Ezequiel
27 Nigruígú mbu̱júu̱ ajngóo Jeobá. Niʼthúnʼ: 2 “Ikháán a̱ʼdióo xa̱biya̱, atani̱ mbá ajmúú ngíná ga̱jma̱a̱ numuu Tiro. 3 Aratháán Tiro:
‹Ikháán bi̱ xtaa náa rawuunʼ lamáa,*
bi̱ na̱ʼtsi̱ ga̱jma̱a̱ bi̱ nagujua̱ náa mbaʼa xuajin dí rígá náa isla,*
rígi̱ dí naʼthí Tátá Jeobá bi̱ itháán mba̱a̱:
“Ikháán Tiro, niratá rígi̱: ‹Ra̱ʼkhá tháán mitsiʼñún›.
4 Xuajñaanʼ rígá náa tapo̱o̱ lamáa
ga̱jma̱a̱ bi̱ nini̱i̱n, nini̱ rí maʼni itháán mitsiʼñán.
5 Nijmún ixi̱ dí rígá náa Senir mu murawíi xajpa rí mi̱du̱ mu muni̱i̱ ga̱jma̱a̱,
ma̱ngaa nijmún ixi̱ cedro dí rígá náa Líbano mu muni̱ ixi̱ dí frígu náa ikháán.
6 Nijmún ixi̱ roble dí rígá náa Basán mu muni̱ ga̱jma̱a̱ ixi̱ dí magún ku̱ña̱a̱n ga̱jma̱a̱,
ma̱ngaa inaaʼ niguma ga̱jma̱a̱ ixi̱ ciprés ga̱jma̱a̱ ikhí niniwíi xtiʼkhuu ga̱jma̱a̱ marfil* rí na̱ʼkha̱ náa isla rí mbiʼyuu Kitim.
7 Xtíin dí frájkha náa ixi̱ dí frígu náa ikháán niguma ga̱jma̱a̱ lino dí na̱ʼkha̱ náa Egipto dí gíʼdoo color gakhi̱i̱,
ma̱ngaa xtíin rí kúgoo ga̱jma̱a̱ niguma ga̱jma̱a̱ gúmá azul, ma̱ngaa mugu̱ miʼñuu dí rígá náa isla rí mbiʼyuu Elisá.
8 Xa̱bu̱ bi̱ kúwá náa Sidón ga̱jma̱a̱ náa Arvad nindxu̱ún bi̱ najmañún najmún ixi̱ dí nagún kuñu̱u̱n ga̱jma̱a̱ barco.
Ikháán Tiro, xtaʼdiin xa̱bu̱ bi̱ naguʼwún nagún náa barco.
9 Xabuanii bi̱ najmañún bi̱ kúwá náa Guebal nuruguáá náa ikháán mu xáto̱ʼo̱o̱ iyaʼ.
Xúgíʼ barco dí rígá náa lamáa ga̱jma̱a̱ bi̱ nagún ikhí, naguwáʼ náa ikháán mu mutsi rí xtaʼdáá ga̱jma̱a̱ mu ikháán maratsi̱ dí guáʼdáá ikhiin.
10 Xa̱bekha bi̱ kúwá náa Persia, náa Lud ga̱jma̱a̱ náa Put ninindxu̱ún soldádiaaʼ ga̱jma̱a̱ bi̱ nuxmijná.
Nijngrigú náa ikháán escudo ga̱jma̱a̱ casco, mu xúʼko̱ maxpíbíínʼ.
11 Xa̱bekha bi̱ kúwá náa Arvad bi̱ ninindxu̱ún soldádiaaʼ nidraʼmíin náa xtájtsí ndrígáaʼ
ga̱jma̱a̱ xa̱bekha bi̱ tsémiñún niruguáá torres ndrígáaʼ.
Nijngrigú escudo rí dijndi náa mbájndi xtájtsí ndrígáaʼ
ga̱jma̱a̱ nini̱ rí maʼni itháán mitsiʼñán.
