Xú káʼnii esngúún xa̱bu̱ ga̱jma̱a̱ numuu Biblia testigos de Jeobá rá.

Testigos de Jeobá nduyáʼ xóo mumbañún xa̱bu̱ mu majmañún ga̱jma̱a̱ numuu rí naʼthí náa Biblia. Dí majuiʼsngaaʼ ga̱jma̱a̱ numuu Biblia ma̱ndoo mambáyaaʼ:

Maraxtaa gagi.
Mambajxáaʼ ga̱jma̱a̱ʼ Dios.
Majmañaaʼ ndiéjunʼ eʼthí náa Biblia dí marigá nda̱wa̱á.

Náa ináa rígi̱, muriʼña̱a̱ grajxe̱ rígi̱:

Xú káʼnii nindxu̱u̱ rí miʼsngáa ga̱jma̱a̱ numuu Biblia rá.

Bi̱ naʼsngáa mambáyaaʼ matanigajma̱a̱ temas rí kagu̱ náa Biblia. Rí matanigajma̱a̱ kiʼsngáa ndrígóo Biblia ¡Araxtaa gagi kámuu mbiʼi!, mañu mañúú gídxúʼ rajmañaaʼ ndiéjunʼ eʼsngáa Biblia ga̱jma̱a̱ ma̱ta̱ya̱a̱ xú káʼnii gándoo gámbáyaaʼ. Á mu nandaaʼ ma̱ta̱ya̱a̱ itháán, atayáá video rígi̱.

Lá ndayóoʼ ma̱ni̱ numa rí miʼsngóʼ ráʼ.

Na̱nguá. Nunixu xó má Jesús niʼthún xa̱bi̱i̱ muni̱: “Nimina̱ánʼla, ikha jngóo guxna̱ála mangáanʼ” (Mateo 10:8). Bi̱ nusngáa na̱nguá edaaʼ nimbá. Ikháán mangáán xáʼyóoʼ matani̱ numa á mu natanda̱ʼa̱ mbá Biblia o mbá libro ¡Araxtaa gagi kámuu mbiʼi!.

Nguáthá mba̱yu̱u̱ʼ ejyuuʼ mámbá rí miʼsngáaʼ rá.

Mbá kañiʼ libro kagu̱ mbá 60 kíxnuu. Ma̱ndoo matanigajma̱a̱ nguáthá má mba̱yu̱u̱ʼ eyaaʼ ikháán. Mbaʼin xa̱bu̱ nunigajma̱a̱ mbá kíxnuu mámbá xmáná ga̱jma̱a̱ eʼwíinʼ nuraʼwíí rí munigajma̱a̱ itháán.

Náá gágíʼdu̱u̱ rá.

1. Atanimajtííʼ formulario náa Internet. Majmuxu datos ndrígáaʼ i̱ndó mu mutamíjnáxu ga̱jma̱á nindxa̱a̱ʼ.
2. Xa̱bu̱ bi̱ maʼsngáaʼ ga̱jma̱a̱ numuu Biblia maʼtámíjná ga̱jma̱á nindxa̱a̱ʼ. Maʼtháanʼ ndiéjunʼ gándoo gámbáyaaʼ kiʼsngáa ndrígóo Biblia, ga̱jma̱a̱ mariʼña̱a̱ asndu ndiéjunʼ má grajxe̱ rí ikháán xtaʼdáá.
3. Ma̱ndoo maratamíjná ga̱jma̱a̱ʼ bi̱ maʼsngáaʼ náá mbiʼi gúnigajma̱a̱la. Ma̱ndoo maʼga gáʼyaaʼ mu matanigajma̱a̱ ga̱jma̱a̱ʼ o maʼtáraʼaaʼ náa teléfono, náa videollamada, o náa correo electrónico. Rí matanigajma̱a̱ ma̱ndoo mbajyúuʼ mbá hora, mu ma̱ndoo mbajyúuʼ itháan mba̱yu̱u̱ʼ o kááʼ mbáxngaa; asndu nguáthá má mba̱yu̱u̱ʼ gawapháán ikháán matanigajma̱a̱.

Lá ma̱ndoo mba̱yo̱o̱ xú kaʼnii nindxu̱u̱ rí miʼsngáaʼ ga̱jma̱a̱ numuu Biblia ráʼ.

Xúʼko̱. Mu matayaa, atanimajtííʼ formulario náa Internet. Índo̱ gáʼga gáʼyaaʼ bi̱ maʼsngáaʼ, aratháán rí nandaaʼ matanigajma̱a̱ mu ma̱ta̱ya̱a̱ á mu nanigua̱a̱ʼ o na̱nguá. Mu munigajma̱a̱ ma̱ndoo majmala folleto ¡Araxtaa gagi kámuu mbiʼi!, rí kááʼ kagu̱ ajtsú kíxnuu dí na̱ʼkha̱ náa libro.

