Ezequiel

29 Nákha tsiguʼ gu̱wa̱ʼ, dí gu̱wa̱ʼ gu̱nʼ, dí mbiʼi 12 dí gu̱nʼ rúʼko̱, nigruígú ajngóo Jeobá. Niʼthúnʼ: 2 A̱ʼdióo xa̱biya̱ atanga̱án matiejxi̱i̱ faraón rey ndrígóo Egipto. Aratáríya̱ʼ dí magíʼnuu ikhaa ga̱jma̱a̱ mbá xúgíʼ Egipto. 3 Maratha̱a̱n ajngáa rígi̱: ‹Rígi̱ dí naʼthí Tátá Jeobá bi̱ itháán mba̱a̱:

Ni̱ni̱ mu mani̱ndxu̱u̱ ndrígóʼ›.

 4 Magruáʼa ajua̱nʼ náa itsu̱ rawaanʼ ga̱jma̱a̱ ma̱ni̱ dí e̱gi̱ʼ bi̱ kúwá náa mañu Nilo makaʼmiin náa xtáaʼ.*

Maríña̱a̱nʼ náa mañu Nilo gajmiáanʼ mbá xúgíinʼ e̱gi̱ʼ bi̱ kúwá náa mañu Nilo bi̱ makaʼmiin náa ikháán.

 5 Ikháán gajmiáanʼ mbá xúgíinʼ e̱gi̱ʼ bi̱ kúwá náa mañu Nilo, maniʼñátigáanʼla náa ku̱ba̱ʼ mijxooʼ.*

Maguanála xanáá ga̱jma̱a̱ ndawa̱a̱ tsáa gágujxa̱a̱nʼla ni má xágímbáanʼla.

Maxnu̱u̱n xujkhú xáná ga̱jma̱a̱ ñu̱ʼu̱ bi̱ jngruigu̱u̱n rijma̱a̱ mupha̱a̱ʼ.

8 Ikha jngóo, rígi̱ dí naʼthí Tátá Jeobá bi̱ itháán mba̱a̱: “Atayáá, makuʼmá mbá espada náa ikháán, magúdíin xa̱bu̱ bi̱ kúwíin náa ikháán ga̱jma̱a̱ xujkhúʼ. 9 Ku̱ba̱ʼ ndrígóo Egipto maʼga̱nú maguanáa ga̱jma̱a̱ maʼni̱i̱ tsaʼtsaʼ, ikhiin maguánú mbuyáá dí ikhúún nindxu̱ʼ Jeobá. Numuu dí ikháán má niratá: ‹Ikhúún kaʼyoʼ mañu Nilo, ikhúún ni̱ni̱›. 10 Gi̱i̱ xtáá mu maxmína̱ʼ ga̱jma̱á nindxa̱a̱ʼ ma̱ngaa mañu Nilo ndrígáaʼ, maniʼñúuʼ tsaʼtsaʼ ku̱ba̱ʼ ndrígóo Egipto ga̱jma̱a̱ mujndooʼ, xóo mbá ku̱ba̱ʼ mijxooʼ dí niguanáa, magíʼdu̱u̱ náa Migdol, náa Siene, asndu náa ndawaa ndrígóo Etiopía. 11 Nimbáa xa̱bu̱ ni má xujkhúʼ xánújngoo ikhí, nimbáa xáxtáa ikhí mbá 40 tsiguʼ. 12 Ma̱ni̱ dí ku̱ba̱ʼ ndrígóo Egipto maguanáa itháan ki xóo i̱ʼwáʼ ku̱ba̱ʼ, ga̱jma̱a̱ xuajin dí rígá ikhí maguanáa itháan ki xóo i̱ʼwáʼ xuajin náa mbá 40 tsiguʼ, ma̱ni̱ dí egipcios majuadríʼiin náa majñu̱únʼ xa̱bu̱ xuajin ga̱jma̱a̱ náa i̱ʼwáʼ xuajin”.

