Lá nijmañaaʼ maraxtaa gagi ráʼ.

1. Ndiéjunʼ eyoo gáʼthúu̱n dí makuwáanʼ gagi ga̱jma̱a̱ rí kuáʼdáá, mú ndiéjunʼ dí na̱nguá eyoo gáʼthúún rá.

BI̱ NUXNÁA núma̱aʼ Jeobá ga̱jma̱a̱ numuu rí naxnún makuwá gagi ga̱jma̱a̱ rí kuáʼdáá ma̱ngaa nakúwá tsímáá. Ikhiin tsékiʼníi, ni má tséjmaa a̱jkiu̱ún ga̱jma̱a̱ numuu rí na̱nguá kuáʼdáá. Xú káʼnii ku̱ma̱a̱ʼ ikháánʼ rá. Dí makuwáanʼ gagi ga̱jma̱a̱ rí kuáʼdáá tsíyóo gáʼthí dí ragíʼmaa maxmiéjunlú ga̱jma̱a̱ numuu xóo kuwáanʼ. Mbá xkri̱da, ma̱ndoo muʼgímijná mu̱ʼni̱ itháan ñajuunʼ Jeobá (Rom. 12:1; 1 Tim. 3:1). Nakuwáánʼ gagi maski ajndu tsékhánulú mbá asignación o mbá ñajunʼ dí ikháanʼ nandulúʼ.

2. Ndíjkha dí gamíi dí xákuwáanʼ gagi ga̱jma̱a̱ rí kuáʼdáá rá.

² Á mu na̱nguá kuwáanʼ gagi ga̱jma̱a̱ dí kuáʼdáá, gamíi dí muraʼwíí mu̱ʼni̱ mbá dí raʼkhí. Mbá xkri̱da tikhuun nuñajunʼ gakhi̱i̱ mu mutsi rí na̱nguá má eñúu̱nʼ. Phú migíná dí tikhuun a̱ngiu̱lú nuni̱ kuʼwáʼ mbújkha̱a̱ o eʼwáʼ dí nanigúu̱nʼ, mbáa nindxa̱ʼwa̱míjna̱: “Kaʼyoʼ má magúʼdoo rígi̱”, “xáʼngo̱ʼ magúʼthu̱u̱n” o “maxnájxi̱i̱ má nda̱wa̱á mbújkha̱a̱”. Mú dí matani̱ kuʼwáʼ tsénigu̱u̱ʼ Jeobá, numuu dí naʼni gachúu mbiʼyuu (Prov. 30:9). Eʼwíinʼ najmáa a̱jkiu̱ún numuu dí tákhánún mbá ñajunʼ dí ikhiin nindúún dí asndu niguánu niniñaaʼ runi̱ ñajuunʼ Jeobá (Gál. 6:9). Náá numuu dí mbáa bi̱ nindxu̱u̱ xa̱bi̱i̱ Jeobá ma̱ndoo maʼga̱nú mandxa̱ʼwa̱mínáʼ xígi̱ kaʼnii rá. Mbáa ga̱jma̱a̱ numuu dí ikhaa nánguá xtáa gagi ga̱jma̱a̱ rí gíʼdoo.

3. Ndiéjunʼ eʼsngúlú dí naʼthí náa Filipenses 4:​11, 12 rá.

³ Mbáa maʼniulú mingíjyúuʼ makuwáanʼ gagi ga̱jma̱a̱ rí kuáʼdáá, mú nindxu̱u̱ dí ma̱ndoo majmañulú ga̱jma̱a̱ gíʼmaa majmañulú. Apóstol Pablo niʼthí: “Ikhúúnʼ nijmañuʼ maxtáá gagi tséʼniuu má xóo kaʼnii xtáá” (atraxnuu Filipenses 4:​11, 12). Índo̱ niʼnirámáʼ ajngáa rígi̱, ikhaa kraʼaa náa guʼwá e̱jua̱nʼ, mú tániñuuʼ raxtáaʼ gagi. Á mu ikháanʼ naʼniulú gakhi̱i̱ makuwáanʼ gagi ga̱jma̱a̱ rí kuáʼdáá, dí niʼthí Pablo ga̱jma̱a̱ xóo nixtáa naʼsngúlú dí ma̱ndoo makuwáanʼ gagi ga̱jma̱a̱ rí kuáʼdáá, mú ndayóo mu̱ʼni̱ tsiakimíjna̱. Xú káʼnii gúʼni rá. Náa artículo rígi̱ mbuʼyáá atsu enii dí mambáyulú.