12 Tarsis naxnáaʼ dí gíʼdoo ga̱jma̱a̱ numuu dí ra̱ʼkhá tháán xtaʼdáá. Ikhaa naxnáaʼ plata, hierro, estaño ga̱jma̱a̱ plomo mu ma̱ʼtsi̱ rí xtaʼdáá. 13 Xúʼko̱ má eʼni ma̱ngaa Javán, Tubal ga̱jma̱a̱ Mesec, nuxniaaʼ ñumbáá ma̱ngaa rí niguma ga̱jma̱a̱ cobre mu mutsi̱ rí xtaʼdáá. 14 Bi̱ kúwá náa goʼwóo Togarmá, nuxniaaʼ wáyú ga̱jma̱a̱ mula mu mutsi̱ rí xtaʼdáá. 15 Xa̱bi̱i̱ Dedán nutsi rí xtaʼdáá, ga̱jma̱a̱ ikháán xtaʼdiin xa̱bu̱ bi̱ nuñajunʼ náa mbaʼa isla, ikhiin nuxnaaʼ marfil ga̱jma̱a̱ ixi̱ skuniʼ rí itháán májánʼ xóo regalo. 16 Xa̱bu̱ bi̱ kúwá náa Edom, nutsi̱ náa ikháán ga̱jma̱a̱ numuu dí ra̱ʼkhá tháán mbaʼa dí xtaʼdáá. Ikhiin nuxnaaʼ itsí turquesa, mugu̱ rí miʼñuu, xtíin kiʼxmí dí mbaʼa color, xtíin dí májánʼ, itsí coral* ga̱jma̱a̱ rubí.
17 Xa̱bu̱ Judá ga̱jma̱a̱ israelitas nutsi̱ rí xtaʼdáá, ikhiin nuxnaaʼ trigo dí na̱ʼkha̱ náa Minit, ganitsu rí itháán májánʼ, jyááʼ, aceite ga̱jma̱a̱ bálsamo* mu mutsi rí xtaʼdáá.
18 Xa̱bu̱ bi̱ kúwá náa Damasco nutsi rí ikháán natagujua̱, numuu dí ikháán ra̱ʼkhá tháán xtaʼdáá, ikhiin nuxnaaʼ vino rí na̱ʼkha̱ náa Helbón ga̱jma̱a̱ mugu̱ rí na̱ʼkha̱ náa Sahar. 19 Xa̱bu̱ bi̱ kúwá náa Vedán ga̱jma̱a̱ náa Javán dí rígá náa mijngii Uzal, ikhiin nuxnaaʼ dí niguma ga̱jma̱a̱ hierro, ixi̱ casia* ga̱jma̱a̱ diin rí ndataun mu mutsi rí xtaʼdáá. 20 Dedán naxnáaʼ xtíin dí kiʼxmí dí najmaa náa xíliu̱ún xujkhúʼ mu ma̱ʼtsi̱ rí xtaʼdáá. 21 Nitriji̱i̱n xa̱bu̱ árabe ga̱jma̱a̱ mbá xúgíinʼ bi̱ kuya̱ edxu̱u̱ bi̱ kúwá náa Quedar, bi̱ nutsi̱i̱n ga̱jma̱a̱ nugujui̱i̱n mugu̱, mugu̱ e̱jmba̱a̱ ga̱jma̱a̱ tsujthu̱nʼ. 22 Xa̱bu̱ bi̱ nugujua̱ ga̱jma̱a̱ bi̱ nutsi bi̱ kúwá náa Saba* ga̱jma̱a̱ náa Raamá nutsi náa ikháán, nuxnaaʼ xúgíʼ enii perfumes rí itháán májánʼ, itsí rí mitsaanʼ* ma̱ngaa oro mu mutsi rí xtaʼdáá. 23 Xa̱bu̱ bi̱ kúwá náa Harán, Cané, náa Edén ga̱jma̱a̱ bi̱ nutsi ma̱ngaa nugujua̱ bi̱ kúwá náa Saba, náa Asur ga̱jma̱a̱ náa Kilmad nutsi rí xtaʼdáá. 24 Náa xuáá ndrígáaʼ ikhiin nutsi ga̱jma̱a̱ nugujua̱ xtíin dí ra̱ʼkhá tháán mitsaanʼ, xtíin azul dí kiʼxmí ga̱jma̱a̱ mbaʼa color, ma̱ngaa xtíin wabaʼ dí gíʼdoo mbaʼa color, xúgíʼ kaxtoʼóo májánʼ ga̱jma̱a̱ ñuñuu.
