Xú káʼnii esngájma Jeobá rí nandoo kaʼyulúʼ wéñuʼ rá.

1. a) Ndiéjunʼ nimbáyulúʼ mundxaʼwamíjna̱ apóstol Juan rá. b) Náa numuu rí gíʼmaa mundxaʼwamíjna̱ rí Jeobá nandoo kaʼyulúʼ wéñuʼ rá.

APÓSTOL Juan niʼthí: “Gu̱ya̱a̱ xú káʼnii eyoo kaʼyulúʼ Anu̱lú” (1 Juan 3:1). Ga̱jma̱a̱ ajngáa rígi̱, nimbáyulúʼ mundxaʼwamíjna̱ rí Jeobá nandoo kaʼyulúʼ wéñuʼ ga̱jma̱a̱ xú káʼnii esngájmulú. Á mu nundxa̱ʼwa̱míjna̱ ga̱jma̱a̱ numuu rúʼko̱, mambáxulúʼ itháan májánʼ gajmiúlú Dios ga̱jma̱a̱ maʼndulú kuʼyáá itháan.

2. Náa numuu rí tikhun naʼniún mingíjyúuʼ mbuyáá rí Dios nandoo kaʼñúún xá.

² Tikhun xa̱bu̱ tsénimbu̱ún rí Jeobá nandoo kaʼyulúʼ. Nakumu̱ún rí Dios tsixmiéjunʼ kaʼñúún. Nakumu̱ún rí Dios i̱ndó nagíʼ xtángoo ga̱jma̱a̱ naʼni mumíniiʼ bi̱ tsénimbu̱ún. Tikhuu religión nusngúún xa̱bu̱ rí Dios naʼni gíníi wéñuʼ. Ikha jngó mbaʼin nundxa̱ʼwa̱míjna̱ rí xándoo maʼndulú kuʼyáá. Mú eʼwíínʼ nakumu̱ún rí Dios nandoo kaʼñúún xúgínʼ xa̱bu̱ tséʼniuu má rí eni. Mú ikháanʼ nuʼnigajmaa̱ Biblia ga̱jma̱a̱ nduʼyáá rí gajkhun ga̱jma̱a̱ numuu Jeobá. Náa Biblia naʼthúlúʼ rí ikhaa nandoo kaʼyulúʼ wéñuʼ, ikha jngó nikuʼmaa A̱ʼdióo makhañúu ga̱jma̱a̱ numulúʼ (Juan 3:16; 1 Juan 4:8). Maski ajndu xúʼko̱, mbáa kuwa tikhun xa̱bi̱i̱ Jeobá bi̱ naʼniún mingíjyúuʼ mbuyáá rí ikhaa nandoo kaʼñúún. Mbáa nundxa̱ʼwa̱míjna̱ xúʼko̱ kaʼnii ga̱jma̱a̱ numuu mbá rí niguaʼnii.

3. Ndíjkha rí ma̱ndoo muʼthá rí Jeobá nandoo kaʼyulúʼ rá.

³ Ndíjkha rí ma̱ndoo muʼthá rí Jeobá nandoo kaʼyulúʼ rá. Numuu rí ikhaa niʼniáanʼ (atraxnuu Salmo 100:3).a Ikha jngó náa Biblia naʼthí rí Adán ninindxu̱u̱ “ade Dios” (Luc. 3:38). Ma̱ngaa, índo̱ Jesús niʼsngúlúʼ muʼtájkáan, niʼsngáa rí Jeobá nindxu̱u̱ Anu̱lú (Mat. 6:9). Ikha jngó Jeobá nandoo kaʼyulúʼ wéñuʼ xóo mbáa xa̱bu̱ bi̱ nandoo kaʼñúún e̱ji̱i̱n.

4. a) Xú káʼnii nindxu̱u̱ Jeobá rá. b) Ndiéjunʼ gúʼyáá náa artículo rígi̱ ga̱jma̱a̱ rí e̱ʼkha̱ nda̱wa̱á rá.