GUXNÁA NÚMA̱Aʼ

4. Ndíjkha nakuwáanʼ gagi índo̱ naguʼwúnlú nuxnáa núma̱aʼ rá. (1 Tesalonicenses 5:18.)

⁴ Makuwáanʼ itháan gagi á mu naguʼwúnlú nuxnáa núma̱aʼ (atraxnuu 1 Tesalonicenses 5:18). Mbá xkri̱da á mu gajkhun nadxulú ga̱jma̱a̱ numuu dí kuáʼdáá, xundxa̱ʼwa̱míjna̱ wéñuuʼ ga̱jma̱a̱ numuu rí na̱nguá kuáʼdáá. Á mu nuxnáa núma̱aʼ Jeobá ga̱jma̱a̱ numuu ñajunʼ dí naxnúlú, mambáyulú mu mu̱ʼni̱ mbáníí ga̱jma̱a̱ xúgíʼ a̱jkiu̱lú, raʼkháa dí mundxa̱ʼwa̱míjna̱ ga̱jma̱a̱ numuu mbá asignación dí nanigulúʼ makhánulúʼ. Jeobá ndaʼyoo dí gíʼdoo wéñuuʼ numuu dí muxnáa núma̱aʼ, ikhaa jngóo náa Biblia naʼthúlú dí muxnáa núma̱aʼ índo̱ gúʼtájkáan, rígi̱ maʼni dí maguáʼdáá “tsímáá ndrígóo Dios dí rígá itháan ñuʼún rí nimbáa xa̱bu̱ numbaaʼ tséʼngo̱o̱ gíkro̱ʼo̱o̱” (Filip. 4:​6, 7).

5. Ndiéjunʼ niʼni Jeobá ga̱jma̱a̱ numún israelitas rá. (Atayáá ma̱ngaa xtiʼkhuu.)

⁵ Gundxa̱ʼwa̱míjna̱ ga̱jma̱a̱ numún israelitas, mbaʼa nuthu nixieʼkhá náa inuu Jeobá numuu dí ndiyáaʼ muphu ganitsu dí ni̱ʼphu̱ náa Egipto (Núm. 11:​4-6). Gajkhun má dí niʼniún gakhi̱i̱ makuwá náa ku̱ba̱ʼ mijxooʼ, mú ikhiin nikúwá itháan gagi á mu ninga̱ju̱u̱n xúgíʼ dí Jeobá niʼni ga̱jma̱a̱ numún. Ndiyóo marmáʼán a̱jkiu̱ún índo̱ Jeobá nikuʼma mbá guwáʼ gamiéjunʼ mu maʼni káwíin náa ñawúunʼ xa̱bu̱ egipcio bi̱ nixtumiin muñajunʼ ga̱jma̱a̱ bi̱ ra̱ʼkhá tháan nini ngíníi. Índo̱ nigájníin náa Egipto “nirawíi káñúnʼ xúgíʼ dí gíʼdoo numuu dí guáʼdáá bi̱ egipcio” xóo plata, oro ga̱jma̱a̱ xtiin (Éx. 12:​35, 36). Ma̱ngaa Jeobá nijmuu tsiaki̱i̱ ndrígóo mu mambáʼtoo lamáa maña̱ʼ, mu xúʼko̱ israelitas maguma káwíin náa ñawúunʼ soldados ndrígióo faraón. Ga̱jma̱a̱ índo̱ nikúwá ragún náa ku̱ba̱ʼ mijxooʼ, xúgíʼ mbiʼi nixnún maná mu mu̱phu̱. Náá numuu dí ikhiin tákúwá gagi xá. Numuu dí túxnáa núma̱aʼ ga̱jma̱a̱ rí kuáʼdáá raʼkháa ga̱jma̱a̱ numuu dí na̱nguá niguáʼdáá ganitsu.

