Ezequiel

22 Nigruígú mbu̱júu̱ ajngóo Jeobá. Niʼthúnʼ: 2 “Ikháán a̱ʼdióo xa̱biya̱, xtaa xawii marata̱ dí magíʼnuu* xuajin rígi̱ dí gíʼdoo aʼkhúun rí naxídíí eʼdi ga̱jma̱a̱ matani̱ mbaʼyoo xúgíʼ dí tsaga rí niʼni ráʼ. 3 Gíʼmaa marata̱: ‹Rígi̱ dí naʼthí Tátá Jeobá bi̱ itháán mba̱a̱: “Ikháán xuajin dí naxídíí eʼdi náa awúu̱n xuajin, bi̱ nartumuu mbiʼyuu, bi̱ naʼnii xándú tsagiin mu maʼni gachíminaʼ, 4 eʼdi rí nitaxídíí niʼni dí maraʼdáá aʼkháanʼ ga̱jma̱a̱ xándú tsagiin bi̱ xtaʼdiin nini̱ rí maʼni mitsagán. Nitani̱ rí martumuu mbiʼyaaʼ, nitumuu má mbiʼyaaʼ. Ikha jngóo ma̱ni̱ dí mani̱ndxa̱a̱ʼ mbá rí mutha wéñííʼ xa̱bu̱ xuajin ga̱jma̱a̱ mbá rí mutsijmaa xa̱bu̱ bi̱ kúwá náa xúgíʼ xuajin. 5 Bi̱ kúwá mijngii ga̱jma̱a̱ bi̱ kúwá mitsínguánʼ mutsijmán, xuajin dí nichúu mbiʼyuu, xuajin náa tsiánguáá dí rígá. 6 Atayáá, mbá xúgíinʼ bi̱ kuya̱ edxu̱u̱ náa Israel bi̱ kúwá náa ikháán, najmún ñajunʼ dí kajkuáa ñawúúnʼ mu muxidíí eʼdi. 7 Náa majña̱a̱ʼ, e̱ji̱n tséyamajkhún anu̱ún ga̱jma̱a̱ ru̱du̱ún.* Naguma nduwiinʼ xa̱bu̱ bi̱ naguwaáʼ ga̱jma̱a̱ naguma ngíníi e̱jín wáʼa ga̱jma̱a̱ gu̱ʼú xuáʼa”›”.

8 “‹Ikháán tsétayamajkuíí náa rí mikaʼwu ga̱jma̱a̱ natani̱ tsagáá sábado ndrígóʼ. 9 Náa majña̱a̱ʼ kúwá bi̱ nuninduwaʼ mu muxidíí eʼdi. Náa majña̱a̱ʼ kúwá xa̱bu̱ bi̱ naʼphu̱ tsigijñaʼ náa inuu kúbá. Ga̱jma̱a̱ náa majña̱a̱ʼ nuni̱ rí tsaga xa̱bu̱. 10 Náa majña̱a̱ʼ nutsijmaa xiawuu anu̱ún* ga̱jma̱a̱ nutsijmaa a̱ʼgu̱ bi̱ tsagaa bi̱ nagajtaa eʼdiuu. 11 Náa majña̱a̱ʼ mbáa xa̱bu̱ naʼni dí xkawiʼ ga̱jma̱a̱ a̱ʼgiu̱u̱ xa̱bu̱ numbaaʼ ga̱jma̱a̱, i̱mba̱a̱ natsíjmaa* guʼgiúunʼ índo̱ naʼni rí tsaga, ga̱jma̱a̱ i̱mba̱a̱ natsíjmaa wáxióo* anu̱u̱. 12 Náa majña̱a̱ʼ nundrigú regalo mu muxidíí eʼdi. Ikháán naraxnátíʼña mu matru̱ma̱a̱ inuu o mu maraʼdáá itháan, ga̱jma̱a̱ natani̱ kuʼwááʼ xa̱bu̱ numbaaʼ ga̱jma̱a̱ʼ mu maraʼdáá mbújkha̱a̱. Xúʼko̱, nimbumaaʼ xtayoʼ mbá kayuuʼ›, eʼthí Tátá Jeobá bi̱ itháán mba̱a̱.

13 ‹Atayáá, na̱xnu̱u̱ ñawúnʼ xóo tsinaʼ rí nawi̱yu̱ʼ eʼni rí natani̱ dí ra̱májánʼ mu makánáaʼ dí maraʼdáá, ma̱ngaa ga̱jma̱a̱ numuu rí nigadíí eʼdi náa majña̱a̱ʼ. 14 Lá xákawabáánʼ* ga̱jma̱a̱ maʼni gújkhúʼ má xúʼko̱ ñawáanʼ mbiʼi dí ikhúún ma̱ni̱ matamíniiʼ ráʼ. Ikhúún Jeobá, ni̱tha̱ ga̱jma̱a̱ manimbánuu. 15 Maxidíraʼáán náa ma̱jñu̱u̱nʼ xuajin ga̱jma̱a̱ maxidíraʼáán náa xuajin dí rígá mitsínguánʼ, ma̱ni̱ gámbáa dí tsagáán. 16 Magajnúu gamajkuaaʼ náa inún xa̱bu̱ xuajin, ga̱jma̱a̱ mi̱dxu̱ʼnú ma̱ta̱ya̱a̱ dí ikhúún nindxu̱ʼ Jeobá›”.