⁴ Tikhun xa̱bu̱ nini gíníi e̱jñún nákha majkhinʼ. Ikha jngó e̱ji̱n buʼko̱ nda̱wa̱á naʼniún mingíjyúuʼ mundxaʼwamíjna̱ rí mbáa xa̱bu̱ ma̱ndoo kaʼñúún e̱ji̱i̱n. Mú Jeobá nditháan xáʼni rí mumíniiʼlú. Rí phú gajkhun, ikhaa nindxu̱u̱ mbáa Anu̱lú bi̱ itháan májánʼ (Sal. 27:10). Ikhaa nandoo kaʼyulúʼ wéñuʼ ga̱jma̱a̱ mbaʼa enii xóo eñawunlú. Ga̱jma̱a̱ índo̱ nduʼyáá xóo eyoo kaʼyulúʼ, itháan gaʼndulúʼ kuʼyáá (Sant. 4:8). Náa artículo rígi̱ gúʼyáá a̱jkhu̱ enii xú káʼnii esngájma Jeobá rí nandoo kaʼyulúʼ. Ga̱jma̱a̱ artículo rí na̱ʼkha̱ nda̱wa̱á mbuʼyáá a̱jkhu̱ enii rí xú káʼnii ikháanʼ ma̱ndoo musngajmáá rí nandulúʼ kuʼyáá.

JEOBÁ NAXNÚLÚ XÚGÍʼ RÍ GÍʼDOO

5. Ndiéjunʼ exnúlúʼ Jeobá xúgiáanʼ rá.

⁵ Índo̱ apóstol Pablo nixtáa náa xuajin Atenas, ndiʼyoo rí kuwa wéñuʼ xándú ga̱jma̱a̱ rí xa̱bu̱ nakumu̱ún rí dios ndrígu̱ún naʼni rí makuwá. Ikha jngó Pablo niʼthún rí Jeobá “niʼni numbaaʼ ga̱jma̱a̱ xúgíʼ dí rígá ikhí”. Ma̱ngaa niʼthí rí Dios “naxnún xúgínʼ xa̱bu̱ rí mbuya ga̱jma̱a̱ xi̱ʼ ma̱ngaa xúgíʼ dí rígá”, ga̱jma̱a̱ “numuu ikhaa nduʼyálú, nuʼbañimijna ga̱jma̱a̱ kuwáanʼlu” (Hech. 17:24, 25, 28). Jeobá naxnúlú xúgíʼ rí nda̱yúlúʼ mu makuwáanʼ tsímáá. Guʼyáá tikhuu rí nixnúlú numuu rí nandoo kaʼyulúʼ.

6. Xú káʼnii nindxu̱u̱ Ku̱ba̱ʼ rí Jeobá niʼni mu makuwáanʼ rá. (Atayáá timbá xtiʼkhu.)

⁶ Mbá xkri̱da, Jeobá niʼni mújúnʼ mbá Ku̱ba̱ʼ mitsaan náa makuwáanʼ (Sal. 115:15, 16). Rí xúgíʼ planetas rí ikhaa niʼni, nakujmaa rí Ku̱ba̱ʼ nindxu̱u̱ kiejunʼ. Científicos niguánu ndiyáá mbaʼa planetas dí rígá náa numbaaʼ. Mú xóó tséxkamaa nimbá rí gíʼdoo xúgíʼ rí ndayóoʼ mu makuwáanʼ ikhí. Jeobá niʼni mújúnʼ Ku̱ba̱ʼ ga̱jma̱a̱ xúgíʼ rí eyóoʼ mu makuwáanʼ, mu ma̱ngaa niʼni mu mani̱ndxu̱u̱ mitsaan, gáʼchú ga̱jma̱a̱ náa ma̱ndoo makuwáanʼ májánʼ (Is. 45:18). Índo̱ nundxa̱ʼwa̱míjna̱ ga̱jma̱a̱ numuu planeta náa kuwáanʼ rí mitsaan wéñuʼ, na̱jkuánu nduʼyáá rí Jeobá phú gajkhun nandoo kaʼyulúʼ (Job 38:4, 7; atraxnuu Salmo 8:3, 4).b

