Ezequiel

3 Ikhú ikhaa niʼthúnʼ: “A̱ʼdióo xa̱biya̱, atsu dí rígá náa inaaʼ.* Atsu rollo rígi̱ ga̱jma̱a̱ nda̱wa̱á ayuʼ gárathu̱u̱n bi̱ kúwá náa goʼwóo Israel”.

2 Ikha jngóo nikuaján rawunʼ ga̱jma̱a̱ ikhaa niʼni dí miʼkhu rollo. 3 Niʼthúnʼ xóó: “A̱ʼdióo xa̱biya̱, atsu rollo rígi̱ dí xtáá raxna̱a̱ʼ asndu maʼni jxa̱ʼ awáanʼ”. Ikhú nigíʼdu̱u̱ nikhu, náa rawunʼ ndi̱yo̱o̱ taun xóo jyááʼ.

4 Nda̱wa̱á niʼthúnʼ: “A̱ʼdióo xa̱biya̱, ayuʼ náa kúwíin bi̱ kúwá náa goʼwóo Israel ga̱jma̱a̱ arathún ajngóʼ. 5 Numuu rí tsékuʼmán mi̱dxu̱ʼ náa mbá xuajin rí nuthi ajngáa dí tsékrua̱ʼa̱a̱ʼ o ajngáa rí tsétatsinuuʼ, nakuʼmán mi̱dxu̱ʼ náa kúwíin bi̱ kúwá náa goʼwóo Israel. 6 Tsékuʼmán mi̱dxu̱ʼ náa mbaʼa xuajin náa nuthi ajngáa dí rakáʼnii makrua̱ʼa̱a̱ʼ ga̱jma̱a̱ náa nuthi ajngáa rí tsétatsinuuʼ o náa najmún ajngáa dí rakáʼnii makrua̱ʼa̱a̱ʼ. Á mu dí nakuʼmán mi̱dxu̱ʼ náa ikhiin itháan má mudxawaanʼ. 7 Mú bi̱ kúwá náa goʼwóo Israel xáʼndúún gúdxawaanʼ, numuu dí ikhiin tsíñún gúdxawunʼ. Xúgíinʼ bi̱ kúwá náa goʼwóo Israel tségíʼ edxu̱ún dí marathu̱u̱n ga̱jma̱a̱ gújkhúʼ a̱jkiu̱ún. 8 Natayáá ráʼ, ni̱ni̱ dí inaaʼ mani̱ndxu̱u̱ gújkhúʼ xó má inún ikhiin ga̱jma̱a̱ ni̱ni̱ dí xkídaaʼ mani̱ndxu̱u̱ gújkhúʼ xó má xkídún ikhiin. 9 Ni̱ni̱ dí xkídaaʼ mani̱ndxu̱u̱ xóo mbá diamante, itháan gújkhúʼ ki xóo mbá itsí. Xámíñáaʼ xtañún, ni má xáguáʼáánʼ gáʼni inún, numuu rí ikhiin tsénimbu̱u̱n”.

10 Ikhú ikhaa niʼthúnʼ: “A̱ʼdióo xa̱biya̱, atadxawíín ga̱jma̱a̱ atagíwánʼ náa a̱jkia̱a̱nʼ xúgíʼ ajngáa dí natha̱a̱nʼ. 11 Ayu̱u̱ʼ náa kúwá xa̱bu̱ xuajñaanʼ* bi̱ ni̱jkha̱ kiʼdiin aratamíjná gajmiáanʼ. Tséʼniuu á mu nudxawaanʼ o na̱nguá, arathún: ‹Rígi̱ dí naʼthí Tátá Jeobá bi̱ itháán mba̱a̱›”.

12 Nda̱wa̱á mbá tsiaki̱i̱ dí kaʼwu* ni̱jkha̱ kañún ga̱jma̱a̱ nidxawuun rí náa kidxuʼ gakhi̱i̱ niʼthí mbáa: “Gaguma mba̱a̱ aguʼ rí naxpíbínʼ ndrígóo Jeobá asndu náa rígá”. 13 Nidxawuun xóo ewán xpíjpiúún ángeles índo̱ nawa̱a̱, ga̱jma̱a̱ xóo nawáán llanta dí ajua̱nʼ náa majñu̱únʼ ikhiin, ra̱ʼkhá tháán gakhi̱i̱ ewán. 14 Mbá tsiaki̱i̱ dí kaʼwu nikujxu̱u̱n ga̱jma̱a̱ ni̱jkha̱ kañún. Ra̱ʼkhá tháán ekiʼnún ga̱jma̱a̱ nakásngañu̱ʼ ni̱jkhá, tsiaki̱i̱ ndrígóo Jeobá* nixnúʼ ikha náa maʼgá. 15 Ikha jngóo ni̱jkhá náa xa̱bu̱ xuajin bi̱ ni̱jkha̱ kiʼdiin bi̱ kúwá náa Tel-Abib, náa mijngii mañu Kebar, niguanúʼ gajmíʼ náa kúwá. Na̱nguá ndi̱yo̱o̱ dí ma̱ni̱ índo̱ nixtáá gajmíʼ ikhí mbá xmáná.

