embáyáaʼ ikháán dí Jeobá naʼni marmáʼáan a̱jkia̱a̱nʼ rá. (Atayáá ma̱ngaa kúgumaʼá “Gajmaaʼ mu matambáñún eʼwíinʼ”.)

¹⁶ Mbaʼa dí naguwíi xuajñuu Dios na̱jkha̱ inún xa̱bu̱ bi̱ tséjmañún wéñuuʼ ga̱jma̱a̱ numuu Biblia. Xóo discurso dí najuixná índo̱ naguámbáa semana, tikhuu artículos ga̱jma̱a̱ videos dí rígá náa jw.org, ga̱jma̱a̱ nagájnuu revistas dí na̱jkha̱ inún bi̱ na̱nguá nindxu̱ún Testigos. Mú mbá xúgiáanʼ nambáyulú dí na̱ʼkha̱ ikhí, numuu rí nambáyulú mu maʼndulú kuʼyáá itháan Jeobá, nakumulú kuʼyáá itháan Ajngá rawuunʼ ga̱jma̱a̱ nambáyulú muʼsngáa itháan májánʼ kiʼsngáa dí na̱ʼkha̱ náa Biblia (Sal. 19:7).

17. Nguáná ma̱ndoo mambáyulú rí nijmañulúʼ nákha niguáʼdi̱i̱ niʼniga̱jma̱a̱ Biblia rá.

¹⁷ Bi̱ kuwáánʼ má mba̱yu̱u̱ʼ ru̱ʼni̱ ñajuunʼ Jeobá nadxulú índo̱ nudxawíín dí narígá mbá dí nixtiʼkhu̱u̱ rí nuʼnimbulú. Maski ajndu xúʼko̱ nuxnáa núma̱aʼ ga̱jma̱a̱ numuu xúgíʼ dí nijmañulúʼ índo̱ niguáʼdi̱i̱ niʼniga̱jma̱a̱ Biblia ga̱jma̱a̱ marigá má xúʼko̱ dí majmañulú. Á mu nduʼyáálú dí naʼniulú gakhi̱i̱ muʼnimbulú mbá nuxi̱ʼ ikha rí nakánulú numuu rí i̱ndó nakumulú kuʼyamijná ikháanʼ o niguʼwunlú xó má nu̱ʼni̱ nákha ginii, gíʼmaa manindxu̱lú xa̱bu̱ guabaaʼ ga̱jma̱a̱ marmáʼáan a̱jkiu̱lú dí bi̱ nayéjkha̱ edxu̱u̱ náa xuajñuu Jeobá nindxu̱u̱ mínaaʼ má ikhaa, bi̱ Niʼniáanʼlú, bi̱ ra̱ʼkhá tháán ejmañuu ga̱jma̱a̱ bi̱ gíʼdoo tsiaki̱i̱. Índo̱ ikháánʼlú o mbáa bi̱ kuʼyáá namínúuʼ gaʼngo̱o̱ a̱jkiu̱lú ga̱jma̱a̱ gundxaʼwamíjna̱ náá numuu dí Jeobá naniñuuʼ rí mumíníiʼ, ma̱ngaa índo̱ gúraʼwíí xóo gájmulúʼ mbiʼi ndrígulú gármáʼáan a̱jkiu̱lú rí kuwáánʼlú náa iwáá mbiʼi ga̱jma̱a̱ dí inu má mambáa dí rígá náa numbaaʼ rígi̱. Xúniʼñáánʼ rajmañulúʼ náa rí Jeobá naʼni marmáʼáan a̱jkiu̱lú mu xúʼko̱ majmáán muraʼwíí májánʼ ga̱jma̱a̱ nditháan xúniʼñáánʼ ru̱ʼni̱ ñajuunʼ.