7. Xú káʼnii imbo̱o̱ esngájmulú Jeobá rí nandoo kaʼyulúʼ wéñuʼ rá.

⁷ Jeobá ma̱ngaa nisngájma rí nandoo kaʼyulúʼ numuu rí niʼniáanʼ xó má xa̱bu̱ nindxu̱u̱ ikhaa (Gén. 1:27). Ikha jngó ma̱ndoo makumulúʼ rí nandoo kaʼyulúʼ ga̱jma̱a̱ ma̱ndoo maʼndulú kuʼyáá. Ikhaa ndaʼyoo dí rúʼko̱ maʼni makuwáanʼ phú gagi, numuu rí e̱ji̱n kuwa gagi índo̱ nakumu̱ún rí anu̱ún nandún kuñún. Ma̱ngaa Jesús niʼsngúlúʼ rí makuwáanʼ tsímáá á mu kuwáanʼ mijngii náa Jeobá (Mat. 5:3). Náa Biblia naʼthúlúʼ rí ikhaa “su naxna hueñuʼlu xoguiʼ ñujunʼ majmaʼlu jma gagui” (1 Tim. 6:17). Nakujmaa kaʼwu rí Jeobá naxnúlú rí májánʼ ga̱jma̱a̱ nandoo kaʼyulúʼ wéñuʼ (Sal. 145:16).

JEOBÁ NAʼSNGÚLÚʼ

8. Náa numuu rí nandulúʼ rí Jeobá maʼsngulúʼ rá.

⁸ Mbáa xa̱bu̱ bi̱ nandoo kaʼñúún e̱ji̱i̱n nagíʼ maʼsngúún mu makuwá májánʼ nda̱wa̱á. Mú mbaʼin bi̱ guáʼdiin e̱jñún rí mbiʼi xúgi̱ tséyamajkuíí rí naʼthí náa Biblia. Ikha jngó na̱nguá ejmañún musngúún e̱jñún rí phú nindxu̱u̱ májánʼ ga̱jma̱a̱ ra̱májánʼ. Rúʼko̱ naʼni rí e̱ji̱n majngarígi̱i̱n ga̱jma̱a̱ xakuwá tsímáá (Prov. 14:12). Mú, Jeobá naxnún ikha rí itháan májánʼ e̱ji̱i̱n, numuu rí ikhaa nindxu̱u̱ ‹Dios bi̱ naʼthí rí gajkhun› (Sal. 31:5). Ikhaa naʼsngúlúʼ rí gajkhun ga̱jma̱a̱ numuu ma̱ngaa naʼthúlúʼ xú káʼnii guʼyamajkuíí. Ga̱jma̱a̱ naʼsngúlúʼ rí xú káʼnii itháan májánʼ makuwáanʼ (atraxnuu Salmo 43:3).c Guʼyáá ndiéjunʼ eʼsngúlúʼ Jeobá rí nasngájma dí ra̱ʼkhá tháán eyoo kaʼyulúʼ.

9, 10. a) Náa numuu rí naʼsngúlúʼ Jeobá ga̱jma̱a̱ numuu ikhaa xá. b) Ndiéjunʼ eʼsngúlúʼ Jeobá ga̱jma̱a̱ numulúʼ rá.

⁹ Timbá, Jeobá naʼsngúlúʼ rí gajkhun ga̱jma̱a̱ numuu (Sant. 4:8). Ikha jngó naʼthúlúʼ xú káʼnii mbiʼyuu. Náa Biblia nakujmaa mbiʼyuu mbaʼa nuthu ki xóo i̱ʼwáʼ. Jeobá ma̱ngaa naʼsngúlúʼ xú káʼnii phú nindxu̱u̱. Mbá xkri̱da, á mu nduʼyáá xúgíʼ rí niʼni na̱jkuánu nduʼyáá rí najmañuu wéñuʼ ga̱jma̱a̱ rí gíʼdoo tsiakii (Rom. 1:20). Ga̱jma̱a̱ índo̱ nuraxnuu Biblia, nduʼyáá rí ikhaa naʼni rí jmbu ga̱jma̱a̱ nandoo kaʼyulúʼ wéñuʼ. Índo̱ nuniʼnííʼ itháan Jeobá itháan exuʼmámijná náa ikhaa.

