DÍ MAMBÁÑÚN BI̱ MBÁ GUʼWÍIN | BI̱ NIDAMIJNÁ
Guríyáʼ mbiʼi makuwáanʼla mbóó
Mbaʼin xa̱bu̱ gajmii na̱nguá etamijná maski má kúwíin mbayuuʼ mbiʼi mbóó. Náá numuu rá.
Náá numuu dí nuni̱ wajímijnaxu maski ajndu kúwáanʼxu jnduʼ rá.
“Numuu dí néʼnguxu wéñuuʼ”
“Índo̱ nakujmaa dí nawapháanʼxu mu mutamíjná ga̱jma̱a̱ makuwáanʼxu mbóó jnduʼ, mbiʼi rúʼko̱ naʼni néʼnguxu wéñuuʼ. Mú índo̱ ikhúún néʼngo̱ʼ, tséjyúu kiʼnún. Ikhaa jngóo nutrigáanxu ndu̱ya̱a̱ tele” (Anna).
“Narígú kaʼyuxu̱ mbiʼi Internet”
“Dí mata̱ʼa̱a̱ʼ náa Internet ga̱jma̱a̱ dí matani̱ cuento gajmiáanʼ ikhí narígú kaʼyáaʼ wéñuuʼ mbiʼi. Xúʼko̱ káʼnii eʼniuʼ ikhúún, tséyóo xú káʼnii nújngoo mbiʼi dí asndu tséthúun nimbá ajngáa a̱jmbio̱ʼ, rúʼko̱ naʼni dí asndu mámbáa tsáa eta̱ʼa̱a̱ náa kuartiúu” (Katherine).
“Mixtiʼkhu dí naniguxu muni̱”
“Índo̱ na̱ʼkha̱núu a̱jmbio̱ʼ naʼni dí ikhaa nanigu̱u̱ʼ ga̱jma̱a̱ dí maʼni̱i̱ a̱jkiu̱u̱n. Nda̱a̱ má dí ethu̱u̱n, numuu dí ra̱ʼkhá tháán ñajunʼ, ndayóoʼ má mbayáa xu̱u̱ʼ. Mú ma̱ngaa nandoʼ dí makuwáanʼxu itháán mbóó jnduʼ” (Jane).
“Nuñajunʼxu má xúʼko̱”
“Ga̱jma̱a̱ numuu ñajunʼ naʼni dí xáxtáá mbóó jnduʼ gajmíʼ bi̱ kúwíin náa goʼwóʼ. Itháán má nariʼña̱a̱ mensaje dí nuxuʼma náa inuʼ ga̱jma̱a̱ correo, ki xóo maxtáá gajmuʼ a̱ʼgiu̱ʼ” (Mark).
Dí ma̱ndoo munila
Gu̱ya̱a̱ dí ndayóoʼ makuwáanʼla mbóó jnduʼ raʼkháa i̱ndó índo̱ naguapháanʼla.
Texto dí mambáyáaʼ: Gíʼmaa “mbu̱ya̱a̱la ndiéjuunʼ dí itháan gíʼdoo numuu” (Filipenses 1:10).
Atatsaʼwáminaʼ rígi̱: Lá natasngájma dí itháán gíʼdoo numuu maraxtaa itháan mbiʼi ga̱jma̱a̱ʼ bi̱ ndiyáa ki xóo ñajunʼ o matani̱ dí nanigua̱a̱ʼ ráʼ. O lá i̱ndó natadxawíín dí naʼthí ga̱jma̱a̱ naraxtaa gajmaaʼ índo̱ naguapháán xáʼ.
Dí ma̱ndoo mu̱ni̱: Guríyáʼ awan mu makuwáanʼla mbóó jnduʼ xúgííʼ mbiʼi, raʼkháa índo̱ naʼngo̱o̱ o nawapháanʼla.
“Nanigu̱ʼ índo̱ a̱jmbio̱ʼ naríyaʼ mbiʼi mu maxtáa ga̱jma̱a̱ nindxu̱ʼ. Rúʼko̱ naʼni mba̱yo̱o̱ dí ndaʼyoo dí gúʼdoo numuʼ ga̱jma̱a̱ dí nandoo maxtáa ga̱jma̱á nindxu̱ʼ. Ma̱ngaa naʼni dí maʼndoʼ ka̱yo̱o̱ itháán” (Anna).
“Xútámáʼ” celular náa mijngii katrigáanʼla.
Texto dí mambáyáaʼ: ‹Rígá mbiʼi dí maguma xúgííʼ› (Eclesiastés 3:1).
Atatsaʼwáminaʼ rígi̱: Nguáthá nuthu tsétagíʼ májánʼ edxa̱a̱ʼ dí naʼtháanʼ bi̱ ndiyáa numuu dí na̱ʼkha̱nú mensaje inaaʼ rá.
