Náá numuu rí testigos de Jeobá nuniriyaʼ mixtiʼkhu rí nikháñúu Jesús ki xóo’ i̱ʼwáʼ religión rá.

Ikháanʼxu̱ bi̱ nindxu̱xu̱ testigos de Jeobá nuʼni xó má eʼthí náa Biblia dí gíʼmaa maguma mu magumari̱ya̱a̱ʼ rí nikháñúu Cristo, dí ma̱ngaa nagumbiʼyuu ganitsu wañuu Tátá (1 Corintios 11:20). Mú eʼwíinʼ xa̱bu̱ nuniri̱ya̱a̱ʼ rígi̱ xó má nakumu̱ún ikhiin o xó má naguʼwún nuni̱ raʼkháa xó má eʼthí náa Biblia.

Náá numuu dí nagumari̱ya̱a̱ʼ rá.

Ikháanʼxu̱ nuʼniri̱ya̱a̱ʼ ganitsu wañuu Tátá mu marmáʼáan a̱jkiu̱xu̱ rí niʼni Jesús ga̱jma̱a̱ numuxu ma̱ngaa mu muxnáa núma̱aʼ rí niʼni (Mateo 20:28; 1 Corintios 11:24). Rí naguma rígi̱, na̱nguá nindxu̱u̱ rí naʼni kaʼwáánʼlú ní má tséʼni jngudi̱i̱ aʼkhá ndrígulú. Náa Biblia naʼthí rí Dios i̱ndó maʼni mba̱a̱ a̱jkiu̱u̱n kaʼyoo aʼkhá ndrígulú á mu ikháanʼlu nuguaʼdáá fe náa Jesús. Tséʼni jngudi̱i̱ aʼkhá ndrígulú ga̱jma̱a̱ numuu mbá ndxa̱a̱ o mbá rí ikháanʼlu nuʼni (Romanos 3:25; 1 Juan 2:1, 2).

Mámbá nguáná gíʼmaa magumari̱ya̱a̱ʼ rá.

Jesús niʼthún xa̱bi̱i̱ dí gíʼmaa muniriya̱a̱ʼ ganitsu wañuu Tátá, mú na̱nguá niʼthún mámbá nguáná gíʼmaa muni̱ (Lucas 22:19). Tikhuun xa̱bu̱ nakumu̱ún dí gíʼmaa maguma mámbá gu̱nʼ; eʼwíinʼ xa̱bu̱ nutha dí mámbá semana, tsejtsí mbiʼi o asndu mbaʼa nuthu dí mbá mbiʼi, asndu kúwá xa̱bu̱ dí nutha dí asndu má nguáthá má nandoo mbáa ma̱ndoo maʼniri̱ya̱a̱ʼ ganitsu wañuu Tátá.a Maski ajndu mbaʼa xóo ekumu̱ún xa̱bu̱, rígá tikhu dí gíʼmaa mbuʼyáálú ginii.

Jesús niʼni ganitsu wañuu ikháá má mbiʼi dí judíos niniri̱ya̱a̱ʼ ndxa̱a̱ Pascua; ga̱jma̱a̱ nda̱wa̱á dí rúʼko̱ ikhaa nikháñún (Mateo 26:1, 2). Rígi̱ tárígá mbaʼ marigá. Numuu dí náa Escrituras naʼnimbríguiiʼ rí Jesús nixnáximinaʼ makhañúu xóo mbáa mugu̱ bi̱ najmaa náa Pascua (1 Corintios 5:7, 8). Ndxa̱a̱ Pascua nagumari̱ya̱a̱ʼ mámbá tsiguʼ (Éxodo 12:1-6; Levítico 23:5). Timbíin cristianos niniri̱ya̱a̱ʼ rí nikháñuu Jesús mámbá tsiguʼ, xúʼko̱ má nuʼnixu mangáanʼ, bi̱ nindxu̱xu̱ testigos de Jeobá nuʼni xó má na̱ʼkha̱ raʼthí náa Biblia.