¹⁰ Jeobá ma̱ngaa naʼsngúlúʼ rí gajkhun ga̱jma̱a̱ numulúʼ. Naʼthúlúʼ rí ni̱ndxu̱lú e̱ji̱i̱n. Ma̱ngaa naʼthúlúʼ rí gíʼmaa muʼni mu muʼni ñajunʼ mbá tsímáá ga̱jma̱a̱ mbá kambáxulú. Náa Biblia naʼthí rí Jeobá taʼniáanʼ mu ma̱ndoo muʼthá káʼnii nindxu̱u̱ májánʼ ga̱jma̱a̱ dí ra̱májánʼ (Jer. 10:23). Ikhaa ndaʼyoo ndiéjunʼ rí itháan gambáyulú. Ikha jngó i̱ndó á mu nuʼnimbulúʼ ga̱jma̱a̱ nduʼyamajkuíí makuwáanʼ gagi ga̱jma̱a̱ tsímáá. Jeobá niʼsngúlúʼ rígi̱ numuu rí nandoo kaʼyulúʼ wéñuʼ.

11. Ndiéjunʼ rí ekudaminaʼ maxnúlúʼ Jeobá nda̱wa̱á rá.

¹¹ Mbáa xa̱bu̱ bi̱ gíʼdiin e̱ji̱n naxmiéjunʼ xú káʼnii gakuwa nda̱wa̱á ga̱jma̱a̱ nandoo rí makuwá tsímáá e̱ji̱i̱n. Mú mbaʼin xa̱bu̱ rí mbiʼi xúgi̱ tséyáá xú káʼnii gákuwá nda̱wa̱á. I̱ndó nunimbáti̱ga̱ vida ndrígu̱ún náa ñajunʼ mu muguaʼdáá rí xájyúuʼ wéñuʼ (Sal. 90:10). Mú, bi̱ nuʼni ñajunʼ Jeobá nuxna̱a̱ núma̱aʼ numuu rí ikhaa naʼsngúlúʼ makuwáanʼ tsímáá xúgi̱ ga̱jma̱a̱ rí nikudaminaʼ rí makuwáanʼ májánʼ nda̱wa̱á.

JEOBÁ NAXPRÍGÚLÚ

12. Xú káʼnii nigíʼ Jeobá mambáyúu Caín ga̱jma̱a̱ Baruc rá.

¹² Índo̱ rí Jeobá ndiʼyoo rí Caín inuu maʼni mbá dí ra̱májánʼ kayuʼ, nigíʼ mambáyúu. Niʼthúu̱n rí xákiʼnáa ga̱jma̱a̱ rí mariʼkuminaʼ. Á mu naʼni xúʼko̱ Jeobá má gáʼni tsajkurámááʼ (Gén. 4:6, 7). Mú Caín táʼdxun, ga̱jma̱a̱ numuu rúʼko̱ ikhaa nimínuuʼ wéñuʼ (Gén. 4:11-13). Imbo̱o̱ mbiʼi, Jeobá ndiʼyoo rí mbáa xa̱bi̱i̱ bi̱ nagumbiʼyuu Baruc nigaʼ ga̱jma̱a̱ nikágua̱ba̱ʼ numuu dí ra̱májánʼ nindxa̱ʼóo edxu̱u̱. Ikha jngó Jeobá niʼthúu̱n rí gíʼmaa mariʼkhuu xóo endxa̱ʼwáminaʼ. Baruc niʼnimbo̱o̱, ga̱jma̱a̱ rúʼko̱ niʼnikríyaʼ (Jer. 45:2-5).

