Náá numuu jngó nimbáa tsíʼngo̱o̱ gáʼne rí ná xátsa̱ñu̱ú xa̱bo̱ rá. | Dí iʼthán Ajngóo Ana̱ʼlóʼ rá.

Nimbáa xa̱bo̱ ede̱ ná numbaa ni máʼ iʼwíin xa̱bo̱ tsí gíʼdoo numúú tsíʼngu̱ún gúne̱ rí xa̱bo̱ ná xátsañu̱ú. Maphú ríga̱ xkujndu asndo nákhí niríga̱ Riajma̱ Xkujndu Mba̱a̱ ná Xúgíí Numbaa. Mbá 2.000 miyón xa̱bo̱ júwa̱ʼ xuajen ná ríga̱ xkujndu.

Náá numuu jngó xa̱bo̱ numbaa tsíʼngu̱ún gúne̱ rí ná xátsa̱ñu̱ú xa̱bo̱ rá. Dí iʼthán Ajngóo Ana̱ʼlóʼ rá.

Ríga̱ atsú inii rí xa̱bo̱ numbaa tsíʼngu̱ún gúne̱ rí ná xátsa̱ñu̱ú xa̱bo̱

1. 1. Ajngóo Ana̱ʼlóʼ naʼthán rí mbiʼi rí juwalóʼ xúge̱ʼ majuwá xa̱bo̱ tsí “maxná gamiéjúún juya mijná i̱ndo̱ó máʼ ikhiin, tsí na̱ni̱gu̱ún muguáʼdáá mi̱ndaʼkho mbúkha̱a̱, tsí nune̱ tsiʼyá, tsí nu̱xu̱xí mijná, […] tsí nu̱ni̱ʼñá ti̱giin iʼwíin, […] tsí tsíñúú gúne̱ mbáníí xkujndu, […] tsí tsíyoo gúni̱ʼñáá rune̱ rí xkawe̱ʼ, tsí namangu̱ún, […] tsí na̱nguá i̱ndxa̱ʼwa̱ mijná rí mune̱, tsí na̱ju̱mu̱ú rí phú gíʼdoo numúú”. Xúgíí ríge̱ʼ naʼne rí xa̱bo̱ ma̱xúne tsiakhe̱ mijná majuwá tsímáá gajmíí a̱nguíi̱n (2 Timoteo 3:2-4).

2. 2. Xa̱bo̱ numbaa ñajuanlóʼ, ikhaa jngó ma̱xájmáaʼlóʼ gúʼne̱ mbáníílóʼ xkujndu rí ríga̱, ndaʼyóo tsiakhe̱ rí Ana̱ʼlóʼ Mikhuíí Jeobá, mbo̱ neʼne ku̱máaʼlóʼ, mambáyálóʼ.a Ajngáa Rawuun Ana̱ʼlóʼ naʼsngáa rí xa̱bo̱ numbaa na̱nguá jaʼyoo maʼthán ñájon mina̱ʼ (Jeremías 10:23).

3. 3. Xtáa mbáa tsí naʼthán ñájúún xa̱bo̱ numbaa ríge̱ʼ, mbáa tsí xkawe̱ʼ a̱kui̱in jamí phú gíʼdoo tsiakhe̱, mbáa “tsí naʼne nduwiin xa̱bo̱ mbá xúgíí inuu numbaa”. Xa̱bo̱ tsíge̱ʼ ñajuun Satanás, tsí nutháán mangaa Xa̱bo̱ Xkawi̱i̱ʼ. Ikhaa̱ náʼthán ñájúún xa̱bo̱ numbaa, ikhaa jngó phú naṯsa̱ñu̱ú xa̱bo̱ jamí ríga̱ xkujndu (Apocalipsis 12:9; 1 Juan 5:19).

Tsáa ma̱ʼngo̱o̱ ma̱ʼne rí ná xátsa̱ñu̱ú xa̱bo̱ rá.

Ajngáa Rawuun Ana̱ʼlóʼ naʼthán rí mbáwíi Ana̱ʼlóʼ Mikuíí ma̱ʼngo̱o̱ ma̱ʼne rí ná xátsa̱ñu̱ú xa̱bo̱, ra̱ʼkháa xa̱bo̱ numbaa.

• “Numuu rí nda̱yo̱o̱ mújúnʼ ndíne gáne̱ ga̱jma̱á numalaʼ —iʼthán Ana̱ʼlóʼ Mikhuíí Jeobá—. Nando̱ʼ rí tsímáá gájuwalaʼ, ra̱ʼkhá rí ma̱juwalaʼ awúun gamiéjon. Phú naʼne a̱kui̱nʼ ma̱ne̱ rí ma̱ʼkha̱ mbiʼi rí máján inalaʼ , xúʼkhue̱n máʼ rí ma̱ri̱gá mbá rí máján gíʼthu̱u̱n a̱kia̱nʼlaʼ inuʼ” (Jeremías 29:11).

Xáne gágu̱ma mbánuu ajngáa ríge̱ʼ rá. Ajngóo Ana̱ʼlóʼ naʼthán: “Ana̱ʼlóʼ, tsí naʼne rí ma̱juwalóʼ tsímáá, inu máʼ masngutiga̱a̱ Satanás” (Romanos 16:20). Ana̱ʼlóʼ ma̱ʼne rí mbáa xa̱bo̱ ñajon tsí xtáa mikhuíí ma̱ʼne rí xa̱bo̱ ná numbaa majuwá tsímáá. Ajngóo Ana̱ʼlóʼ naʼthán rí xa̱bo̱ ñajon tsíge̱ʼ mbiʼyuu “Xa̱bo̱ Ñajon tsí niʼgíi Ana̱ʼlóʼ”, jamí Jesukrísto̱ ñajuun xa̱bo̱ ñajon tsúʼkhue̱n (Lucas 4:43). Ído̱ Jesús gáʼthán ñájon numbaa, xa̱bo̱ majuwá tsímáá (Isaías 9:6, 7).

• Xí nandaaʼ ma̱ma̱ñaaʼ i̱wa̱á xóó, araxnuu ná naʼthán “Dí gáʼne Xa̱bo̱ Ñajon tsí niʼgíi Ana̱ʼlóʼ rá.”