6. Ndiéjunʼ gámbáyulú mu muxnáa núma̱aʼ rá.

⁶ Ndiéjunʼ gámbáyulú mu maguʼwunlú muxnáa núma̱aʼ rá. Timbá, guríya̱ʼ mbiʼi mu mundxa̱ʼwa̱míjna̱ ga̱jma̱a̱ numuu xúgíʼ rí májánʼ dí kuaʼdáálú, mbáa ma̱ndoo muʼnirámáʼ a̱jma̱ o ajtsú enii (Lam. 3:​22, 23). Raga̱jma̱, gaguʼwunlu muxniin núma̱aʼ eʼwíinʼ mu itháan má guxnáa núma̱aʼ Jeobá rí naʼni ga̱jma̱a̱ numulú (Sal. 75:1). Ragajtsú, gambájxulú gajmiúlú bi̱ naguʼwuun nuxnáa núma̱aʼ, mú xúʼko̱ mangáanʼ maguʼwunlú muxnáa núma̱aʼ, numuu dí á mu nambájxulú gajmiúlú mbáa bi̱ naxiéʼkhá, mbáa xúʼko̱ má gúʼni mangáanʼ (Deut. 1:​26-28; 2 Tim. 3:​1, 2, 5). Á mu nuxnáa núma̱aʼ maʼni dí xájmaa a̱jkiu̱lú ga̱jma̱a̱ numuu rí na̱nguá kuáʼdáá.

7. Ndiéjunʼ nimbáyúu Aci mu maxtáa itháan gagi rá.

⁷ Guʼyáá rí nigíʼnuu Aci mbáa ndxájulú a̱ʼgu̱ bi̱ xtáa náa Indonesia. Ikhaa naʼthí: “Índo̱ nirígá nandii COVID-19, nigíʼdu̱u̱ ninimbríguii xóo xtáá ikhúún ga̱jma̱a̱ xóo kúwá eʼwíinʼ a̱ngiu̱lú, rúʼko̱ niʼni dí ní xáxtáá gagi” (Gál. 6:4). Ndiéjunʼ nimbáyúu ndxájulú mu mariʼkhu̱u̱ xóo endxa̱ʼwa̱mínáʼ rá. Aci naʼthí xóó: “Nindxa̱ʼwáminaʼ ga̱jma̱a̱ numuu xúgíʼ dí májánʼ rí naxnúʼ Jeobá mámbá mbiʼi, ma̱ngaa xóo eguma tsajkurámúúnʼ numuu dí xtáá náa xuajñuu. Ikhú nigíʼdu̱u̱ ni̱xna̱a̱ núma̱aʼ Jeobá, rígi̱ niʼni dí maxtáá itháan gagi”. Ikha jngóo á mu ikháán na̱nguá xtaa gagi ga̱jma̱a̱ numuu dí xtaa ratani̱, mambáyáaʼ dí matayaridáá ndxájulú.

GANINDXU̱LÚ XA̱BU̱ WABAAʼ

8. Ndiéjunʼ nigíʼnuu Baruc rá.

⁸ Ni̱jkha̱nú mbá mbiʼi dí Baruc bi̱ nindxu̱u̱ secretario ndrígóo profeta Jeremías nánguá nixtáa gagi ga̱jma̱a̱ numuu ñajunʼ dí niʼni. Ikhaa nambáyúu Jeremías mu maʼthúún israelitas dí maguáʼníí ga̱jma̱a̱ numuu rí túnimbu̱ún kuyáá Jeobá. Baruc nigíʼdu̱u̱ nixmiéjuunʼ kaʼyaminaʼ ga̱jma̱a̱ nindxa̱ʼwa̱mínáʼ rí nandoo maʼni ikhaa, raʼkháa dí nandoo Jeobá. Ikha jngóo Jeobá niʼthúu̱n Baruc: “Ikháán natayáʼ dí maraʼdáá. Atatsíñááʼ ratayáʼ xúgíʼ rúʼko̱” (Jer. 45:​3-5). Xóo muʼthá Jeobá niʼthúu̱n: “Araxtaa gagi ga̱jma̱a̱ ñajunʼ rí natani̱”. Baruc nidxawuun dí niʼthúu̱n Jeobá, ga̱jma̱a̱ tániñuuʼ rambájxu̱u̱ ga̱jma̱a̱.