I̱yi̱i̱ʼ rí najmulú mu muʼnigajma̱a̱: ¡Araxtaa gagi kámuu mbiʼi! Ga̱jma̱a̱ Biblia. Traducción del Nuevo Mundo.

Lá mbaʼyóoʼ mani̱ndxu̱ʼ testigo de Jeobá á mu nanigajma̱a̱ Biblia gajmíʼ ikhiin xáʼ.

Nánguá. Testigos de Jeobá nanigu̱u̱nʼ musngúún xa̱bu̱ ga̱jma̱a̱ numuu Biblia, mú tsétsudaa nimbáa mu mani̱ndxu̱u̱ testigo. Dí nuni̱ nindxu̱u̱ rí nusngáa ga̱jma̱a̱ gamajkhu dí naʼthí náa Biblia, ga̱jma̱a̱ nduyáá dí mámbáa xa̱bu̱ kaʼyoo maraʼwíí ndiéjunʼ gáʼnimbo̱o̱ (1 Pedro 3:15).

Lá ma̱ndoo majmuʼ Biblia dí gúʼdoo índo̱ gánigajma̱a̱ ráʼ.

Xúʼko̱. Ma̱ndoo majmaaʼ asndu xkáʼníí má Biblia rí ikháán xtaʼdáá. Maski má bi̱ nindxu̱xu̱ testigos de Jeobá najmuxu̱ Traducción del Nuevo Mundo —dí nindxu̱u̱ mbá Biblia rí naʼthímbájmbu ga̱jma̱a̱ ramíʼskhaa makrua̱ʼa̱a̱ʼ—, ndu̱ya̱a̱xu rí mbaʼin xa̱bu̱ nanigu̱u̱nʼ majmúún Biblia rí nagu̱ʼúún má najmún.

Lá ma̱ndoo maxtáá ga̱jmu̱ʼ imba̱a̱ índo̱ miʼsngóʼ ráʼ.

Xúʼko̱. Ma̱ndoo marathu̱u̱n makuwíin xúgíinʼ bi̱ kúwá náa guʼwáaʼ o bi̱ nambájxa̱a̱ʼ gajmiáanʼ.

Á mu ninigajma̱a̱ gajmíʼ testigos de Jeobá nákha ginii, lá ma̱ndoo matangu̱ún manigajma̱a̱ mbu̱júu̱ʼ ráʼ.

Xúʼko̱. Mbáa asndu manigua̱a̱ʼ itháan ki xóo nákha ginii numuu rí nixtiʼkhu̱u̱ xóo najuiʼsngáa ga̱jma̱a̱ numuu Biblia, mu mambáñún xa̱bu̱ rí mbiʼi xúgi̱. Kagu̱ xtiʼkhuu ga̱jma̱a̱ itháan ragákhíi makrua̱ʼa̱a̱ʼ ki xóo rí najuiʼsngáa ga̱jma̱a̱ numuu Biblia nákha ginii.

Lá rígá imbo̱o̱ʼ xóo ma̱ndoo manigajma̱a̱ Biblia, rí xáʼyóoʼ má dí mbáa maʼsngóʼ ráʼ.

Xúʼko̱. Mbaʼin xa̱bu̱ tséʼniún gakhi̱i̱ makru̱ʼu̱u̱n rí munigajma̱a̱ gajmiún mbáa, mú eʼwíinʼ ginii nandún munigajma̱a̱ i̱ndó ikhiin. Náa níʼkhóo “Ayudas para estudiar la Biblia” rígá mbaʼa wéñuuʼ i̱yi̱i̱ʼ ga̱jma̱a̱ videos rí ma̱ndoo mambáyaaʼ, dí xáxtumáán rí ma̱ta̱ya̱a̱. Rígi̱ nindxu̱u̱ tikhuʼ:

Videos sobre la Biblia. Nindxu̱u̱ náa na̱ʼkha̱ ikha dí naʼsngáa náa Biblia.
Preguntas sobre la Biblia. Nindxu̱u̱ artículos náa naxtiʼña̱a̱ mbaʼa enii grajxe̱ rí na̱ʼkha̱ náa Biblia.
Textos bíblicos explicados. Atayáá rí endoo gáʼthúu̱n tikhuu ajngáa ga̱jma̱a̱ textos ndrígóo Biblia dí najmaʼnuuʼ.