13. Ndiéjunʼ nijmañún xa̱bi̱i̱ Jeobá nákha wajyúúʼ índo̱ niraʼníí xkujndu rá.

¹³ Jeobá naxnúlú ikha ga̱jma̱a̱ naxprígúlúʼ numuu rí nandoo kaʼyulúʼ wéñuʼ. Ikhaa naxprígúlúʼ índo̱ ndayóoʼ, mú ma̱ngaa nambáyulúʼ mu manindxu̱lúʼ itháan májánʼ xa̱bu̱ (Heb. 12:6). Jeobá nimbáñun muriʼkhumijná xa̱bi̱i̱ nákha wajyúúʼ. Mbá xkri̱da, niniñuʼ rí José, Moisés ga̱jma̱a̱ David muraʼníí xkujndu rí mingíjyúuʼ wéñuʼ. Índo̱ ikhiin kuwa ruraʼníí xkujndu rí mingíjyúuʼ nijmañún dí rúʼko̱ mambáñun nda̱wa̱á índo̱ Jeobá gáxnún ñajunʼ rí itháan miʼskhoo. Índo̱ nuraxnuu náa Biblia xú káʼnii Jeobá nambáñun xa̱bi̱i̱ ga̱jma̱a̱ nambáñun muriʼkhumijná, nduʼyáá rí nandoo kaʼyulúʼ wéñuʼ (atraxnuu Proverbios 3:11, 12).d

14. Xú káʼnii esngájma Jeobá rí nandoo kaʼyulúʼ índo̱ nakiéʼkulu rá.

¹⁴ Índo̱ nakiéʼkulu, Jeobá nasngájmulúʼ rí nandoo kaʼyulúʼ á mu tséʼni gaʼduunʼ rí naxprígúlúʼ. Xú káʼnii eʼni xá. Gaʼyee Isaías niʼthí rí Jeobá ‹naʼni mba̱a̱ a̱jkiu̱u̱n kaʼyulúʼ wéñuʼ› (Is. 55:7). Ga̱jma̱a̱ rey David niʼthí rí Jeobá nindxu̱u̱ “bi̱ naʼni mba̱a̱ a̱jkiu̱u̱n xúgíʼ rí nakiéʼkhánʼ, bi̱ xtáa raʼni̱i̱ xúgíʼ náa naʼkui̱i̱n, ikhaa xtáa randa̱ʼa̱a̱ vida ndrígáʼ náa iñáʼ, ga̱jma̱a̱ nasngájma rí nandoo kaʼyaʼ má xúʼko̱ ma̱ngaa nagáwiinʼ a̱jkiu̱u̱n ga̱jma̱á numaʼ” (Sal. 103:3, 4, 12). Xó má eʼyáá, Jeobá xtáa xawii mu maʼni mba̱a̱ a̱jkiu̱u̱n kaʼyulúʼ. Mú ikháanʼ gíʼmaa mundrígúlú ikhoo ga̱jma̱a̱ rí naxprígúlúʼ ma̱ngaa muʼni rí ndayóoʼ mu muriʼkhuíí rí eʼnilú. Garmáʼáan a̱jkiu̱lú rí Jeobá naxprígúlúʼ numuu rí nandoo kaʼyulúʼ (Sal. 30:5).

JEOBÁ NAÑEUNLÚ

15. Xú káʼnii imbo̱ʼ esngájmulú Jeobá rí nandoo kaʼyulúʼ wéñuʼ rá.

¹⁵ Mbáa xa̱bu̱ bi̱ nandoo kaʼñúún wéñuʼ e̱ji̱i̱n nañewu̱u̱n náa rí migamíi. Rúʼko̱ eʼni Jeobá ga̱jma̱á numulúʼ. Salmo 97:10 naʼthí rí Jeobá nañewu̱u̱n vida ndrígu̱ún xa̱bi̱i̱ bi̱ ni̱ndxu̱ún jmbiin ga̱jma̱a̱ naʼni káwíin náa xa̱bu̱ bi̱ ra̱míjínʼ. Atatsaʼwáminaʼ rígi̱. Índo̱ nduʼyáá dí rígá mbá rí maʼni gawúunʼ idulú, nacha̱ eñewa̱a̱n. Xúʼko̱ má kayuʼ, Jeobá nacha̱ eñewunlú náa rí migamíi. Ikhaa eʼni xúʼko̱ numuu rí nandoo kaʼyulúʼ (atraxnuu Zacarías 2:8).e

16, 17. Xú káʼnii eñawu̱u̱n xa̱bi̱i̱ Jeobá rá.