9. Ndiéjunʼ eʼsngúlú dí naʼthí náa 1 Corintios 4:​6, 7 rá. (Atayáá ma̱ngaa xtiʼkhuu.)

⁹ Mbáa nguáná ma̱ndoo dí mbáa ndxájulú mandxaʼwáminaʼ dí kaʼyoo makhánáá mbá asignación o magruígú mbá ñajunʼ, mbáa ga̱jma̱a̱ numuu dí rígá mbaʼa dí najmañuu naʼni, nañajunʼ gakhi̱i̱ ga̱jma̱a̱ mba̱yu̱u̱ʼ má xtáa raʼni ñajuunʼ Jeobá o ikhaa naʼni má xúgíʼ rígi̱. Maski ajndu xúʼko̱, mbáa eʼwíinʼ ekhánún ñajunʼ dí ikhaa nandoo maʼni. Ndiéjunʼ gámbáyúu mu xájmáa a̱jkiu̱u̱n xá. Rí mandxa̱ʼwa̱mínáʼ dí niʼthí Pablo náa 1 Corintios 4:​6, 7 (atraxnuu). Jeobá naxnúlú xúgíʼ ñajunʼ dí kuaʼdáá numuu dí ikhaa nandoo kaʼyulú ga̱jma̱a̱ májáanʼ wéñuuʼ a̱jkiu̱u̱n. Naxnúlú xúgíʼ rígi̱ maski ajndu ikháanʼ rakáʼyulú (Rom. 12:​3, 6; Efes. 2:​8, 9).

10. Ndiéjunʼ gámbáyulú mu manindxu̱lú xa̱bu̱ wabaaʼ rá.

¹⁰ Dí mundxa̱ʼwa̱míjna̱ náa xkri̱doo Jesús mambáyulú manindxu̱lú xa̱bu̱ wabaaʼ. Gármáʼáan a̱jkiu̱lú dí ikhaa niʼjñáa rajkhúún apóstoles ndrígióo maski ajndu ikhaa nindxu̱u̱ A̱ʼdióo Dios. Apóstol Juan niʼnirámáʼ: “Jesús ndaʼyoo má rí Anu̱u̱ niniñuuʼ náa ñawúunʼ xúgíʼ dí rígá ga̱jma̱a̱ rí ikhaa ni̱ʼkha̱ náa Dios ga̱jma̱a̱ rí mata̱nga̱a̱ náa Dios, [...] nigíʼdu̱u̱ niʼjñáa rajkúún xa̱bi̱i̱” (Juan 13:​3-5). Jesús ma̱ndoo mandxa̱ʼwa̱mínáʼ dí xa̱bi̱i̱ kaʼñúún dí mujñáa rajkhúu ikhaa. Mú Jesús nimbá míʼtsú tákumu̱u̱ dí ikhaa ndayóoʼ magiʼdoo ga̱jma̱a̱ maxtáa májánʼ (Luc. 9:58). Ikhaa ninindxu̱u̱ xa̱bu̱ wabaaʼ ma̱ngaa nixtáa gagi ga̱jma̱a̱ dí nigiʼdoo. Ra̱ʼkhá tháan májánʼ xkri̱da nigíʼ (Juan 13:15).