13 Numuu dí rígi̱ rí naʼthí Tátá Jeobá bi̱ itháán mba̱a̱: “Nda̱wa̱á dí gájngoo mbá 40 tsiguʼ matangu̱ún magímbíin egipcios bi̱ nijuadríʼiin náa majñu̱únʼ xa̱bu̱ xuajin, 14 maʼkháaʼ kagui̱i̱n egipcios bi̱ ni̱jkha̱ kiʼdiin, mu makuwá náa ku̱ba̱ʼ Patrós náa dí nigumiin, ga̱jma̱a̱ ikhí mani̱ndxu̱ún mbá xuajin dí ni xágiʼdoo numuu. 15 Egipto ni xágiʼdoo numuu náa eʼwíinʼ xa̱bu̱ ñajunʼ ga̱jma̱a̱ ni xáʼtáñajúúnʼ itháan xa̱bu̱ bi̱ kúwá náa i̱ʼwáʼ xuajin. Ma̱ni̱ dí xánindxu̱ún mbaʼin mu xáʼngu̱u̱n gútañajúúnʼ i̱ʼwáʼ xuajin. 16 Xa̱bu̱ Israel ni xákumu̱ún kuyáá itháan Egipto, ga̱jma̱a̱ numuu dí nigíʼnuu maʼni marmáʼáan a̱jkiu̱ún dí túra̱ʼwi̱i̱ májánʼ dí muni̱ índo̱ ninda̱ʼa̱a̱ Egipto dí mambáñún. Ikhiin maguánú mbuyáá dí ikhúún nindxu̱ʼ Tátá Jeobá bi̱ itháán mba̱a̱”›”.

17 Nákha tsiguʼ 27, índo̱ ndayáa gu̱nʼ, timbá mbiʼi dí gu̱nʼ rúʼko̱, nigruígú ajngóo Jeobá. Niʼthúnʼ: 18 “A̱ʼdióo xa̱biya̱, Nabucodonosor* rey ndrígóo Babilonia nikuʼmiin mbaʼin soldado mu magún gúxmijná gajmiún xa̱bu̱ Tiro. Xúgíinʼ niʼni tsaʼtsaʼ edxu̱ún ga̱jma̱a̱ asndu niʼni miʼñuu xpajphún. Ni má ikhaa ni má soldádiu̱u̱ tájuiʼni numún ga̱jma̱a̱ numuu rí nigún gúxmijná náa Tiro.

19 Ikha jngóo, rígi̱ rí naʼthí Tátá Jeobá bi̱ itháán mba̱a̱: ‹Atayáá, maxnu̱u̱ Nabucodonosor rey bi̱ xtáa náa Babilonia ku̱ba̱ʼ ndrígóo Egipto. Ikhaa maʼga̱a̱ kagu̱u̱ xúgíʼ rí gíʼdoo, maguwíi ga̱jma̱a̱ ra̱ʼkhá tháán mba̱a̱ gáʼgáa kagu̱u̱ dí gáwanáa. Rúʼko̱ gúda̱a̱ʼ soldádiu̱u̱›.

20 ‹Ma̱ni̱ numa̱a̱ índo̱ gáxnúu ku̱ba̱ʼ ndrígóo Egipto, numuu dí nixmínaʼ ga̱jma̱a̱ numuʼ, índo̱ nixmínaʼ gajmíi̱n xa̱bu̱ Tiro›, eʼthí Tátá Jeobá bi̱ itháán mba̱a̱.

21 Mbiʼi rúʼko̱ ma̱ni̱ dí maxtáa mbáa bi̱ gíʼdoo tsiaki̱i̱* náa goʼwóo Israel, ga̱jma̱a̱ ikháán maniʼñáánʼ dí marata̱ náa majñu̱únʼ ikhiin, mu xúʼko̱ ikhiin maguánú mbuyáá dí ikhúún nindxu̱ʼ Jeobá”.