¹⁶ Jeobá najmiuu má xúʼko̱ ángeles mu mañewu̱u̱n xa̱bi̱i̱ (Sal. 91:11). Mbá xkri̱da, mbáa ángel nigudíin mbá 185,000 soldados mbóó mbruʼun mu maʼnikríyaʼ xuajñu Dios (2 Rey. 19:35). Mbiʼi rí nikuwa timbíi̱n cristianos, ángeles niriyaʼ Pedro ga̱jma̱a̱ eʼwíínʼ náa guʼwá e̱jua̱nʼ (Hech. 5:18-20; 12:6-11). Xóó tséʼni mba̱yu̱ʼ rí nirígá mbá guerra náa mbá xuajin mba̱a̱ ndrígóo Africa. Nixmijná, ninikuʼwáʼ, nitsijmiin xa̱bu̱ ga̱jma̱a̱ niradíin náa xúgíʼ xuajin. Maski ajndu nimbáa xa̱bi̱i̱ Jeobá tákhañuu, mu mbaʼin nindátigu̱u̱n xúgíʼ rí guáʼdáá. Mú, nikumu̱ún rí Jeobá xtáa rañewu̱u̱n má xúʼko̱. Ikhiin nimíniʼ wéñuʼ mú nikuwa gagi. Índo̱ mbáa ndxájulú bi̱ xtáa náa guʼwá dí nuxna ikha xúgíʼ numbaaʼ ni̱jkha̱ gáʼñun, niraxu̱u̱n xú káʼnii kuwa. Ikhiin nitháán rí núma̱a̱ Jeobá xúgíʼ má májánʼ.

¹⁷ Tikhun xa̱bi̱i̱ Dios nikháñun numuu rí niwájun jmbu. Rúʼko̱ nigíʼnuu discípulo Esteban gajmíi̱n eʼwíínʼ. Ikha jngó Jeobá nguáná tsírikhoo rí xákhañun xa̱bi̱i̱. Mú nañewu̱u̱n xa̱bi̱i̱ xóo mbá grupo índo̱ naʼthúún ga̱jma̱a̱ numuu tsáʼkhá rí nagrui̱ga̱ Satanás (Efes. 6:10-12). Rígi̱ ma̱ndoo muxkamaa náa Biblia ga̱jma̱a̱ náa i̱yi̱i̱ʼ rí naʼniratoo organización. Mbá xkri̱da, Jeobá naʼthúlúʼ ga̱jma̱a̱ numuu rí migamíi majmulu Internet, rí manigulúʼ muguaʼdáá wéñuʼ mbújkha̱a̱, libros, películas ga̱jma̱a̱ videojuegos náa na̱ʼkha̱ rí nubúnʼ xa̱bu̱ ga̱jma̱a̱ nuxmijná wéñuʼ. Nakujmaa kaʼwu rí Jeobá nandoo kaʼyulúʼ ga̱jma̱a̱ nandoo mañewu̱nlú.

MBÁ RÍ MÁJÁNʼ WÉÑUʼ

18. Xú káʼnii eʼni makumulúʼ rí mbuʼyáá dí Jeobá nandoo kaʼyulúʼ rá.

¹⁸ Índo̱ Moisés nindxa̱ʼwáminaʼ náa xúgíʼ tsiguʼ rí niʼni ñajunʼ Jeobá, ndiʼyoo gajkhun rí Dios nindoo kaʼyoo. Ikha jngó niʼthí: “Araxnúxuʼ mámbá miʼcha̱ rí nandaʼ xtayuxuʼ má xúʼko̱, mu mundxa̱ʼwa̱ ga̱jma̱a̱ gagi ma̱ngaa mu maʼdxuxu xúgíʼ mbiʼi ndrígúxu̱” (Sal. 90:14). Gagiwa̱nʼ a̱jkiu̱lú ajngáa rí niʼthí apóstol Juan: “Gu̱ya̱a̱ xú káʼnii eyoo kaʼyulúʼ Anu̱lú” (1 Juan 3:1). Lá ragájkhun rí májánʼ wéñuʼ rí mbuʼyáá ga̱jma̱a̱ makumulúʼ rí Jeobá nandoo kaʼyulúʼ wéñuʼ ráʼ.