11. Ndiéjunʼ nimbáyúu Dennis mu maxtáa itháan gagi rá.

¹¹ Dennis mbáa ndxájulú xa̱biya̱ bi̱ xtáa náa Países Bajos, naʼthí dí ikhaa naʼniminaʼ mani̱ndxu̱u̱ xa̱bu̱ wabaaʼ xó má Jesús, mú nguáná naʼniuu gakhi̱i̱. Ikhaa naʼthí: “Nakiʼnún índo̱ nda̱yo̱o̱ dí i̱mba̱a̱ nakhánáá ñajunʼ dí ikhúún naniguʼ magúʼdoo, numuu dí nandxa̱ʼwa̱mínáʼ ikhúún kaʼyoo ma̱ni̱ ñajunʼ rúʼko̱. Índo̱ nagíʼnuʼ xúʼko̱, naʼgíminaʼ manigajma̱a̱ ga̱jma̱a̱ numuu dí mani̱ndxa̱a̱ʼ xa̱bu̱ wabaaʼ. Náa aplicación JW Library^®, gúʼdoo mbaʼa texto dí tima etiquetas ga̱jma̱a̱ numuu cualidad rígi̱, mu maxkamaa itháan nacha̱ ga̱jma̱a̱ matangu̱ún magúxnuu mbu̱júu̱. Ma̱ngaa nadxaun discurso dí gúʼdoo náa celular ndrígóʼ dí naʼthí ga̱jma̱a̱ numuu dí mani̱ndxa̱a̱ʼ xa̱bu̱ wabaaʼ.a Nijmañuʼ dí xúgíʼ dí nu̱ʼni̱ gíʼmaa maʼni mba̱a̱ Jeobá, raʼkháa dí mu̱ʼni̱ mbaʼumíjna̱. Ñajunʼ dí nu̱ʼni̱ nindxu̱u̱ ñajuunʼ Jeobá, ikháanʼlú i̱ndó numbáyíí. Á mu narígá mbá mbiʼi dí nánguá kúwáanʼ gagi xóo má nigíʼnuu ndxájulú Dennis, gu̱ʼni̱ tsiakimíjna̱ manindxu̱lú xa̱bu̱ wabaaʼ, xúʼko̱ mambájxulú itháan májánʼ gajmiúlú Jeobá ga̱jma̱a̱ makuwáanʼ gagi (Sant. 4:​6, 8).

GUNDXA̱ʼWÁMI̱JNA̱ NÁA DÍ KUA̱ʼTHI̱I̱N MARIGÁ NDA̱WA̱Á

12. Ndiéjunʼ dí kuáʼti̱i̱n nda̱wa̱á naʼni dí makuwáanʼ gagi xúgi̱ rá. (Isaías 65:​21-25.)

¹² Makuwáanʼ itháan gagi á mu nundxa̱ʼwa̱míjna̱ náa dí wíji̱ marigá nda̱wa̱á. Náa libro ndrígóo Isaías naʼthí dí Jeobá nakro̱ʼo̱o̱ má dí naʼni gakhi̱i̱ makuwáanʼ náa numbaaʼ rígi̱. Ikha jngóo, nakudaminaʼ maʼni gámbáa xúgíʼ dí naʼni mumíniiʼ (atraxnuu Isaías 65:​21-25). Náa numbaaʼ nuxi̱ʼ makuwáanʼ náa mbá guʼwá mitsaanʼ, náa makuwáanʼ májánʼ, maguaʼdáá ñajunʼ dí nanigulúʼ, mu̱ʼphu̱ ganitsu dí miʼtsí, ní xáxmiéjunlú dí maguáʼníí dí ra̱májánʼ o dí e̱jñu̱lúʼ mumíniiʼ (Is. 32:​17, 18; Ezeq. 34:25). Ra̱ʼkhá tháan mitsaanʼ xóo gákuwáanʼ nda̱wa̱á ga̱jma̱a̱ gajkhun mambanúu.