Náá mbiʼi ga̱jma̱a̱ náá hora

Xóo niʼni Jesús nambáyulú mu mbuʼyáá mámbá nguáná gíʼmaa muʼni rí niʼthí, mú ma̱ngaa nambáyulú mbuʼyáá náá mbiʼi ga̱jma̱a̱ náá hora gíʼmaa muʼni, ikhaa niʼni ganitsu wañuu rí mbiʼi 14 ñajunʼ gu̱nʼ nisán tsiguʼ 33, nda̱wa̱á rí nijnguáanʼ a̱jkha̱ʼ xó má e̱ʼkha̱ náa calendario rí nijmún nákha wajyúúʼ (Mateo 26:18-20, 26). Ikháanʼxu ma̱ngaa nu̱nixu rígi̱, bi̱ nindxu̱xu̱ testigos de Jeobá nuʼniri̱ya̱a̱ʼxu ikháá má mbiʼi ga̱jma̱a̱ ikháá má hora xó má nini̱ timbíin cristianos.

Mbiʼi 14 ñajunʼ gu̱nʼ nisán tsiguʼ 33 niʼni mbá mbiʼi viernes, mú mámbá tsiguʼ ma̱ndoo mani̱ndxu̱u̱ mixtiʼkhu mbiʼi. Mu mbuyáá dí mbiʼi gáʼni 14 ñajunʼ gu̱nʼ nisán, testigos de Jeobá nuʼni xó má nini̱ xa̱bu̱ bi̱ nikúwá nákha nixtáa Jesús raʼkháa xóo nuni̱ judíos bi̱ kúwá mbiʼi xúgi̱.b

Pan ga̱jma̱a̱ vino

Náa ganitsu wañuu dí niʼni Jesús, ikhaa nijmuu pan dí ragíʼdoo levadura ga̱jma̱a̱ vino rí nipíduunʼ náa ndxa̱a̱ Pascua (Mateo 26:26-28). Ikha jngóo, mangáanʼ najmuxu̱ pan dí ragíʼdoo levadura ga̱jma̱a̱ rí nda̱a̱ dí kandawooʼ ma̱ngaa najmuxu̱ vino mú raʼkháa i̱ndó iyooʼ uva nindxu̱u̱, ni ma vino dí kandawooʼ ga̱jma̱a̱ azúcar, iya najnga̱a̱ o i̱ʼwáʼ ináa.

Tikhu religión najmún pan dí nakájxi̱i̱. Mú náa Biblia mbaʼa nuthu naʼnimbríguiiʼ levadura ga̱jma̱a̱ aʼkhá ma̱ngaa ga̱jma̱a̱ dí ra̱májánʼ (Lucas 12:1; 1 Corintios 5:6-8; Gálatas 5:7-9). Ikha jngóo pan dí ragíʼdoo levadura ga̱jma̱a̱ dí nda̱a̱ nimbá dí kandawooʼ naʼnimbríguiiʼ májánʼ xuyuuʼ Cristo dí ragíʼdoo aʼkhá (1 Pedro 2:22). I̱mba̱a̱ rí nuni̱ i̱ʼwáʼ religión nindxu̱u̱ rí najmún iyooʼ uva raʼkháa vino, nuni̱ mbá dí tséʼthí náa Biblia. Tikhuun nuni̱ i̱ndó má numuu dí ikhiin nutha dí ragíʼmaa mu̱ʼwa̱a̱n iya najnga̱a̱ maski ajndu na̱nguá eʼthí xúʼko̱ náa Biblia (1 Timoteo 5:23).

Na̱nguá nindxu̱u̱ xuyuuʼ ní má eʼdiuu Jesús

Pan dí ragíʼdoo levadura ga̱jma̱a̱ vino rí najmaa náa Conmemoración nandoo gáʼthúu̱n xuyuuʼ ga̱jma̱a̱ eʼdiuu Jesús. Tsérígá mbá milagro dí majngutajxi̱i̱ xuyuuʼ ga̱jma̱a̱ eʼdiuu Jesús, xóo ekumu̱ún mbaʼin. Guʼyáá náá numuu dí nuʼtálú dí tsérígá rígi̱.

• Jesús táʼthún xa̱bi̱i̱ dí mu̱wa̱a̱n eʼdiuu, ikhaa naninuuʼ májánʼ xtángoo ndrígóo Dios numuu rí ikhí naʼthí dí eʼdi nindxu̱u̱ mitsúʼkháan (Génesis 9:4; Hechos 15:28, 29). Xó má eʼyáá Jesús niʼthún má xúʼko̱ xa̱bi̱i̱ rí munimbu̱u̱n má xúʼko̱ xtángoo ndrígóo Dios (Juan 8:28, 29).