16 Índo̱ nijngoo mbá xmáná, nigruígú ajngóo Jeobá rígi̱:

17 “A̱ʼdióo xa̱biya̱, niʼgíinʼ mu matiejngoo náa goʼwóo Israel ga̱jma̱a̱ índo̱ gátadxawíín mbá ajngáa dí gátha̱, marathu̱u̱n ga̱jma̱a̱ numuʼ. 18 Á mu mbáa xa̱bu̱ ra̱májáanʼ na̱thu̱u̱n ‹Ikháán makhañáaʼ› mú, á mu ikháán tsératamáʼáán ni má tsératháán xa̱bu̱ ra̱májáanʼ dí maniñuuʼ raʼni dí ra̱májánʼ mu maxtáa má xúʼko̱, ga̱jma̱a̱ numuu dí nindxu̱u̱ xa̱bu̱ ra̱májáanʼ ikhaa makhañúu ga̱jma̱a̱ numuu aʼkhúun, mú eʼdiuu marumáá ikháán.* 19 Mú á mu ikháán naratamáʼáán xa̱bu̱ ra̱májáanʼ ga̱jma̱a̱ ikhaa tséniñuuʼ raʼni dí ra̱májánʼ, ikhaa makhañúu ga̱jma̱a̱ numuu aʼkhúun, mú ikháán makríña̱a̱nʼ. 20 Mú, á mu mbáa xa̱bu̱ májáanʼ naniñuuʼ raʼni dí májánʼ ga̱jma̱a̱ naʼni dí ra̱májánʼ, maʼgíʼ mbá dí maʼni majngrádaaʼ ga̱jma̱a̱ makhañúu. Á mu dí na̱nguá niratamáʼáán, ikhaa makhañúu ga̱jma̱a̱ numuu aʼkhúun ga̱jma̱a̱ dí májánʼ rí naʼni nimbáa xármáʼáan a̱jkiu̱u̱n, mú eʼdiuu marumáá ikháán. 21 Mú, á mu niratamáʼáán xa̱bu̱ bi̱ naʼni dí májánʼ rí xáʼni aʼkhá ga̱jma̱a̱ ikhaa tséʼni aʼkhá, ikhaa maxtáa má xúʼko̱ numuu rí nijuiʼtamáʼáán, ga̱jma̱a̱ ikháán niʼnga̱a̱ʼ nitani̱ kríyaminaʼ”.

22 Náa mbaaʼ rúʼko̱, tsiaki̱i̱ ndrígóo Jeobá nirígá náa ikhúún, ga̱jma̱a̱ ikhaa niʼthúnʼ: “Atujxa̱a̱ʼ ga̱jma̱a̱ ayuʼ náa xkua̱, ikhí gúʼtámíjnálú”. 23 Ikha jngóo nitu̱jxu̱ʼ ga̱jma̱a̱ ni̱jkhá náa xkua̱. Ikhí rígá aguʼ rí naxpíbínʼ ndrígóo Jeobá, nindxu̱u̱ ikháá má xóo aguʼ rí ikhúún ndi̱yo̱o̱ náa mijngii rawuunʼ mañu Kebar. Ga̱jma̱a̱ nismbatígo̱ʼ mbayííʼ. 24 Ikhú tsiaki̱i̱ ndrígóo Dios nirígá náa ikhúún ga̱jma̱a̱ niʼni rí magújun, ikhú ikhaa* niʼtámíjná ga̱jma̱á nindxu̱ʼ, ga̱jma̱a̱ niʼthúnʼ:

“Ayu̱u̱ʼ, atruguaraʼaminaʼ náa guʼwáaʼ. 25 Ikháán a̱ʼdióo xa̱biya̱, ma̱ta̱ya̱a̱ rí muta̱ma̱ʼ ñuñuu náa tsu̱da̱a̱ʼ, rúʼko̱ gúruʼwa̱a̱ʼ ga̱jma̱a̱ mu xúʼko̱ xágajnáaʼ ga̱jma̱a̱ maraxtaa náa majñu̱únʼ. 26 Ma̱ni̱ dí makáʼma rajua̱a̱nʼ náa xákhaaʼ ga̱jma̱a̱ maguanáaʼ chíjmáa, xándoo gátaxprígún numuu rí ikhiin tsénimbu̱u̱n. 27 Mú, índo̱ ikhúún gátha̱a̱n, mambáʼtoo rawaanʼ ga̱jma̱a̱ ikháán marathu̱u̱n: ‹Rígi̱ dí naʼthí Tátá Jeobá bi̱ itháán mba̱a̱›. Bi̱ maʼndoo maʼdxawuun, gaʼdxawun, mú bi̱ xáʼndoo maʼdxawuun xáʼdxawun má, numuu rí ikhiin tsénimbu̱u̱n.