13. Ndiéjunʼ xkujndu kuaʼdáá ga̱jma̱a̱ xú káʼnii embáyulú dí mundxa̱ʼwa̱míjna̱ dí kuaʼti̱i̱n marigá nda̱wa̱á rá.

¹³ Gíʼdoo wéñuuʼ numuu dí mundxa̱ʼwa̱míjna̱ dí kuáʼti̱i̱n marigá nda̱wa̱á, numuu dí kuwáanʼ náa “iwáá mbiʼi” ga̱jma̱a̱ naʼni “mingíjyúuʼ rí maʼngulú” (2 Tim. 3:1). Mú Jeobá naxnúlú ikha, tsiaki̱i̱ ga̱jma̱a̱ nambáyulú mu maʼngulú (Sal. 145:14). Ma̱ngaa dí kuáʼti̱i̱n marigá nda̱wa̱á nambáyulú índo̱ naguáʼdáá xkujndu. Mbáa ndayóoʼ muñajunʼ gakhi̱i̱ mu muxnún rí ndañún bi̱ kúwá náa guʼwúlú, Jeobá nikudaminaʼ dí náa numbaaʼ nuxi̱ʼ maxnúlú dí ndayúlú ga̱jma̱a̱ maxnúlú itháan ki xóo rí kuaʼdáá xúgi̱ (Sal. 9:18; 72:​12-14). O mbáa xtaʼdáá mbá nandii mbiiʼ ga̱jma̱a̱ naʼkui̱i̱nʼ xúgíʼ mbiʼi o xtaa ngíná wéñuuʼ, mú rígá mbá rí xtaʼti̱i̱n nda̱wa̱á, numuu dí Dios nikudaminaʼ dí náa numbaaʼ nuxi̱ʼ ní xarigá nandii ní má xákháñulúʼ (Apoc. 21:​3, 4). Rígi̱ nambáyulú mu xákiʼnáanʼlú ga̱jma̱a̱ numuu xóo kuwáánʼlú. Ikha jngóo maski ajndu niniulú dí ra̱májánʼ, kuaʼdáá nandii, nikháñúu mbáa bi̱ nandulúʼ kuʼyáá o kuaʼdáá i̱mba̱ xkujndu, ma̱ndoo makuwáanʼ gagi numuu dí káaʼ mbáxngaa gaguaʼdáá gamiéjunʼ rígi̱ ga̱jma̱a̱ dí náa numbaaʼ nuxi̱ʼ maʼga̱nú mámbáa xúgíʼ dí naʼni mumíniiʼ (2 Cor. 4:​17, 18).

14. Ndiéjunʼ gúʼni mu mbuʼyáá dí gajkhun mambanúu dí marigá nda̱wa̱á rá.

¹⁴ Dí kuaʼti̱i̱n marigá nda̱wa̱á nambáyulú makuwáanʼ gagi xúgi̱. Ndiéjunʼ gúʼni mu mbuʼyáá dí gajkhun mambanúu rá. Xó má mbáa xa̱bu̱ bi̱ na̱jkha̱ náa mikrína ndayóoʼ dí maskámuu mbá lámpara mu mbaʼyoo májánʼ náá ejkha̱. Xúʼko̱ má mangáanʼ ndayóoʼ mundxa̱ʼwa̱míjna̱ xóo gákuwáanʼ náa ku̱ba̱ʼ mitsaanʼ, mu ma̱ndoo mbuʼyáá dí gajkhun mambanúu. Mbá xkri̱da, índo̱ néʼngulú eʼni xkujndu dí kuáʼdáá ga̱jma̱a̱ numuu mbújkha̱a̱ ma̱ndoo mundxa̱ʼwa̱míjna̱ xóo gákuwáanʼ índo̱ mbújkha̱a̱ ní xágiʼdoo numuu, índo̱ ní xáguaʼdáá gidxóó, o índo̱ ní xáʼni gínáánʼlú. Ma̱ngaa á mu najmáa a̱jkiu̱lú dí na̱nguá nikhánulú mbá asignación o ñajunʼ dí ikháanʼ nindulú, ma̱ndoo mundxa̱ʼwa̱míjna̱ dí nda̱wa̱á ní xáxmiéjunlú ga̱jma̱a̱ numuu rúʼko̱, numuu dí manindxu̱lú xa̱bu̱ jmbii ga̱jma̱a̱ maguaʼdáá mba̱yu̱u̱ʼ tsiguʼ mu mu̱ʼni̱ ñajuunʼ Jeobá (1 Tim. 6:19). Á mu naguʼwúnlú nundxa̱ʼwa̱míjna̱ ga̱jma̱a̱ numuu rí nikudaminaʼ maʼni Jeobá, maʼni dí ní xáxmiéjunlú ga̱jma̱a̱ numuu xkujndu dí kuaʼdáá.

