Mba’iin xa̱bo̱ nánguá i̱ni̱mbúún juñúú xa̱bo̱ ñajon | Dí iʼthán Ajngóo Ana̱ʼlóʼ rá.

Ná xúgíí numbaa tsigu 2024 xa̱bo̱ mu̱ra̱ʼwíin xa̱bo̱ ñajon nuxi̱i̱n. Maske máʼ xkuaʼnii, mbaʼiin xa̱bo̱ nánguá i̱ni̱mbúún juñúú xa̱bo̱ ñajon xuajñúu̱.

• Ná xuajen Estados Unidos mbaʼiin xa̱bo̱ nithan rí xa̱bo̱ ñajon tsíxná gamiéjúu̱n mu̱mba̱ñúu̱ xa̱bo̱, “rí i̱ndo̱ó ga̱jma̱á numúú ikhii̱n naxná gamiéjúu̱n” (Xa̱bo̱ tsí nuthúún centro de investigación Pew Research Center, mbiʼi 19 i̱ka̱ ñajun go̱nʼ septiembre tsigu 2023). a

Xúʼkhue̱n máʼ jiáma jamí i̱jín go̱ʼo̱ mangiin, nánguá i̱ni̱mbúu̱n juñúú xa̱bo̱ ñajon ni máʼ nánguá khiamúu̱ rí mi̱tambáñúu gúne̱ xa̱bo̱ ñajon.

• “Na̱ka̱ raʼne mbaʼiin jiáma jamí i̱jín go̱ʼo̱ tsí nandúún gúne̱ mbáníí gaʼkho̱ rí ríga̱ xúge̱ʼ, nuthee̱n rí xa̱bo̱ ñajon tsí júwa̱ʼ xúge̱ʼ tsíjmii̱ gúne̱ mbáníí gaʼkho̱ rí ríga̱” (I̱ye̱e̱ʼ rí mbiʼyuu The New York Times, mbiʼi 29 i̱ka̱ ñajun go̱nʼ enero tsigu 2024).

• “Jiáma jamí i̱jín go̱ʼo̱ phú i̱wa̱á na̱ni̱mbúún juñúú xa̱bo̱ tsí nakujmii ná internet nuni̱i̱ video xó rí xa̱bo̱ ñajon” (Iye̱e̱ʼ rí mbiʼyuu The Korea Times, mbiʼi 22 i̱ka ñajun go̱nʼ enero tsigu 2024).

Á ma̱ga̱nú mbá mbiʼi ma̱jmii xa̱bo̱ ñajon gúne̱ mbáníí gaʼkho̱ rí naʼne ngíníi xa̱bo̱ xúge̱ʼ rá. Á xtáa mbáa xa̱bo̱ ede̱ tsí ma̱goo ma̱ni̱mbalóʼ juʼyáalóʼ rá.

Gu̱ʼyáá májáánlóʼ tsáa xa̱bo̱ na̱ni̱mbalóʼ juʼyáálóʼ

Phú gíʼdoo numuu mbuʼyáá májanlóʼ tsáa xa̱bo̱ na̱ni̱mba̱lóʼ juʼyáálóʼ. Ajngáa Rawuun Ana̱ʼlóʼ naʼthán rí “xa̱bo̱ tsí jógoo inuu na̱ni̱mboo̱ xúgíí rí waʼtháa̱n ene̱ iʼwíin, xómáʼ xa̱bo̱ tsí gia̱wa̱n iʼnii̱ xúgíí, nandxaʼwá mine̱ʼ mújúu̱n rí ma̱ʼnii̱” (Proverbios 14:15).

• Xí nandaaʼ ma̱ma̱ñaaʼ xáne gátha̱ne̱ ma̱thi̱yáá xí gakon rí naʼtháanʼ mbáa xa̱bo̱, araxnuu ná naʼthán “Xáne gátha̱ne̱ ma̱xágu̱ma nduwáán”.

Maske máʼ júwa̱ʼ xa̱bo̱ ñajon tsí májáan a̱kuíi̱n gakon nandúún mu̱mba̱ñúú xa̱bo̱, tsíʼngúu̱n gúne̱ mbáníi káxe̱ rí nu̱xu̱ʼdá mijnée̱ muni̱i̱. Ikhaa jngó Ajngó Ana̱ʼlóʼ naʼthán:

• “Ma̱xáni̱mbaaʼ xtañúú xa̱bo̱ tsí gíʼdoo numúú, ni máʼ xa̱bo̱ numbaa ma̱xáni̱mbaaʼ xtayáa̱, numuu rí ma̱xájmaa̱ gáʼne̱ jríña̱á” (Salmo 146:3).

Mbáa xa̱bo̱ ede̱ tsí ma̱goo ma̱ni̱mbaaʼ xtayáá

Ajngóo Ana̱ʼlóʼ naʼthán rí Ana̱ʼlóʼ niʼgíi̱ Jesucristo mbayá idxu̱ún xa̱bo̱, ndawa̱a̱ i̱mba̱a̱ xa̱bo̱ ede̱ tsí ma̱goo ma̱ni̱mbaaʼ xtayáá xó rí Jesucristo (Lucas 1:32, 33). Jesús ñajuun Xa̱bo̱ Ñajon tsí niʼgíi̱ Ana̱ʼlóʼ, xúge̱ʼ xtáa̱ náʼthán ñájuii̱n asndo ná mikhuíí (Mateo 6:10).

• Athiyáá náá numuu jngó ma̱goo ma̱ni̱mbaaʼ xtayáá Jesús jamí mangaa dí gáʼnii̱ ma̱ʼne mbánuu̱ xúgíí gaʼkho̱ rí naʼne ngínáaʼlóʼ xúge̱ʼ, araxnuu ná naʼthán “Tsáa nindxu̱u̱ Rey náa Reino ndrígóo Dios rá” jamí ná naʼthán mangaa “Rí gáʼni Reino ndrígóo Dios”.