25 Barco dí na̱ʼkha̱ náa Tarsis, nagún kudúún dí natagujua̱ ga̱jma̱a̱ dí naratsi̱,
ikha jngóo índo̱ ikháán nadxu̱ʼ náa tapo̱o̱ lamáa asndu kajtíí ga̱jma̱a̱ mikiwu̱n* edxu̱ʼ xtaaʼ.
26 Bi̱ najmañún najmún ixi̱ dí nagún ku̱ña̱a̱n ga̱jma̱a̱, nigún ku̱ña̱a̱n náa lamáa dí naʼbajxi̱,
giñánʼ dí na̱ʼkha̱ xígií náa nagájnuu a̱jkha̱ʼ* niʼni gámbáan náa tapo̱o̱ lamáa.
27 Rí gíʼdoo numuu rí xtaʼdáá, rí natagujua̱, xa̱bia̱a̱ʼ bi̱ nuñajunʼ,
bi̱ nuruguáá náa ikháán mu xáto̱ʼo̱o̱ iyaʼ, bi̱ nutsi̱ ga̱jma̱a̱ bi̱ nugujua̱ dí xtaʼdáá,
mbá xúgíinʼ xa̱bekha bi̱ nuxmijná, xúgíinʼ bi̱ kúwá náa ikháán,
xúgíinʼ ikhiin magu̱ʼwi̱i̱n náa tapo̱o̱ lamáa mbiʼi rí gaxpátujxi̱i̱n.
28 Rí mundxa̱ʼwa̱ xa̱bia̱a̱ʼ bi̱ nagún náa ikháán, maʼni rí mamiñún xa̱bu̱ bi̱ kúwá náa rawuunʼ lamáa.
29 Xúgíinʼ bi̱ najmañún najmún ixi̱ dí nagún kuñu̱u̱n ga̱jma̱a̱ barco,
bi̱ najnguʼwún ikhí ga̱jma̱a̱ xa̱bekha bi̱ kúwá náa lamáa muniña̱a̱nʼ barco ndrígu̱ún ga̱jma̱a̱ magúun gákuwá náa ku̱ba̱ʼ.
30 Mundxa̱ʼwa̱ gakhi̱i̱ ga̱jma̱a̱ mumbiya gínún ga̱jma̱a̱ numaaʼ,
índo̱ kúwá rugri̱gu yujndaʼ náa edxu̱ún ga̱jma̱a̱ nurmbuximíjna̱ náa idiʼ.
31 Muda̱ edxu̱ún ga̱jma̱a̱ mugíʼ xtíin mi̱du̱*
mumbiya ngínún ga̱jma̱a̱ mundxaʼwaskhá.
32 Índo̱ kúwá rumbiya ngínún muni̱ mbá ajmúú rí ngíná, muni̱ nángi eʼni ga̱jma̱a̱ numaaʼ:
‹Tsáá lá i̱mba̱a̱ xóo Tiro, rí xúgi̱ wíí kua̱ʼa̱a̱n náa tapo̱o̱ lamáa.
33 Índo̱ na̱ʼkha̱nú náa lamáa dí natagujua̱ nitani̱ rí xa̱bu̱ bi̱ kúwá náa mbaʼa xuajin makuwá gagi.
Rí gíʼdoo numuu rí xtaʼdáá ga̱jma̱a̱ rí natagujua̱ niʼni rí maguáʼdáá reyes bi̱ kúwá náa tsu̱du̱u̱ ku̱ba̱ʼ.
34 Rí xúgi̱ niguma gámbáan náa lamáa, náa iyaʼ mi̱jnu̱ʼ,
xúgíʼ rí natagujua̱ ga̱jma̱a̱ xa̱bia̱a̱ʼ nigu̱ʼwi̱i̱n náa lamáa.
35 Índo̱ gúyaaʼ xa̱bu̱ bi̱ kúwá náa isla asndu maʼniún tsiánguá
ga̱jma̱a̱ reyes ndrígu̱ún mamiñún rí asndu maguíʼiin, makujmaa náa inún dí ra̱ʼkhá tháán exmiéjúúnʼ.
36 Bi̱ nugujua̱ bi̱ kúwá náa majñu̱únʼ xa̱bu̱ xuajin mujuiyú ga̱jma̱a̱ numuu rí nigíʼnaaʼ.
Mbá nacha̱ gáguma gámbáan ga̱jma̱a̱ maʼni gamíi.
Matatsiʼñáánʼ raraxtaa asndu kámuu›”›”.