Dí ma̱ndoo mu̱ni̱: Gunimíjnala muríyáʼ mbóó míʼtsú dí mbá mbiʼi mu muphiʼtsula, xútámáʼ celular náa mijngii katrigáanʼla. Numuu dí ikhú ma̱ndoo mutamíjnála dí nigíʼnala mámbá mbiʼi.
Guʼgua̱ gútsila mbóó ga̱jma̱a̱ gúni ñajunʼ dí ndayóoʼ náa guʼwáá á mu naʼngo̱o̱.
Texto dí mambáyáaʼ: “Itháan májánʼ dí a̱jmi̱i̱n ki xóo mbáwíí, numuu rí mba̱a̱ gakhánún bi̱ nuñajunʼ gakhi̱i̱” (Eclesiastés 4:9).
Atatsaʼwáminaʼ rígi̱: Nguáthá nuthu e̱jkua̱la wájíʼ índo̱ na̱jkuá gútsi o i̱ʼwáʼ dí ndayála náa guʼwáá rá.
Dí ma̱ndoo mu̱ni̱: Guñajunʼla mbá jnduʼ ga̱jma̱a̱ gumbáyumijnálá, maski ajndu naku̱ma̱la dí majmáanʼ má ndajkuáanʼ.
“Xúyáa̱la xóo i̱ndó dí ndayóoʼ maguma, gu̱ya̱a̱la xóo mbóoʼ náa ma̱ndoo makuwáanʼla mbóó jnduʼ índo̱ nujñáala traste, nura̱jxi̱la xtíin, nugíjxi̱la̱ rexa̱a̱, nuxijyááʼlá planta o i̱ʼwáʼ dí nuni̱la” (Nina).
Gunimíjnala makruaʼala kuñu̱u̱ ga̱jma̱a̱ xúguaʼthíi̱nla muxnala dí xáʼngu̱u̱n.
Texto dí mambáyáaʼ: “Mu xúgíinʼ gúyáá rí nindxa̱la xa̱bu̱ bi̱ nakru̱ʼu̱u̱n dí marathu̱u̱n” (Filipenses 4:5).
Atatsaʼwáminaʼ rígi̱: Xkáʼnii gándoo gúyaa á mu tsenda̱ʼa̱a̱la mbóoʼ dí xáʼngo̱o̱ gáxnala mbáa rá.
Dí ma̱ndoo mu̱ni̱: Gutamíjnála dí nandala. Mu xúʼko̱ muraʼwíí májánʼ dí gúnila ga̱jma̱a̱ majmala májánʼ mbiʼi dí kuaʼdáá, mú xúʼko̱ mbá nájmáanʼ makuwáanʼla tsímáá.
“A̱jmbio̱ʼ tségaaʼ nacha̱, mú ikhúún tséjyúu eʼni néʼngo̱ʼ numuu dí nandoo kháñúʼ. Nguáná na̱thu̱u̱n magajnúun gáʼni mbóoʼ dí maʼni̱i̱ a̱jkiu̱u̱n, ikhúún naguanúʼ guʼwáá. Xúʼko̱ ikhaa nandoo naʼni ejercicio ga̱jma̱a̱ ikhúún naguanúʼ nda̱ya̱a̱ xu̱ʼ. Rúʼko̱ eʼni dí mbá nájmáanʼxu nuni̱ dí nanduxu” (Daniela).
Dí ma̱ndoo munila mbóó jnduʼ
Ginii, mámbáa tsáa gáriʼña̱a̱ graxe̱ rígi̱. Nda̱wa̱á gutamíjnála dí niriʼña̱a̱.
Lá nakuwáanʼ mbayuuʼ mbóó jnduʼ ráʼ.
Ndiéjuunʼ tsiaki̱i̱ dí naʼni mu maraxtaa mbóó ga̱jma̱a̱ bi̱ ndiyáa dí naʼniaaʼ maraxna̱a̱ núma̱aʼ rá.
Ndiéjuunʼ dí nandaaʼ mariʼkhuu dí naʼni bi̱ ndiyáa rá.
Nguáthá nuthu eʼniaaʼ dí xátaʼgíʼ májánʼ edxa̱a̱ʼ matadxawíín dí naʼtháanʼ bi̱ ndiyáa numuu dí natru̱gua̱ celular o tablet rá.
Ndiéjuunʼ gátani̱ mu ma̱ta̱ya̱a̱ dí xáʼngo̱o̱ gaxnáaʼ xúgííʼ dí nandaaʼ xá.
Ndiéjuunʼ gáʼyóoʼ muriʼkhu̱u̱ xmáná má rígi̱ mu ma̱ndoo makuwáanʼla itháán mbayuuʼ mbóó ga̱jma̱a̱ maxmiéjuanla kuyamíjna̱ itháán rá.