17 Nigruígú mbu̱júu̱ ajngóo Jeobá. Niʼthúnʼ: 18 “A̱ʼdióo xa̱biya̱, goʼwóo Israel ni̱jkha̱nú ninindxu̱u̱ náa ikhúún xóo náskha rí tséjmaa. Xúgíinʼ ikhiin nindxu̱ún xóo cobre, estaño, hierro ga̱jma̱a̱ plomo dí kajti awúu̱n horno. Niguánú ninindxu̱ún náskoo plata.

19 Ikha jngóo rígi̱ dí naʼthí Tátá Jeobá bi̱ itháán mba̱a̱: ‹Numuu dí xúgiáanʼ ni̱jkua̱nú nini̱ndxa̱la xóo náskha dí tséjmaa, magímbáanʼla náa awúu̱n Jerusalén. 20 Xó má plata, cobre, hierro, plomo ga̱jma̱a̱ estaño najti mbóó náa awúu̱n horno mu majuiyaʼ índo̱ nakha ga̱jma̱a̱ aguʼ, xúʼko̱ gágímbáanʼla índo̱ gákásnga̱ñu̱ʼ ga̱jma̱a̱ gákiʼnún, mandiyuuʼ náa ikháanʼla aguʼ mu markuiñáanʼla. 21 Magímbáanʼla ga̱jma̱a̱ mandiyuuʼ aguʼ rí nakásngañu̱ʼ náa ikháanʼla ga̱jma̱a̱ majuiñáanʼla náa awúu̱n. 22 Xó má plata najuiyaʼ náa awúu̱n horno, xúʼko̱ gájuiñáanʼla mangáanʼ náa awúu̱n xuajin, ga̱jma̱a̱ muʼgua̱nú mbu̱ya̱a̱ dí ikhúún Jeobá, nixidírámuuʼ dí nakásnga̱ñu̱ʼ náa ikháanʼla›”.

23 Ga̱jma̱a̱ nigruígú mbu̱júu̱ ajngóo Jeobá. Niʼthúnʼ: 24 “A̱ʼdióo xa̱biya̱, aratháán: ‹Nindxa̱a̱ʼ mbá ku̱ba̱ʼ dí xáguma kaʼwii, náa xáxnúu ruʼwa, mbiʼi dí gákiʼnún. 25 Profeta ndrígu̱ún niriya̱ʼ awan dí muni̱ náa xuajin, xóo mbáa león bi̱ nandxaʼwá, bi̱ nurujturi̱ga̱a̱ xujkhúʼ bi̱ naguguaa. Ikhiin naʼphu̱u̱n xa̱bu̱ ga̱jma̱a̱ nuda̱a̱ xúgíʼ dí gíʼdoo numuu. Náa awúu̱n xuajin nini̱ rí mbaʼin gu̱ʼu̱ maguanún gu̱ʼú xuáʼa. 26 Ndxajkiún ninújngurámúúnʼ xtángoo ndrígóʼ ga̱jma̱a̱ nutsijmaa má xúʼko̱ náa dí mikaʼwu. Tséni̱ makujmaa xóo mixtiʼkhu nindxu̱u̱ dí kaʼwu ga̱jma̱a̱ dí na̱nguá kaʼwu, ni má tsésngáa xóo mixtiʼkhu nindxu̱u̱ dí kaʼwu ga̱jma̱a̱ dí tsaga, tsíñún gúyamajkuíí sábado ndrígóʼ ga̱jma̱a̱ nutsijmún. 27 Príncipe ndrígu̱ún bi̱ kúwá ikhí nindxu̱ún xóo lobos* bi̱ nurujturi̱ga̱a̱ xujkhúʼ bi̱ nurugua̱a̱, nuxidíí eʼdi ga̱jma̱a̱ nuradíin xa̱bu̱ mu xúʼko̱ mbuya̱ʼ rí maguáʼdáá. 28 Mú profeta ndrígu̱ún niruguáá dí nini̱ ga̱jma̱a̱ idiʼ. Nduyáá rí nawasngájmún* rí minduwaʼ ga̱jma̱a̱ nuni̱ xawan rí minduwaʼ, ga̱jma̱a̱ nuthi “Rígi̱ dí naʼthí Tátá Jeobá bi̱ itháán mba̱a̱”, índo̱ Jeobá nda̱a̱ rí niʼthí. 29 Xa̱bu̱ xuajin nininduwaʼ ga̱jma̱a̱ nini̱ kuʼwáʼ, nini̱ ngínáa bi̱ ndayóoʼ ga̱jma̱a̱ bi̱ ngínáa, nininduwaaʼ xa̱bu̱ bi̱ na̱ʼkha̱á ga̱jma̱a̱ táʼndún gúni̱i̱ dí májánʼ›.

30 ‹Nixtáá raʼyáaʼ mbáa xa̱bu̱ náa ma̱jñu̱únʼ bi̱ maʼni májáanʼ xtájtsí dí niguma ga̱jma̱a̱ itsí o mu mawiji̱ inuʼ náa nixkudiriya̱ʼ xtájtsí mu maʼtámbáyúu ku̱ba̱ʼ mu xúʼko̱ xáguma gámbáa. Mú táxkamaa nimbáa. 31 Ikha jngóo maxidírámuuʼ náa ikhiin ga̱jma̱a̱ ma̱ni̱ gámbíin ga̱jma̱a̱ aguʼ dí nakásnga̱ñu̱ʼ. Ma̱ni̱ rí mumíniiʼ ga̱jma̱a̱ numuu xúgíʼ rí nini̱›, eʼthí Tátá Jeobá bi̱ itháán mba̱a̱”.