• Apóstoles ndrígóo Jesús túwa̱a̱n eʼdiuu numuu rí mbruʼun má rúʼko̱ ikhaa niʼthí dí eʼdiuu magadíí, rí ikhaa maxnáximinaʼ (Mateo 26:28).

• Jesús nixnáximinaʼ “mbóó miʼtsú asndu kámuu” (Hebreos 9:25, 26). Á mu pan ga̱jma̱a̱ vino rí najmaa náa ganitsu wañuu Tatá najngutaxi xuyuuʼ ga̱jma̱a̱ eʼdiuu, mbá xúgíinʼ bi̱ nuphu pan ga̱jma̱a̱ nu̱wa̱a̱n vino mani̱ndxu̱u̱ xóo natangiín nuxnajxi̱i̱ Jesús xóo tsigijñaʼ o dí nuxidíí eʼdiuu.

• Jesús niʼthí: “Gu̱nila má xúʼko̱ rígi̱ mu marmáʼáan a̱jkia̱la kuyo̱ʼ”, na̱nguá niʼthí: “Gu̱nila má xúʼko̱ rígi̱ mu muxnajxí xuyuuʼ ga̱jma̱a̱ eʼdiuu mbu̱júu̱” (1 Corintios 11:24).

Tikhuun xa̱bu̱ naku̱mu̱ún dí pan ga̱jma̱a̱ vino najgutajxi̱i̱ xuyuuʼ ga̱jma̱a̱ eʼdiuu Jesús, ikhiin nakumu̱ún xígi̱ kaʼnii numuu rí náa tikhu texto ndrígóo Biblia na̱ʼkha̱ raʼthí xígi̱ kaʼnii. Mbaʼa Biblia náa Mateo 26:28 naʼthí: “Rígi̱ nindxu̱u̱ eʼdiuʼ”. Mú ajngáa rígi̱ ma̱ngaa najuiʼtájuíi: “Rígi̱ nandoo gáʼthúu̱n eʼdiuʼ”.c Jesús gi̱i̱ najmuu mbá xkri̱da xó má naguʼwuun naʼni índo̱ naʼsngáa (Mateo 13:34, 35).

Tsíín naʼphu̱ pan ga̱jma̱a̱ naʼwa̱a̱n vino rá.

Índo̱ testigos de Jeobá nuniri̱ya̱a̱ʼ ganitsu wañuu Tátá, káaʼ tikhuiin naʼphu̱ pan ga̱jma̱a̱ naʼwa̱a̱n vino. Gúʼyáálú náá numuu.

Eʼdi dí nixídíramuuʼ Jesús nigíʼ nuxi̱ʼ rí nimbánuu dí niriʼkuriyaaʼ dí Jeobá nimbánuu ga̱jma̱a̱ xuajen Israel nákhá wajyúuʼ (Hebreos 8:10-13). Índo̱ narígá Conmemoración i̱ndó ma̱ndoo muphu pan ga̱jma̱a̱ muwa̱a̱n vino bi̱ nijuiʼtsiwíin, xándoo muphu cristianos bi̱ na̱nguá niraʼwíin Dios (Hebreos 9:15; Lucas 22:20). Cristianos bi̱ nijuiʼtsiwíin mutañajunʼ náa mekhuíí gajmiún Cristo. Náa Biblia naʼthí dí i̱ndó 144,000 xa̱bu̱ nikhánún ñajunʼ kiejunʼ rígi̱ (Lucas 22:28-30; Apocalipsis 5:9, 10; 14:1, 3).

Bi̱ mutañajunʼ gajmiún Cristo nagumbiʼñún “mugu̱ bi̱ rambáʼiin” mú mbaʼin xa̱bu̱ naguáʼthi̱i̱n makuwá náa tsu̱du̱u̱ Ku̱ba̱ʼ kámuu mbiʼi (Lucas 12:32; Apocalipsis 7:9, 10). Bi̱ naguáʼthi̱i̱n makuwá náa tsu̱du̱u̱ Ku̱ba̱ʼ, tséʼphu pan ga̱jma̱a̱ tséʼwa̱a̱n vino índo̱ nagumariya̱a̱ʼ ganitsu wañuu Tátá. I̱ndó má nakúwá náa narígá mu muxnáa núma̱aʼ ga̱jma̱a̱ numuu dí Jesús nixnáximinaʼ makhañún ga̱jma̱a̱ numulú (1 Juan 2:2).