Político nuthi dí gamíi magi̱ʼdu̱u̱ Armagedón | Ndiéjuunʼ eʼthí náa Biblia rá.

Miʼcha̱ lunes 10 ñajunʼ gu̱nʼ octubre tsiguʼ 2022, Rusia nidaʼ mbaʼa bomba misil náa tikhu xuajen ndrígóo Ucrania. Niʼni rígi̱, numuu rí a̱jma̱ mbiʼi wapháá nigumaa gámbáa mbá puente dí gíʼdoo numuu dí naruwaa Crimea ga̱jma̱a̱ Rusia. Wapháá má nithi tikhuin político dí gamíi magi̱ʼdu̱u̱ Armagedón.

• ‹Xóó tserígá mbóoʼ xkujndu mbáa wéñuuʼ xóo nirígá índo̱ niʼtáñajunʼ Kennedy bi̱ nindxu̱u̱ presidente náa Estados Unidos ga̱jma̱a̱ asndu nákha nirígá xkujndu numuu bomba misil náa Cuba. [...] Ikhúún naku̱mu̱ʼ xí najmulú bomba nuclear magi̱ʼdu̱u̱ Armagedón›, niʼthí Joe Biden, presidente náa Estados Unidos nákha 6 ñajunʼ gu̱nʼ octubre tsiguʼ 2022.

• “Mangúún nda̱yo̱o̱ gajkhun dí rígi̱ nindxu̱u̱ guerra Armagedón; rí gamíi maʼni gámbóo numbaaʼ”. Rígi̱ niʼthí presidente Volodímir Zelenski ndrígóo Ucrania, índo̱ nixtaxi̱i̱ dí narígá índo̱ najmaa bomba o i̱ʼwáʼ; BBC News, nákha 8 ñajunʼ gu̱nʼ octubre tsiguʼ 2022.

Lá dí magi̱ʼdu̱u̱n ga̱jma̱a̱ bomba nuclear maʼni dí marígá Armagedón ráʼ. Ndiéjunʼ eʼthí náa Biblia rá.

Lá magi̱ʼdu̱u̱ Armagedón ga̱jma̱a̱ numuu dí najmaa bomba nuclear ráʼ.

Na̱nguá. Ajngáa Armagedón i̱ndó na̱ʼkha̱ mbá miʼtsu náa Biblia, náa Apocalipsis 16:16. Tséʼthi ga̱jma̱a̱ numuu guerra dí naguáʼdáá xuajen, naʼthí ga̱jma̱a̱ numuu guerra dí magiʼdoo Dios gajmíi̱n “reyes bi̱ kúwá náa xúgíʼ ku̱ba̱ʼ” (Apocalipsis 16:14). Dios majmuu Armagedón mu maʼni gámbíin xúgíinʼ xa̱bu̱ ñajunʼ náa numbaaʼ (Daniel 2:44).

Mu ma̱ta̱ya̱a̱ ndiéjunʼ gágíʼnuu Ku̱ba̱ʼ náa Armagedón, atraxnuu artículo “¿Qué es el Armagedón?”.

Lá mambáa Ku̱ba̱ʼ ga̱jma̱a̱ mangiin xa̱bu̱ numuu mbá guerra nuclear ráʼ.

Na̱nguá. Mbáa nda̱wa̱á xa̱bu̱ ñajunʼ majmúún bomba nuclear, mu Dios xániñuuʼ dí munigámbáa Ku̱ba̱ʼ. Náa Biblia naʼthí:

• “Ku̱ba̱ʼ ndajyúuʼ kámuu mbiʼi” (Eclesiastés 1:4).

• “Xa̱bu̱ bi̱ nuni̱ rí májánʼ mundrigúu ku̱ba̱ʼ ga̱jma̱a̱ makuwá kámuu mbiʼi ikhí” (Salmo 37:29).

Profecías dí na̱ʼkha̱ náa Biblia ga̱jma̱a̱ dí xtáa rarígá náa xúgíʼ numbaaʼ nasngájma rí nánguá má mba̱yu̱u̱ʼ marigá dí maʼni maxtiʼkhuu náa xa̱bu̱ (Mateo 24:3-7; 2 Timoteo 3:1-5). Atayáá rí naʼthí náa Biblia ga̱jma̱a̱ numuu rí kua̱ʼthi̱i̱n nda̱wa̱á, xáxtumáán rí majmañaaʼ kiʼsngáa ndrígóo Biblia.