15. Ndiéjunʼ ejmañaaʼ náa xkri̱doo Christa rá.

¹⁵ Christa a̱ʼgiu̱u̱ ndxájulú Dennis bi̱ niʼthá ga̱jma̱a̱ numuu náa kutriga̱ 11, naʼthí dí naxnúu tsiaki̱i̱ dí marigá nda̱wa̱á. Ikhaa gíʼdoo mbá nandii mbiiʼ dí naʼni makáwabaaʼ. Ikha jngóo ndayóoʼ majmuu silla de rueda. Ga̱jma̱a̱ nawanúu náa xiawoo numuu dí naʼkui̱i̱ wéñuuʼ. Xíjkhóó doctor ndrígóo niʼthúu̱n dí ní xáʼni̱i̱ a̱jkiu̱u̱n. Mú ikhaa nandxa̱ʼwáminaʼ náa dí gíʼthu̱u̱n marigá nda̱wa̱á, rúʼko̱ nambáyúu mu maxtáa tsímáá. Ikhaa ndaʼyoo dí mamínuuʼ dí mbiʼi xúgi̱, mú maxtáa gagi náa numbaaʼ nuxi̱ʼ.

“NDA̱A̱ DÍ GÁʼÑÚUNʼ BI̱ NAMÍÑÚÚN KUYÁÁ”

16. Náa numuu dí David niʼthí dí “nimbá nda̱a̱ dí gáʼñúunʼ bi̱ namíñúún kuyáá” Jeobá rá.

¹⁶ Maski ajndu kuwáánʼlú gagi ga̱jma̱a̱ rí kuaʼdáá, mú tsiaki̱i̱ má maguaʼdáá xkujndu. Gundxa̱ʼwámi̱jna̱ ga̱jma̱a̱ numuu rey David, náa Biblia naʼthí dí nikháñún ajtsíin e̱ji̱i̱n. Ma̱ngaa nithi dí raʼkhí ga̱jma̱a̱ numuu, niniña̱a̱nʼ bi̱ nambájxu̱u̱ gajmíi̱nʼ ga̱jma̱a̱ mba̱yu̱u̱ʼ tsiguʼ nigún ruxkáá mu muxiyáa, maski ajndu xúʼko̱ ikhaa nixtáa gagi. David niʼthí: “Nimbá nda̱a̱ dí gáʼñúunʼ bi̱ namíñúún kuyáá” Jeobá (Sal. 34:​9, 10). Niʼthí rígi̱ numuu dí ndiʼyoo dí maski ajndu Jeobá naniñuuʼ dí mumíniiʼlú, mú naxnúlú dí gajkhun ndayúlú (Sal. 145:16). Xó má David mangáanʼ nakuwáanʼ gagi numuu dí nduʼyáá rí Jeobá maxtáa ga̱jma̱á nindxu̱lú tséʼniuu má xó gákuwáánʼlú.

17. Ndíjkha dí nandaaʼ maraxtaa gagi tséʼniuu má xú káʼnii xtaa rá.

¹⁷ Jeobá nandoo dí makuwáanʼ gagi, tséʼniuu má xú káʼnii kuwáanʼlu (Sal. 131:​1, 2). Ikha jngóo guʼgíʼ guʼnimbáníí dí nijmañulúʼ gi̱i̱ mu makuwáanʼ gagi. Guʼni tsiakimíjna̱ maguʼwunlú muxnáa núma̱aʼ, manindxu̱lú xa̱bu̱ wabaaʼ ga̱jma̱a̱ mundxa̱ʼwa̱míjna̱ náa dí kuaʼti̱i̱n marigá nda̱wa̱á. Á mu nu̱ʼni̱ xúʼko̱, ma̱ndoo muʼthá: “Ikhúúnʼ nijmañuʼ maxtáá gagi” (Filip. 4:11).