Ezequiel
25 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, atanga̱án matiejxu̱u̱n ammonitas ga̱jma̱a̱ aratáríya̱ʼ dí maguáʼníí. 3 Arathún ammonitas: ‹Gudxawíín ajngóo Tátá Jeobá bi̱ itháán mba̱a̱. Rígi̱ dí naʼthí Tátá Jeobá bi̱ itháán mba̱a̱: “Índo̱ goʼwóʼ niguma gachíí, índo̱ ku̱ba̱ʼ Israel niguanáa ga̱jma̱a̱ índo̱ goʼwóo Judá ni̱jkha̱ kiʼyá, ikháán* nitatsíjma ‹¡Májánʼ má!›. 4 Ikha jngóo maxnajxíín náa xa̱bu̱ bi̱ naguwáʼ xígií náa nagájnuu a̱jkha̱ʼ.* Ikhiin magi̱wi̱i̱nʼ* náa ikháán ga̱jma̱a̱ ikhí gúndriga̱ guʼwá xtíin. Mu̱phu̱ xndú rí najma̱a̱ náa ikháán ga̱jma̱a̱ muwa̱a̱n yaʼdú. 5 Ga̱jma̱a̱ ma̱ni̱ dí Rabá mani̱ndxu̱u̱ mbá mbaaʼ náa rígá ra̱jxa̱ mu̱phu̱ camello ga̱jma̱a̱ ku̱bu̱únʼ ammonitas náa muda̱a̱ jxu̱ún mugu̱ ga̱jma̱a̱ ikháanʼla muʼgua̱nú mbu̱ya̱a̱ dí ikhúún nindxu̱ʼ Jeobá”›”.
6 “Numuu dí rígi̱ dí naʼthí Tátá Jeobá bi̱ itháán mba̱a̱: ‹Niraxnáá ñawáanʼ ga̱jma̱a̱ nitajngupriga̱ mbayííʼ, ra̱ʼkhá tháán nidxaanʼ ga̱jma̱a̱ nitatsíjma índo̱ nitayáá dí nimínuuʼ ku̱ba̱ʼ ndrígóo Israel. 7 Ikha jngóo makruíya̱ʼ ñawúnʼ mu ma̱ni̱ rí matamíniiʼ ga̱jma̱a̱ maxnajxíín náa xa̱bu̱ xuajin xóo dí naguanáa náa nuxmijná. Ma̱ni̱ gámbáanʼ náa majñu̱únʼ xa̱bu̱ xuajin ga̱jma̱a̱ ma̱ni̱ rí mandáti̱ga̱a̱n náa xuajin. Maxíña̱a̱n ga̱jma̱a̱ ikháán mi̱dxu̱ʼnú ma̱ta̱ya̱a̱ dí ikhúún nindxu̱ʼ Jeobá›.
8 Rígi̱ dí naʼthí Tátá Jeobá bi̱ itháán mba̱a̱: ‹Numuu rí Moab ga̱jma̱a̱ Seír nithi “¡Atayáá! Goʼwóo Judá nindxu̱u̱ ikháá má xóo xúgíʼ xuajin”, 9 maniʼñúuʼ dí xuajin dí rígá náa ndawaa Moab maguma gámbáa, ku̱bo̱o̱ʼ dí mitsaanʼ:* Bet-Jesimot, Baal-Meón ga̱jma̱a̱ asndu náa Quiryataim. 10 Maxnajxíi Moab gajmíi̱n ammonitas, náa xa̱bu̱ bi̱ naguwáʼ xígií náa nagájnuu a̱jkha̱ʼ, mu xúʼko̱ xuajin ní xármáʼáan a̱jkiu̱ún gúni̱ ammonitas. 11 Ga̱jma̱a̱ ma̱ni̱ rí mamínuuʼ Moab ga̱jma̱a̱ ikhiin maguánú mbuyáá dí ikhúún nindxu̱ʼ Jeobá›.
12 Rígi̱ dí naʼthí Tátá Jeobá bi̱ itháán mba̱a̱: ‹Edom nitanga̱a̱ niʼniuu goʼwóo Judá xó má ikhaa niʼniuu, índo̱ niʼni xígi̱ kaʼnii, niʼni rí magiʼdoo mba̱a̱ aʼkhúun. 13 Ikha jngóo, rígi̱ dí naʼthí Tátá Jeobá bi̱ itháán mba̱a̱: “Ikhúún mangúún makruíya̱ʼ ñawúnʼ mu ma̱ni̱ rí mamínuuʼ Edom, ma̱ni̱ gámbíin náa ikhaa xa̱bu̱ ga̱jma̱a̱ xujkhúʼ ga̱jma̱a̱ ma̱ni̱ rí mani̱ndxu̱u̱ mbá mbaaʼ rí niguanáa. Makhañún ga̱jma̱a̱ espada xa̱bu̱ bi̱ kúwá náa Temán asndu bi̱ kúwá náa Dedán. 14 ‹Majmiuʼ xuajñunʼ Israel mu maniu̱u̱ Edom xó má niʼni. Ikhiin muni̱ mbaʼyoo Edom rí nakásngañu̱ʼ ga̱jma̱a̱ rí nakiʼnún, mu mbaʼyoo dí naniu̱u̱ xó má niʼni ikhaa›, eʼthí Tátá Jeobá bi̱ itháán mba̱a̱”›.
15 Rígi̱ dí naʼthí Tátá Jeobá bi̱ itháán mba̱a̱: ‹Ga̱jma̱a̱ numuu dí guáʼdiin sia̱nʼ xa̱bu̱ Israel, filisteos nduyáʼ má xúʼko̱ xóo muniu̱u̱n xó má ikhiin niniu̱u̱n ga̱jma̱a̱ rí muni̱ gámbíin numuu rí tsíñún gúñún. 16 Ikha jngóo, rígi̱ dí naʼthí Tátá Jeobá bi̱ itháán mba̱a̱: “Makruíya̱ʼ ñawúnʼ mu ma̱ni̱ gámbíin filisteos. Ma̱ni̱ gámbíin keretitas ga̱jma̱a̱ ma̱ni̱ gámbíin mbá xúgíinʼ xa̱bu̱ bi̱ kúwá náa rawuunʼ lamáa* bi̱ xóó naguanún. 17 Majmuʼ tsiaki̱i̱ ndrígóʼ mu maniu̱u̱ xó má ikhiin nini̱, ma̱ni̱ rí mumíniiʼ ga̱jma̱a̱ rí nakásngañu̱ʼ, índo̱ gániu̱u̱n xó má ikhiin nini̱, maguánú mbuyáá dí ikhúún nindxu̱ʼ Jeobá”›”.